ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲՈՒԼՂԱՐԻԱՅԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԵՎՐՈՊԱԿԱՆ ՄԻՈՒԹՅԱՆ ՄԻՋԵՎ ԱՌԱՆՑ ԹՈՒՅԼՏՎՈՒԹՅԱՆ ԲՆԱԿՎՈՂ ԱՆՁԱՆՑ ՀԵՏԸՆԴՈՒՆՄԱՆ (ՌԵԱԴՄԻՍԻԱ) ՄԱՍԻՆ» ՀԱՄԱՁԱՅՆԱԳՐԻ ԿԻՐԱՐԿՄԱՆ ԱՐՁԱՆԱԳՐՈՒԹՅՈՒՆ

Հայաստանի Հանրապետության կառավարությունը և Բուլղարիայի Հանրապետության կառավարությունը (այսուհետ՝ Պայմանավորվող կողմեր),

հաշվի առնելով 2013 թվականի ապրիլի 19-ին Բրյուսելում ստորագրված՝ «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման (ռեադմիսիայի) մասին» համաձայնագրի (այսուհետ՝ Համաձայնագիր) 20-րդ հոդվածի դրույթները,

ցանկանալով ստեղծել անհրաժեշտ պայմաններ Համաձայնագրի կիրարկումը դյուրացնելու համար,

համաձայնեցին հետևյալի մասին.

Հոդված 1

Իրավասու մարմինները

Համաձայնագրի և սույն Արձանագրության կիրարկման համար պատասխանատու իրավասու մարմիններն են.

1) հետընդունման և տարանցման դիմումների ներկայացման, ընդունման և դրանց ընթացք տալու համար՝

ա) Բուլղարական Պայմանավորվող կողմի համար՝

Բուլղարիայի Հանրապետության ներքին գործերի նախարարությունը,

Սահմանային ոստիկանության կենտրոնական վարչությունը

Հետընդունման բաժին

Հասցե՝	46, Կնյագինյա Մարիա Լուիզա Բուլևարդ 1202 Սոֆիա, Բուլղարիայի Հանրապետություն
Հեռ.՝	+359 2 982 34 38 +359 2 982 30 29 +359 2 982 49 54
Ֆաքս՝	+359 2 988 58 67
Էլ. փոստ՝	nsgp@mvr.bg rakulekov.180@mvr.bg ajzagorov.180@mvr.bg elnikolova.180@mvr.bg

բ) Հայկական Պայմանավորվող կողմի համար՝ 

Հայաստանի Հանրապետության տարածքային կառավարման և ենթակառուցվածքների նախարարության միգրացիոն ծառայությունը։

Հասցե՝	Կարապետ Ուլնեցու 31, Երևան, 0037, Հայաստանի Հանրապետություն
Հեռ.՝	+ 374 60 275 018 + 374 60 275 017
Ֆաքս՝	+ 374 60 275 033
Էլ. Փոստ՝	readmission@mta.gov.am

2) Հարցազրույցներ անցկացնելու և ճամփորդական փաստաթղթեր տրամադրելու համար իրավասու դիվանագիտական կամ հյուպատոսական ներկայացուցչություններն են.

ա) բուլղարական Պայմանավորվող կողմի համար՝

Հայաստանի Հանրապետությունում Բուլղարիայի Հանրապետության դեսպանությունը։

Հասցե՝	Նոր Արեշ, Սոֆիայի փող., 16-րդ շենք, Երևան, 0020, Հայաստան
Հեռ.՝	+374 10 458233 +374 96 405210
Ֆաքս՝	+374 10 458233
Էլ. Փոստ՝	embassy.yerevan@mfa.bg

բ) հայկական Պայմանավորվող կողմի համար՝

Բուլղարիայի Հանրապետությունում Հայաստանի Հանրապետության դեսպանությունը։

Հասցե՝	Զագորիշան փողոց, 3-րդ շենք, Սոֆիա, 1111, Բուլղարիա
Հեռ.՝	+359 2946 12 72 +359 2946 12 73
Ֆաքս՝	+359 2946 12 74
Էլ. Փոստ՝	armbulgariaembassy@mfa.am

3) Պայմանավորվող կողմերը դիվանագիտական ուղիներով միմյանց անմիջապես կծանուցեն իրավասու մարմինների և կապի իրենց տվյալներին վերաբերող ցանկացած փոփոխության մասին: Այդ փոփոխությունները չեն դիտարկվում որպես սույն Արձանագրության 13-րդ հոդվածով սահմանված փոփոխություններ և ուժի մեջ են մտնում ծանուցումն ստանալու օրվանից:

Հոդված 2

Սահմանային անցակետերը

1) Պայմանավորվող կողմերի հետևյալ սահմանային անցակետերը նախատեսված են հետընդունման և տարանցման համար.

ա) բուլղարական Պայմանավորվող կողմի համար՝

Սոֆիայի օդանավակայան BCP

Վառնայի օդանավակայան BCP

Բուրգասի օդանավակայան BCP

բ) հայկական Պայմանավորվող կողմի համար՝

«Զվարթնոց» միջազգային օդանավակայան, Երևան։

2) Անհրաժեշտության դեպքում իրավասու մարմինները առանձին գործերով կարող են որոշել այլ սահմանային անցակետեր, որոնք նշված չեն սույն հոդվածի 1-ին կետում:

3) Պայմանավորվող կողմերը դիվանագիտական ուղիներով միմյանց անմիջապես կծանուցեն սույն հոդվածի 1-ին կետում նշված սահմանային անցակետերի փոփոխության մասին: Այդ փոփոխությունները չեն դիտարկվում որպես սույն Արձանագրության 13-րդ հոդվածով սահմանված փոփոխություններ և ուժի մեջ են մտնում ծանուցումն ստանալու օրվանից:

Հոդված 3

Հետընդունման դիմումների ընթացակարգը և պատասխանները

1) Հայցող Պայմանավորվող կողմի իրավասու մարմինը ներկայացնում է Հայցվող Պայմանավորվող կողմի իրավասու մարմնին հետընդունման դիմումը (Համաձայնագրի 5-րդ հավելված) գրավոր ձևակերպված և Համաձայնագրի 8-րդ հոդվածի համաձայն, հաղորդակցման ցանկացած միջոցով, այդ թվում՝ Ռեադմիսիոն հայցերի կառավարման էլեկտրոնային համակարգի, Համաձայնագրի 11-րդ հոդվածի 1-ին կետում սահմանված ժամկետներում:

2) Հայցվող Պայմանավորվող կողմի իրավասու մարմինը ներկայացնում է Հայցող Պայմանավորվող կողմի իրավասու մարմնին հետընդունման դիմումի վերաբերյալ իր պատասխանը գրավոր, հաղորդակցման ցանկացած միջոցով, այդ թվում՝ Ռեադմիսիոն հայցերի կառավարման էլեկտրոնային համակարգի, Համաձայնագրի 11-րդ հոդվածի 2-րդ կետում սահմանված ժամկետներում:

3) Հետընդունման դիմումի և սույն հոդվածի 2-րդ կետում նշված պատասխանի մեջ առկա անձնական տվյալների մշակումը կատարվում է Համաձայնագրի 17-րդ հոդվածի դրույթներին համաձայն:

Հոդված 4

Այլ փաստաթղթեր

1) Եթե Հայցող Պայմանավորվող կողմը գտնում է, որ Համաձայնագրի 1-4-րդ հավելվածներում չնշված այլ փաստաթղթեր կարող են անհրաժեշտ լինել հետընդունման ենթակա անձի քաղաքացիությունը պարզելու կամ հետընդունման համար երրորդ երկրի քաղաքացիների կամ քաղաքացիություն չունեցող անձանց կարգավիճակը հաստատելու համար, ապա այդպիսի փաստաթղթերը՝ կցված հետընդունման դիմումին, նույնպես կարող են ներկայացվել Հայցվող Պայմանավորվող կողմին:

2) Սույն հոդվածի 1-ին կետում նշված փաստաթղթերը հետընդունման դիմումին ընթացք տալու ժամանակ հաշվի առնելու հարցը որոշում է Հայցվող Պայմանավորվող կողմը:

Հոդված 5

Հարցազրույց

1) Եթե Հայցող Պայմանավորվող կողմը չի կարող ներկայացնել Համաձայնագրի 1-ին կամ 2-րդ հավելվածներում թվարկված փաստաթղթերից որևէ մեկը, ապա, Հայցող Պայմանավորվող կողմի խնդրանքով, Հայցող Պայմանավորվող կողմի պետությունում Հայցվող Պայմանավորվող կողմի դիվանագիտական կամ հյուպատոսական ներկայացուցչությունների լիազորված ներկայացուցիչները հարցազրույց են անցկացնում հետընդունման դիմումի մեջ ընդգրկված՝ հետընդունման ենթակա անձի հետ Համաձայնագրի 9-րդ հոդվածի 3-րդ կետում սահմանված ժամկետներում:

2) Հայցվող Պայմանավորվող կողմը տեղեկացնում է Հայցող Պայմանավորվող կողմին հարցազրույցի արդյունքների մասին հնարավորինս կարճ ժամկետում, սակայն հարցազրույց անցկացնելու խնդրանք պարունակող հետընդունման դիմումն ստանալու օրվանից ոչ ուշ, քան 10 (տասը) օրացուցային օրվա ընթացքում:

Սույն կետում նշված հետընդունման դիմումին պատասխանելու ժամկետը սկսում է գործել հարցազրույցի արդյունքների մասին տեղեկություն ներկայացնելու օրվանից:

3) Եթե հարցազրույցի արդյունքում հնարավոր չի լինում հաստատել հետընդունման ենթակա անձի քաղաքացիությունը, ապա Հայցվող Պայմանավորվող կողմը հարցազրույցի արդյունքները Հայցող Պայմանավորվող կողմին է ներկայացնում հետընդունման դիմումի վերաբերյալ որոշման հետ միասին: Եթե համապատասխան անձը չի ներկայանում հարցազրույցին, ապա Հայցող Պայմանավորվող կողմը Հայցվող Պայմանավորվող կողմին տեղեկացնում է տվյալ իրավիճակի պատճառների մասին, և Պայմանավորվող կողմերը նոր ժամանակահատված են սահմանում:

4) Հարցազրույցի վայրը և օրը յուրաքանչյուր դեպքի համար որոշվում է առանձին:

Հոդված 6

Տարանցման դիմում ներկայացնելը և դրան պատասխանելը

1) Համաձայնագրի 15-րդ հոդվածի 1-ին կետի համաձայն՝ գրավոր կազմված տարանցման դիմումը Հայցող Պայմանավորվող կողմի իրավասու մարմինը ներկայացնում է Հայցվող Պայմանավորվող կողմի իրավասու մարմնին հաղորդակցության ցանկացած միջոցով, այդ թվում՝ Ռեադմիսիոն հայցերի կառավարման էլեկտրոնային համակարգի, նախատեսված տարանցումից առնվազն 7 (յոթ) օրացուցային օր առաջ:

2) Համաձայնագրի 15-րդ հոդվածի 1-ին կետում սահմանված տվյալներից բացի, տարանցման դիմումը պարունակում է նաև երաշխիք առ այն, որ անձը ընդունվում է վերջնական նպատակակետ հանդիսացող պետության կողմից:

3) Հայցվող Պայմանավորվող կողմի իրավասու մարմինը տարանցման դիմումի պատասխանը ներկայացնում է Հայցող Պայմանավորվող կողմի իրավասու մարմնին հաղորդակցության ցանկացած միջոցով, այդ թվում՝ Ռեադմիսիոն հայցերի կառավարման էլեկտրոնային համակարգի, գրավոր, Համաձայնագրի 15-րդ հոդվածի 2-րդ կետում սահմանված ժամկետներում:

4) Եթե Հայցող Պայմանավորվող կողմը գտնում է, որ տարանցման ընթացքում անհրաժեշտ է Հայցվող Պայմանավորվող կողմի աջակցությունը, ապա այս հարցը նույնպես ներառվում է տարանցման դիմումի մեջ (Համաձայնագրի 6-րդ հավելված): Հայցվող Պայմանավորվող կողմի իրավասու մարմինը տարանցման դիմումի պատասխանի մեջ տեղեկացնում է Հայցող Պայմանավորվող կողմի իրավասու մարմնին նման աջակցության տրամադրման հնարավորության մասին:

5) Եթե տարանցումը հետաձգվել է որևէ իրավական կամ գործնական խոչընդոտի պատճառով, Հայցող Պայմանավորվող կողմի իրավասու մարմինը անմիջապես, սակայն ոչ ուշ, քան տարանցումից 1 (մեկ) օր առաջ տեղեկացնում է Հայցվող Պայմանավորվող կողմի իրավասու մարմնին խոչընդոտների մասին և նշում է տարանցման համար նախատեսված ժամը և վայրը:

6) Տարանցման դիմումի մեջ և սույն հոդվածի 3-րդ կետում նշված պատասխանում ներառված անձնական տվյալների մշակումը կատարվում է Համաձայնագրի 17-րդ հոդվածի դրույթների համաձայն:

Հոդված 7

Հետընդունման ենթակա անձի փոխադրման ընթացակարգը

1) Հայցող Պայմանավորվող կողմը Ռեադմիսիոն հայցերի կառավարման էլեկտրոնային համակարգի միջոցով տեղեկացնում է Հայցվող Պայմանավորվող կողմին Համաձայնագրի 12-րդ հոդվածում նշված անձի փոխադրման եղանակների և տրանսպորտային միջոցների մասին:

2) Հայցվող Պայմանավորվող կողմի իրավասու մարմինը տեղեկացնում է Հայցող Պայմանավորվող կողմի իրավասու մարմնին փոխադրման եղանակների ընդունելի լինելու վերաբերյալ հնարավորինս կարճ ժամկետում, սակայն 1-ին կետում նշված տեղեկությունն ստանալու օրվանից ոչ ուշ, քան 4 աշխատանքային օրվա ընթացքում: Եթե Հայցող Պայմանավորվող կողմի առաջարկած փոխադրման եղանակներն ընդունելի չեն Հայցվող Պայմանավորվող կողմի համար, ապա փոխադրման այլ եղանակները քննարկվում են հնարավորինս կարճ ժամկետում։

3) Եթե փոխադրումը հետաձգվել է որևէ իրավական կամ գործնական խոչընդոտի պատճառով, Հայցող Պայմանավորվող կողմի իրավասու մարմինը անմիջապես տեղեկացնում է Հայցվող Պայմանավորվող կողմի իրավասու մարմնին խոչընդոտների մասին և նշում է փոխադրման նախատեսված ժամը և վայրը:

4) Հետընդունման ենթակա անձի փոխադրման հետ կապված փաստաթղթերը ձևակերպվում են՝ օգտագործելով սույն Արձանագրության 1-ին հավելվածի ձևանմուշը:

Հոդված 8

Սխալմամբ կատարված հետընդունում

1) Սխալմամբ կատարված հետընդունման դեպքում Հայցող Պայմանավորվող կողմը հետ է վերցնում Հայցվող Պայմանավորվող կողմից հետընդունված անձին Համաձայնագրի 13-րդ հոդվածում սահմանված ժամկետում և պայմաններով:

2) Հայցվող Պայմանավորվող կողմին ներկայացված բոլոր փաստաթղթերը վերադարձվում են Հայցող Պայմանավորվող կողմին: Եթե տվյալների և փաստաթղթի փոխանցումը կատարվել է էլեկտրոնային եղանակով, ապա Հայցվող Պայմանավորվող կողմը դրանք անմիջապես ջնջում է:

Հոդված 9

Հետընդունվող կամ փոխադրվող անձի ուղեկցումը

1) Այն դեպքում, երբ հետընդունման կամ տարանցման ընթացքի մեջ գտնվող անձը պետք է ուղեկցվի, Հայցող Պայմանավորվող կողմի իրավասու մարմինը ներկայացնում է հետևյալ տեղեկությունը ուղեկցող(ներ)ի վերաբերյալ. անուն և ազգանուն, ուղեկցողների պաշտոնները, անձնագրերի տեսակները, դրանց համարը և տրման ամսաթիվը, թռիչքի համարը, ժամանման և մեկնման օրը և ժամը:

Այս տեղեկությունը նշվում է սույն Արձանագրության 7-րդ հոդվածի 1-ին կետի համաձայն արված ծանուցման մեջ: Ուղեկցողների տվյալների որևէ փոփոխության դեպքում Հայցող Պայմանավորվող կողմի իրավասու մարմինները անմիջապես տեղեկացնում են Հայցվող Պայմանավորվող կողմի իրավասու մարմիններին:

2) Ուղեկցողը պարտավոր է ուղեկցել հետընդունման ենթակա անձին և նրան փոխանցել Հայցվող Պայմանավորվող կողմի իրավասու մարմնի ներկայացուցչին:

3) Ուղեկցողները պարտավորվում են կատարել Հայցվող Պայմանավորվող կողմի օրենսդրության պահանջները: Հետընդունման ենթակա անձին ուղեկցման կամ տարանցման ընթացքում ուղեկցողների իրավասությունները սահմանափակված են օրինական պաշտպանությամբ՝ Հայցվող Պայմանավորվող կողմի օրենսդրության համաձայն: Այն դեպքում, երբ Հայցվող Պայմանավորվող կողմի պաշտոնյաները, որոնք իրավասու են իրականացնելու անհրաժեշտ գործողություններ, չեն կարող գործել կամ աջակցություն խնդրել անմիջական կամ լուրջ վտանգի իրավիճակներում, ուղեկցողները կարող են ողջամիտ և համաչափ միջոցներ ձեռնարկել՝ կանխարգելելու համար հետընդունման ենթակա անձի փախուստը, ինքն իրեն կամ այլ երրորդ անձին վնաս հասցնելը կամ գույքին վնաս պատճառելը: Հայցվող Պայմանավորվող կողմի տարածքում մնալու ընթացքում ուղեկցողները, Հայցվող Պայմանավորվող կողմի ազգային օրենսդրության համաձայն, զենք կամ այլ արգելված իրեր չեն կրում և կրում են քաղաքացիական հագուստ:

4) Ուղեկցողները պարտավոր են կրել իրենց անձը հաստատող փաստաթղթերը, հետընդունումը և տարանցումը հաստատող փաստաթղթերը, ինչպես նաև հետընդունման կամ տարանցման ենթակա անձի ճամփորդական փաստաթուղթը և այլ պահանջվող վկայականներ կամ տվյալներ:

5) Պայմանավորվող կողմերի իրավասու մարմինները համագործակցում են Հայցվող Պայմանավորվող կողմի տարածքում ուղեկցողների մնալու հետ կապված բոլոր հարցերով: Հայցվող Պայմանավորվող կողմի իրավասու մարմինները նշանակված ուղեկցողներին տրամադրում են ցանկացած աջակցություն:

6) Եթե հետընդունման կամ տարանցման ենթակա անձն ունի հատուկ խնամքի կարիք, ուղեկցողների կազմում կարող են ընդգրկվել նաև բժշկական անձնակազմ, սոցիալական աշխատողներ և այլն:

Հոդված 10

Ծախսերը

1) Հայցող Պայմանավորվող կողմը հետընդունման կամ տարանցման հետ կապված՝ Հայցվող Պայմանավորվող կողմի ծախսերը, որոնք, Համաձայնագրի 16-րդ հոդվածի համաձայն, պետք է հոգա Հայցող Պայմանավորվող կողմը, փոխհատուցում է եվրոյով՝ ծախսերը հաստատող փաստաթղթերը ներկայացնելուց հետո՝ վաթսուն (60) աշխատանքային օրվա ընթացքում:

2) Պայմանավորվող կողմերը դիվանագիտական ուղիներով միմյանց ծանուցում են համապատասխան բանկային հաշիվներին մասին:

Հոդված 11

Հաղորդակցության լեզուն

Հետընդունման և տարանցման դիմումները, ինչպես նաև դրանց պատասխանները, նամակագրությունը և սույն Արձանագրության կիրարկման հետ կապված՝ Պայմանավորվող կողմերի իրավասու մարմինների միջև խորհրդակցությունները կատարվում են անգլերենով:

Հոդված 12

Խորհրդակցությունները

1) Սույն Արձանագրության 1-ին հոդվածում նշված Պայմանավորվող կողմերի իրավասու մարմինները անցկացնում են փորձագետների մակարդակով խորհրդակցություններ, որպեսզի քննարկեն Համաձայնագրի և սույն Արձանագրության կիրարկման հետ կապված հարցերը:

2) Եթե հնարավոր չէ հասնել համաձայնության փորձագետների մակարդակով, Պայմանավորվող կողմերից մեկը կարող է հանդիպում անցկացնել նախարարների մակարդակով:

Հոդված 13

Փոփոխություններ և լրացումներ

Սույն Արձանագրության մեջ փոփոխություններ և լրացումներ կատարվում են Պայմանավորվող կողմերի գրավոր փոխհամաձայնությամբ: Այդ փոփոխություններն ու լրացումներն ուժի մեջ են մտնում սույն Արձանագրության 14-րդ հոդվածով սահմանված ընթացակարգի համաձայն:

Հոդված 14

Ուժի մեջ մտնելը և դադարեցումը

1) Սույն Արձանագրությունն ուժի մեջ է մտնում Պայմանավորվող կողմերի ներքին իրավական ընթացակարգերը ավարտելուց հետո և Համաձայնագրի 20-րդ հոդվածի 2-րդ կետի համաձայն Համաձայնագրի 19-րդ հոդվածում նշված հետընդունման հարցերով Համատեղ կոմիտեին ծանուցելու օրվա հաջորդ օրը:

2) Պայմանավորվող կողմերը դիվանագիտական ուղիներով միմյանց ծանուցում են սույն Արձանագրության ուժի մեջ մտնելու համար անհրաժեշտ ներքին իրավական ընթացակարգերի ավարտի մասին:

3) Այն Պայմանավորվող կողմը, որն ստանում է վերջին գրավոր ծանուցումը 2-րդ կետի համաձայն, տեղեկացնում է Համաձայնագրի 19-րդ հոդվածում նշված հետընդունման հարցերով համատեղ կոմիտեին 2-րդ կետի արդյունքների մասին:

4) Սույն Արձանագրությունը կնքվում է անժամկետ:

5) Սույն Արձանագրության գործողությունը կդադարի Համաձայնագրի գործողության դադարեցման հետ միաժամանակ:

6) Յուրաքանչյուր Պայմանավորվող կողմ կարող է դադարեցնել Արձանագրության գործողությունը ցանկացած ժամանակ՝ դիվանագիտական ուղիներով գրավոր ծանուցում ուղարկելով մյուս Պայմանավորվող կողմին: Դադարեցումն ուժի մեջ է մտնում ծանուցումը մյուս Պայմանավորվող կողմի ստանալուց հետո՝ 90 օրվա ընթացքում: Դադարեցնող Պայմանավորվող կողմին գրավոր հաստատվում է դադարեցման մասին ծանուցման ստացումը:

Հոդված 15

Հավելվածներ

1-ին հավելվածը կկազմի սույն Արձանագրության անբաժանելի մասը:

Կատարված է Երևան քաղաքում, 2019 թվականի հոկտեմբերի 28-ին, երկու բնօրինակով, յուրաքանչյուրը՝ հայերեն, բուլղարերեն և անգլերեն, ընդ որում՝ բոլոր տեքստերը հավասարազոր են: Սույն Արձանագրության դրույթների մեկնաբանման ժամանակ տարաձայնությունների դեպքում կգերակայի անգլերեն տեքստը:

Հավելված 1

____________________________________________________________________________________________ ____________________________________________________________________________________________ ____________________________________________________________________________________________ (Հայցվող Պայմանավորվող կողմի իրավասու մարմնի անվանումը և հասցեն)   Փաստաթղթի համարը՝ ------------------------------- Ամսաթիվը՝ ------------------------   Արձանագրություն Հետընդունման ենթակա անձի փոխանցման վերաբերյալ   Օրը ------- ժամին----- հետևյալ անձինք հետ են ընդունվել ____________________________________________________________________________________________ (Նշել վայրը)

I

ԱՆՁՆԱԿԱՆ ՏՎՅԱԼՆԵՐ

1. Ամբողջական անունը (ընդգծել ազգանունը)

Ծննդյան ամսաթիվը և վայրը՝

Քաղաքացիությունը՝

Հետընդունման ժամանակ անձի մոտ գտնվող անձնական իրերը և ֆինանսական միջոցները.

2. Այլ անձինք (համաձայն 1-ին կետի տվյալների)

II

ԱՆՁԻ (ԱՆՁԱՆՑ) ՀԵՏԸՆԴՈՒՆՄԱՆ ՎԵՐԱԲԵՐՅԱԼ ՀԱՅՑՎՈՂ ՊԱՅՄԱՆԱՎՈՐՎՈՂ ԿՈՂՄԻ ԻՐԱՎԱՍՈՒ ՄԱՐՄՆԻ ՀԱՄԱՁԱՅՆՈՒԹՅԱՆ ՄԱՍԻՆ ՏՎՅԱԼՆԵՐ

Համաձայնության մասին փաստաթղթի համարը՝ ----------------------

Տրված՝

Ում կողմից՝

III

ՀԵՏԸՆԴՈՒՆՈՒՄ

1. Անձը (անձինք) հետևյալ համարի (համարների) ներքո ....... ............ ............ հետ են ընդունվել, մինչդեռ անձը (անձինք) հետևյալ համարի (համարների) ներքո ....... ....... ......... հետ չեն ընդունվել:

2. Հետընդունման մերժման պատճառները:

3. Հետընդունմանն առնչվող հետևյալ իրերը նույնպես ընդունվել են.

(փաստաթղթեր՝ ճամփորդական փաստաթղթեր, անձը հաստատող փաստաթուղթ և այլն, իրեր ...)

Հետընդունման ընթացքում հատուկ ուշադրություն է դարձվում. (վնասվածքներին, նոր հաստատված տվյալներին, ...)