ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

10 ապրիլի 2008 թվականի N 349-Ն

ՊԱՏՎԱՐՆԵՐԻ ԵՎ ԱՄԲԱՐՏԱԿՆԵՐԻ ՎՐԱՅՈՎ ԱՆՑՆՈՂ ՃԱՆԱՊԱՐՀԱՀԱՏՎԱԾՆԵՐԻՑ ՕԳՏՎԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

«Ավտոմոբիլային ճանապարհների մասին» Հայաստանի Հանրապետության օրենքի 9-րդ հոդվածի 2-րդ մասին համապատասխան` Հայաստանի Հանրապետության կառավարությունը որոշում է.

1. Հաստատել պատվարների և ամբարտակների վրայով անցնող ճանապարհահատվածներից օգտվելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Տ. Սարգսյան
2008 թ. ապրիլի 15 Երևան

Հավելված ՀՀ կառավարության 2008 թվականի ապրիլի 10-ի N 349-Ն որոշման

Կ Ա Ր Գ

ՊԱՏՎԱՐՆԵՐԻ ԵՎ ԱՄԲԱՐՏԱԿՆԵՐԻ ՎՐԱՅՈՎ ԱՆՑՆՈՂ ՃԱՆԱՊԱՐՀԱՀԱՏՎԱԾՆԵՐԻՑ ՕԳՏՎԵԼՈՒ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետությունում պատվարների և ամբարտակների (այսուհետ` պատվար) վրայով անցնող ճանապարհահատվածներից օգտվելու կարգը:

2. Պատվարների վրայով անցնող ճանապարհահատվածներից (այսուհետ` ճանապարհահատված) օգտվելը կարգավորվում է ճանապարհային երթևեկության և ավտոմոբիլային ճանապարհների պահպանման ու շահագործման կանոններին, սույն կարգին և այլ իրավական ակտերին համապատասխան:

3. Ճանապարհահատվածը և ջրամբարը տնօրինողների միջև կնքվում է համապատասխան պայմանագիր կամ ընդունվում է համապատասխան իրավական ակտ կոնկրետ ջրամբարի պատվարի վրայով անցնող ճանապարհահատվածից օգտվելու վերաբերյալ:

II. ՊԱՏՎԱՐՆԵՐԻ ՎՐԱՅՈՎ ԱՆՑՆՈՂ ՃԱՆԱՊԱՐՀԱՀԱՏՎԱԾՆԵՐԻՑ ՕԳՏՎԵԼՈՒ ԿԱՐԳԸ

4. Ճանապարհահատվածը տնօրինողը պատասխանատու է միայն ճանապարհահատվածի հողային պաստառի տարածքում գտնվող ճանապարհային կառուցվածքի համար (ճանապարհային պատվածք, կողնակներ, ճանապարհային նշաններ, գծանշում):

5. Ճանապարհային և կլիմայական անբարենպաստ պայմանների դեպքում ճանապարհահատվածում երթևեկությունը կարող է ժամանակավորապես սահմանափակվել կամ դադարեցվել` ճանապարհահատվածը և ջրամբարը տնօրինողների ցուցումով:

6. Ճանապարհահատվածների բոլոր մուտքերն ու ելքերը պետք է ունենան կարծր ծածկույթ` գործող շինարարական նորմերին համապատասխան:

7. Ջրամբարը տնօրինողն իրավասու է ճանապարհահատվածը տնօրինող մարմնի հետ համաձայնեցված սահմանելու ճանապարհահատվածով անցնող տրանսպորտային միջոցների թույլատրելի բեռի քաշը, եզրաչափերը և արագությունները:

8. Ճանապարհահատվածներում թույլատրվում է միայն ջրամբարը տնօրինողի կողմից սահմանված նորմերը չգերազանցող տրանսպորտային միջոցների երթևեկությունը:

9. Արտակարգ իրավիճակների սպառնալիքի կամ առաջացման ժամանակ, ինչպես նաև շեպերի ամրակապման խախտման և նորոգման ու շինարարական աշխատանքների իրականացման դեպքում` ջրամբարը տնօրինողը տվյալ ճանապարհահատվածում կարող է դադարեցնել կամ սահմանափակել տրանսպորտային միջոցների երթևեկությունը` դրա մասին անհապաղ տեղյակ պահելով ճանապարհահատվածը տնօրինողին և ճանապարհային երթևեկության անվտանգության ապահովման բնագավառի Հայաստանի Հանրապետության կառավարության լիազորած պետական կառավարման մարմնին:

10. Համաձայն միջազգային մակրոսեյսմիկ սանդղակի (1964 թվական)` 7 և ավելի բալ ուժգնությամբ երկրաշարժից հետո` պատվարի տեխնիկական զննման ժամանակահատվածում ճանապարհահատվածով երթևեկությունը դադարեցվում է ջրամբարը տնօրինողի ցուցումով` դրա մասին անհապաղ տեղյակ պահելով ճանապարհահատվածը տնօրինողին և ճանապարհային երթևեկության անվտանգության ապահովման բնագավառի Հայաստանի Հանրապետության կառավարության լիազորած պետական կառավարման մարմնին:

11. Ճանապարհահատվածում երթևեկությունն իրականացվում է` առանց տրանսպորտային միջոցների կանգառի և կայանման:

12. Ճանապարհահատվածը վերականգնվում է կամ որևէ այլ շինարարական աշխատանք իրականացվում է` առանց պատվարների կառուցվածքների փոփոխության:

13. Ճանապարհը տնօրինողը ճանապարհահատվածով ծանրաքաշ և մեծ եզրաչափերով տրանսպորտային միջոցների երթևեկությունը համաձայնեցնում է ջրամբարը տնօրինողի հետ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան