ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

26 հունվարի 1999 թվականի N 41

քաղ. Երևան

ԼԻՆՍԻ ՀԻՄՆԱԴՐԱՄԻ (ԱՄՆ) ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆԸ ՀԱՏԿԱՑՎԱԾ ՎԱՐԿԱՅԻՆ ՄԻՋՈՑՆԵՐԻ ԿԱՌԱՎԱՐՄԱՆ ՀԱՆՁՆԱԺՈՂՈՎԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

Լինսի հիմնադրամի (ԱՄՆ) կողմից Հայաստանի Հանրապետությանը հատկացված վարկային միջոցների արդյունավետ կառավարումը և վարկային ծրագրի իրականացումն ապահովելու նպատակով`

Հաստատել Հայաստանի Հանրապետության վարչապետի 1998 թվականի հուլիսի 23-ի «Հանձնաժողով ստեղծելու մասին» N 440 որոշմամբ ստեղծված Լինսի հիմնադրամի կողմից Հայաստանի Հանրապետությանը հատկացված վարկային միջոցների կառավարման հանձնաժողովի կանոնակարգը (կցվում է):

Կ Ա Ն Ո Ն Ա Կ Ա Ր Գ

ԼԻՆՍԻ ՀԻՄՆԱԴՐԱՄԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆԸ ՀԱՏԿԱՑՎԱԾ ՎԱՐԿԱՅԻՆ ՄԻՋՈՑՆԵՐԻ ԿԱՌԱՎԱՐՄԱՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Լինսի հիմնադրամի (ԱՄՆ) կողմից Հայաստանի Հանրապետությանը հատկացված վարկային միջոցների (այսուհետև` ծրագիր) կառավարման հանձնաժողովը (այսուհետև` հանձնաժողով) իր գործունեության ընթացքում ղեկավարվում է Հայաստանի Հանրապետության օրենսդրությամբ, Լինսի հիմնադրամի, Հայաստանի Հանրապետության կառավարության և Հայաստանի Հանրապետության կենտրոնական բանկի միջև 1998 թվականի հուլիսի 15-ին ստորագրված համաձայնագրով սահմանված դրույթներով ու սույն կանոնակարգով:

2. Հանձնաժողովն իր գործունեության ընթացքում հաշվետու է Հայաստանի Հանրապետության կառավարությանը:

3. Հանձնաժողովի անհատական կազմը հաստատում է Հայաստանի Հանրապետության վարչապետը:

4. Հանձնաժողովն ունի ձևաթուղթ:

II. ՀԱՆՁՆԱԺՈՂՈՎԻ ԻՐԱՎԱՍՈՒԹՅՈՒՆԸ

5. Հանձնաժողովը`

ա) հաստատում է ծրագրի իրականացման ընթացակարգը.

բ) Հայաստանի Հանրապետության կենտրոնական բանկի առաջարկությամբ հաստատում է վարկային ծրագրի իրականացմանը մասնակցող առևտրային բանկերի ցանկը (այսուհետև` բանկեր).

գ) ծրագրի իրականացման գրասենյակի «Արտասահմանյան ֆինանսական ծրագրերի կառավարման կենտրոն» պետական փակ բաժնետիրական ընկերության ներկայացմամբ ընդունում է որոշում բանկերի կողմից հաստատված ենթածրագրերի շրջանակներում բանկերի հետ վարկային համաձայնագրեր կնքելու վերաբերյալ.

դ) լուծում է ծրագրի իրականացման ընթացքում առաջացող ընթացիկ հարցեր.

ե) հաստատում է ծրագրի իրականացման վերաբերյալ ընթացիկ և տարեկան հաշվետվությունները.

զ) ծրագրի իրականացման գրասենյակից կարող է պահանջել և ստանալ վարկային ծրագրի շրջանակներում նրա գործունեության վերահսկման համար անհրաժեշտ տեղեկատվություն:

III. ՀԱՆՁՆԱԺՈՂՈՎԻ ՆԱԽԱԳԱՀԻ ԻՐԱՎՈՒՆՔՆԵՐՆ ՈՒ ՊԱՐՏԱԿԱՆՈՒԹՅՈՒՆՆԵՐԸ

6. Հանձնաժողովի նախագահը`

ա) ղեկավարում է հանձնաժողովի աշխատանքները և կազմակերպում դրա գործունեությունը.

բ) հրավիրում է հանձնաժողովի նիստերը և նախագահում դրանք.

գ) հանձնաժողովի նիստերին խորհրդակցական ձայնի իրավունքով մասնակցելու համար, անհրաժեշտության դեպքում, իր կամ հանձնաժողովի անդամների նախաձեռնությամբ հրավիրում է Հայաստանի Հանրապետության նախարարությունների, գերատեսչությունների, մարզպետարանների և այլ կազմակերպությունների ու հիմնարկների ներկայացուցիչներին.

դ) ստորագրում է հանձնաժողովի ընդունած որոշումները, ինչպես նաև ծրագրի շրջանակներում վճարման փաստաթղթերը.

ե) հանձնաժողովի նիստերում քննարկվելիք հարցերի նախապատրաստման վերաբերյալ հանձնարարականներ է տալիս ծրագրի իրականացման գրասենյակին:

7. Հանձնաժողովի նախագահի ժամանակավոր բացակայության դեպքում նրա հանձնարարությամբ հանձնաժողովի նախագահի պարտականությունները կատարում է հանձնաժողովի անդամներից մեկը:

IV. ՀԱՆՁՆԱԺՈՂՈՎԻ ԱՆԴԱՄՆԵՐԻ ԻՐԱՎՈՒՆՔՆԵՐՆ ՈՒ ՊԱՐՏԱԿԱՆՈՒԹՅՈՒՆՆԵՐԸ

8. Հանձնաժողովի անդամը`

ա) մասնակցում է հանձնաժողովի աշխատանքներին, նիստերի օրակարգերի ձևավորմանը, հարցերի քննարկումներին և ներկայացնում առաջարկություններ.

բ) մասնակցում է հանձնաժողովի նիստերին և քվեարկությանը:

V. ՀԱՆՁՆԱԺՈՂՈՎԻ ՆԻՍՏԵՐԻ ԱՆՑԿԱՑՄԱՆ եվ ՈՐՈՇՈՒՄՆԵՐԻ ԸՆԴՈՒՆՄԱՆ ԿԱՐԳԸ

9. Հանձնաժողովի նիստերը գումարվում են առնվազն երկու ամիսը մեկ անգամ:

10. Հանձնաժողովի արտահերթ նիստերը կարող են հրավիրվել`

ա) հանձնաժողովի նախագահի նախաձեռնությամբ.

բ) ծրագրի իրականացման գրասենյակի առաջարկությամբ.

գ) հանձնաժողովի անդամների առնվազն մեկ երրորդի պահանջով:

11. Հանձնաժողովի նիստերի օրակարգերը ձևավորում է հանձնաժողովի նախագահը ծրագրի իրականացման գրասենյակի ներկայացմամբ:

12. Հանձնաժողովի հերթական նիստի օրակարգը և քննարկվող հարցերին առնչվող փաստաթղթերը հանձնաժողովի անդամներին են տրվում նիստից առնվազն երեք օր առաջ:

13. Հանձնաժողովի նիստերն իրավազոր են, եթե դրանց մասնակցում են հանձնաժողովի անդամների առնվազն երկու երրորդը: Հանձնաժողովի որոշումներն ընդունվում են նիստին ներկա հանձնաժողովի անդամների ձայների պարզ մեծամասնությամբ: Ձայների հավասարության դեպքում հանձնաժողովի նախագահի ձայնը վճռորոշ է:

14. Հանձնաժողովի որոշումները կարող են ընդունվել առանց նիստերի գումարման հարցման միջոցով: Հարցումը համարվում է իրավազոր, եթե հարցմանը մասնակցում է հանձնաժողովի անդամների առնվազն երկու երրորդը:

15. Հանձնաժողովի նիստերն արձանագրվում են: