«Գրանցված է»
ՀՀ արդարադատության
նախարարության կողմից
9 ապրիլի 2007 թ.
Պետական գրանցման թիվ 05007167

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

20 փետրվարի 2007 թ.

թիվ 54-Ն

Ո Ր Ո Շ ՈՒ Մ

2006-2007 ԹՎԱԿԱՆՆԵՐԻ ՀՈՒՇԱԴՐԱՄՆԵՐԻ ԹՈՂԱՐԿՄԱՆ ԾՐԱԳՐՈՎ ՆԱԽԱՏԵՍՎԱԾ ՀՈՒՇԱԴՐԱՄՆԵՐԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ԵՎ ԴՐԱՆՑ ՆԿԱՐԱԳՐՈՒԹՅՈՒՆՆԵՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «է» կետը և հաշվի առնելով Հայաստանի Հանրապետության կենտրոնական բանկի խորհրդի 2006 թվականի ապրիլի 11-ի «2006-2007 թվականների հուշադրամների թողարկման ծրագիրը և հուշադրամների չափանիշները հաստատելու մասին» թիվ 155-Ն որոշումը՝ Հայաստանի Հանրապետության կենտրոնական բանկի խորհուրդը որոշում է.

1. 2007 թվականի ապրիլի 16-ից շրջանառության մեջ դնել «Հայկ Նահապետ» ոսկե հուշադրամը, «Մատենադարանի հիմնադրման 50-ամյակ» արծաթե հուշադրամը, «Խաղող» արծաթե հուշադրամը։

2. 2007 թվականի մայիսի 7-ից շրջանառության մեջ դնել «Շուշիի ազատագրման 15-ամյակ» ոսկե հուշադրամը։

3. Հաստատել սույն որոշման 1-ին և 2-րդ կետերով սահմանված հուշադրամների նկարագրությունները՝ համաձայն հավելվածի (կցվում է)։

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

ՀՀ կենտրոնական բանկի նախագահի տեղակալ	Ա. Ջավադյան
2007 թ. փետրվարի 26 Երևան

	Հավելված
	Հաստատված է ՀՀ կենտրոնական բանկի խորհրդի 2007 թվականի փետրվարի 20-ի թիվ 54-Ն որոշմամբ

Ն Կ Ա Ր Ա Գ Ր ՈՒ Թ Յ ՈՒ Ն

«Հայկ Նահապետ» ոսկե, «Մատենադարանի հիմնադրման 50-ամյակ» արծաթե, «Խաղող» արծաթե, «Շուշիի ազատագրման 15-ամյակ» ոսկե հուշադրամների

«Հայկ Նահապետ» հուշադրամի նկարագրությունը

Հայաստանի Հանրապետության կենտրոնական բանկը Հայ մշակույթի պատմությանը նվիրված հուշադրամների շարքում թողարկել է 5000 դրամ անվանական արժեքով «Հայկ Նահապետ» ոսկե հուշադրամը:

Հուշադրամի դիմերեսի արտաքին շրջանակում տեղադրված է «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ 2007» մակագրությունը: Ներքին շրջանակը բաժանված է երկու մասի՝ ձախ կիսաշրջանակում պատկերված են Հայաստանի Հանրապետության զինանշանը և հուշադրամի անվանական արժեքը՝ 5000 ԴՐԱՄ: Աջ կիսաշրջանակում պատկերված է «Օրիոն» կամ «Հայկ» համաստեղությունը, որի վերևի մասում գրված են «Հայկ» և «orion» բառերը:

Հուշադրամի դարձերեսի շրջանագծով տեղադրված են «ՀԱՅԿ ՆԱՀԱՊԵՏ» և «HAIK NAHAPET» բառերը, իսկ ամբողջ մակերեսին Հայկ Նահապետի պատկերն է (քանդակագործ Կ. Նուրիջանյանի կերտած հուշարձանը):

Հուշադրամն իր թափանցիկ պատիճով և իսկության հավաստագրով տեղադրված է կաշվե տուփի մեջ:

Հուշադրամի ուրվագծերի հեղինակներն են Էդուարդ Կուրղինյանը (դիմերես) և Հարություն Սամուելյանը (դարձերես);

Հուշադրամը հատվել է Չեխիայի դրամահատարանում:

Հուշադրամի բնութագիրը՝

Անվանական արժեքը	5000 դրամ
Մետաղը և հարգը	ոսկի, 9000
Զանգվածը	4,3 գ
Տրամագիծը	18,0 մմ
Դրամաշուրթը	ատամնավոր
Որակը	սովորական
Տպաքանակը	3000 հատ:

«Մատենադարանի հիմնադրման 50-ամյակ» հուշադրամի նկարագրությունը

Հայաստանի Հանրապետության կենտրոնական բանկի կողմից թողարկված 1957 դրամ անվանական արժեքով արծաթե հուշադրամը նվիրված է Երևանի Մեսրոպ Մաշտոցի անվան Մատենադարանի հիմնադրման 50-ամյակին:

Հուշադրամի դիմերեսի վերևի մասում շրջանագծով մակագրված են «ՄԱՏԵՆԱԴԱՐԱՆ» և «MATENADARAN» բառերը: Մեջտեղի մասում երկայնքով պատկերված է Մատենադարանի շենքը, որի ներքևի հատվածում տեղադրված է հուշադրամի անվանական արժեքը՝ 1957 ԴՐԱՄ, իսկ վերևի հատվածում՝ «50-ամյակ» և «50-th Anniversary» մակագրությունները:

Հուշադրամի դարձերեսի արտաքին շրջանագծով տեղադրված է «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ 2007» մակագրությունը, իսկ ներքին շրջանագիծը իրենից ներկայացնում Է մի դրվագ Մատենադարանի դռան վրա փորագրած զարդանախշից:

Հուշադրամն իր թափանցիկ պատիճով և իսկության հավաստագրով տեղադրված Է պլաստմասսայե տուփի մեջ:

Ուրվագծերի հեղինակն է՝ Էդուարդ Կուրղինյանը:

Հուշադրամը հատվել է Չեխիայի դրամահատարանում:

Հուշադրամի բնութագիրը՝

Անվանական արժեքը	1957 դրամ
Մետաղը և հարգը	արծաթ, 9250
Զանգվածը	33,6 գ
Տրամագիծը	40,0 մմ
Դրամաշուրթը	ատամնավոր
Որակը	պրուֆ
Տպաքանակը	500 հատ:

«Խաղող» հուշադրամի նկարագրությունը

Հայաստանի Հանրապետության կենտրոնական բանկի կողմից թողարկված 1000 դրամ անվանական արժեքով «Խաղող» արծաթե հուշադրամը շարունակում է Հայաստանի բուսական և կենդանական աշխարհին նվիրված հուշադրամների թեմատիկ շարքը:

Հուշադրամի դիմերեսի ներքին շրջանակում պատկերված է Հայաստանի Հանրապետության զինանշանը: Զինանշանի տակ տեղադրված է հուշադրամի անվանական արժեքը՝ 1000 ԴՐԱՄ: Ներքին շրջանակի եզրաշրթով մակագրված է՝ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ»: Արտաքին շրջանակում պատկերված է խաղողի և տերևի տեսքով զարդանախշ:

Հուշադրամի դարձերեսի ամբողջ մակերեսով պատկերված է խաղողի ողկույզը՝ իր տերևով, որի աջ մասում մակագրված են «ՀԱՅԿԱԿԱՆ ԽԱՂՈՂ» բառերը:

Հուշադրամն իր թափանցիկ պատիճով և իսկության հավաստագրով տեղադրված է պլաստմասսայե տուփի մեջ:

Ուրվագծերի հեղինակն է՝ Էդուարդ Կուրղինյանը:

Հուշադրամը հատվել է Չեխիայի դրամահատարանում:

Հուշադրամի բնութագիրը՝

Անվանական արժեքը	1000 դրամ
Մետաղը և հարգը	արծաթ, 9250
Զանգվածը	33,6 գ
Տրամագիծը	40,0 մմ
Դրամաշուրթը	ատամնավոր
Որակը	պրուֆ
Տպաքանակը	500 հատ:

«Շուշիի ազատագրման 15-ամյակ» հուշադրամի նկարագրությունը

Հայաստանի Հանրապետության կենտրոնական բանկը թողարկել է 10.000 դրամ անվանական արժեքով ոսկե հուշադրամ՝ նվիրված Շուշիի ազատագրման 15-ամյակին:

Հուշադրամի դիմերեսի արտաքին շրջանակում մակագրված է՝ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ 2007»: Ներքին շրջանակում պատկերված են հավերժության խորհրդանիշն ու ճախրող արծիվը, իսկ ներքևի հատվածում տեղադրված է հուշադրամի անվանական արժեքը՝ 10000 ԴՐԱՄ:

Հուշադրամի դարձերեսի մեջտեղի մասում պատկերված է «Շուշիի ազատագրման համար» մեդալը, որից փոքր-ինչ ձախ Հայաստանի Հանրապետության զինված ուժերի զինանշանն է: Հուշադրամի արտաքին եզրագծով մակագրված է՝ «ՇՈՒՇԻԻ ԱԶԱՏԱԳՐՄԱՆ 15-ԱՄՅԱԿ»:

Հուշադրամը իր թափանցիկ պատիճով և իսկության հավաստագրով տեղադրված Է կաշվե տուփի մեջ:

Ուրվագծերի հեղինակն է՝ Հարություն Սամուելյանը:

Հուշադրամը հատվել է Լեհաստանի դրամահատարանում:

Հուշադրամի բնութագիրը՝

Անվանական արժեքը	10.000 դրամ
Մետաղը և հարգը	ոսկի, 9000
Զանգվածը	8,6 գ
Տրամագիծը	22,0 մմ
Որակը	պրուֆ
Դրամաշուրթը	ատամնավոր
Տպաքանակը	1000 հատ: