«ՕԶՈՆԱՅԻՆ ՇԵՐՏԸ ՔԱՅՔԱՅՈՂ ՆՅՈՒԹԵՐԻ ՄԱՍԻՆ» ՄՈՆՐԵԱԼԻ ԱՐՁԱՆԱԳՐՈՒԹՅԱՆ ՓՈՓՈԽՈՒԹՅՈՒՆՆԵՐ ԸՆԴՈՒՆՎԱԾ ՄՈՆՐԵԱԼՈՒՄ 1997թ. ՍԵՊՏԵՄԲԵՐԻ 17-19-ը ԿԱՅԱՑԱԾ ԿՈՂՄԵՐԻ ԻՆՆԵՐՈՐԴ ՀԱՆԴԻՊՄԱՆ ԺԱՄԱՆԱԿ

ՀՈԴՎԱԾ 1

ՓՈՓՈԽՈՒԹՅՈՒՆ

Ա. Հոդված 4, 1qua. կետ

Արձանագրության 4-րդ հոդվածի 1 ter կետից հետո պետք է ավելացվի հետևյալ կետը.

1 qua. Սույն կետի ուժի մեջ մտնելուց հետո` մեկ տարվա ընթացքում, յուրաքանչյուր Կողմ պետք է արգելի Ե Հավելվածում նշված վերահսկվող նյութերի ներմուծումը սույն Արձանագրության Կողմ չհանդիսացող ցանկացած պետությունից:

Բ. Հոդված 4, 2 qua կետ

Արձանագրության 4-րդ հոդվածի 2 ter կետից հետո պետք է ավելացվի հետևյալ կետը.

2 qua. Սույն կետի ուժի մեջ մտնելուց մեկ տարի հետո յուրաքանչյուր Կողմ պետք է արգելի Ե Հավելվածում նշված վերահսկվող նյութերի արտահանումը սույն Արձանագրության Կողմ չհանդիսացող ցանկացած պետություն:

Գ. Հոդված 4, 5-րդ, 6-րդ և 7-րդ կետեր

Արձանագրության 4-րդ հոդվածի 5-րդ, 6-րդ և 7-րդ կետերում.

«և Գ Հավելվածի II Խումբ» բառերին պետք է փոխարինեն.

«Գ Հավելվածի և Ե Հավելվածի II Խումբ» բառերը:

Դ. Հոդված 4, 8-րդ կետ

Արձանագրության 4-րդ հոդվածի 8-րդ կետում

«Հոդված 2Է» բառերին պետք է փոխարինեն

«Հոդվածներ 2Է և 2Ը» բառերը:

Ե. Հոդված 4Ա. Կողմերի հետ առևտրի վերահսկումը

Արձանագրությունը պետք է լրացվի հետևյալ` 4Ա հոդվածով.

1. Եթե վերահսկվող նյութի համար համապատասխան փուլային վերացման ժամկետի լրանալուց հետո Կողմը, չնայած Արձանագրությամբ ստանձնած իր պարտավորությունները կատարելու նպատակով ձեռնարկած որոշակի քայլերին, ի վիճակի չէ դադարեցնելու տվյալ նյութի արտադրությունը ներքին սպառման համար, բացառությամբ Կողմերի միջև համաձայնեցված էական օգտագործման նպատակներով նախատեսված դեպքերի, նա պետք է արգելի այդ նյութի օգտագործված, վերաշրջանառված և վերամշակված քանակությունների արտահանումը` բացառությամբ ոչնչացման նպատակով նախատեսված դեպքերի:

2. Սույն հոդվածի 1-ին կետը կկիրառվի` առանց վնասելու Կոնվենցիայի 11-րդ հոդվածի գործողությունն ու Արձանագրության 8-րդ հոդվածի համաձայն մշակված պարտավորությունների չկատարման ընթացակարգը:

Զ. Հոդված 4Բ. Արտոնագրում

Արձանագրությունը պետք է լրացվի հետևյալ` 4Բ հոդվածով.

1. Յուրաքանչյուր Կողմ պետք է մինչև 2000 թ. հունվարի 1-ը կամ սույն հոդվածի` իր համար ուժի մեջ մտնելուն հաջորդող երեք ամիսների ընթացքում, կախված նրանից, թե որն է նշված երկու ժամկետներից ամենաուշը, ստեղծի և իրականացնի Ա, Բ, Գ և Ե Հավելվածներում նշված նոր, օգտագործված, վերաշրջանառված և վերամշակված վերահսկվող նյութերի ներմուծման և արտահանման արտոնագրման համակարգ:

2. Չնայած սույն հոդվածի 1-ին կետի` 5-րդ հոդվածի 1-ին կետի համաձայն գործող ցանկացած Կողմ, որը որոշում է, որ ինքն ի վիճակի չէ ստեղծելու և իրականացնելու Գ և Ե Հավելվածներում նշված վերահսկվող նյութերի ներմուծման և արտահանման արտոնագրման համակարգ, կարող է հետաձգել այդ գործողությունների իրականացումը, համապատասխանաբար, մինչև 2005թ. հունվարի 1-ը և 2002թ. հունվարի 1-ը:

3. Յուրաքանչյուր Կողմ պետք է իր արտոնագրման համակարգի ներդրմանը հաջորդող երեք ամիսների ընթացքում Քարտուղարությանը ներկայացնի հաշվետվություն այդ համակարգի ստեղծման և գործողության վերաբերյալ:

4. Քարտուղարությունը պետք է պարբերաբար պատրաստի և բոլոր Կողմերին ուղարկի այն Կողմերի ցանկը, որոնք իրեն ներկայացրել են հաշվետվություն իրենց արտոնագրման համակարգերի մասին և նաև պետք է այս տեղեկատվությունը ներկայացնի Իրականացնող հանձնաժողովին, որպեսզի վերջինս քննարկի այն և համապատասխան առաջարկություններ անի Կողմերին:

ՀՈԴՎԱԾ 2

ԿԱՊԸ 1997թ. ԿԱՏԱՐՎԱԾ ՓՈՓՈԽՈՒԹՅԱՆ ՀԵՏ

Ոչ մի պետություն կամ տնտեսական ինտեգրման տարածաշրջանային կազմակերպություն չի կարող ի պահ հանձնել սույն Փոփոխության վավերացման, ընդունման, հաստատման կամ միացման մասին որևէ փաստաթուղթ, եթե նա նախօրոք կամ համաժամանակյա կարգով չի ներկայացրել 1992թ. նոյեմբերի 25-ի` Կոպենհագենում կայացած Կողմերի չորրորդ հանդիպման ժամանակ ընդունված Փոփոխությանն առնչվող այդպիսի փաստաթուղթ:

ՀՈԴՎԱԾ 3

ՈՒԺԻ ՄԵՋ ՄՏՆԵԼԸ

1. Սույն Փոփոխությունն ուժի մեջ է մտնում 1999թ. հունվարի 1-ին` պայմանով որ պետությունների կամ տարածաշրջանային տնտեսական ինտեգրման տարածաշրջանային կազմակերպությունների կողմից ի պահ կհանձնվեն «Օզոնային շերտը քայքայող նյութերի մասին» Մոնրեալի արձանագրության վավերացման, ընդունման կամ հաստատման մասին առնվազն քսան փաստաթուղթ: Մինչ հիշյալ ամսաթիվը սույն պայմանը չկատարելու դեպքում Փոփոխությունն ուժի մեջ կմտնի պայմանը կատարելու օրվան հաջորդող իննսուներորդ օրը:

2. 1-ին կետի նպատակների համար` տարածաշրջանային տնտեսական ինտեգրման կազմակերպության կողմից ի պահ հանձնված ցանկացած նման փաստաթուղթ չի համարվի հավելյալ նման կազմակերպության անդամ պետությունների կողմից ի պահ հանձնված փաստաթղթերին:

3. Սույն Փոփոխության` 1-ին կետում սահմանված կարգով ուժի մեջ մտնելուց հետո Արձանագրության ցանկացած այլ Կողմի համար այն ուժի մեջ է մտնում Կողմի վավերացման, ընդունման կամ հաստատման մասին փաստաթղթերն ի պահ հանձնելու օրվան հաջորդող իննսուներորդ օրը:

Հայաստանի Հանրապետության համար ուժի մեջ է մտել 2009թ. հունվարի 18-ին: