«Գրանցված է»

ՀՀ արդարադատության

նախարարության կողմից

30 հուլիսի 2009 թ.

Պետական գրանցման թիվ 05009264

ՄԵԿ ՀԱՐՅՈՒՐ ՀԱԶԱՐ ԴՐԱՄ ԱՆՎԱՆԱԿԱՆ ԱՐԺԵՔՈՎ 2009 ԹՎԱԿԱՆԻ ԹՈՂԱՐԿՄԱՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԹՂԹԱԴՐԱՄՆԵՐԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «է» կետը, 41-րդ, 42-րդ, 47-րդ և «Իրավական ակտերի մասին» Հայաստանի Հանրապետության օրենքի 16-րդ հոդվածները` Հայաստանի Հանրապետության կենտրոնական բանկի խորհուրդը որոշում է.

1. 2009 թվականի օգոստոսի 24-ից շրջանառության մեջ դնել մեկ հարյուր հազար դրամ անվանական արժեքով 2009 թվականի թողարկման Հայաստանի Հանրապետության թղթադրամները:

2. Հաստատել մեկ հարյուր հազար դրամ անվանական արժեքով 2009 թվականի թողարկման Հայաստանի Հանրապետության թղթադրամի նմուշը` համաձայն Հավելված 1-ի (կցվում է):

3. Հաստատել մեկ հարյուր հազար դրամ անվանական արժեքով 2009 թվականի թողարկման Հայաստանի Հանրապետության թղթադրամի նկարագրությունը` համաձայն Հավելված 2-ի (կցվում է):

4. Սույն որոշումն ուժի մեջ է մտնում հրապարակմանը հաջորդող տասներորդ օրվանից:

ՀՀ կենտրոնական բանկի նախագահ	Ա. Ջավադյան
2009 թ. հուլիսի 29 Երևան

Հավելված 1   Հաստատված է ՀՀ կենտրոնական բանկի խորհրդի 2009 թվականի հուլիսի 24-ի թիվ 215-Ն որոշմամբ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 100.000 ԴՐԱՄ ԱՆՎԱՆԱԿԱՆ ԱՐԺԵՔՈՎ

ԹՂԹԱԴՐԱՄՆԵՐԻ ՆՄՈՒՇԸ

Հավելված 2   Հաստատված է ՀՀ կենտրոնական բանկի խորհրդի 2009 թվականի հուլիսի 24-ի թիվ 215-Ն որոշմամբ

ՆԿԱՐԱԳՐՈՒԹՅՈՒՆ

2009 թ. նմուշի 100 000 դրամ անվանական արժեքով ՀՀ թղթադրամի

Թղթադրամը (չափսը՝ 160 x 72 մմ) ունի Հայոց Աբգար Ե թագավորի դիմանկարը պատկերող և անվանական արժեքը ներկայացնող ջրանիշ: Դիմերեսի հիմնական գույնը կապույտ է, դարձերեսինը՝ դարչնագույն: Թղթադրամը պարունակում է երկու պաշտպանական ներգիծ, որոնցից մեկն ամբողջությամբ ներդրված է թղթի մեջ և երևում է միայն լուսընդդեմ դիտելիս՝ հոծ գծի տեսքով, իսկ մյուսը՝ թղթադրամի դարձերեսի վրա երևում է արծաթափայլ կետագծերի, իսկ լուսընդդեմ դիտելիս՝ հոծ գծի տեսքով, որի մեջ կարդացվում է «AMD 100000» մանրատառաշարը։

Դիմերես

Թղթադրամի ձախ մասում ուղղահայաց, կարմիր գույնով տպագրված են թղթադրամի սերիան նշող երկու տառերը՝ «ԶԱ», և ութանիշ համարը։ Կարմիր համարանիշից աջ փակցված է ուղղահայաց կինեգրամայով ժապավենաձև փայլաթիթեղ: Փայլաթիթեղի երկայնքով, պարբերաբար կրկնվելով, երևում են Աբգար Ե թագավորի դիմանկարը, «AMD» և «100000» գրառումները։ Թագավորի գլխի լուսապսակը լույսի անկման անկյան փոփոխության դեպքում շարժվում է աջից դեպի ձախ: «100000» թվի ներքևում գտնվող ստվերը լույսի անկման անկյան փոփոխության դեպքում շարժվում է վերից վար։ Կինեգրամայի երկու եզրերի ողջ երկայնքով երևում են «100000 ԴՐԱՄ» և «AMD 100000» ապամետաղականացված գրառումները։ Փայլաթիթեղի վրա, վերևի մասում, կարմիր գույնով հորիզոնական տպագրված է «100000» թիվը։ Փայլաթիթեղից աջ պատկերված է Աբգար Ե թագավորի մասին պատմությունը պարունակող շագանակագույն քարակոթողը։ Քարակոթողի պատկերից վերև Աբգար Ե թագավորի դրոշն է՝ կարմիր պաստառի վրա կանաչ խաչ, որի կենտրոնում Քրիստոսի կենդանագիր պատկերով դաստառակն է։ Քարակոթողի ներքևում գտնվում է շեղանկյուն զարդանախշ՝ «100000» թվի գաղտնապատկերով։

Թղթադրամի դիմերեսին հիմնականը Աբգար Ե թագավորի պատկերն է՝ կապույտով և շագանակագույնով: Թագավորի պատկերի և քարակոթողի միջև կապույտ գույնով ուղղահայաց գրված է «Աբգար Ե թագավոր»։ Թղթադրամի դիմերեսի հետին ֆոնի վրա կապույտ գույնով պատկերված է Ա դարի տարածաշրջանային քարտեզի մի հատված: Թղթադրամի վերին մասում, թղթադրամի երկայնքով մուգ կապույտ գույնով գրված է «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ», որի տակ, միկրոտառաշարով՝ «100000ՀԱՐՅՈՒՐՀԱԶԱՐԴՐԱՄ» կրկնվող գրառումը: Դրանից ներքև, կապույտով և մանուշակագույնով տպագրված է թագի թափանցիկ պատկեր։ Թագի մասնիկների մի մասը տպագրված է դիմերեսին, մյուս մասը՝ դարձերեսին. լուսընդդեմ դիտելիս դրանք մեծ ճշտությամբ լրացնում են միմյանց և կազմում թագի ամբողջական պատկեր:

Քարտեզի ներքևի մասում մուգ կապույտ գույնով տպագրված են ՀՀ կենտրոնական բանկի նախագահի և ՀՀ ֆինանսների նախարարի ստորագրությունները, «Բանկի նախագահ» և «Ֆինանսների նախարար» բառերը։ Դրանից ներքև, կարմիր գույնով, երկու տողով գրված է «ՀԱՐՅՈՒՐ ՀԱԶԱՐ ԴՐԱՄ»։

Թղթադրամի ջրանիշի դաշտի վերին մասում, հորիզոնական, սև գույնով տպագրված են թղթադրամի սերիան՝ «ԶԱ», և ութանիշ համարը. ավելի աջ, մուգ կարմիրով՝ երեք թեք գծիկ և մեկ կետ։ Ջրանիշի դաշտի ներքևի աջ մասում մետաղական ոսկեփայլ ներկով տպագրված է Աբգար Ե թագավորի տոհմը որպես արքայական ներկայացնող հնադարյան մետաղադրամի պատկերը։ Դրանից ներքև տպագրված է «100000» թիվը, որի նիշերի վերևի մասը շագանակագույն է, իսկ ներքևինը՝ կապույտ։ «100000» թվի վերջին զրոյից վերև տպագրված է թողարկման տարեթիվը՝ «2009»։ Թղթադրամի աջ եզրի մոտ, ուղղահայաց դիրքով, կապույտ գույնով տպագրված է «CENTRAL BANK OF THE REPUBLIC OF ARMENIA»: Թղթադրամի ներքևի աջ և ձախ մասերում կապույտ գույնով, մի քանի տող մանրատառաշարով տպագրված են «100000» թիվը և «AMD» տառային կոդը։

Դիմերեսի աջ և ձախ եզրերին դեղին գույնի անկանոն շրջանակներ են։

Դարձերես

Թղթադրամի ձախ եզրի մոտ, ուղղահայաց դիրքով, կապույտ գույնով տպագրված է «CENTRAL BANK OF THE REPUBLIC OF ARMENIA»: Թղթադրամի ձախ կողմում՝ ջրանիշի դաշտի ներքևի մասում, հորիզոնական գծով բաժանված, բաց դարչնագույնով և մուգ մանուշակագույնով տպագրված է անվանական արժեքն արտահայտող «100000» թիվը։ «100000» թվի ստորին կեսը տպագրված է օպտիկապես փոփոխական ներկով՝ լույսի անկման անկյան փոփոխության դեպքում կարելի է նկատել գույնի փոփոխությունը կապույտից մանուշակագույնի։

Թղթադրամի մեջտեղում պատկերված է Հիսուսի աշակերտ Թադեոսի (72 աշակերտներից) կողմից Աբգար Ե թագավորին Քրիստոսի կենդանագիր պատկերով դաստառակի փոխանցման տեսարանը:

Թղթադրամի վերևի մասում, թղթադրամի երկայնքով, մուգ կապույտով գրված են «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ», իսկ դրանից ներքև, միկրոտառաշարով՝ «100000ՀԱՐՅՈՒՐ ՀԱԶԱՐԴՐԱՄ» կրկնվող թվերը և բառերը: Նկարի ներքևի մասում մեկ տողով, սև և մուգ կապույտ գույներով գրված է «ՀԱՐՅՈՒՐ ՀԱԶԱՐ ԴՐԱՄ»։ Նկարից դեպի աջ, ուղղահայաց սյան տեսքով պատկերված է մուգ կապույտ զարդանախշ։ Զարդանախշի վրա, վերին մասում, ուղղահայաց գրված է «100000» թիվը: Թղթադրամի ներքևի աջ և ձախ մասերում սպիտակ և բաց կապույտ գույներով, մի քանի տող մանրատառաշարով տպագրված են «100000» թիվը և «AMD» տառային կոդը։

Դարձերեսի աջ և ձախ եզրերին դեղին գույնի անկանոն շրջանակներ են։