ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

27 մարտի 1996 թվականի N 193

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՊԻ ՆԱԽԱՐԱՐՈՒԹՅԱՆ ԿԱՆՈՆԱԴՐՈՒԹՅՈՒՆԸ, ԱՊԱՐԱՏԻ ԵՎ ՀԱՄԱԿԱՐԳԻ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

1. Հաստատել Հայաստանի Հանրապետության կապի նախարարության կանոնադրությունը, ապարատի և համակարգի կառուցվածքը (կցվում են):

2. Սահմանել Հայաստանի Հանրապետության կապի նախարարության կոլեգիայի անդամների թվաքանակը` 9 մարդ:

3. Ուժը կորցրած ճանաչել Հայաստանի Հանրապետության կառավարության 1992 թվականի մայիսի 4-ի «Հայաստանի Հանրապետության կապի նախարարության մասին» N 267 որոշման 1-ին և 2-րդ կետերը:

Հայաստանի Հանրապետության վարչապետ

Հ. ԲԱԳՐԱՏյան

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՊԻ ՆԱԽԱՐԱՐՈՒԹՅԱՆ

I. Ընդհանուր դրույթներ

1. Հայաստանի Հանրապետության կապի նախարարությունը (այսուհետև` նախարարություն) գործադիր իշխանության հանրապետական մարմին է, որն իրականացնում է համակարգի կառավարումը` ենթարկվելով Հայաստանի Հանրապետության կառավարությանը:

2. Նախարարությունն իր իրավասության շրջանակներում իրականացնում է կառավարումն կապի բնագավառում, պատասխանատու է ճյուղի զարգացման, կառուցվածքային քաղաքականության և շուկայական հարաբերությունների նախադրյալների ստեղծման, ճյուղում սեփականության տարբեր ձևերի ներդաշնակ գործունեության ապահովման համար:

3. Նախարարությունն իրավաբանական անձ է, ունի Հայաստանի Հանրապետության պետական զինանշանի պատկերով և իր անվամբ կնիք:

II. Նախարարության խնդիրներն ու գործառույթները

4. Նախարարության հիմնական խնդիրներն են`

ա) էլեկտրական և փոստային կապի գործունեության կարգավորումը` ուղղված քաղաքացիների, պետական մարմինների պաշտպանությանը, անվտանգությանը, իրավակարգի պաշտպանությանը, տնտեսավարող սուբյեկտների և այլ իրավաբանական անձանց, ինչպես նաև իրավաբանական անձի կարգավիճակ չունեցող ձեռնարկությունների կապի ծառայությունների մատուցման կարիքների բավարարմանը.

բ) կապի բոլոր ցանցերի զարգացման համակարգումը, կապի ցանցերի կառուցման և վերակառուցման նախագծային փաստաթղթերի պետական փորձաքննության իրականացումը, բացառությամբ ներարտադրական և տեխնոլոգիական կապի ցանցերի.

գ) կապի բնագավառին առնչվող օրենսդրական ակտերի նախագծերի մշակումը, ինչպես նաև կապի բնագավառում գերատեսչական նորմատիվ ակտերի ընդունումը և Հայաստանի Հանրապետության օրենսդրությամբ սահմանված կարգով հրապարակումը.

դ) կապի բնագավառում տնտեսական գործունեության առանձին տեսակների լիցենզավորումը.

ե) ռադիոհաճախության տիրույթի բաշխման և օգտագործման վերաբերյալ առաջարկությունների մշակումը.

գ) Հայաստանի Հանրապետության կապի փոխկապված ցանցի կապի միջոցների և ծառայությունների սերտիֆիկացման ուղղությամբ աշխատանքների կազմակերպումը.

է) կապի միջոցների և ցանցերի նկատմամբ տեխնիկական հսկողության իրականացումը, բացառությամբ ներարտադրական և տեխնոլոգիական կապի ցանցերի.

ը) կապի բնագավառում մոբիլիզացիոն ծրագրի մշակումը և արտակարգ իրավիճակներում միջոցառումների իրականացումը.

թ) կապի բնագավառում գիտատեխնիկական առաջընթացի ապահովումը.

ժ) կապի բնագավառի աշխատողների սոցիալական պաշտպանվածության և աշխատանքի անվտանգ պայմանների ապահովումը.

ի) Հայաստանի Հանրապետությունը միջազգային կազմակերպություններում Հայաստանի Հանրապետության օրենսդրությամբ սահմանված կարգով ներկայացնելը և կապի բնագավառում Հայաստանի Հանրապետության շահերի պաշտպանության ապահովումը:

5. Իր առջև դրված խնդիրներին համապատասխան նախարարությունը`

ա) մշակում և իրականացնում է Հայաստանի Հանրապետության կապի ենթակառուցվածքային զարգացման ծրագրի նախագիծը.

բ) շահագրգիռ պետական կառավարման մարմինների մասնակցությամբ մշակում է Հայաստանի Հանրապետության էլեկտրական և փոստային կապի ցանցերի զարգացման և դրանց կառավարման սխեմաները.

գ) իրականացնում է Հայաստանի Հանրապետության ռադիոհաճախությունների պետական հանձնաժողովի հատկացրած ռադիոհաճախության տիրույթի բաշխումը և օգտագործման վերահսկումը.

դ) Հայաստանի Հանրապետության կառավարություն է ներկայացնում առաջարկություններ կապի ձեռնարկությունների և այլ օբյեկտների սեփականաշնորհման և ապապետականացման վերաբերյալ.

ե) Հայաստանի Հանրապետության պետական ձեռնարկությունների և անավարտ շինարարության օբյեկտների սեփականաշնորհման և ապապետականացման ծրագրերին համապատասխան ապահովում է սեփականաշնորհման և ապապետականացման գործընթացը նախարարության համակարգի ձեռնարկություններում.

զ) իրականացնում է մենաշնորհային գործունեության սահմանափակմանն ուղղված քաղաքականություն, օժանդակում կապի բնագավառում նոր տնտեսական կառույցներին.

է) կապի բնագավառում իրականացնում է ներդրումների քաղաքականություն.

ը) իրականացնում է իր տված լիցենզիաների հաշվառումը և դրանց պայմանների կատարման վերահսկումը.

թ) հաստատում է փոստային վճարումների, փոստային ծրարների և բացիկների նմուշները, սահմանում անվանագները և տպաքանակները, կազմակերպում դրանց հրատարակումն ու տարածումը.

ժ) սահմանում է կապի ծառայությունների հիմնական տեսակների սակագները.

ի) կազմակերպում է հաշվապահական հաշվառման և հաշվետվության կատարելագործման աշխատանքները, քննարկում պետական ձեռնարկությունների հաշվապահական հաշվետվությունները և դրանց հիման վրա կազմում ընդհանրացված հաշվապահական հաշվետվություն.

լ) կազմակերպում է կապի բնագավառում մասնագետների պատրաստման աշխատանքները.

խ) միջազգային կազմակերպություններում հանդես է գալիս որպես կապի գործադիր իշխանության պետական մարմին (ադմինիստրացիա), իր լիազորությունների սահմաններում ներկայացնում և պաշտպանում է էլեկտրական ու փոստային կապի բնագավառում Հայաստանի Հանրապետության շահերը, կապի միջազգային կազմակերպություններում համակարգում է նշված բնագավառում Հայաստանի Հանրապետության բոլոր իրավաբանական և ֆիզիկական անձանց գործունեությունը:

III. Նախարարության աշխատանքի կազմակերպումը

6. Նախարարության համակարգն ընդգրկում է իր ենթակայության ձեռնարկությունների ամբողջությունը:

7. Նախարարությունը ճյուղին վերաբերող բոլոր հարցերը լուծում է իրեն վերապահված իրավունքների սահմաններում` չխախտելով ձեռնարկությունների համար Հայաստանի Հանրապետության գործող օրենսդրությամբ նախատեսված ինքնուրույնությունը:

8. Նախարարությունը մյուս նախարարությունների հետ համատեղ իրականացնում է գործնական կապեր ու համագործակցություն` միջճյուղային հարցերի մշակման ու լուծման համար:

9. Նախարարությունը Հայաստանի Հանրապետության կառավարության հանձնարարությամբ իրականացնում է ճյուղի պետական գույքի տիրապետման և օգտագործման գործառույթները: Նախարարության համակարգի ձեռնարկություններում ապահովում է պետական սեփականության պահպանությունը:

1) Նախարարությունը`

ա) ղեկավարվում է Հայաստանի Հանրապետության գործող օրենսդրությամբ և սույն կանոնադրությամբ ու, դրանց հիման վրա և ի կատարումն դրանց, իր իրավասության սահմաններում արձակում է հրամաններ, հրահանգներ և տալիս ցուցումներ, որոնց կատարումը պարտադիր է ձեռնարկությունների, ինչպես նաև քաղաքացիների համար.

բ) մյուս նախարարությունների հետ համատեղ, անհրաժեշտության դեպքում, արձակում է հրամաններ և հրահանգներ.

գ) ընդհանրացնում է օրենսդրական ակտերի կիրառման պրակտիկան ճյուղում, առաջարկություններ մշակում օրենսդրության կատարելագործման վերաբերյալ և դրանք ներկայացնում Հայաստանի Հանրապետության կառավարության կամ Հայաստանի Հանրապետության վարչապետի քննարկմանը.

դ) սահմանված կարգով մասնակցում է նախարարության իրավասության մեջ մտնող հարցերի վերաբերյալ միջազգային պայմանագրերի նախագծերի մշակմանն ու քննարկմանը.

ե) Հայաստանի Հանրապետության օրենսդրությամբ սահմանված կարգով կասեցնում, վերացնում կամ ուժը կորցրած է ճանաչում համակարգի ձեռնարկությունների կողմից ընդունված հրամաններն ու հրահանգները:

11. Նախարարությունը ճյուղի կառավարման բոլոր հարցերի քննարկումն ու լուծումը կազմակերպում է կոլեգիալության և միանձնյա ղեկավարման զուգակցման հիման վրա, աշխատանքի հանձնարարված տեղամասում գործերի վիճակի ու որոշակի առաջադրանքների կատարման համար պաշտոնատար անձանց պատասխանատվության ճշտորոշ սահմանումով:

12. Նախարարությունը գլխավորում է նախարարը, որին Հայաստանի Հանրապետության սահմանադրությանը համապատասխան պաշտոնի է նշանակում և պաշտոնից ազատում Հայաստանի Հանրապետության նախագահը` Հայաստանի Հանրապետության վարչապետի առաջարկությամբ:

13. Նախարարն ունի տեղակալներ, որոնց պաշտոնի է նշանակում և պաշտոնից ազատում Հայաստանի Հանրապետության վարչապետը` խորհրդակցելով նախարարի հետ:

14. Նախարարը`

ա) պատասխանատվություն է կրում նախարարության առջև դրված խնդիրների ու գործառույթների կատարման համար.

բ) սահմանում է նախարարի տեղակալների, վարչությունների ու բաժինների պետերի և նախարարության մյուս կառուցվածքային ստորաբաժանումների ղեկավարների պատասխանատվության աստիճանը` նախարարության համակարգի ձեռնարկությունների գործունեության համար.

գ) կատարում է նախարարի տեղակալների միջև պարտականությունների բաշխում.

դ) Հայաստանի Հանրապետության վարչապետի հաստատմանն է ներկայացնում նախարարության ապարատի կառուցվածքը և աշխատողների թվաքանակը.

ե) հաստատում է նախարարության վարչությունների, բաժինների, նախարարության համակարգի ձեռնարկությունների կանոնադրությունները.

զ) առաջարկում է նախարարության կոլեգիայի անդամների թվաքանակը և Հայաստանի Հանրապետության վարչապետի հաստատմանն է ներկայացնում կոլեգիայի անհատական կազմը.

է) կազմակերպում և ղեկավարում է նախարարության կոլեգիայի նիստերը.

ը) կոնտրակտային եղանակով աշխատանքային պայմանագրեր է կնքում նախարարության համակարգի ձեռնարկությունների ղեկավարների հետ, բացառությամբ հատուկ նշանակության պետական ձեռնարկությունների:

15. Նախարարի բացակայության ժամանակ, նրա համաձայնությամբ, նախարարի պարտականությունները կատարում է նախարարի առաջին տեղակալը:

16. Նախարարությունում ստեղծվում է կոլեգիա, որի կազմի մեջ մտնում է նախարարը (նախագահ), նախարարի տեղակալները` ի պաշտոնե, նախարարության ղեկավար աշխատողներ:

17. Նախարարության կոլեգիան իր պարբերաբար անցկացվող նիստերում քննության է առնում ճյուղի զարգացման հիմնական հարցերը, քննարկում համակարգի ձեռնարկությունների գործնական ղեկավարման, կատարման ստուգման, ղեկավար կադրերի ընտրության և օգտագործման հարցերը, կարևորագույն հրամանների և հրահանգների նախագծերը, լսում նախարարության վարչությունների և բաժինների, նախարարության համակարգի ձեռնարկությունների հաշվետվությունները:

18. Կոլեգիայի որոշումները կենսագործվում են, որպես կանոն, նախարարի հրամաններով: Նախարարի և կոլեգիայի անդամների միջև առկա տարաձայնությունների դեպքում նախարարը կենսագործում է իր որոշումը, ծագած տարաձայնությունների մասին զեկուցելով Հայաստանի Հանրապետության կառավարությանը կամ Հայաստանի Հանրապետության վարչապետին, իսկ կոլեգիայի անդամներն իրենց հերթին կարող են իրենց կարծիքը հայտնել Հայաստանի Հանրապետության կառավարությանը կամ Հայաստանի հանրապետության վարչապետին:

19. Նախարարությունը ճյուղում կազմակերպում է գիտական հետազոտությունների անցկացում, տեղեկատվության հավաքում, մշակում և տարածում, զարգացնում և կոորդինացնում է համագործակցությունն այլ երկրների հետ:

20. Գիտության և տեխնիկայի զարգացման հիմնական ուղղությունների վերաբերյալ առաջարկությունները քննության առնելու, ճյուղում գիտականորեն հիմնավորված միասնական տեխնիկական քաղաքականություն իրականացնելու, տնտեսական-շուկայական ձևերն արմատավորելու վերաբերյալ հանձնարարություններ մշակելու համար նախարարությունում ստեղծվում է գիտատեխնիկական խորհուրդ` բաղկացած մասնագետներից, գիտական փորձագետներից (այդ թվում` օտարերկրյա), ինչպես նաև այլ ներկայացուցիչներից: Գիտատեխնիկական խորհրդի կազմը և խորհրդի կանոնադրությունը հաստատում է նախարարը:

21. Նախարարությունը մասնակցում է համակարգի աշխատողների մասնագիտական պիտանիության և որակավորման վերաբերյալ պահանջների սահմանման գործին, կոորդինացնում համակարգի ղեկավար կադրերի ընտրության, բաշխման և որակավորման բարձրացման աշխատանքները:

22. Նախարարությունը Հայաստանի Հանրապետության օրենսդրությամբ սահմանված կարգով ստեղծում, վերակազմավորում և լուծարում է համակարգի ձեռնարկությունները:

23. Նախարարությունը համակարգի ձեռնարկություններին թույլտվություն է տալիս պետական սեփականություն հանդիսացող դուստր ձեռնարկություններ, բաժանմունքներ, մասնաճյուղեր, ներկայացուցչություններ հիմնադրելու, տեղաբաշխելու և լուծարելու, ինչպես նաև ձեռնարկությունների տնտեսական միավորումներին անդամակցելու համար:

24. Նախարարությունը համակարգի ձեռնարկություններին թույլտվություն է տալիս իրենց տնօրինության տակ գտնվող պետական ֆինանսական միջոցները Հայաստանի Հանրապետության սահմաններից դուրս ներդնելու համար:

25. Նախարարությունը Հայաստանի Հանրապետության օրենսդրությամբ սահմանված կարգով վերահսկում է համակարգի ձեռնարկությունների տնօրինությանը հանձնված պետական գույքի օգտագործումը, ինչպես նաև համաձայնություն է տալիս այդ գույքի օտարման կամ վարձակալության հանձնման համար:

26. Նախարարությունն իրականացնում է համակարգի ձեռնարկությունների գործունեության, ներառյալ հիմնադիր փաստաթղթերի և նրանց կողմից կնքված պայմանագրերի օրինականության վերահսկումը:

27. Նախարարությունը կազմակերպում է քաղաքացիների նամակների (դիմումների և գանգատների) ժամանակին քննարկումը, հասնելով այդ նամակներում բարձրացված հարցերի ճիշտ լուծմանը, ինչպես նաև միջոցներ է ձեռնարկում քաղաքացիների նամակներում հաղորդվող` նախարարության համակարգի ձեռնարկությունների գործունեության մեջ տեղ գտած թերությունների վերացման համար:

28. Նախարարության ապարատի ֆինանսավորումն իրականացվում է միայն պետական բյուջեի միջոցների հաշվին:

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՊԻ ՆԱԽԱՐԱՐՈՒԹՅԱՆ ԱՊԱՐԱՏԻ ԵՎ ՀԱՄԱԿԱՐԳԻ ԿԱՌՈՒՑՎԱԾՔԸ