ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 սեպտեմբերի 2007 թվականի N 1081-Ն

ԲՈՒՍԱՍԱՆԻՏԱՐԻԱՅԻ ՊԵՏԱԿԱՆ ՏԵՍՈՒՉԻ ՀԱՄԱԶԳԵՍՏԸ ԿՐԵԼՈՒ ԿԱՐԳԸ ԵՎ ՁԵՎԸ ՍԱՀՄԱՆԵԼՈՒ ՄԱՍԻՆ
(վերնագիրը փոփ. 03.06.10 N 684-Ն)

«Բուսասանիտարիայի մասին» Հայաստանի Հանրապետության օրենքի 4-րդ հոդվածի 7-րդ կետի դրույթներին համապատասխան` Հայաստանի Հանրապետության կառավարությունը որոշում է.

(նախաբանը փոփ. 03.06.10 N 684-Ն)

1. Սահմանել`

1) բուսասանիտարիայի պետական տեսուչի համազգեստը կրելու կարգը` համաձայն N 1 հավելվածի.

2) բուսասանիտարիայի պետական տեսուչի համազգեստի ձևը՝ համաձայն N 2 հավելվածի։

(1-ին կետը փոփ. 03.06.10 N 684-Ն)

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ս. Սարգսյան
2007 թ. սեպտեմբերի 24 Երևան

Հավելված N 1 ՀՀ կառավարության 2007 թվականի սեպտեմբերի 13-ի N 1081-Ն որոշման

Կ Ա Ր Գ

ԲՈՒՍԱՍԱՆԻՏԱՐԻԱՅԻ ՊԵՏԱԿԱՆ ՏԵՍՈՒՉԻ ՀԱՄԱԶԳԵՍՏԸ ԿՐԵԼՈՒ
(վերնագիրը փոփ. 03.06.10 N 684-Ն)

1. Սույն կարգով սահմանվում են բուսասանիտարիայի պետական տեսուչի ամառային և ձմեռային համազգեստները կրելու կարգը և օգտագործման ժամկետները։

(1-ին կետը փոփ. 03.06.10 N 684-Ն)

2. Համազգեստը կրում են բուսասանիտարիայի բոլոր պետական տեսուչները:

(2-րդ կետը փոփ. 03.06.10 N 684-Ն)

3. Բուսասանիտարիայի պետական տեսուչները համազգեստը կրում են ամենօրյա ծառայողական պարտականությունների կատարման, ատեստավորման, ուսուցման և վերապատրաստման ժամանակ:

(3-րդ կետը փոփ. 03.06.10 N 684-Ն)

4. Բուսասանիտարիայի պետական տեսուչի` կնոջ և տղամարդու համազգեստների ձևերից յուրաքանչյուրը բաղկացած է ամառային և ձմեռային տեսակներից:

(4-րդ կետը փոփ. 03.06.10 N 684-Ն)

5. Բուսասանիտարիայի պետական տեսուչի համազգեստը պետք է համապատասխանի սույն կարգի պահանջներին և պահվի անթերի վիճակում:

(5-րդ կետը փոփ. 03.06.10 N 684-Ն)

6. Բուսասանիտարիայի պետական տեսուչի մեղքով՝ սահմանված ժամկետներից շուտ օգտագործման համար ոչ պիտանի դարձած համազգեստը փոխարինվում է նորով՝ բուսասանիտարիայի պետական տեսուչի սեփական միջոցների հաշվին:

(6-րդ կետը փոփ. 03.06.10 N 684-Ն)

7. Բուսասանիտարիայի պետական տեսուչի համազգեստի առանձին մասերը կրելու առանձնահատկություններն են՝

1) գլխարկ կրելու կարգը` ամենօրյա կիսաբրդե գլխարկը կամ ձմեռային ականջակալներով գլխարկը կրում են ուղիղ և ազատ ոճով: Թույլատրվում է ականջակալներով գլխարկի ականջակալներն իջեցնել օդի ջերմաստիճանը ցածր լինելու դեպքում.

2) վերնազգեստը կրելու կարգը`

ա. ձմեռային վերարկուն բուսասանիտարիայի տղամարդ պետական տեսուչները կրում են բոլոր կոճակները դեպի աջ կոճկված վիճակում, իսկ բուսասանիտարիայի կին պետական տեսուչները՝ բոլոր կոճակները դեպի ձախ կոճկված վիճակում,

բ. ամենօրյա ձմեռային բաճկոնը կոճկվում է ամրակներով և բոլոր կոճակներով, իսկ ամառային ամենօրյա բաճկոնը թույլատրվում է կրել չկոճկված,

գ. նշված բոլոր վերնազգեստները, ինչպես նաև տաբատը պետք է կրել մաքուր, հարդարված և արդուկված վիճակում,

դ. այդ համազգեստների գրպանների կափույրները պետք է դուրս հանված լինեն.

3) վերնաշապիկը և փողկապը կրելու կարգը`

ա. վերնաշապիկը կրում են բաճկոնի հետ: Վերնաշապիկի օձիքի հետևի մասը պետք է լինի բաճկոնի օձիքի հետ հավասար կամ 0.5 սմ-ից ոչ ավելի բարձրությամբ,

բ. թույլատրվում է վերնաշապիկը կրել առանց բաճկոնի՝ փողկապով, իսկ կարճաթև վերնաշապիկը՝ առանց փողկապի,

գ. վերնաշապիկը պետք է լինի մաքուր, արդուկված: Վերնաշապիկը կոճկվում է դեպի աջ (կին տեսուչների համար՝ դեպի ձախ),

դ. փողկապն ամրացվում է վերնաշապիկին: Այն պետք է միշտ լինի մաքուր և կոկիկ վիճակում.

4) կոշիկներ կրելու կարգը` համազգեստ կրելու դեպքում կոշիկները պետք է լինեն սահմանված նմուշի, պատշաճ և մշտապես մաքուր վիճակում, կիսաճտքավոր կոշիկների քուղերը՝ կապված:

(7-րդ կետը փոփ. 03.06.10 N 684-Ն)

8. Բուսասանիտարիայի պետական տեսուչի ձմեռային և ամառային համազգեստը կրելու ժամկետներն են՝

NN ը/կ	Համազգեստի տարրերը	Կրելու ժամկետը (տարի)	Քանակը` մեկ մարդու համար (հատ)
1	2	3	4
Բուսասանիտարիայի տղամարդ պետական տեսուչ
1.	Գլխարկ` ձմեռային	3	1
2.	Կիսավերարկու` ձմեռային	3	1
3.	Բաճկոն` ձմեռային	3	1
4.	Վերնաշապիկ` երկարաթև, ձմեռային	1	2
5.	Տաբատ` ձմեռային	3	2
6.	Կիսաճտքավոր կոշիկ` ձմեռային	1	1 զույգ
7.	Գլխարկ (կեպի)` ամառային	1	1
8.	Բաճկոն` ամառային	3	2
9.	Տաբատ` ամառային	2	2
10.	Վերնաշապիկ` կարճաթև, ամառային	1	2
11.	Կոշիկ` ամառային	1	2 զույգ
12.	Փողկապ	1	2
13.	Գոտի՝ կաշվե	1	2
Բուսասանիտարիայի կին պետական տեսուչ
14.	Գլխարկ` ձմեռային	3	1
15.	Կիսավերարկու` ձմեռային	3	1
16.	Բաճկոն` ձմեռային	3	1
17.	Կիսաշրջազգեստ` ձմեռային	3	2
18.	Տաբատ` ձմեռային	3	2
19.	Վերնաշապիկ` երկարաթև, ձմեռային	1	2
20.	Կիսաճտքավոր կոշիկ` ձմեռային	1	1 զույգ
21.	Գլխարկ` ամառային	1	1
22.	Բաճկոն` ամառային	3	2
23.	Կիսաշրջազգեստ` ամառային	3	2
24.	Տաբատ` ամառային	3	2
25.	Վերնաշապիկ` կարճաթև, ամառային	1	2
26.	Կոշիկ` ամառային	1	2 զույգ
27.	Փողկապ	1	2
28.	Գոտի` կաշվե	1	2

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ կառավարության 2007 թվականի սեպտեմբերի 13-ի N 1081-Ն որոշման

ԲՈՒՍԱՍԱՆԻՏԱՐԻԱՅԻ ՊԵՏԱԿԱՆ ՏԵՍՈՒՉԻ ՀԱՄԱԶԳԵՍՏԻ ՁԵՎԸ
(վերնագիրը փոփ. 03.06.10 N 684-Ն)

I. ԲՈՒՍԱՍԱՆԻՏԱՐԻԱՅԻ ՏՂԱՄԱՐԴ ՊԵՏԱԿԱՆ ՏԵՍՈՒՉԻ ՁՄԵՌԱՅԻՆ ՀԱՄԱԶԳԵՍՏԸ
(վերնագիրը փոփ. 03.06.10 N 684-Ն)

1. Ականջակալներով գլխարկ` մահուդից, բաղկացած է թասակից, ականջակալներից և ճակատային մասից (հովհար): Ականջակալները և հովհարը մշակված են արհեստական մորթուց` թասակը չորստապականի է (N 1 նկար):

2. Կիսավերարկու` կանաչավուն բրդյա կտորից, տաք ներդիրով, կոճկվում է կափույրով ծածկվող շղթայով: Լանջափեշերի ներքևի մասում մեծ վրադիր կափույրներով գրպաններ են, իսկ վերևի մասում` թեք ներկարված փոքր գրպաններ: Աստառը մետաքսյա է, ձախ կողմում ունի ծոցագրպան (N 1 նկար)։

3. Տաբատ` կանաչավուն բրդյա կտորից, տաք ներդիրով, ուղիղ ուրվագծով, գոտին` գոտեմակօղերով, մետաքսե աստառով, կոճկվում է կոճակով և շղթայով: Արտաքին գրպաններն ուղիղ են: Հետևամասի աջ կողմում ունի կոճակով կոճկվող կափույրով գրպան (N 1 նկար)։

4. Երկարաթև վերնաշապիկ` բաց կանաչավուն բրդյա կտորից, ծալովի օձիքով, ձախ կրծքամասում` կոճակով կոճկվող արտաքին գրպան, կոճկվում է 8 կոճակով: Թևքերը երկար են, ուղիղ թևքածալերով (N 1 նկար):

5. Բաճկոն` կանաչավուն բրդյա կտորից, միափեշ, միակողմ 4 կոճակով, հետ ծալված օձիքով: Կրծքամասի երկու կողմում տեղադրված են ներկարված շերտակարերով, իսկ փեշերի ներքևի մասում` վրադիր գրպաններ` կափույրներով: Աստառը մետաքսյա է, ձախ կողմում ունի ծոցագրպան (N 1 նկար)։

6. Ձմեռային կիսաճտքավոր կոշիկ` սև գույնի կաշվից, տաք, բնական մորթուց (ոչխարի) ներդիրով: Ներբանները` ռելիեֆային, կոճկվում է շղթայով (N 1 նկար):

II. ԲՈՒՍԱՍԱՆԻՏԱՐԻԱՅԻ ՏՂԱՄԱՐԴ ՊԵՏԱԿԱՆ ՏԵՍՈՒՉԻ ԱՄԱՌԱՅԻՆ ՀԱՄԱԶԳԵՍՏԸ
(վերնագիրը փոփ. 03.06.10 N 684-Ն)

7. Գլխարկ` բրդյա, ամենօրյա` մուգ կանաչավուն կտորից, դարչնագույն երիզով և գլխարկաբոլորքով: Բաղկացած է սև, լաքապատ գլխարկահովհարից և գլխարկաբոլորքից: Գլխարկաբոլորքը դարչնագույն է` 2 մմ լայնքով կարմիր մահուդից կարված երիզով: Գլխարկահովհարը սև է, լաքապատ (N 3 նկար)։

8. Ամառային տաբատ` կանաչ բամբակյա կտորից, ուղիղ ուրվագծով: Գոտին` գոտեմակօղերով, կոճկվում է 2 կոճակով և շղթայով: Արտաքին գրպաններն ուղիղ են: Հետևամասի աջ կողմում ունի կոճակով կոճկվող կափույրով գրպան (N 3 նկար)։

9. Կարճաթև վերնաշապիկ` կանաչ բամբակյա կտորից, ծալովի օձիքով, կրծքամասում` կոճակով կոճկվող կափույրով գրպան, կոճկվում է 8 կոճակով, թևքերը կարճ են, ուղիղ թևքածալով (N 3 նկար)։

10. Գարնանային-աշնանային բաճկոն` կանաչ բամբակյա կտորից, ուղիղ ուրվագծով, կոճկվում է 4 կոճակով: Օձիքը` ծալովի, լանջափեշերի ներքևի մասերում վրադիր կափույրներով գրպաններ են, իսկ վերևի մասում` թեք ներկարված փոքր գրպաններ: Աստառը մետաքսյա է, ձախ կողմում ունի ծոցագրպան (N 3 նկար)։

11. Ամառային կոշիկ` սև կամ մուգ դարչնագույն կաշվից, երեսամասը` ամբողջական առաջամասով (N 3 նկար)։

III. ԲՈՒՍԱՍԱՆԻՏԱՐԻԱՅԻ ԿԻՆ ՊԵՏԱԿԱՆ ՏԵՍՈՒՉԻ ՁՄԵՌԱՅԻՆ ՀԱՄԱԶԳԵՍՏԸ
(վերնագիրը փոփ. 03.06.10 N 684-Ն)

12. Ականջակալներով գլխարկ` մահուդից, բաղկացած է թասակից, ականջակալներից և ճակատային մասից (հովհար): Ականջակալները և հովհարը մշակված արհեստական մորթուց են: Թասակը չորստապականի է (N 2 նկար):

13. Ձմեռային կիսավերարկու` մուգ կանաչավուն կտորից, հանովի մորթե օձիքով, ուղիղ ուրվագծով և տաք ներդիրով: Կոճկվում է կափույրով ծածկվող շղթայով: Լանջափեշերի ներքևի մասերում մեծ, վրադիր գրպաններ են, իսկ վերևի մասում` թեք ներկարված փոքր գրպաններ: Աստառը մետաքսից է, ձախ կողմում ունի ծոցագրպան (N 2 նկար)։

14. Կիսաշրջազգեստ` կանաչավուն բրդյա կտորից, ուղիղ կտրվածքով, երկկողմանի սեղմոններով, հետևամասում կափույրով ճեղքվածքով: Աստառը մետաքսից է: Ձախ կողմից կոճկվում է շղթայով (N 2 նկար)։

15. Բաճկոն` մուգ կանաչավուն բրդյա կտորից: Միափեշ, միակողմ 3 ոսկեգույն կոճակով, վրադիր օձիքով: Կրծքամասը` սեղմոններով, փեշերի ներքևի մասերում ունի ներկարվող, կափույրով թեք գրպաններ: Աստառը մետաքսյա է, ձախ կողմում ունի ծոցագրպան (N 2 նկար)։

16. Տաբատ` կանաչավուն բրդյա կտորից, տաք ներդիրով, ուղիղ ուրվագծով, գոտին` գոտեմակօղերով, մետաքսե աստառով, կոճկվում է կոճակով և շղթայով: Արտաքին գրպաններն ուղիղ են: Հետևամասի աջ կողմում ունի կոճակով կոճկվող կափույրով գրպան (N 5 նկար)։

17. Երկարաթև վերնաշապիկ` սպիտակ մետաքսից, օձիքը` հետ ծալված, կրծքամասը` սեղմոններով, կոճկվում է կափույրով ծածկված 8 կոճակով (N 4 նկար)։

18. Կիսաճտքավոր կոշիկ` սև, բնական կաշվից, երեսամասը` ամբողջական կամ կտրված քթամասով, երկարացված ձևավոր հետևամասով, կրունկը` մինչև 5,5 սմ բարձրությամբ: Լեզվակը միացված է առաջամասին (N 4 նկար):

IV. ԲՈՒՍԱՍԱՆԻՏԱՐԻԱՅԻ ԿԻՆ ՊԵՏԱԿԱՆ ՏԵՍՈՒՉԻ ԱՄԱՌԱՅԻՆ ՀԱՄԱԶԳԵՍՏԸ
(վերնագիրը փոփ. 03.06.10 N 684-Ն)

19. Գլխարկ՝ մուգ կանաչավուն բրդյա կտորից, լայնեզր, սև երիզով, բաղկացած է թասակից և դեպի վերև ծալված գլխարկաբոլորքից: Գլխարկաբոլորքը ճակատային մասում ունի 10 սմ լայնություն, իսկ հետևի մասում՝ 7 սմ: Գլխարկաբոլորքի եզրը կարված է 2 մմ լայնքով մահուդից (N 4 նկար)։

20. Բաճկոն` սինթետիկ, մուգ կանաչավուն գույնի: Միափեշ, միակողմ 3 ոսկեգույն կոճակով, վրադիր օձիքով: Կրծքամասը` սեղմոններով, փեշերի ներքևի մասերում ունի ներկարվող, կափույրով թեք գրպաններ: Աստառը մետաքսյա է, ձախ կողմում ունի ծոցագրպան (N 4 նկար)։

21. Տաբատ` կանաչ բամբակյա կտորից, ուղիղ ուրվագծով: Գոտին` գոտեմակօղերով, կոճկվում է 2 կոճակով և շղթայով: Արտաքին գրպաններն ուղիղ են: Հետևամասի աջ կողմում ունի կոճակով կոճկվող կափույրով գրպան (N 6 նկար)։

22. Կիսաշրջազգեստ` բամբակյա, մուգ կանաչավուն գույնի, ուղիղ կարվածքով, երկկողմանի սեղմոններով, աստառով: Գոտին` գոտեմակօղերով, կողամասում կոճկվում է մեկ կոճակով և շղթայով (N 4 նկար)։

23. Կարճաթև վերնաշապիկ` սպիտակ մետաքսից, օձիքը` հետ ծալված, կրծքամասը` սեղմոններով, կոճկվում է կափույրով ծածկված 8 կոճակով (N 4 նկար)։

24. Կոշիկ` սև կաշվից, երեսամասը` ամբողջական, հետևամասի և առաջամասի հետ ծալված եզրերով: Ներբանը ձևավորված է պոլիուրէթանից` սոսնձով միացման մեթոդով: Կրունկն ունի մինչև 5 սմ բարձրություն, փաթաթված է երեսամասի նյութով (N 4 նկար)։

(հավելվածը փոփ 03.06.10 N 684-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան