«Վավերացնում եմ»

Հայաստանի Հանրապետության

Նախագահ Ռ. Քոչարյան

9 օգոստոսի 2004 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

10 հունիսի 2004 թվականի N 1052-Ն

ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ ՄԻՋՈՑՆԵՐԻ ՓՈՐՁԱՔՆՆՈՒԹՅԱՆ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2001 ԹՎԱԿԱՆԻ ՕԳՈՍՏՈՍԻ 10-Ի N 742 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

«Բույսերի պաշտպանության և բույսերի կարանտինի մասին» Հայաստանի Հանրապետության օրենքի 8-րդ հոդվածի «դ» կետին համապատասխան, ինչպես նաև ի կատարումն Հայաստանի Հանրապետության կառավարության 2003 թվականի դեկտեմբերի 24-ի N 1930-Ն որոշմամբ հաստատված` Հայաստանի Հանրապետության կառավարության 2004 թվականի գործունեության միջոցառումների ծրագրի 20-րդ ու 63-րդ կետերի` Հայաստանի Հանրապետության կառավարությունը որոշում է.

1. Հաստատել բույսերի պաշտպանության քիմիական միջոցների փորձաքննության անցկացման կարգը` համաձայն հավելվածի:

2. Ուժը կորցրած ճանաչել Հայաստանի Հանրապետության կառավարության 2001 թվականի օգոստոսի 10-ի «Բույսերի պաշտպանության միջոցների ներկրման և արտահանման մասին իրավաբանական և ֆիզիկական անձանց եզրակացություն տալու կարգը հաստատելու մասին» N 742 որոշմամբ հաստատված կարգի 8-րդ կետի վերջին պարբերությունը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2004 թ. օգոստոսի 3 Երևան

Հավելված ՀՀ կառավարության 2004 թվականի հունիսի 10-ի N 1052-Ն որոշման

Կ Ա Ր Գ

ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ ՄԻՋՈՑՆԵՐԻ ՓՈՐՁԱՔՆՆՈՒԹՅԱՆ ԱՆՑԿԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետություն ներմուծվող և Հայաստանի Հանրապետությունից արտահանվող, ինչպես նաև Հայաստանի Հանրապետությունում արտադրվող, պահպանվող և վաճառվող (այսուհետ` իրացվող) բույսերի պաշտպանության քիմիական միջոցների փորձաքննության գործընթացը:

2. Սույն կարգը չի տարածվում «Տարանցիկ փոխադրում» մաքսային ռեժիմով Հայաստանի Հանրապետություն ներմուծվող բույսերի պաշտպանության քիմիական միջոցների վրա:

II. ՕԳՏԱԳՈՐԾՎՈՂ ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ

3. Սույն կարգում օգտագործվող հիմնական հասկացություններն են`

փորձաքննություն` բույսերի պաշտպանության քիմիական միջոցների խմբաքանակից վերցված նմուշների լաբորատոր փորձարկում` սահմանված չափորոշիչներին թունանյութերի ազդող նյութի և բաղադրության համապատասխանության որոշման նպատակով.

խմբաքանակ` ցանկացած քանակի նույնանման որակական հատկանիշներով համասեռ արտադրանք, որը նախատեսվում է միաժամանակյա ներմուծման և արտահանման համար կամ պահպանվում է նույն պահեստում.

կետային նմուշ` բույսերի պաշտպանության քիմիական միջոցների ոչ մեծ քանակություն, որը խմբաքանակից վերցվում է մեկ գործողության ընթացքում` միացյալ նմուշի ձևավորման համար.

միացյալ նմուշ` մի քանի կետային նմուշներից կազմված նմուշ.

միջին նմուշ` միացյալ նմուշի մաս` առանձնացված լաբորատոր փորձարկման համար:

III. ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ ՄԻՋՈՑՆԵՐԻ ԽՄԲԱՔԱՆԱԿԻՑ ՆՄՈՒՇԱՌՈՒՄԸ

4. Նմուշառումն իրականացվում է «Բույսերի պաշտպանության ծառայություն» պետական ոչ առևտրային կազմակերպության (այսուհետ` ծառայություն) կողմից:

5. Բույսերի պաշտպանության քիմիական միջոցների նմուշառում կատարվում է յուրաքանչյուր խմբաքանակից: Յուրաքանչյուր կետային նմուշ պետք է լինի 30 գրամից ոչ ավելի:

6. Նմուշառումը պետք է կատարվի ընտրանքային կարգով` խմբաքանակի տարբեր մասերից:

7. Խմբաքանակից փորձանմուշները վերցվում են հետևյալ չափաքանակներով`

Խմբաքանակի տարավորված միավորի քանակը (հատ)	Կետային նմուշառման քանակը (հատ)
մինչև 50	3
51-150	5
151-400	8
401-800	12
801-1500	16
1501-3000	22
3001-5000	28
5000-ից ավելի	30

IV. ԲՈՒՅՍԵՐԻ ՊԱՇՏՊԱՆՈՒԹՅԱՆ ՔԻՄԻԱԿԱՆ ՄԻՋՈՑՆԵՐԻ ՓՈՐՁԱՔՆՆՈՒԹՅՈՒՆԸ

8. Ծառայությունը փորձաքննության է ենթարկում Հայաստանի Հանրապետությունում իրացվող` բույսերի պաշտպանության բոլոր քիմիական միջոցները:

9. Բույսերի պաշտպանության քիմիական միջոցների փորձաքննության մեթոդները մշակվում և հաստատվում են լիազորված պետական կառավարման մարմնի կողմից, իսկ փորձաքննության վարձի չափերը` Հայաստանի Հանրապետության ֆինանսների և էկոնոմիկայի նախարարության հետ համատեղ:

10. Խմբաքանակից վերցված կետային նմուշները ծառայության ներկայացուցիչների կողմից մանրակրկիտ զննվում են: Նմուշների համասեռության դեպքում բոլոր կետային նմուշները դատարկվում են մաքուր տարայի մեջ, կազմվում է միացյալ նմուշ, այնտեղից վերցվում միջին նմուշ և կատարվում լաբորատոր փորձարկում:

11. Ծառայությունը, փորձանմուշի փորձաքննության հիման վրա, բույսերի պաշտպանության քիմիական միջոցների մասին դրական եզրակացություն է տալիս միայն այն դեպքում, երբ փորձարկման արդյունքները համապատասխանում են որակի նկատմամբ ներկայացվող պահանջներին:

12. Բույսերի պաշտպանության քիմիական միջոցների փորձաքննության դրական արդյունքները հիմք են հանդիսանում դրանց մասին դրական եզրակացություն տալու համար: Փորձաքննության բացասական արդյունքի դեպքում տրվում է մերժման եզրակացություն:

13. Փորձաքննությունների ավարտից հետո մնացած կամ չօգտագործված փորձանմուշները վերադարձվում են ապրանքի սեփականատիրոջը կամ նրա լիազոր ներկայացուցիչներին` բացառությամբ այն դեպքերի, երբ Հայաստանի Հանրապետության օրենսդրությամբ նախատեսված է տվյալ ապրանքի հսկիչ նմուշի` որոշակի ժամկետով պահպանումը փորձարկման լաբորատորիայում: Այս դեպքում ապրանքի սեփականատերը կամ նրա լիազոր ներկայացուցիչը կարող է հսկիչ նմուշը հետ վերցնել այդ ժամկետը լրանալուց հետո:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան