«Վավերացնում եմ»
Հայաստանի Հանրապետության
Նախագահ Ռ. Քոչարյան
 9 հունվարի 2003 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

26 դեկտեմբերի 2002 թվականի N 2126-Ն

ԵՐԵՎԱՆԻ ԹԱՂԱՅԻՆ ՀԱՄԱՅՆՔՆԵՐԻՆ ԼԻԱԶՈՐՈՒԹՅՈՒՆ ՎԵՐԱՊԱՀԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ԱՊՐԻԼԻ 23-Ի N 444 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Երևան քաղաքի պետական հանրակրթական համակարգի կառավարման հետագա ապակենտրոնացման նպատակով Հայաստանի Հանրապետության կառավարությունը որոշում է.

1. Երևանի թաղային համայնքներին վերապահել Երևանի քաղաքապետարանի ենթակայության՝ կառավարման և ֆինանսավորման նոր կարգի անցած հանրակրթական դպրոցների կառավարման խորհուրդների կազմի 40 տոկոսը ձևավորելու լիազորությունը։

2. Սահմանել, որ՝

ա) սույն որոշման 1-ին կետում նշված դպրոցների կառավարման խորհուրդների կազմի 40 տոկոսը ձևավորում են համայնքների ղեկավարները՝ ավագանու համաձայնությամբ.

բ) համայնքի ղեկավարի կողմից նշանակված անձը չի կարող ընդգրկվել մեկից ավելի խորհրդի կազմում.

գ) Երևանի քաղաքապետարանի ենթակայության հանրակրթական դպրոցների կառավարման խորհուրդները ձևավորվում և գործադիր մարմինների տնօրեններն ընտրվում ու պաշտոնի նշանակվում են Հայաստանի Հանրապետության կրթության և գիտության նախարարության կողմից սահմանված կարգերով։

3. Հայաստանի Հանրապետության կառավարության 2002 թվականի ապրիլի 23-ի «Հայաստանի Հանրապետության հանրակրթական դպրոցների հանրակրթական համակարգի բարեփոխումների փորձնական ծրագրով նախատեսված կառավարման և ֆինանսավորման նոր կարգի անցման ժամանակացույցը հաստատելու մասին» N 444 որոշման մեջ կատարել հետևյալ փոփոխությունները՝

որոշմամբ հաստատված ժամանակացույցում՝

ա) «Նոր Նորքի թաղային համայնք 2004 թվական» բառերը փոխարինել «Նոր Նորքի թաղային համայնք 2003 թվական» բառերով,

բ) «Շենգավիթի թաղային համայնք 2004 թվական» բառերը փոխարինել «Շենգավիթի թաղային համայնք 2003 թվական» բառերով։

4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2002 թ. դեկտեմբերի 28       Երևան