«Վավերացնում եմ»
Հայաստանի Հանրապետության
Նախագահ Ռ. Քոչարյան
21 հունիսի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

1 հունիսի 2006 թվականի N 826-Ն

ՀԱՆՐԱԿՐԹԱԿԱՆ ԵՎ ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ՆԱԽԱԶՈՐԱԿՈՉԱՅԻՆ ՈՒ ԶՈՐԱԿՈՉԱՅԻՆ ՏԱՐԻՔԻ ՊԱՏԱՆԻՆԵՐԻՆ ԶԻՆՎՈՐԱԿԱՆ ԾԱՌԱՅՈՒԹՅԱՆԸ ՖԻԶԻԿԱՊԵՍ ՆԱԽԱՊԱՏՐԱՍՏԵԼՈՒ ԵՎ ԴՐԱ ՆԿԱՏՄԱՄԲ ՎԵՐԱՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Մանկապատանեկան սպորտի մասին» Հայաստանի Հանրապետության օրենքի 9-րդ հոդվածի պահանջներով` Հայաստանի Հանրապետության կառավարությունը որոշում է.

1. Սահմանել հանրակրթական և մասնագիտական ուսումնական հաստատություններում նախազորակոչային ու զորակոչային տարիքի պատանիներին զինվորական ծառայությանը ֆիզիկապես նախապատրաստելու և դրա նկատմամբ վերահսկողություն իրականացնելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2006 թ. հունիսի 20 Երևան

Հավելված ՀՀ կառավարության 2006 թվականի հունիսի 1-ի N 826-Ն որոշման

Կ Ա Ր Գ

ՀԱՆՐԱԿՐԹԱԿԱՆ ԵՎ ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ՆԱԽԱԶՈՐԱԿՈՉԱՅԻՆ ՈՒ ԶՈՐԱԿՈՉԱՅԻՆ ՏԱՐԻՔԻ ՊԱՏԱՆԻՆԵՐԻՆ ԶԻՆՎՈՐԱԿԱՆ ԾԱՌԱՅՈՒԹՅԱՆԸ ՖԻԶԻԿԱՊԵՍ ՆԱԽԱՊԱՏՐԱՍՏԵԼՈՒ ԵՎ ԴՐԱ ՆԿԱՏՄԱՄԲ ՎԵՐԱՀՍԿՈՂՈՒԹՅՈՒՆ ԻՐԱԿԱՆԱՑՆԵԼՈՒ

1. Սույն կարգով սահմանվում են հանրակրթական և մասնագիտական ուսումնական հաստատություններում նախազորակոչային ու զորակոչային տարիքի պատանիներին զինվորական ծառայությանը ֆիզիկապես նախապատրաստելու և դրա նկատմամբ վերահսկողություն իրականացնելու պայմանները: Սույն կարգը նպատակ ունի օժանդակելու պատանիների առողջության ամրապնդմանը, նրանց առողջ ապրելակերպի ձևավորմանն ու ներդաշնակ զարգացմանը, Հայաստանի Հանրապետության զինված ուժերում ծառայելու համար ֆիզիկապես կոփված և ռազմահայրենասիրական ոգով դաստիարակված պատանիների պատրաստմանը, ինչպես նաև` բարելավելու և գնահատելու պատանիների ֆիզիկական պատրաստվածությունը:

2. Զինվորական ծառայությանը նախազորակոչային ու զորակոչային տարիքի պատանիների ֆիզիկական նախապատրաստությունն իրականացվում է հանրակրթական և մասնագիտական ուսումնական հաստատություններում ուսումնական պլանով նախատեսված «Ֆիզիկական կուլտուրա» առարկայի պարտադիր ժամաքանակների սահմաններում և պատանիների ֆիզիկական պատրաստվածության գնահատման նորմատիվների աղյուսակին համապատասխան` համաձայն ձևի, որոնց բովանդակությանը և անցկացման ժամկետներին նախազորակոչային և զորակոչային տարիքի պատանիներին ծանոթացնում են յուրաքանչյուր ուսումնական տարվա սկզբին:

3. Նախազորակոչային ու զորակոչային տարիքի պատանիների ֆիզիկական նախապատրաստության գնահատման նպատակով, ֆիզիկական պատրաստվածության գնահատման նորմատիվների ընդունման համար սահմանված ժամկետից մեկ ամիս առաջ, ուսումնական հաստատության տնօրենի հրամանով ստեղծվում է հանձնաժողով, որի կազմում ընդգրկվում են ուսումնական բաժնի վարիչը, ֆիզկուլտուրայի ուսուցիչները, դասախոսները, ֆիզղեկը, զինղեկը, ուսումնական հաստատությանը կցված զորամասի ֆիզիկական պատրաստության պետը, ծնողական կոմիտեի ներկայացուցիչներ: Ֆիզիկական պատրաստվածության գնահատման նորմատիվների ընդունումը կազմակերպվում է ուսումնական հաստատությունների մարզադահլիճներում, մարզահրապարակներում, մերձակա կամ ուսումնական հաստատություններին կցված զորամասերի մարզադաշտերում՝ հանդիսավոր պայմաններում, խստագույնս պահպանելով վարժությունների կատարման անվտանգության կանոնները:

4. Զինվորական ծառայությանը նախազորակոչային ու զորակոչային տարիքի պատանիների ֆիզիկական նախապատրաստության, ինչպես նաև նորմատիվների ընդունման գործընթացի նկատմամբ վերահսկողությունն իրականացնում են Հայաստանի Հանրապետության պաշտպանության նախարարության ու Հայաստանի Հանրապետության կրթության և գիտության նախարարության համապատասխան ստորաբաժանումները:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև

Ա Ղ Յ ՈՒ Ս Ա Կ

ՆԱԽԱԶՈՐԱԿՈՉԱՅԻՆ ԵՎ ԶՈՐԱԿՈՉԱՅԻՆ ՏԱՐԻՔԻ ՊԱՏԱՆԻՆԵՐԻ ՖԻԶԻԿԱԿԱՆ ՊԱՏՐԱՍՏՎԱԾՈՒԹՅԱՆ ԳՆԱՀԱՏՄԱՆ ՆՈՐՄԱՏԻՎՆԵՐԻ

NN ը/կ	Վարժությունները	Նախազորակոչային տարիքի պատանիների գնահատականները			Զորակոչային տարիքի պատանիների գնահատականները
		բավարար	լավ	գերազանց	բավարար	լավ	գերազանց
1.	Վազք` 100 մ, իսկ համապատասխան վազքուղու բացակայության դեպքում՝ վազք`60 մ	16.5 վրկ 10.0 վրկ	16.0 վրկ 9.5 վրկ	15.5 վրկ 9.0 վրկ	16.2 վրկ 9.2 վրկ	15.5 վրկ 8.8 վրկ	14.8 վրկ 8.3 վրկ
2.	Ձգումներ պտտաձողի վրա	5 անգամ	7 անգամ	9 անգամ	6 անգամ	9 անգամ	11 անգամ
3.	Վազք` 1000 մ	4.25 րոպե	4.15 րոպե	3.50 րոպե	4.15 րոպե	3.50 րոպե	3.40 րոպե
4.	Նռնակի նետում` 600 գ	20 մ	25 մ	30 մ	30 մ	35 մ	40 մ