ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

1 մայիսի 2000 թվականի N 233
քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ԵՎ ՍՈՑԻԱԼԱԿԱՆ ԱՊԱՀՈՎՈՒԹՅԱՆ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆՆ ՈՒ ԿԵՆՏՐՈՆԱԿԱՆ ԱՊԱՐԱՏԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության Նախագահի 2000 թվականի փետրվարի 28-ի «Հայաստանի Հանրապետության կառավարության կառուցվածքում փոփոխություններ կատարելու մասին» հրամանագրին և Հայաստանի Հանրապետության վարչապետի 2000 թվականի մարտի 2-ի «Հայաստանի Հանրապետության Նախագահի 2000 թվականի փետրվարի 28-ի «Հայաստանի Հանրապետության կառավարության կառուցվածքում փոփոխություններ կատարելու մասին» հրամանագրի կատարմանն ուղղված միջոցառումների մասին» N 84 որոշմանը համապատասխան`

1. Հաստատել`

ա) Հայաստանի Հանրապետության առողջապահության և սոցիալական ապահովության նախարարության կանոնադրությունը (կցվում է).

բ) Հայաստանի Հանրապետության առողջապահության և սոցիալական ապահովության նախարարության կենտրոնական ապարատի կառուցվածքը (կցվում է):

2. Հայաստանի Հանրապետության վարչապետի 1998 թվականի նոյեմբերի 6-ի «Պետական կառավարման մարմինների աշխատողների առավելագույն թվաքանակ և ղեկավարների տեղակալների թվաքանակ սահմանելու մասին» N 620 որոշման հավելվածում կատարել հետևյալ փոփոխությունները`

ա) 4-րդ տողը շարադրել հետևյալ խմբագրությամբ.

«4. ՀՀ առողջապահության և սոցիալական ապահովության նախարարություն 185 5 1».

բ) ուժը կորցրած ճանաչել 23-րդ տողը:

3. Հայաստանի Հանրապետության ֆինանսների և էկոնոմիկայի նախարարությանը` 15-օրյա ժամկետում սահմանված կարգով Հայաստանի Հանրապետության կառավարություն ներկայացնել առաջարկություն Հայաստանի Հանրապետության 2000 թվականի պետական բյուջեում համապատասխան փոփոխություններ կատարելու վերաբերյալ:

4. Ուժը կորցրած ճանաչել`

ա) Հայաստանի Հանրապետության վարչապետի 1996 թվականի փետրվարի 19-ի «Հայաստանի Հանրապետության առողջապահության նախարարության կանոնադրությունը և կենտրոնական ապարատի կառուցվածքը հաստատելու մասին» N 61 որոշման 1-ին կետը` Հայաստանի Հանրապետության առողջապահության նախարարության կանոնադրությունը հաստատելու մասով.

բ) Հայաստանի Հանրապետության վարչապետի 1997 թվականի ապրիլի 9-ի «Հայաստանի Հանրապետության սոցիալական ապահովության նախարարության կանոնադրությունը և աշխատակազմի կառուցվածքը հաստատելու մասին» N 130 որոշման 1-ին կետը` Հայաստանի Հանրապետության սոցիալական ապահովության նախարարության կանոնադրությունը հաստատելու մասով.

գ) Հայաստանի Հանրապետության վարչապետի 1997 թվականի հուլիսի 8-ի «Հայաստանի Հանրապետության վարչապետի ապրիլի 9-ի N 130 որոշման մեջ փոփոխություններ կատարելու մասին» N 297 որոշման «բ» կետը.

դ) Հայաստանի Հանրապետության վարչապետի 1997 թվականի հոկտեմբերի 13-ի «Հայաստանի Հանրապետության վարչապետի 1997 թվականի ապրիլի 9-ի N 130 որոշման մեջ փոփոխություն կատարելու մասին» N 470 որոշումը.

ե) Հայաստանի Հանրապետության վարչապետի 1998 թվականի հունիսի 29-ի «Հայաստանի Հանրապետության սոցիալական ապահովության նախարարության աշխատակազմի կառուցվածքը հաստատելու մասին» N 378 որոշման 1-ին կետը.

զ) Հայաստանի Հանրապետության վարչապետի 1998 թվականի ապրիլի 22-ի «Հայաստանի Հանրապետության վարչապետի 1996 թվականի փետրվարի 19-ի N 61 որոշման մեջ փոփոխություն կատարելու մասին» N 203 որոշումը.

է) Հայաստանի Հանրապետության վարչապետի 1998 թվականի դեկտեմբերի 16-ի «Հայաստանի Հանրապետության վարչապետի 1998 թվականի հունիսի 29-ի N 378 որոշման մեջ լրացում կատարելու մասին» N 729 որոշումը.

ը) Հայաստանի Հանրապետության վարչապետի 1998 թվականի դեկտեմբերի 22-ի «Հայաստանի Հանրապետության առողջապահության նախարարության կենտրոնական ապարատի կառուցվածքը հաստատելու մասին» N 742 որոշման 1-ին կետը.

թ) Հայաստանի Հանրապետության վարչապետի 1999 թվականի հոկտեմբերի 27-ի «Հայաստանի Հանրապետության վարչապետի 1997 թվականի ապրիլի 9-ի N 130 և 1998 թվականի հունիսի 29-ի N 378 որոշումներում փոփոխություններ կատարելու մասին» N 672 որոշումը:

Հայաստանի Հանրապետության վարչապետ

Ա. Սարգսյան

Հաստատված է ՀՀ վարչապետի 2000 թ. մայիսի 1-ի N 233 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

Հայաստանի Հանրապետության առողջապահության եվ սոցիալական ապահովության նախարարության

I. Ընդհանուր դրույթներ

1. Հայաստանի Հանրապետության առողջապահության և սոցիալական ապահովության նախարարությունը (այսուհետև` նախարարություն) գործադիր իշխանության հանրապետական մարմին է:

2. Նախարարությունը գործում է Հայաստանի Հանրապետության օրենսդրությանը համապատասխան և իր խնդիրները լուծելու նպատակով իրականացնում է Հայաստանի Հանրապետության օրենսդրությամբ ու սույն կանոնադրությամբ իրեն վերապահված լիազորությունները:

3. Նախարարությունն իր իրավասության սահմաններում Հայաստանի Հանրապետության անունից իր գործողություններով կարող է ձեռք բերել և իրականացնել գույքային և անձնական ոչ գույքային իրավունքներ ու պարտականություններ, ինչպես նաև հանդես գալ դատարանում:

4. Նախարարությունն իր իրավասության սահմաններում ընդունում է գերատեսչական նորմատիվ ակտեր:

5. Նախարարությունն ունի Հայաստանի Հանրապետության զինանշանի պատկերով և իր անվամբ կնիք, դրոշմակնիք, ձևաթուղթ:

6. Նախարարության կենտրոնական ապարատի պահպանման համար անհրաժեշտ ծախսերի ֆինանսավորումն իրականացվում է Հայաստանի Հանրապետության պետական բյուջեի միջոցների հաշվին:

II. Նախարարության հիմնական խնդիրներն ու գործառույթները

7. Նախարարության հիմնական խնդիրներն են`

ա) առողջապահական և սոցիալական ապահովության զարգացման քաղաքականության, ամենամյա պետական նպատակային ծրագրերի մշակումը և իրականացումը.

բ) համակարգի գործունեության կազմակերպումը, կառավարումը և ֆինանսավորումը.

գ) հանրային առողջապահության բնակչության հիգիենիկ և հակահամաճարակային անվտանգության ապահովումը.

դ) բնակչության առաջնային և մասնագիտացված բժշկական օգնության ու ծառայությունների ապահովումը.

ե) արտակարգ իրավիճակներում բնակչության բժշկական և սոցիալական ապահովության իրականացումը.

զ) պարտադիր և կամավոր ապահովագրության համակարգի ներդրումն ու կենսաթոշակային համակարգի կատարելագործումը.

է) բնակչության զբաղվածության քաղաքականության մշակումը և իրականացումը.

ը) աշխատանքի ոլորտի պետական կարգավորման միասնական քաղաքականության իրականացումը.

թ) պետական կենսաթոշակային ապահովության համակարգի ռազմավարության մշակումը և իրականացումը.

ժ) առողջապահության և սոցիալական ապահովության ոլորտում միջազգային ու միջգերատեսչական համագործակցության ապահովումը.

ժա) սոցիալական աջակցության քաղաքականության իրականացումը.

ժբ) բնակչության առողջական վիճակի ուսումնասիրությունը, հաշմանդամության ու մահացության նվազեցման և կյանքի տևողության ավելացման ծրագրերի մշակումն ու իրականացումը.

ժգ) առողջապահության և սոցիալական ապահովության ոլորտներին առնչվող օրենսդրական ակտերի մշակումն ու դրանք սահմանված կարգով ներկայացնելը:

8. Նախարարության հիմնական գործառույթներն են`

ա) բժշկական օգնության որակի չափորոշիչների ու չափանիշների մշակումը և դրանց նկատմամբ վերահսկողությունը.

բ) արտակարգ իրավիճակներում բնակչության առաջնահերթ բժշկական օգնության ապահովումը.

գ) մարզային առողջապահական կազմակերպությունների գործունեությունն ապահովող նորմատիվ փաստաթղթերի մշակումը և հաստատումը.

դ) նախարարության կազմակերպամեթոդական աշխատանքներն ապահովող նորմատիվ փաստաթղթերի մշակումը և այդ աշխատանքների իրականացումը.

ե) համակարգի վիճակի վերաբերյալ տեղեկատվության ստացումը և վերլուծությունը.

զ) նախարարության համակարգի ընկերությունների և հիմնարկների սահմանված կարգով ֆինանսավորումը, դրանց հաշվապահական հաշվեկշիռների ընդունումն ու ամփոփումը.

է) ոլորտում կառուցվածքային բարեփոխումների իրականացումը, գիտական նվաճումների ներդրումը, նյութատեխնիկական հագեցվածության, տեխնիկական և տեխնոլոգիական զարգացման քաղաքականության մշակումն ու իրականացումը.

ը) սանիտարական նորմերի ու կանոնների մշակումը, իրականացումը և դրանց նկատմամբ վերահսկողությունը.

թ) հիգիենիկ և հակահամաճարակային կարգի մշակումն ու դրա նկատմամբ վերահսկողությունը.

ժ) բնակչության առողջության վրա շրջակա միջավայրի ազդեցության գործոնների սոցիալ-հիգիենիկ հետազոտությունների կազմակերպումը.

ժա) վարակիչ և զանգվածային ոչ վարակիչ հիվանդությունների ու թունավորումների կանխարգելման նպատակով սանիտարահիգիենիկ և հակահամաճարակային միջոցառումների կազմակերպումը.

ժբ) բնակչության բժշկահիգիենիկ կրթության կազմակերպումը.

ժգ) հաշմանդամների բժշկասոցիալական փորձաքննության աշխատանքների կազմակերպումը.

ժդ) մոր և մանկան առողջության պահպանման ծրագրերի ու միջոցառումների մշակումը և իրականացումը.

ժե) բժշկական օգնության և ծառայությունների տեսակների ցանկի մշակումը, բուժօգնության որակի նկատմամբ վերահսկողությունը.

ժզ) բժշկական և դեղագործական գործունեություն իրականացնող բուժաշխատողների և կազմակերպությունների մասնագիտական լիցենզավորումը.

ի) բժշկական կադրերի պատրաստման, մասնագիտացման և շարունակական կրթման քաղաքականության մշակումն ու իրականացումը.

իա) անվճար բուժօգնության շրջանակներում դեղերի կենտրոնացված գնումների կազմակերպումը և դրանց նկատմամբ վերահսկողությունը.

իբ) հանրապետությունում արտադրվող և հանրապետություն ներմուծվող դեղորայքի տեսակների ու որակի նկատմամբ պետական վերահսկողության և դեղերի պետական գրանցման կազմակերպումը.

իգ) առողջապահության և սոցիալական ապահովության բնագավառում այլ պետությունների և միջազգային կազմակերպությունների հետ սահմանված կարգով համագործակցության իրականացումը.

իդ) աշխատանքի ոլորտի պետական կարգավորման միասնական քաղաքականության մշակումը.

իե) բնակչության զբաղվածության հանրապետական և տարածքային ծրագրերի մշակումն ու իրականացումը.

իզ) աշխատուժի Հայաստանի Հանրապետության օրենսդրությամբ սահմանված կարգով տեղաշարժի կազմակերպումը.

իէ) քաղաքացիների սոցիալական ապահովության անհատական ծածկագրային համակարգի ներդրումը.

իը) հաշմանդամների և տարեցների հիմնահարցերի քաղաքականության մշակումն ու իրականացումը.

իթ) սոցիալական անապահով ընտանիքների սոցիալական պաշտպանվածության ու հասցեական օգնության իրականացման ծրագրերի մշակումը և իրականացումը.

իժ) պրոթեզաօրթոպեդիկ օգնության կազմակերպումը, հաշմանդամների` վերականգնողական պարագաներով ապահովումը և վերականգնման միջոցառումների, պրոթեզաօրթոպեդիկ պարագաների արտադրության կազմակերպումը.

լ) մասնագիտացված կազմակերպություններում ու տնային պայմաններում միայնակ տարեց քաղաքացիների և հաշմանդամների խնամքի կազմակերպումը.

լա) ընտանիքի պահպանման և զարգացման, սոցիալական պաշտպանության նոր մեխանիզմների մշակումը և կատարելագործումը.

լբ) թափառաշրջիկ և մուրացիկ անձանց (այդ թվում` երեխաների) սոցիալական օգնության ծրագրերի մշակումը.

լգ) առանց ծնողական խնամքի մնացած երեխաների խնամքի կազմակերպումը ընտանիքներում և մասնագիտացված կազմակերպություններում.

լդ) հանրապետությունում որդեգրման ենթակա և որդեգրված երեխաների, որդեգրողների հաշվառման կազմակերպումը.

լե) խնամակալական և հոգաբարձական մարմինների գործունեության նկատմամբ վերահսկողությունը.

լզ) Հայաստանի Հանրապետության սոցիալ-տնտեսական զարգացման տարեկան և հեռանկարային ծրագրերի մշակմանը մասնակցությունը.

լէ) Հայաստանի Հանրապետության օրենսդրությամբ սահմանված այլ խնդիրների և գործառույթների իրականացումը:

III. Նախարարության աշխատանքների կազմակերպումը

9. Նախարարության համակարգը ներառում է նախարարության ենթակայության հիմնարկները և կազմակերպությունները:

10. Նախարարությունը`

ա) սույն կանոնադրությամբ սահմանված խնդիրներն ու գործառույթները իրականացնում է իրեն վերապահված լիազորությունների շրջանակներում չխախտելով համակարգի հիմնարկների և կազմակերպությունների Հայաստանի Հանրապետության օրենսդրությամբ սահմանված ինքնուրույնությունը.

բ) մյուս պետական մարմինների հետ միջճյուղային հարցերի մշակման և լուծման համար իրականացնում է գործարար կապեր ու համագործակցություն.

գ) անհրաժեշտության դեպքում Հայաստանի Հանրապետության նախարարությունների և գերատեսչությունների հետ համատեղ արձակում է հրամաններ, համագործակցում պետական կառավարման տարածքային մարմինների հետ.

դ) սահմանված կարգով մասնակցում է իր իրավասությանը պատկանող հարցերի վերաբերյալ միջազգային պայմանագրերի (համաձայնագրերի) նախագծերի մշակմանն ու քննարկմանը.

ե) կազմակերպում է քաղաքացիների և իրավաբանական անձանց նամակների (դիմումներ, բողոքներ) ժամանակին քննարկումը` հասնելով դրանցում բարձրացված հարցերի ճիշտ և արդարացի լուծմանը, ինչպես նաև միջոցներ է ձեռնարկում նամակներում հաղորդվող նախարարության համակարգի գործունեության մեջ տեղ գտած թերությունների վերացման համար:

11. Նախարարությունը գլխավորում է նախարարը, որին պաշտոնի նշանակում և պաշտոնից ազատում է Հայաստանի Հանրապետության Նախագահը` Հայաստանի Հանրապետության վարչապետի առաջարկությամբ:

Նախարարի տեղակալներին, ինչպես նաև Հայաստանի Հանրապետության գլխավոր պետական սանիտարական բժշկին պաշտոնի նշանակում և պաշտոնից ազատում է Հայաստանի Հանրապետության վարչապետը` խորհրդակցելով նախարարի հետ:

Նախարարի բացակայության ժամանակ, նրա հանձնարարությամբ, նախարարի պարտականությունները կատարում է նախարարի տեղակալը:

12. Նախարարը`

ա) ղեկավարում է նախարարության համակարգի ընթացիկ գործունեությունը, պատասխանատու է նախարարության` սույն կանոնադրությամբ սահմանված խնդիրների ու գործառույթների իրականացման համար.

բ) սահմանում է իր տեղակալների, կառուցվածքային ստորաբաժանումների ղեկավարների իրավասությունների սահմանները, հաստատում նախարարության կենտրոնական ապարատի կառուցվածքային ստորաբաժանումների, ենթակա հիմնարկների և կազմակերպությունների կանոնադրությունները.

գ) ներկայացնում է նախարարությունը Հայաստանի Հանրապետությունում, այլ պետություններում և միջազգային կազմակերպություններում.

դ) Հայաստանի Հանրապետության օրենսդրությամբ վերապահված իր իրավասության սահմաններում կամ հատուկ լիազորությունների առկայության դեպքում ներկայացնում է Հայաստանի Հանրապետության կառավարությունը կամ Հայաստանի Հանրապետությունն այլ պետություններում և միջազգային կազմակերպություններում.

ե) նախարարության, իսկ հատուկ լիազորությունների առկայության դեպքում` նաև Հայաստանի Հանրապետության կամ Հայաստանի Հանրապետության կառավարության անունից ստորագրում է Հայաստանի Հանրապետության միջազգային պայմանագրեր.

զ) տալիս է լիազորագրեր, կնքում քաղաքացիական-իրավական և աշխատանքային պայմանագրեր, պաշտոնի նշանակում և պաշտոնից ազատում է նախարարության կենտրոնական ապարատի կառուցվածքային ստորաբաժանումների ղեկավարների ու աշխատողների, համակարգի հիմնարկների և կազմակերպությունների ղեկավարներին.

է) Հայաստանի Հանրապետության վարչապետի հաստատմանն է ներկայացնում նախարարության կանոնադրությունը և կենտրոնական ապարատի կառուցվածքը, կոլեգիայի կազմը և կենտրոնական ապարատի աշխատողների թիվը.

ը) սահմանված կարգով խրախուսում և կարգապահական ներգործության միջոցներ է կիրառում ոլորտի աշխատողների նկատմամբ.

թ) Հայաստանի Հանրապետության օրենսդրությամբ և սույն կանոնադրությամբ իրեն վերապահված իրավասության սահմաններում արձակում է հրամաններ և տալիս ցուցումներ.

ժ) Հայաստանի Հանրապետության օրենսդրությամբ սահմանված կարգով ստեղծում, վերակազմակերպում և դադարեցնում է համակարգի հիմնարկների ու կազմակերպությունների գործունեությունը.

ժա) հաստատում է նախարարության կոլեգիայի նիստերի նախապատրաստման, հրավիրման, անցկացման և որոշումների ընդունման կարգը.

ժբ) իրականացնում է իրավաբանական անձանց մասնակցի (բաժնետիրոջ) իրավասությունները` Հայաստանի Հանրապետությանը պատկանող և նախարարության կառավարմանը վերապահված բաժնետոմսերի մասով, կամ այդ իրավասությունների իրականացումը լիազորում է նախարարության պաշտոնատար անձանց.

ժգ) իրականացնում է Հայաստանի Հանրապետության օրենսդրությամբ և սույն կանոնադրությամբ իրեն վերապահված այլ լիազորություններ:

13. Նախարարությունը համակարգի կառավարման հարցերը քննարկում և լուծում է կոլեգիալության ու միանձնյա ղեկավարման սկզբունքների զուգակցման, ինչպես նաև որոշակի առաջադրանքների կատարման համար պաշտոնատար անձանց իրավասությունների հստակ սահմանման հիման վրա:

14. Նախարարությունում ստեղծվում է կոլեգիա, որի անդամների թիվը և անհատական կազմը հաստատում է Հայաստանի Հանրապետության վարչապետը:

Կոլեգիայի կազմի մեջ մտնում են նախարարը (կոլեգիայի նախագահ), նախարարի տեղակալները, Հայաստանի Հանրապետության սոցիալական ապահովագրության պետական հիմնադրամի նախագահը, Հայաստանի Հանրապետության կառավարությանն առընթեր պետական առողջապահական գործակալության պետը` ի պաշտոնե, նախարարության կենտրոնական ապարատի կառուցվածքային ստորաբաժանումների, համակարգի հիմնարկների, կազմակերպությունների ղեկավարներ:

Կոլեգիայի նիստերին կարող են մասնակցել քննարկվող հարցերին առնչվող այլ անձինք:

15. Կոլեգիայի նիստերը գումարվում են առնվազն յուրաքանչյուր ամիսը մեկ անգամ, որոնցում քննության են առնվում ոլորտի զարգացման հարցերը, սոցիալ-տնտեսական զարգացման ծրագրերի, Հայաստանի Հանրապետության օրենքների, այլ իրավական ակտերի, նախարարի հրամանների, հրահանգների նախագծերը, համակարգի հիմնարկների և կազմակերպությունների գործնական ղեկավարման, ղեկավար կադրերի ընտրության ու տեղաբաշխման հարցերը, նախարարության վարչությունների և բաժինների, համակարգի հիմնարկների ու կազմակերպությունների հաշվետվությունները և նախարարության լիազորությունների հետ կապված այլ հարցեր:

16. Կոլեգիայի նիստերին նրա անդամների ներկայությունը պարտադիր է: Կոլեգիայի նիստն իրավազոր է, եթե նիստին մասնակցում է կոլեգիայի անդամների կեսից ավելին: Կոլեգիայի որոշումներն ընդունվում են ձայների պարզ մեծամասնությամբ և կենսագործվում նախարարի հրամաններով:

17. Նախարարի և կոլեգիայի անդամների միջև տարաձայնությունների առկայության դեպքում նախարարը կենսագործում է իր որոշումը ծագած տարաձայնությունների մասին զեկուցելով Հայաստանի Հանրապետության վարչապետին: Կոլեգիայի անդամը (անդամները) ծագած տարաձայնությունների մասին կարող է (են) իր (իրենց) կարծիքը հայտնել Հայաստանի Հանրապետության վարչապետին:

18. Նախարարին կից ստեղծվում են գիտնականներից և մասնագետներից կազմված առողջապահության և սոցիալական հարցերով զբաղվող, հասարակական հիմունքներով գործող խորհրդատվական, գիտավերլուծական մարմին հանդիսացող գիտամեթոդական խորհուրդ և այլ խորհուրդներ:

19. Նախարարությունը կազմակերպում է կենտրոնական ապարատի և համակարգի աշխատողների մասնագիտական որակավորման բարձրացման, նրանց վերապատրաստման աշխատանքները, անցկացնում կենտրոնական ապարատի աշխատողների ատեստավորում, համակարգում է ղեկավար կադրերի ընտրության, վերապատրաստման և տեղաբաշխման աշխատանքները:

Հաստատված է ՀՀ վարչապետի 2000 թ. մայիսի 1-ի N 233 որոշմամբ

Կ Ա Ռ ՈՒ Ց Վ Ա Ծ Ք

Հայաստանի Հանրապետության առողջապահության եվ սոցիալական ապահովության նախարարության կենտրոնական ապարատի

Բուժօգնության վարչություն

Սոցիալական ծառայությունների վարչություն

Աշխատանքի և զբաղվածության վարչություն

Սոցիալական ապահովագրության վարչություն

Կենսաթոշակային ապահովության վարչություն

Հիգիենիկ և հակահամաճարակային հսկողության վարչություն

Հաշմանդամների և տարեցների հարցերի վարչություն

Ընտանիքի, կանանց և երեխաների հարցերի վարչություն

Կրթության և կադրերի վարչություն

Համակարգի ապահովվածության վարչություն

Առողջապահական և սոցիալական ծրագրերի վարչություն

Տնտեսագիտական վարչություն

Հաշվապահական հաշվառման վարչություն

Տեղեկատվության և ամփոփ վերլուծության վարչություն

Արտաքին կապերի և միջազգային համագործակցության վարչություն

Հատուկ ծրագրերի և արտակարգ իրավիճակների վարչություն

Վերահսկողության տեսչություն

Գործերի կառավարչություն

Իրավաբանական բաժին

Առաջին բաժին

Նախարարի աշխատակազմ