ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

1 նոյեմբերի 2007 թվականի N 1290-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻՈՒԹՅՈՒՆ ՍՏԱՑՈՂ ԱՆՁԻ ԵՐԴՄԱՆ ԱՐԱՐՈՂԱԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Հայաստանի Հանրապետության քաղաքացիության մասին» Հայաստանի Հանրապետության օրենքի 28-րդ հոդվածի 1-ին մասի 4-րդ կետի` Հայաստանի Հանրապետության կառավարությունը որոշում է.

1. Սահմանել Հայաստանի Հանրապետության քաղաքացիություն ստացող անձի երդման արարողակարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
 

Հայաստանի Հանրապետության վարչապետ	Ս. Սարգսյան
2007 թ. նոյեմբերի 16 Երևան

Հավելված ՀՀ կառավարության 2007 թվականի նոյեմբերի 1-ի N 1290-Ն որոշման

Ա Ր Ա Ր Ո Ղ Ա Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻՈՒԹՅՈՒՆ ՍՏԱՑՈՂ ԱՆՁԻ ԵՐԴՄԱՆ

1. Սույն արարողակարգով սահմանվում է Հայաստանի Հանրապետության քաղաքացիություն ստացող անձի (այսուհետ` անձ) Հայաստանի Հանրապետության քաղաքացու երդում (այսուհետ` երդում) տալու ընթացակարգը:

2. Երդման արարողությունը կազմակերպում և իրականացնում է Հայաստանի Հանրապետության կառավարությանն առընթեր Հայաստանի Հանրապետության ոստիկանության անձնագրային և վիզաների վարչությունը (այսուհետ` վարչություն)՝ Հայաստանի Հանրապետության Նախագահի Հայաստանի Հանրապետության քաղաքացիություն շնորհելու մասին հրամանագիրն ուժի մեջ մտնելուց հետո ոչ ուշ, քան 30-օրյա ժամկետում:

3. Երդման արարողության օրը նշանակում է վարչությունը:

4. Երդման արարողությունն իրականացվում է վարչությունում:

5. Երդման արարողության օրվանից 10 օր առաջ վարչությունն անձին ուղարկում է գրավոր ծանուցում` համաձայն ձևի, որում շարադրվում է երդման տեքստը, երդման արարողության անցկացման օրը, ժամը և վայրը, ինչպես նաև երդման նշանակության մասին պարզաբանում ստանալու ցանկություն ունենալու դեպքում՝ վարչություն ներկայանալու օրը, ժամը և պարզաբանում տվող պաշտոնատար անձի պաշտոնը, անունը, ազգանունը:

6. Երդման արարողությունն անց է կացվում հանդիսավոր պայմաններում՝ Հայաստանի Հանրապետության պետական դրոշի առջև:

7. Անձը երդում տալիս է մեկ անգամ և անհատապես:

8. Երդման արարողությունն սկսվում է վարչության պետի ներածական խոսքով, որից հետո ընթերցվում է Հայաստանի Հանրապետության Նախագահի Հայաստանի Հանրապետության քաղաքացիություն շնորհելու մասին հրամանագիրը:

9. Երդում տվող անձը բարձրաձայն և հանդիսավոր ընթերցում է «Հայաստանի Հանրապետության քաղաքացիության մասին» Հայաստանի Հանրապետության օրենքի 13-րդ հոդվածի 7-րդ մասով սահմանված երդման տեքստը և ստորագրում այն:

10. Վարչության պետը շնորհավորում է անձին երդում տալու կապակցությամբ, որից հետո հնչում է Հայաստանի Հանրապետության օրհներգը:

11. Երդման ստորագրված տեքստը կցվում է անձի` Հայաստանի Հանրապետության քաղաքացիություն ստանալու վերաբերյալ փաստաթղթերին:

12. Երդում տալուց հետո անձին տրվում է Հայաստանի Հանրապետության Սահմանադրության և Հայաստանի Հանրապետության օրենսդրության առանձնահատկությունների մասին տեղեկատվական ձեռնարկը և հանձնվում է Հայաստանի Հանրապետության քաղաքացու անձնագիր:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև

Գ Ր Ա Վ Ո Ր  Ծ Ա Ն ՈՒ Ց ՈՒ Մ

Հարգելի ________________________________________________________

(ծանուցվողի անունը, ազգանունը)

Ձեզ է ներկայացվում Հայաստանի Հանրապետության քաղաքացու երդման տեքստը:
«Ես` _______________________________________ , դառնալով Հայաստանի

(անունը, ազգանունը)

Հանրապետության քաղաքացի, երդվում եմ հավատարիմ լինել Հայաստանի Հանրապետությանը, պահպանել Հայաստանի Հանրապետության Սահմանադրությունը և օրենքները, պաշտպանել Հայաստանի Հանրապետության անկախությունը և տարածքային ամբողջականությունը: Պարտավորվում եմ հարգել Հայաստանի Հանրապետության պետական լեզուն, ազգային մշակույթը և սովորույթները:»:

Տեղեկացնում ենք, որ ________________________ -ին, ժամը _________ -ին

(տարեթիվը, ամիսը, օրը)

Հայաստանի Հանրապետության կառավարությանն առընթեր Հայաստանի Հանրապետության ոստիկանության անձնագրային և վիզաների վարչությունում, __________

________________________________________________________________ ,

(հասցեն)

իրականացվելու է Ձեր՝ Հայաստանի Հանրապետության քաղաքացու երդման արարողությունը:
Երդման նշանակության մասին պարզաբանում ստանալու ցանկություն ունենալու դեպքում խնդրվում է

________________________ -ին, ժամը _________ -ին

(տարեթիվը, ամիսը, օրը)
ներկայանալ Հայաստանի Հանրապետության կառավարությանն առընթեր Հայաստանի Հանրապետության ոստիկանության անձնագրային և վիզաների վարչություն________ սենյակ, ___________________________________________ մոտ:

(պաշտոնատար անձի պաշտոնը, անունը, ազգանունը)

_____ __________________ 200   թ.