«Վավերացնում եմ»
Հայաստանի Հանրապետության
Նախագահ Ռ. Քոչարյան
10 հունվարի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 նոյեմբերի 2003 թվականի N 1779-Ն

ՄԱՔՍԱՅԻՆ ՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ ՀԱՄԱՐ ԱՆՀՐԱԺԵՇՏ ՓԱՍՏԱԹՂԹԵՐԻ ՈՒ ՏԵՂԵԿՈՒԹՅՈՒՆՆԵՐԻ ՑԱՆԿԵՐԸ ԵՎ ԴՐԱՆՔ ՄԱՔՍԱՅԻՆ ՄԱՐՄԻՆՆԵՐԻՆ ՏՐԱՄԱԴՐԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հայաստանի Հանրապետության մաքսային օրենսգրքի 141-րդ հոդվածի 1-ին կետին համապատասխան` Հայաստանի Հանրապետության կառավարությունը որոշում է.

1. Սահմանել`

ա) մաքսային հսկողություն իրականացնելու համար անհրաժեշտ փաստաթղթերի ցանկը` համաձայն N 1 հավելվածի.

բ) մաքսային հսկողություն իրականացնելու համար անհրաժեշտ տեղեկությունների ցանկը` համաձայն N 2 հավելվածի.

գ) մաքսային հսկողություն իրականացնելու համար անհրաժեշտ փաստաթղթերը և տեղեկությունները մաքսային մարմիններին տրամադրելու կարգը` համաձայն N 3 հավելվածի:

2. Ուժը կորցրած ճանաչել Հայաստանի Հանրապետության կառավարության 2001 թվականի մայիսի 15-ի «Մաքսային հսկողություն իրականացնելու համար անհրաժեշտ փաստաթղթերի ու տեղեկությունների ցանկերը և դրանց տրամադրման կարգը հաստատելու մասին» N 413 որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2003 թ. դեկտեմբերի 29 Երևան

Հավելված N 1 ՀՀ կառավարության 2003 թվականի նոյեմբերի 21-ի N 1779-Ն որոշման

Ց Ա Ն Կ

ՄԱՔՍԱՅԻՆ ՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ ՀԱՄԱՐ ԱՆՀՐԱԺԵՇՏ ՓԱՍՏԱԹՂԹԵՐԻ

1. Հայաստանի Հանրապետության մաքսատներում` որպես արտաքին տնտեսական գործունեության մասնակից գրանցվելու համար անհրաժեշտ փաստաթղթերն են`

ա) կազմակերպության կանոնադրությունը (պատճենը),

բ) պետական գրանցման վկայականը (պատճենը),

գ) հարկ վճարողի հաշվառման համարը (պատճենը),

դ) տեղեկանք կազմակերպության հաշվարկային հաշվի մասին` տրված սպասարկող բանկի կողմից:

2. Կազմակերպությունների և անհատ ձեռնարկատերերի կողմից ներմուծվող ապրանքների և տրանսպորտային միջոցների նկատմամբ մաքսային հսկողություն իրականացնելու համար անհրաժեշտ փաստաթղթերն են`

ա) մաքսային հայտարարագիրը, Հայաստանի Հանրապետության մաքսային օրենսդրությամբ նախատեսված դեպքերում` նաև մաքսային արժեքի մանրամասնությունների հայտարարագիրը,

բ) ապրանքի ձեռքբերման հաշիվ-ապրանքագիրը կամ պայմանագիրը, կամ դրան փոխարինող համապատասխան այլ փաստաթուղթ,

գ) ապրանքի տեղափոխումը հիմնավորող փաստաթուղթը (ապրանքատրանսպորտային բեռնագիր),

դ) Հայաստանի Հանրապետության օրենսդրությամբ նախատեսված դեպքերում` ոչ սակագնային կարգավորման նպատակով պահանջվող փաստաթղթերի բնօրինակները` թույլտվություն, լիցենզիա, հավաստագիր (սերտիֆիկատ), եզրակացություն, վկայագիր և այլն,

ե) ակցիզային հարկով հարկման և պարտադիր դրոշմավորման ենթակա` ներմուծված ապրանքների համար ակցիզային դրոշմանիշերի ձեռքբերման անդորրագիրը և ձեռք բերված ակցիզային դրոշմանիշերի օգտագործման մասին հաշվետվությունը,

զ) մաքսային վճարների վճարված լինելը հավաստող կամ Հայաստանի Հանրապետության մաքսային օրենսդրությամբ նախատեսված դեպքերում` դրանց վճարումը երաշխավորող փաստաթղթերը:

3. Կազմակերպությունների և անհատ ձեռնարկատերերի կողմից արտահանվող ապրանքների և տրանսպորտային միջոցների նկատմամբ մաքսային հսկողություն իրականացնելու համար անհրաժեշտ փաստաթղթերն են`

ա) մաքսային հայտարարագիրը,

բ) ապրանքի ձեռքբերման հաշիվ-ապրանքագիրը կամ պայմանագիրը, կամ դրան փոխարինող համապատասխան այլ փաստաթուղթ,

գ) ապրանքի տեղափոխումը հիմնավորող փաստաթուղթը (ապրանքատրանսպորտային բեռնագիր),

դ) Հայաստանի Հանրապետության օրենսդրությամբ նախատեսված դեպքերում` ոչ սակագնային կարգավորման նպատակով պահանջվող փաստաթղթերի բնօրինակները` թույլտվություն, լիցենզիա, վկայագիր, հավաստագիր: Ծագման երկրի հավաստագիր չի պահանջվում` բացառությամբ իրենց բնութագրով` Հայաստանի Հանրապետության օրենսդրությամբ սահմանված` երկակի նշանակության ապրանքների և տեխնոլոգիաների շարքը դասվող ապրանքների, ինչպես նաև այն դեպքերում, երբ հավաստագիր պահանջվում է Հայաստանի Հանրապետության անունից կնքված և վավերացված միջազգային պայմանագրերով,

ե) մաքսային վճարների վճարված լինելը հավաստող կամ Հայաստանի Հանրապետության մաքսային օրենսդրությամբ նախատեսված դեպքերում` դրանց վճարումը երաշխավորող փաստաթղթերը:

4. Ֆիզիկական անձանց կողմից ներմուծվող ապրանքների և տրանսպորտային միջոցների նկատմամբ մաքսային հսկողություն իրականացնելու համար անհրաժեշտ փաստաթղթերն են`

ա) մաքսային հայտարարագիրը, Հայաստանի Հանրապետության օրենսդրությամբ նախատեսված դեպքերում` նաև մաքսային արժեքի մանրամասնությունների հայտարարագիրը,

բ) ապրանքի ձեռքբերման հաշիվ-ապրանքագիրը կամ պայմանագիրը, կամ դրան փոխարինող համապատասխան այլ փաստաթուղթ,

գ) Հայաստանի Հանրապետության օրենսդրությամբ նախատեսված դեպքերում` ոչ սակագնային կարգավորման նպատակով պահանջվող փաստաթղթերի բնօրինակները` թույլտվություն, լիցենզիա, եզրակացություն, հավաստագիր (սերտիֆիկատ), վկայագիր և այլն,

դ) մաքսային վճարների վճարված լինելը հավաստող կամ Հայաստանի Հանրապետության մաքսային օրենսդրությամբ նախատեսված դեպքերում` դրանց վճարումը երաշխավորող փաստաթղթերը:

5. Ֆիզիկական անձանց կողմից արտահանվող ապրանքների և տրանսպորտային միջոցների նկատմամբ մաքսային հսկողություն իրականացնելու համար անհրաժեշտ փաստաթղթերն են`

ա) Հայաստանի Հանրապետության մաքսային օրենսդրությամբ նախատեսված դեպքերում` մաքսային հայտարարագիրը,

բ) Հայաստանի Հանրապետության օրենսդրությամբ նախատեսված դեպքերում` ոչ սակագնային կարգավորման նպատակով պահանջվող փաստաթղթերի բնօրինակները` թույլտվություն, լիցենզիա, վկայագիր, հավաստագիր: Ծագման երկրի սերտիֆիկատ չի պահանջվում` բացառությամբ իրենց բնութագրով` Հայաստանի Հանրապետության օրենսդրությամբ սահմանված` երկակի նշանակության ապրանքների և տեխնոլոգիաների շարքը դասվող ապրանքների, ինչպես նաև այն դեպքերում, երբ հավաստագիր պահանջվում է Հայաստանի Հանրապետության անունից կնքված և վավերացված միջազգային պայմանագրերով,

գ) մաքսային վճարների վճարված լինելը հավաստող կամ Հայաստանի Հանրապետության մաքսային օրենսդրությամբ նախատեսված դեպքերում` դրանց վճարումը երաշխավորող փաստաթղթերը:

6. Հայաստանի Հանրապետության մաքսային օրենսգրքին համապատասխան` անձի անհրաժեշտ լիազորությունները հաստատող փաստաթղթերն են`

ա) անձնագիրը կամ անձը հաստատող այլ փաստաթուղթ,

բ) անձի` որպես հայտարարատու հանդես գալու համար անհրաժեշտ լիազորությունները հաստատող փաստաթուղթը (լիազորագիր կամ նմանատիպ այլ փաստաթուղթ, մաքսային մասնագետի որակավորում ունենալը հաստատող փաստաթուղթ):

7. Մաքսային գործի հետ կապված լիցենզավորման ենթակա գործունեության տեսակների նկատմամբ վերահսկողություն իրականացնելու համար անհրաժեշտ, լիցենզավորման ենթակա գործունեություն իրականացնող անձանցից պահանջվող փաստաթղթերն են`

ա) գործունեության տվյալ տեսակով զբաղվելու լիցենզիան (պատճենը),

բ) մաքսային պահեստներում, ազատ մաքսային պահեստներում, անմաքս առևտրի խանութներում և ազատ տնտեսական գոտիներում Հայաստանի Հանրապետության մաքսային օրենսդրությանը համապատասխան վարվող գրանցամատյաններն ու մաքսային մարմիններ ներկայացման ենթակա ապրանքների շարժի մասին հաշվետվությունները:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ կառավարության 2003 թվականի նոյեմբերի 21-ի N 1779-Ն որոշման

Ց Ա Ն Կ

ՄԱՔՍԱՅԻՆ ՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ ՀԱՄԱՐ ԱՆՀՐԱԺԵՇՏ ՏԵՂԵԿՈՒԹՅՈՒՆՆԵՐԻ

1. Ապրանքների և տրանսպորտային միջոցների արտահանման դեպքում` մաքսային մարմիններ են ներկայացվում տեղեկություններ`

ա) ընտրված մաքսային ռեժիմի մասին,

բ) ապրանքն առաքողի (արտահանողի) և հայտարարատուի անվանման, գտնվելու վայրի, իսկ կազմակերպությունների և (կամ) անհատ ձեռնարկատերերի համար` նաև հարկ վճարողի հաշվառման համարի մասին,

գ) ապրանքի քանակի, քաշի, փաթեթավորման և բեռնահարկերի մասին,

դ) ապրանքն ստացողի (ներմուծողի) անվանման և գտնվելու վայրի մասին,

ե) ներմուծողի երկրի մասին,

զ) ապրանքներ և ուղևորներ տեղափոխող տրանսպորտային միջոցների մասին,

է) ապրանքի մաքսային արժեքի մասին,

ը) ապրանքի` ըստ ԱՏԳ ԱԱ-ի դասակարգման և լրացուցիչ չափման միավորի մասին,

թ) ապրանքի ծագման երկրի մասին,

ժ) կազմակերպության կամ անհատ ձեռնարկատերերի կողմից ստացված ակցիզային դրոշմանիշերի մասին (ակցիզային դրոշմանիշեր արտահանելու դեպքում),

ժա) մաքսային վճարների կատարման մասին:

2. Ապրանքների և տրանսպորտային միջոցների ներմուծման դեպքում` մաքսային մարմիններ են ներկայացվում տեղեկություններ`

ա) ընտրված մաքսային ռեժիմի մասին,

բ) ընտրված մաքսային ռեժիմի սահմաններում ապրանքների տեղափոխման առանձնահատկությունների մասին,

գ) ապրանքն առաքող (արտահանողի) և ստացողի (ներմուծողի) անվանման, գտնվելու վայրի, իսկ կազմակերպությունների և անհատ ձեռնարկատերերի համար` նաև հարկ վճարողի հաշվառման համարի մասին,

դ) ապրանքի քանակի (ըստ ԱՏԳ ԱԱ-ի հիմնական և լրացուցիչ չափման միավորների), փաթեթավորման և բեռնահարկերի մասին,

ե) հայտարարատուի անվանման և հասցեի, կազմակերպությունների համար` նաև հարկ վճարողի հաշվառման համարի մասին,

զ) արտահանող երկրի մասին,

է) ապրանքներ և ուղևորներ տեղափոխող տրանսպորտային միջոցների մասին,

ը) ապրանքների մաքսային արժեքի մասին,

թ) ապրանքի` ըստ ԱՏԳ ԱԱ-ի դասակարգման մասին,

ժ) ապրանքի քաշի մասին` փաթեթավորման հետ միասին, և առանց փաթեթավորման,

ժա) ապրանքի ծագման երկրի մասին,

ժբ) կազմակերպության կողմից ստացված ակցիզային դրոշմանիշերի (պարտադիր դրոշմավորման ենթակա ապրանքների ներմուծման դեպքում) մասին,

ժգ) մաքսային վճարների կատարման մասին,

ժդ) մաքսային և ազատ մաքսային պահեստներում, անմաքս առևտրի խանութներում և ազատ տնտեսական գոտիներում ապրանքների շարժի մասին:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 3 ՀՀ կառավարության 2003 թվականի նոյեմբերի 21-ի N 1779-Ն որոշման

Կ Ա Ր Գ

ՄԱՔՍԱՅԻՆ ՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ ՀԱՄԱՐ ԱՆՀՐԱԺԵՇՏ ՓԱՍՏԱԹՂԹԵՐԸ ԵՎ ՏԵՂԵԿՈՒԹՅՈՒՆՆԵՐԸ ՄԱՔՍԱՅԻՆ ՄԱՐՄԻՆՆԵՐԻՆ ՏՐԱՄԱԴՐԵԼՈՒ

1. Սույն կարգով սահմանվում է մաքսային մարմիններին մաքսային հսկողություն իրականացնելու համար անհրաժեշտ փաստաթղթերի և տեղեկությունների տրամադրման կարգը:

2. Մաքսային հսկողության իրականացման համար`

ա) անհրաժեշտ փաստաթղթերը և տեղեկություններն ապրանքներ տեղափոխող անձանց կողմից ներկայացվում են Հայաստանի Հանրապետության այն մաքսային մարմիններ, որոնց կողմից` Հայաստանի Հանրապետության մաքսային օրենսդրությամբ սահմանված կարգով իրականացվում են Հայաստանի Հանրապետության մաքսային սահմանով տեղափոխվող ապրանքների մաքսային ձևակերպումները և (կամ) տեղափոխումը.

բ) մաքսային և ազատ մաքսային պահեստներում, ազատ տնտեսական գոտիներում, ինչպես նաև անմաքս առևտրի խանութներում ապրանքների շարժին վերաբերող փաստաթղթերն ու տեղեկությունները ներկայացվում են վերադաս մաքսային մարմին` նրա կողմից սահմանված կարգով.

գ) Հայաստանի Հանրապետություն ներմուծվող` ակցիզային հարկով հարկման և պարտադիր դրոշմավորման ենթակա ապրանքների համար ակցիզային դրոշմանիշերի ձեռքբերմանն ու օգտագործմանը վերաբերող փաստաթղթերը և տեղեկությունները մաքսային մարմիններ են ներկայացվում Հայաստանի Հանրապետության կառավարության կողմից սահմանված կարգով.

դ) սույն կետում չնշված` Հայաստանի Հանրապետության այլ անձինք, մաքսային հսկողության իրականացման համար անհրաժեշտ փաստաթղթերը և տեղեկությունները մաքսային մարմիններ են ներկայացնում իրենց նախաձեռնությամբ կամ մաքսային մարմինների պահանջով` Հայաստանի Հանրապետության օրենսդրությամբ սահմանված կարգով:

(2-րդ կետը փոփ. 22.01.09 N 78-Ն)

3. Հայաստանի Հանրապետության մաքսային սահմանով ապրանքներ տեղափոխող անձինք մաքսային հսկողություն իրականացնելու համար անհրաժեշտ տեղեկությունները ներկայացնում են վերադաս մաքսային մարմինի կողմից սահմանված ձևի հայտարարագրերով և (կամ) մաքսային նպատակների իրականացման համար անհրաժեշտ` Հայաստանի Հանրապետության մաքսային օրենսդրությամբ սահմանված այլ փաստաթղթերով, ինչպես նաև ֆիզիկական անձանց բանավոր հարցմամբ:

(3-րդ կետը փոփ. 22.01.09 N 78-Ն)

4. Մաքսային հսկողություն իրականացնելու համար անհրաժեշտ տեղեկությունները պարզելու և ստանալու նպատակով Հայաստանի Հանրապետության մաքսային մարմիններն իրավունք ունեն իրենց նախաձեռնությամբ` Հայաստանի Հանրապետության մաքսային օրենսդրությամբ սահմանված դեպքերում և կարգով իրականացնելու օրենքով սահմանված գործողություններ:

5. Հայաստանի Հանրապետության մաքսային մարմինների պաշտոնատար անձինք իրավունք ունեն անձանցից պահանջելու և ստանալու միայն Հայաստանի Հանրապետության մաքսային օրենսդրությամբ նախատեսված փաստաթղթեր ու տեղեկություններ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան