ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

2 օգոստոսի 2004 թվականի N 498-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ԽՈՐՀՐԴԻ ԱՇԽԱՏԱԿԱՐԳԸ, ԱՆՀԱՏԱԿԱՆ ԿԱԶՄԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2001 ԹՎԱԿԱՆԻ ԱՊՐԻԼԻ 10-Ի N 267 ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հայաստանի Հանրապետության վարչապետի 2004 թվականի օգոստոսի 2-ի «Հայաստանի Հանրապետության սոցիալական ապահովագրության պետական հիմնադրամի կանոնադրությունը հաստատելու և Հայաստանի Հանրապետության վարչապետի 2001 թվականի մարտի 13-ի N 201 որոշումն ուժը կորցրած ճանաչելու մասին» N 497-Ա որոշմամբ հաստատված Հայաստանի Հանրապետության սոցիալական ապահովագրության պետական հիմնադրամի կանոնադրության 17-րդ կետին համապատասխան

1. Հաստատել`

ա) Հայաստանի Հանրապետության սոցիալական ապահովագրության պետական հիմնադրամի խորհրդի աշխատակարգը` համաձայն N 1 հավելվածի.

բ) Հայաստանի Հանրապետության սոցիալական ապահովագրության պետական հիմնադրամի խորհրդի անհատական կազմը` համաձայն N 2 հավելվածի:

2. ՈՒժը կորցրած ճանաչել Հայաստանի Հանրապետության վարչապետի 2001 թվականի ապրիլի 10-ի «Հայաստանի Հանրապետության սոցիալական ապահովագրության պետական հիմնադրամի խորհրդի անհատական կազմը հաստատելու մասին» N 267 որոշումը:

Հայաստանի Հանրապետության վարչապետ	Ա. Մարգարյան
2004 թ. օգոստոսի 2 Երևան

Հավելված N 1 ՀՀ վարչապետի 2004 թ. օգոստոսի 2-ի N 498-Ն որոշման

Ա Շ Խ Ա Տ Ա Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ԽՈՐՀՐԴԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն աշխատակարգով սահմանվում են Հայաստանի Հանրապետության սոցիալական ապահովագրության պետական հիմնադրամի (այսուհետ` հիմնադրամ) խորհրդի (այսուհետ` խորհուրդ) աշխատանքների կազմակերպման և խորհրդի որոշումների կատարման ընթացակարգերը:

II. ԽՈՐՀՐԴԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

2. Խորհուրդն իր աշխատանքները կազմակերպում է նիստերի միջոցով, որոնք հրավիրվում են խորհրդի նախագահի կողմից` ըստ անհրաժեշտության, բայց ոչ պակաս, քան յուրաքանչյուր կիսամյակը մեկ անգամ: Պարտադիր նիստերը գումարվում են յուրաքանչյուր տարվա առաջին և երրորդ եռամսյակների ընթացքում:

Խորհրդի նիստերը կարող են հրավիրվել նաև խորհրդի անդամների առնվազն 1/3-ի պահանջով` խորհրդի նախագահի կողմից` համապատասխան պահանջ ներկայացնելուց 20 օրվա ընթացքում: Եթե նշված ժամկետում խորհրդի նախագահը նիստ չի հրավիրում, ապա նիստ կարող են հրավիրել նման պահանջ ներկայացրած անձինք:

Խորհրդի նիստերը, բացառությամբ պարտադիր նիստերի, կարող են անցկացվել հարցման միջոցով` գրավոր փաստաթղթերի փոխանցմամբ, էլեկտրոնային կամ այլ կապի միջոցներով: Եթե խորհրդի որոշման նախագիծը խորհրդի անդամին պատշաճ ուղարկվելուց կամ փոխանցվելուց հետո 5-օրյա ժամկետում խորհրդի անդամի կողմից պատասխան չի տրվում, ապա համարվում է, որ խորհրդի անդամը կողմ է որոշման նախագծին: Հարցման եղանակով սահմանված կարգով որոշում չընդունվելու դեպքում հարցը քննարկվում է խորհրդի առաջիկա նիստում:

(2-րդ կետը խմբ. 30.03.06 N 218-Ն)

3. Խորհրդի նիստերը վարում է խորհրդի նախագահը, իսկ նրա բացակայության դեպքում` հիմնադրամի նախագահը:

4. Խորհրդի նիստն իրավազոր է, եթե նիստին մասնակցում է խորհրդի անդամների կեսից ավելին: Խորհրդի որոշումներն ընդունվում են խորհրդի անդամների ձայների պարզ մեծամասնությամբ: Ձայների հավասարության դեպքում նիստը նախագահողի ձայնը վճռորոշ է: Խորհրդի որոշումները ենթակա են պարտադիր կատարման և կենսագործվում են հիմնադրամի նախագահի հրամաններով:

Խորհրդի նիստերն արձանագրվում են:

(4-րդ կետը փոփ. 30.03.06 N 218-Ն)

5. Խորհրդի նիստերը դռնբաց են: Դռնբաց նիստերին կարող են ներկա լինել զանգվածային լրատվության միջոցների ներկայացուցիչներ: Խորհրդի որոշմամբ կարող են անցկացվել դռնփակ նիստեր:

III. ԽՈՐՀՐԴԻ ՆԻՍՏ ԱՆՑԿԱՑՆԵԼԸ

6. Խորհրդի նիստերն անցկացվում են սույն աշխատակարգի 2-րդ կետում սահմանված ժամկետում և կարգով: Խորհրդի նախագահը որոշում է խորհրդի նիստի անցկացման վայրը, օրը և ժամը, որոնք նշվում են նրա հաստատած` խորհրդի նիստի օրակարգի նախագծում: Խորհրդի յուրաքանչյուր անդամ իրավունք ունի հարց ներկայացնելու նիստի օրակարգում ընդգրկելու համար: Խորհրդին առաջարկություն ներկայացվում է նիստի օրակարգը հաստատելու ժամանակ:

(6-րդ կետը փոփ., խմբ., լրաց. 30.03.06 N 218-Ն)

7. Խորհրդի նիստի օրակարգում նշվում են`

ա) քննարկման ենթակա հարցերը,

բ) քննարկվող յուրաքանչյուր հարցը զեկուցողի անունը, ազգանունը,

գ) նիստին հրավիրված` խորհրդի անդամ չհանդիսացող անձանց անունները, ազգանունները,

դ) խորհրդի նիստի անցկացման վայրը, օրը և ժամը:

Խորհրդի յուրաքանչյուր առաջին պարտադիր նիuտում քննարկվում են հիմնադրամի նախորդ տարվա, իսկ երկրորդ նիստում` տվյալ տարվա բյուջեի կիսամյակային կատարողականի հաշվետվությունները: Հարցը ներկայացնում է հիմնադրամի նախագահը կամ հիմնադրամի համապատասխան պաշտոնատար անձը:

(7-րդ կետը փոփ., խմբ. 30.03.06 N 218-Ն)

8. Խորհրդի նիստի օրակարգը և քննարկվելիք հարցերին վերաբերող այլ անհրաժեշտ փաստաթղթերը խորհրդի անդամներին են ուղարկվում նիստից առնվազն 5 աշխատանքային օր առաջ:

9. Խորհրդի նիստերն արձանագրվում են` սույն աշխատակարգի IV բաժնի համաձայն:

10. Խորհրդի աշխատանքային գործունեության կազմակերպչական-տեխնիկական ապահովումը, այդ թվում` նիստի հաստատված օրակարգի նախագծի և նիստում քննարկվելիք հարցերին վերաբերող այլ անհրաժեշտ փաստաթղթերի առաքումը խորհրդի անդամներին իրականացնում է հիմնադրամի աշխատակազմը:

(10-րդ կետը փոփ. 30.03.06 N 218-Ն)

IV. ԽՈՐՀՐԴԻ ՆԻՍՏԻ ԱՐՁԱՆԱԳՐՄԱՆ ԵՎ ԽՈՐՀՐԴԻ ԳՈՐԾԱՎԱՐՈՒԹՅԱՆ ԿԱՐԳԸ

11. Խորհրդի նիստերն արձանագրում է հիմնադրամի աշխատակազմը:

(11-րդ կետը փոփ. 30.03.06 N 218-Ն)

12. Խորհրդի որոշմամբ նիստը կարող է տեսագրվել կամ ձայնագրվել:

13. Նիստի արձանագրությունն ընդգրկում է`

ա) նիստի օրակարգը,

բ) քննարկվող հարցերի, զեկուցումների և ելույթների հիմնական դրույթները,

գ) քվեարկության դրված հարցերի ճշգրիտ ձևակերպումները, յուրաքանչյուր հարցի քվեարկության արդյունքները, ինչպես նաև ընդունված որոշումները,

դ) հրավիրված անձանց ցուցակը,

ե) նիստին ներկա` զանգվածային լրատվության միջոցների ներկայացուցիչների ցուցակը:

Նիստի արձանագրությանը կցվում են քննարկված հարցերին վերաբերող փաստաթղթերը, այդ թվում` քվեարկության ներկայացված որոշումների նախագծերը, գրավոր զեկուցումների և ելույթների տեքստերը:

14. Նիստի արձանագրությունը կազմվում և 3 աշխատանքային օրվա ընթացքում և խորհրդի ընդունած որոշումների հետ միասին ստորագրության են ներկայացվում նիստը վարող անձին:

(14-րդ կետը փոփ. 30.03.06 N 218-Ն)

15. Խորհրդի նիստերի արձանագրությունները, քննարկված հարցերին վերաբերող փաստաթղթերը և ընդունված որոշումների բնօրինակները կարվում են հատուկ թղթապանակում և Հայաստանի Հանրապետության օրենսդրությամբ սահմանված կարգով պահվում հիմնադրամում:

16. Յուրաքանչյուր հարցի քվեարկության արդյունքները և ընդունված որոշումները նիստից հետո, 7 աշխատանքային օրվա ընթացքում, ներկայացվում են խորհրդի բոլոր անդամներին:

17. Խորհրդի անդամն իրավունք ունի ծանոթանալու նիստերի արձանագրություններին:

18. Նիստի արձանագրության և ելույթների, քննարկումների, քվեարկության արդյունքների, ընդունված որոշումների անհամապատասխանության հայտնաբերման դեպքում խորհրդի անդամն իրավունք ունի պահանջելու, որ արձանագրության տեքստը վերանայվի, և դրա մեջ կատարվեն համապատասխան լրացումներ ու փոփոխություններ: Նիստի տեսագրության կամ ձայնագրության բացակայության դեպքում նիստի արձանագրության տեքստում տեղ գտած անհամապատասխանությանն առնչվող վեճերը քննարկվում և լուծվում են խորհրդի նիստում:

V. ԽՈՐՀՐԴԻ ԱՐՏԱՀԵՐԹ ՆԻՍՏԸ

VI. ԽՈՐՀՐԴԻ ՈՐՈՇՈՒՄՆԵՐԻ ԿԱՏԱՐՄԱՆ ՆԿԱՏՄԱՄԲ ՎԵՐԱՀՍԿՈՂՈՒԹՅՈՒՆԸ

23. Խորհրդի որոշումների կատարման նկատմամբ ընթացիկ վերահսկողությունն իրականացնում է հիմնադրամը` դրանց կատարման ընթացքի մասին պարբերաբար և խորհրդի որոշմամբ սահմանած ժամկետներում տեղեկատվություն տրամադրելով խորհրդի նախագահին: Հիմնադրամի նախագահը պատասխանատվություն է կրում խորհրդի որոշումները ժամանակին և ճշգրիտ կատարելու համար:

(23-րդ կետը փոփ. 30.03.06 N 218-Ն)

24. Խորհրդի պարտադիր նիստերում լսվում են խորհրդի նախկին նիստում ընդունված որոշումները կատարելու մասին հաշվետվությունները:

(24-րդ կետը փոփ. 30.03.06 N 218-Ն)

25. Խորհրդի նիստերը լուսաբանվում են զանգվածային լրատվության միջոցներով:

(հավելվածը փոփ., խմբ., լրաց. 30.03.06 N 218-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ վարչապետի 2004 թ. օգոստոսի 2-ի N 498-Ն որոշման

Կ Ա Զ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ԽՈՐՀՐԴԻ

 

Ս. Սարգսյան	- ՀՀ վարչապետ (խորհրդի նախագահ)
Վ. Խաչիկյան	- ՀՀ սոցիալական ապահովագրության  պետական հիմնադրամի նախագահ
Լ. Գևորգյան	- ՀՀ  Նախագահի օգնական
Գ. Մալխասյան	- ՀՀ արդարադատության նախարարի առաջին տեղակալ
Ա. Պետրոսյան	- ՀՀ աշխատանքի և սոցիալական հարցերի նախարարի առաջին տեղակալ
Պ. Սաֆարյան	- ՀՀ ֆինանսների և էկոնոմիկայի նախարարի առաջին տեղակալ
Վ. Տերտերյան	- ՀՀ տարածքային կառավարման նախարարի տեղակալ
Լ. Յոլյան	- ՀՀ առողջապահության նախարարի տեղակալ
Ռ. Քոչարյան	- ՀՀ կառավարությանն առընթեր հարկային պետական ծառայության պետի տեղակալ
Ա. Ղազարյան	- Հայաստանի արդյունաբերողների և գործարարների միության նախագահ (համաձայնությամբ)
Բ. Խառատյան	- ՀՀ արհեստակցական միությունների կոնֆեդերացիայի նախագահի տեղակալ (համաձայնությամբ)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան