«Վավերացնում եմ»
Հայաստանի Հանրապետության
Նախագահ Ռ. Քոչարյան
23 օգոստոսի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 օգոստոսի 2006 թվականի N 1157-Ա

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԱԳԱԾՈՏՆԻ ԵՎ ՇԻՐԱԿԻ ՄԱՐԶՊԵՏԱՐԱՆՆԵՐԻՆ ԳՈՒՄԱՐ ՀԱՏԿԱՑՆԵԼՈՒ ՄԱՍԻՆ

«Հայաստանի Հանրապետության բյուջետային համակարգի մասին» Հայաստանի Հանրապետության օրենքի 19-րդ հոդվածի 3-րդ կետին համապատասխան` Հայաստանի Հանրապետության կառավարությունը որոշում է.

1. Հայաստանի Հանրապետության Արագածոտնի և Շիրակի մարզպետարաններին Հայաստանի Հանրապետության 2006 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդի հաշվին հատկացնել համապատասխանաբար 13.500.0 հազ. դրամ և 9,800.0 հազ. դրամ (բյուջետային ծախսերի տնտեսագիտական դասակարգման «Պետական բյուջեից համայնքների բյուջեներին տրվող նպատակային հատկացումներ՝ սուբվենցիաներ» հոդվածով)` 2006 թվականի հուլիսի 4-ին Հայաստանի Հանրապետության Արագածոտնի և Շիրակի մարզերի մի շարք համայնքներում տեղացած հորդառատ անձրևների հետևանքով փլուզված միջհամայնքային կամուրջների նորոգման նպատակով տուժած համայնքներին սուբվենցիա տրամադրելու համար, որից` Հայաստանի Հանրապետության Արագածոտնի մարզի`

ա) Սարալանջի գյուղական համայնքին` 5,500.0 հազ. դրամ` համայնքի քանդված կամրջի վերականգնման համար,

բ) Լուսագյուղի գյուղական համայնքին` 6,000.0 հազ. դրամ` համայնքի 2 քանդված կամրջի վերականգնման համար,

գ) Միրաքի գյուղական համայնքին` 2,000.0 հազ. դրամ` համայնքի քանդված կամրջի վերականգնման համար:

Հայաստանի Հանրապետության Շիրակի մարզի Անուշավան գյուղի Չայ գետակի փլուզված միջհամայնքային կամրջի նորոգման համար` 9,800.0 հազ. դրամ:

2. Սահմանել, որ սույն որոշման 1-ին կետում նշված սուբվենցիայի գումարների՝ Հայաստանի Հանրապետության Արագածոտնի մարզի Սարալանջի, Լուսագյուղի և Միրաքի գյուղական համայնքների և Շիրակի մարզի Անուշավանի գյուղական համայնքի կողմից նպատակային օգտագործման նկատմամբ վերահսկողությունը համապատասխանաբար իրականացնում են Հայաստանի Հանրապետության Արագածոտնի և Շիրակի մարզպետները:

3. Հայաստանի Հանրապետության Արագածոտնի և Շիրակի մարզպետներին՝ սույն որոշման 1-ին կետում նշված սուբվենցիայի գումարները նշված համայնքներին տրամադրել համայնքների ղեկավարների հետ նախապես կնքելով սուբվենցիայի տրամադրման պայմանների մասին պայմանագրեր՝ Հայաստանի Հանրապետության 2005 թվականի դեկտեմբերի 15-ի «Հայաստանի Հանրապետության 2006 թվականի պետական բյուջեի կատարումն ապահովող միջոցառումների մասին» N 2162-Ն որոշման 5.13-րդ կետի պահանջներին համապատասխան:

Հայաստանի Հանրապետության վարչապետ	Ա. Մարգարյան
2006 թ. օգոստոսի 19 Երևան