Հ Ա Մ Ա Ձ Ա Յ Ն Ա Գ Ի Ր

Բնական և տեխնածին բնույթի արտակարգ իրավիճակների կանխման և հետևանքների վերացման բնագավառում փոխգործակցության մասին

Սույն Համաձայնագրի մասնակից պետությունների Կառավարությունները, այսուհետ՝ Համաձայնագրի մասնակիցներ,

նկատի ունենալով արտակարգ իրավիճակների առաջացման հնարավորությունը, որոնց հետևանքները չեն կարող վերացվել Համաձայնագրի մասնակիցներից մեկի ուժերով և միջոցներով, և այդ կապակցությամբ համակարգված գործողությունների անհրաժեշտությունը,

հաշվի առնելով բնական և տեխնածին բնույթի արտակարգ իրավիճակների անդրսահմանային ազդեցության հնարավորությունը, որը պահանջում է դրանց կանխման և հետևանքների վերացման համաձայնեցված գործողությունների իրականացում,

ընդունելով արտակարգ իրավիճակների կանխմանը և հետևանքների վերացմանը ուղղված միջոցառումների իրականացման համար վթարային-փրկարարական ուժերի, նյութատեխնիկական, բժշկական, պարենամթերային, ֆինանսական և տեղեկատվական ռեսուրսների համատեղ օգտագործման անհրաժեշտությունը,

ձգտելով արտակարգ իրավիճակների կանխման և հետևանքների վերացման հիմնախնդիրների լուծման ժամանակ գիտատեխնիկական հարաբերությունների պահպանմանը և զարգացմանը,

համաձայնեցին ներքոհիշյալի մասին.

Հ ո դ վ ա ծ  1

Սույն Համաձայնագիրը սահմանում է բնական աղետների, տեխնածին վթարների և աղետների հետևանքով ծագող արտակարգ իրավիճակների կանխմանն ու հետևանքների վերացմանը մասնակցության և փոխգործակցության իրականացման կարգը:

Հ ո դ վ ա ծ  2

Համաձայնագրի մասնակիցների փոխգործակցության հիմնական սկզբունքներն են.

արտակարգ իրավիճակների կանխման և դրանց ժամանակ գործողության համար նախատեսված համակարգերի և մարմինների ինտեգրացիա` ներառյալ նման իրավիճակներում գործողությունների ազգային ծրագրերի համակարգվածությունը,

օրենսդրության նորմերի մերձեցում և համաձայնագրերի մշակում, որոնք անհրաժեշտ են հատուկ բնագավառներում փոխգործակցության և համագործակցության համար,

միջազգային կազմակերպություններում համատեղ գործողությունների իրականացում և մասնակցություն համապատասխան ուղղվածության միջազգային ծրագրերում,

Համաձայնագրի մասնակցի պատասխանատվությունը արտակարգ իրավիճակի առաջացման և հետևանքների համար,

արտակարգ իրավիճակների առաջացման ժամանակ կանխիչ գործողությունները,

ներպետական մակարդակով որոշման ընդունման ինքնուրույնությունը:

Հ ո դ վ ա ծ  3

Համաձայնագրի մասնակիցները իրականացնում են փոխգործակցություն հետևյալ հիմնական ուղղություններով.

արտակարգ իրավիճակների կանխմանն ու հետևանքների վերացմանն ուղղված փոխգործակցության համակարգի ստեղծման և կատարելագործման աշխատանքների համակարգում (կազմակերպում),

արտակարգ իրավիճակների կանխման հարցերով միջպետական նպատակային և գիտատեխնիկական ծրագրերի մշակում և իրագործում` ներառյալ բնակչության, նյութական և մշակութային արժեքների, շրջակա միջավայրի պաշտպանության հարցերը,

հսկողություն ներունակ վտանգավոր օբյեկտների, շրջակա միջավայրի վիճակի նկատմամբ, արտակարգ իրավիճակների առաջացման և դրանց մասշտաբների կանխատեսում,

փոխադարձ ծանուցում ներունակ վտանգավոր օբյեկտների և շրջակա միջավայրի վիճակի, առաջացող արտակարգ իրավիճակների, դրանց զարգացման ընթացքի և հնարավոր հետևանքների, դրանց վերացման համար ձեռնարկվող միջոցառումների մասին,

արտակարգ իրավիճակների հետևանքների վերացում և Համաձայնագրի մասնակիցների տարածքներում տուժած բնակչության տեղավորման համար միջոցների ձեռնարկում,

արտակարգ իրավիճակների կանխման և հետևանքների վերացման հարցերով մասնագետների պատրաստում և որակավորման բարձրացում:

Հ ո դ վ ա ծ  4

Համաձայնագրի մասնակիցները մշակում և իրագործում են միջպետական նպատակային և գիտատեխնիկական ծրագրեր, որոնք համաձայնեցվում և հաստատվում են Համաձայնագրի այն մասնակիցների կողմից, ովքեր մասնակցում են դրանց իրագործմանը:

Հ ո դ վ ա ծ  5

Համաձայնագրի մասնակիցները միմյանց տրամադրում են տեղեկություններ ուժերի և միջոցների մասին, որոնք կարող են օպերատիվ կերպով ներգրավվել Համաձայնագրի մասնակիցների տարածքներում վթարային-փրկարարական աշխատանքների անցկացման համար՝ համապատասխան հարցում ստանալու դեպքում:

Համաձայնագրի մասնակիցը բնական և տեխնածին բնույթի խոշորածավալ արտակարգ իրավիճակների առաջացման դեպքում կարող է անհրաժեշտ օգնության համար դիմել Համաձայնագրի մյուս մասնակիցներին՝ նշելով հարցվող օգնության կոնկրետ տեսակները և ծավալները:

Օգնության համար ներգրավված ուժերի և միջոցների ղեկավարությունը իրականացնում է Համաձայնագրի այն մասնակիցը, որի տարածքում իրականացվում են վթարային-փրկարարական աշխատանքները:

Արտակարգ իրավիճակների հետևանքների վերացմանը, կենսաապահովման հարցերի լուծմանն ուղղված ջանքերի ավելացման համար այլ ուժերի և միջոցների ներգրավման անհրաժեշտության դեպքում Համաձայնագրի մասնակիցները մշակում և Համագործակցության Կառավարությունների ղեկավարների Խորհրդին են ներկայացնում համապատասխան առաջարկություններ:

Համաձայնագրի մասնակիցների ուժերը և միջոցները ներգրավվում են վթարային-փրկարարական, վթարային-վերականգնողական և այլ աշխատանքների կատարման համար՝ օգնություն հայցող Կողմի հաշվին կատարված ծախսերի հետագա փոխհատուցման պայմանով կամ այլ համաձայնեցված ձևով:

Հ ո դ վ ա ծ  6

Համաձայնագրի մասնակիցները պարտավորվում են միմյանց օպերատիվ կերպով սույն Համաձայնագրի կատարման համար անհրաժեշտ տեղեկություններ տրամադրել:

Հ ո դ վ ա ծ  7

Արտակարգ իրավիճակի արդյունքում պատճառված վնասի համար պատասխանատվությանը վերաբերող կարգը, կանոնները և ընթացակարգերը կկարգավորվեն առանձին համաձայնագրով:

Հ ո դ վ ա ծ  8

Համաձայնագրի մասնակիցները սույն Համաձայնագրի մեկնաբանման և կիրառման վերաբերյալ վեճերը կարգավորում են բանակցությունների կամ, իրենց ընտրությամբ, այլ խաղաղ միջոցների օգնությամբ:

Հ ո դ վ ա ծ  9

Սույն Համաձայնագրի դրույթների գործնական իրագործման նպատակներով ստեղծվում է Բնական և տեխնածին բնույթի արտակարգ իրավիճակների միջպետական խորհուրդ՝ բաղկացած Համաձայնագրի մասնակիցների լիազոր ներկայացուցիչներից՝ յուրաքանչյուր պետությունից մեկական:

Բնական և տեխնածին բնույթի արտակարգ իրավիճակների միջպետական խորհուրդը իր աշխատանքում ղեկավարվում է Համագործակցության Կառավարությունների ղեկավարների խորհրդի հաստատած Կանոնակարգով:

Հ ո դ վ ա ծ  10

Սույն Համաձայնագիրը բաց է Անկախ Պետությունների Համագործակցության բոլոր մասնակից պետությունների ստորագրման համար:

Սույն Համաձայնագրին, նրա բոլոր մասնակիցների համաձայնությամբ, կարող է միանալ ցանկացած այլ պետություն:

Հ ո դ վ ա ծ  11

Համաձայնագրի յուրաքանչյուր մասնակից պետություն կարող է դուրս գալ Համաձայնագրից՝ համապատասխան գրավոր ծանուցում ուղարկելով ավանդապահին: Նման մասնակցի համար Համաձայնագրի գործողությունը դադարում է վերոհիշյալ ծանուցումը ավանդապահի ստանալու օրվանից 12 ամիս հետո:

Հ ո դ վ ա ծ  12

Սույն Համաձայնագիրը ուժի մեջ է մտնում ստորագրման օրվանից:

Կատարված է Մինսկ քաղաքում 1993 թվականի հունվարի 22-ին, մեկ բնօրինակով` ռուսերենով: Բնօրինակը պահվում է Բելառուսի Հանրապետության Կառավարության արխիվում, որը դրա հաստատված պատճենները կուղարկի սույն Համաձայնագիրը ստորագրած պետություններին:

*Համաձայնագիրը Հայաստանի Հանրապետության համար ուժի մեջ է մտել 1993 թվականի հունվարի 22-ից: