ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

10 հունիսի 1996 թվականի N 345

քաղ. Երևան

ՄԱՐԶՊԵՏԻ` ՀԱՆՐԱՊԵՏԱԿԱՆ ԳՈՐԾԱԴԻՐ ՄԱՐՄԻՆՆԵՐԻ ՀԱՄԱՊԱՏԱՍԽԱՆ ՄԱՐԶԻ ՏԱՐԱԾՔԱՅԻՆ ԾԱՌԱՅՈՒԹՅՈՒՆՆԵՐԻՑ ՏԵՂԵԿԱՏՎՈՒԹՅՈՒՆ ՍՏԱՆԱԼՈՒ ԿԱՐԳԻ ՄԱՍԻՆ

Համաձայն Հայաստանի Հանրապետության նախագահի 1995 թվականի հուլիսի 25-ի «Հայաստանի Հանրապետության կառավարության կառուցվածքը և գործունեության կարգը սահմանելու մասին» հրամանագրի 96-րդ և 118-րդ կետերի`

Հաստատել մարզպետի` հանրապետական գործադիր մարմինների համապատասխան մարզի տարածքային ծառայություններից տեղեկատվություն ստանալու կարգը (կցվում է):

Հայաստանի Հանրապետության վարչապետ

Հ. ԲԱԳՐԱՏյան

Հաստատված է ՀՀ վարչապետի 1996 թ. հունիսի 10-ի N 345 որոշմամբ

Կ Ա Ր Գ

ՄԱՐԶՊԵՏԻ` ՀԱՆՐԱՊԵՏԱԿԱՆ ԳՈՐԾԱԴԻՐ ՄԱՐՄԻՆՆԵՐԻ ՀԱՄԱՊԱՏԱՍԽԱՆ ՄԱՐԶԻ ՏԱՐԱԾՔԱՅԻՆ ԾԱՌԱՅՈՒԹՅՈՒՆՆԵՐԻՑ ՏԵՂԵԿԱՏՎՈՒԹՅՈՒՆ ՍՏԱՆԱԼՈՒ

1. Սույնով կարգավորվում է մարզպետի` հանրապետական գործադիր մարմինների համապատասխան մարզի տարածքային ծառայություններից (այսուհետև` տարածքային ծառայություններ) տեղեկատվություն ստանալու կարգը, ժամկետը, մարզպետին տրվող տեղեկությունների բնույթը, տեղեկատվության տրամադրումը մերժելու հիմքերը:

2. Մարզում պետական կառավարման ապահովման, մարզի տարածքում Հայաստանի Հանրապետության կառավարության տարածքային քաղաքականության իրականացման և հանրապետական գործադիր մարմինների տարածքային ծառայությունների գործունեության համակարգման նպատակով մարզպետը, նշելով անհրաժեշտ տեղեկատվության բնույթը, ծավալը, պարբերականությունը, իր իրավասության շրջանակներում իրավունք ունի տարածքային ծառայություններից ստանալու`

ա) վիճակագրական ամփոփ տվյալներ.

բ) տարածքային ծառայության զարգացման (ընդլայնման), սահմանափակման, կրճատման վերաբերյալ տեղեկատվություն.

գ) տարածքային ծառայության գործունեության կարգի և պայմանների մասին տեղեկատվություն.

դ) տարածքային ծառայության կողմից պետական սեփականության, բնական ռեսուրսների, պատմության և մշակույթի հուշարձանների, հատուկ պահպանվող այլ օբյեկտների պահպանության ու արդյունավետ օգտագործման մասին տեղեկատվություն.

ե) տարածքային ծառայության կողմից հողօգտագործման և հողի պահպանման վերաբերյալ տեղեկատվություն.

զ) տարածքային ծառայության կողմից ջրերի, անտառների, կանաչ գոտիների, ընդերքի պահպանության և օգտագործման վերաբերյալ տեղեկատվություն.

է) տարածքային ծառայության կողմից հակահամաճարակային և կարանտինային միջոցառումների, վարակիչ և զանգվածային ոչ վարակիչ հիվանդությունների ու թունավորումների կանխարգելման նպատակով սանիտարահիգիենիկ միջոցառումների իրականացման վերաբերյալ տեղեկատվություն.

ը) տարածքային ծառայության կողմից մարզի տարածքում ազգային անվտանգության, ինչպես նաև զինապարտների հաշվառման, զորակոչի և վարժական հավաքների կազմակերպման վերաբերյալ տեղեկատվություն.

թ) տարածքային ծառայության կողմից մարզի տարածքում հասարակական կարգի պահպանման և ամրապնդման հարցերի, հակահրդեհային միջոցառումների իրականացման վերաբերյալ տեղեկատվություն.

ժ) մարզպետի` իր իրավասության շրջանակներում ընդունած որոշումների և կարգադրությունների կատարման վերաբերյալ տեղեկատվություն.

ի) հանրամատչելի և Հայաստանի Հանրապետության օրենսդրությամբ ու սույն կարգով չարգելված այլ տեղեկատվություն:

3. Տարածքային ծառայությունը պարտավոր է մարզպետի` իրենց դիմելու օրվանից 5-օրյա ժամկետում նրան գրավոր ներկայացնել պահանջվող տեղեկատվությունը, եթե դրա տրամադրման համար անհրաժեշտ չի կատարել լրացուցիչ ուսումնասիրություններ, ստուգումներ կամ իրականացնել այլ միջոցառումներ, կամ մերժել դրա տրամադրումը:

Սույն կարգի 2-րդ կետի «է», «ը», «թ» ենթակետերով նախատեսված տեղեկատվության տրամադրման ժամկետը կարող է սահմանվել մինչև մեկ օր` ելնելով իրավիճակից:

Եթե տարածքային ծառայությունը չունի այդպիսի տեղեկատվություն կամ այդ տեղեկատվության տրամադրումը դուրս է տվյալ տարածքային ծառայության իրավասությունից, ապա վերջինս պարտավոր է մարզպետի` իրենց դիմելու օրվանից 3-օրյա ժամկետում այդ մասին հայտնել նրան:

Եթե տեղեկատվության տրամադրման համար անհրաժեշտ է կատարել լրացուցիչ ուսումնասիրություններ, ստուգումներ կամ իրականացնել այլ միջոցառումներ, ապա տարածքային ծառայությունը պարտավոր է մարզպետի` իրենց դիմելու օրվանից 5-օրյա ժամկետում այդ մասին հայտնել նրան` նշելով տեղեկատվության տրամադրման ժամկետը:

Եթե պահանջվող վիճակագրական կամ այլ տեղեկատվություն հավաքելու և ամփոփելու համար Հայաստանի Հանրապետության օրենսդրությամբ սահմանված են ժամկետներ, ապա նման տեղեկատվությունը մարզպետին կարող է տրամադրվել միայն այդ ժամկետների ավարտից հետո:

4. Տարածքային ծառայությունն իրավունք ունի մերժելու պահանջվող տեղեկատվության տրամադրումը`

ա) եթե այն հանդիսանում է ծառայողական, բանկային, առևտրային կամ Հայաստանի Հանրապետության օրենսդրությամբ սահմանված այլ գաղտնիք.

բ) եթե այն հանդիսանում է մարդու անձնական կամ ընտանեկան կյանքի մասին տեղեկատվություն, որի տրամադրման մասին չկա քաղաքացու (քաղաքացիների) գրավոր համաձայնությունը.

գ) եթե տեղեկատվության տրամադրման դեպքում խախտվում են անձի և քաղաքացու` Հայաստանի Հանրապետության սահմանադրությամբ և օրենսդրությամբ սահմանված իրավունքներն ու ազատությունները.

դ) եթե տեղեկատվության պահանջը չի բխում սույն կարգից.

ե) Հայաստանի Հանրապետության օրենսդրությամբ սահմանված այլ դեպքերում:

5. Տեղեկատվության տրամադրման մերժման կամ սույն կարգով սահմանված ժամկետներում չտրամադրման դեպքում մարզպետն այդ մասին կարող է դիմել համապատասխան տարածքային ծառայության վերադաս հանրապետական գործադիր մարմնին: Այդ դիմումը համապատասխան տարածքային ծառայության վերադաս հանրապետական գործադիր մարմնի կողմից քննության է առնվում և մարզպետին պատասխան է տրվում դրա ստացման օրվանից 10-օրյա ժամկետում: Տարածքային ծառայության վերադաս հանրապետական գործադիր մարմնի պատասխանի հետ չհամաձայնվելու դեպքում մարզպետը կարող է դիմել Հայաստանի Հանրապետության վարչապետին, որի որոշումը վերջնական է:

6. Սույն կարգի պահանջները խախտող պաշտոնատար անձինք կրում են Հայաստանի Հանրապետության օրենսդրությամբ սահմանված կարգապահական պատասխանատվություն:

7. Սույն կարգում օգտագործվող «մարզ» և «մարզպետ» հասկացությունները հավասարապես վերաբերում են համապատասխանաբար «Երևան քաղաք» և «Երևանի քաղաքապետ» հասկացություններին: