«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
21 ապրիլի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 ապրիլի 2001 թվականի N 332
քաղ. Երևան

ՀԱՅԱՍՏԱՆՈՒՄ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ 2001 ԹՎԱԿԱՆԻ ՊԵՏԱԿԱՆ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի 4-րդ հոդվածի պահանջները` Հայաստանի Հանրապետության կառավարությունը որոշում է.

1. Հաստատել Հայաստանում փոքր և միջին ձեռնարկատիրության զարգացման 2001 թվականի պետական ծրագիրը (կցվում է):

2. Հաստատել Հայաստանում փոքր և միջին ձեռնարկատիրության զարգացման 2001 թվականի պետական ծրագրի իրականացման միջոցառումների ցանկը` համաձայն հավելվածի:

3. Հայաստանի Հանրապետության ֆինանսների և էկոնոմիկայի նախարարությանը` մեկամսյա ժամկետում Հայաստանի Հանրապետության արդյունաբերության և առևտրի նախարարության հետ համատեղ սահմանված կարգով Հայաստանի Հանրապետության կառավարություն ներկայացնել առաջարկություն Հայաստանում փոքր և միջին ձեռնարկատիրության զարգացման 2001 թվականի պետական ծրագրի իրականացման համար անհրաժեշտ ֆինանսավորման վերաբերյալ:

4. Սույն որոշումն ուժի մեջ է մտնում 2001 թվականի ապրիլի 21-ից:

Հայաստանի Հանրապետության վարչապետ

Ա. Մարգարյան

Հաստատված է ՀՀ կառավարության 2001 թվականի ապրիլի 21-ի N 332 որոշմամբ

ՀԱՅԱՍՏԱՆՈՒՄ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ 2001 ԹՎԱԿԱՆԻ ՊԵՏԱԿԱՆ ԾՐԱԳԻՐ

I. ԾՐԱԳՐԻ ՄՇԱԿՄԱՆ ՀԻՄՔԵՐԸ

Հայաստանի Հանրապետությունում փոքր և միջին ձեռնարկատիրության (ՓՄՁ) զարգացման 2001 թվականի պետական ծրագրի (այսուհետև` ծրագիր) մշակման և իրականացման հիմքը «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքն է:

Ծրագրի մշակման համար հիմք են հանդիսացել նաև`

ա) Հայաստանի Հանրապետության կառավարության գործունեության ծրագիրը,

բ) Հայաստանում փոքր և միջին ձեռնարկատիրության զարգացման քաղաքականության և ռազմավարության հիմնադրույթները,

գ) Հայաստանի Հանրապետության կառավարության 2001 թվականի բյուջետային ուղերձը:

II. ԾՐԱԳՐԻ ԽՆԴԻՐՆԵՐԸ

Ծրագրի խնդիրներն են`

ա) ՓՄՁ-ի սուբյեկտների արդյունավետ գործունեության համար անհրաժեշտ ենթակառուցվածքների ստեղծումը և զարգացումը.

բ) ՓՄՁ-ի սուբյեկտների արտաքին տնտեսական գործունեության ընդլայնումը և արտահանման խթանումը.

գ) իրավական դաշտի հետագա բարելավումը.

դ) ՓՄՁ-ի սուբյեկտների ֆինանսական և ներդրումային աջակցության հնարավորությունների ընդլայնումը.

ե) ՓՄՁ-ի սուբյեկտների վիճակագրության վարումը.

զ) ՓՄՁ-ի սուբյեկտներին անհրաժեշտ բիզնես-տեղեկատվական և խորհրդատվական ծառայություններից, բիզնես-ուսուցողական և կադրերի վերապատրաստման համակարգի ծառայություններից օգտվելու մատչելիության ապահովումը:

III. ԾՐԱԳՐԱՅԻՆ ՄԻՋՈՑԱՌՈՒՄՆԵՐԻ ՀԱՄԱԿԱՐԳԸ

2001 թվականի համար նախատեսված ծրագրային միջոցառումների համակարգն ընդգրկում է ՓՄՁ-ի ոլորտի զարգացման և պետական աջակցության հետևյալ հիմնական ուղղությունները.

1. ՓՄՁ-Ի ԶԱՐԳԱՑՄԱՆ ԱԶԳԱՅԻՆ ԿԵՆՏՐՈՆԻ ՀԻՄՆԱԴՐՈՒՄ

Հայաստանում ՓՄՁ-ի պետական քաղաքականության և ոլորտի զարգացմանն ուղղված ծրագրերի իրականացման համար կհիմնադրվի փոքր և միջին ձեռնարկատիրության զարգացման ազգային կենտրոն ոչ առևտրային կազմակերպություն` իրավաբանական անձի կարգավիճակով:

Բանակցություններ կվարվեն միջազգային և օտարերկրյա դոնոր կազմակերպությունների հետ (Համաշխարհային բանկ (WB), Ճապոնիայի միջազգային համագործակցության գործակալություն (JICA), Հունաստանի զարգացման նախարարություն և այլն)` 2001 թվականին և հետագայում համատեղ ծրագրերի իրականացման նպատակով: Դրանք մաս կկազմեն Հայաստանի Հանրապետությունում ՓՄՁ-ի զարգացման պետական քաղաքականության և տարեկան ծրագրերի: Փոքր և միջին ձեռնարկատիրության զարգացման ազգային կենտրոնը կիրականացնի «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքով նախատեսված ՓՄՁ-ի սուբյեկտների ֆինանսական և ներդրումային աջակցությունը, երաշխիքների տրամադրումը:

ՓՄՁ-ի ոլորտում Հայաստանի Հանրապետության տարածաշրջանային քաղաքականության առավել արդյունավետ իրականացման նպատակով աղետի գոտում և սահմանամերձ շրջաններում կհիմնադրվեն ՓՄՁ-ի զարգացման ազգային կենտրոնի մասնաճյուղեր:

2. ՓՄՁ-Ի ՏԵՂԵԿԱՏՎԱԿԱՆ ԵՎ ԽՈՐՀՐԴԱՏՎԱԿԱՆ ԱՊԱՀՈՎՈՒՄ

Պետական կառավարման մարմինները, ինչպես նաև բիզնես-աջակցող կառույցները և ՓՄՁ-ի սուբյեկտները պետք է ապահովվեն համապատասխան տեղեկատվությամբ և խորհրդատվությամբ:

Այս ուղղությամբ նախատեսվում է`

Հայաստանի Հանրապետության ազգային վիճակագրական ծառայության կողմից ՓՄՁ-ի սուբյեկտների վիճակագրության վարում.

ՓՄՁ-ի զարգացման ազգային կենտրոնում ՓՄՁ-ի աջակցման կազմակերպությունների, ծրագրերի, ձևերի ու մեխանիզմների, գործող օրենսդրական և այլ իրավական ակտերի վերաբերյալ բիզնես-տեղեկատվական բազայի ստեղծում.

ՓՄՁ-ին աջակցող և ծառայություններ մատուցող կազմակերպությունների ու ծրագրերի տեղեկագրի հրատարակում:

Բանակցություններ կվարվեն ճապոնական համապատասխան կազմակերպությունների հետ Հայաստանում վենչուրային բիզնեսի վարկավորման և արտահանման խթանման գրասենյակներ բացելու վերաբերյալ:

3. ՓՄՁ-Ի ՀԱՄԱՐ ԿԱԴՐԵՐԻ ՄԱՍՆԱԳԻՏԱԿԱՆ ՈՒՍՈՒՑՈՒՄ ԵՎ ՎԵՐԱՊԱՏՐԱՍՏՈՒՄ

ՓՄՁ-ի համար կադրերի մասնագիտական ուսուցումը և վերապատրաստումը ենթադրում է կադրերի մասնագիտական ուսուցման և վերապատրաստման համակարգի ձևավորում: Այս ուղղությամբ նախատեսվում է`

բիզնես-կրթական ծրագրերի և մեթոդական ձեռնարկների մշակում,

ՓՄՁ-ի ոլորտը ներկայացնող ձեռնարկատերերի և մասնագետների վերապատրաստում` իրականացվելիք համատեղ ծրագրերի շրջանակներում:

Ծրագրերը կիրականացվեն ՓՄՁ-ի զարգացման ազգային կենտրոնի կողմից:

IV. ԾՐԱԳՐԻ ԻՐԱԿԱՆԱՑՄԱՆ ՄԵԽԱՆԻԶՄՆԵՐԸ

ՓՄՁ-ի զարգացման 2001 թվականի պետական ծրագրի իրականացման մեխանիզմները գործադրվում են սույն ծրագրով նախատեսված ՓՄՁ-ին աջակցող կառույցների միջոցով.

1. Նպատակային ենթածրագրերը մշակվում են Հայաստանի Հանրապետության արդյունաբերության և առևտրի նախարարության կողմից` նոր ստեղծվող ՓՄՁ-ի զարգացման ազգային կենտրոնի և համապատասխան այլ պետական մարմինների մասնակցությամբ: Ենթածրագրերի մշակման աշխատանքներում կներգրավվեն նաև շահագրգիռ հասարակական կազմակերպությունները:

2. Համաձայն «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի` ՓՄՁ-ի զարգացման տարեկան ծրագրերի ֆինանսավորումը կատարվում է Հայաստանի Հանրապետության պետական բյուջեից, որն արտացոլվում է Հայաստանի Հանրապետության պետական բյուջեում առանձին տողով: Հայաստանի Հանրապետության 2001 թվականի պետական բյուջեն ընդունվել է ավելի վաղ, քան «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքը և առանձին տողով Հայաստանի Հանրապետության 2001 թվականի պետական բյուջեում չի արտացոլվել: Այդ կապակցությամբ 2001 թվականի ծրագրի ֆինանսավորումը նպատակահարմար է իրականացնել Հայաստանի Հանրապետության 2001 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդից:

3. Նպատակային ենթածրագրերը համակարգում են համապատասխան պետական կառույցները, ի դեմս Հայաստանի Հանրապետության արդյունաբերության և առևտրի նախարարության (որպես ՓՄՁ-ի զարգացման պետական քաղաքականության մշակման համար պատասխանատու մարմին) և նոր ստեղծվող ՓՄՁ-ի զարգացման ազգային կենտրոնի (որպես ՓՄՁ-ի զարգացման պետական քաղաքականությունն ու զարգացման ծրագրերն իրականացնող հիմնական կառույց):

4. Ենթածրագրերի իրականացմանը մասնակցում են պետական կառույցներ (կրթական, գիտահետազոտական հաստատություններ և այլն), ինչպես նաև մասնավոր կառույցներ (բիզնես-խորհրդատվական, ուսուցողական, տեղեկատվական և բիզնես- ծառայություններ մատուցող այլ կազմակերպություններ): Դրանք ընտրվում են բաց մրցույթի միջոցով, որն անցկացնում են ենթածրագրերը համակարգող մարմինները:

5. Ենթածրագրերի իրականացման փուլում դրանց ընթացիկ վիճակն ու արդյունքները գնահատում են ծրագրերի տեխնիկական առաջադրանքով որոշված ղեկավարող և համակարգող մարմինները, ինչպես նաև տվյալ կազմակերպության լիազոր ներկայացուցիչները` արտաքին դոնորների առկայության դեպքում:

Հավելված ՀՀ կառավարության 2001 թվականի ապրիլի 21-ի N 332 որոշման

Ց Ա Ն Կ

ՓՄՁ-Ի ԶԱՐԳԱՑՄԱՆ 2001 ԹՎԱԿԱՆԻ ՊԵՏԱԿԱՆ ԾՐԱԳՐԻ ԻՐԱԿԱՆԱՑՄԱՆ ՄԻՋՈՑԱՌՈՒՄՆԵՐԻ

NN ը/կ	Միջոցառումը	Կատարողը	Կատարման ժամկետը
1	2	3	4
1.	Իրավաբանական անձի կարգավիճակով որպես ոչ առևտրային կազմակերպություն ՓՄՁ-ի զարգացման ազգային կենտրոնի հիմնադրման վերաբերյալ ՀՀ կառավարության որոշման նախագիծը ՀՀ կառավարություն ներկայացնելը	ՀՀ արդյունաբերության և առևտրի նախարարություն	2001 թ. սեպտեմբեր
2.	ՓՄՁ-ի սուբյեկտների վիճակագրության վարման նախապատրաստում	ՀՀ ազգային վիճակագրական ծառայություն (համաձայնությամբ)	2001 թ. ընթացքում
3.	ՓՄՁ-ին աջակցող և ծառայություններ մատուցող կազմակերպությունների ու ծրագրերի տեղեկագրի հրատարակում	ՓՄՁ-ի զարգացման ազգային կենտրոն	2001 թ. IV եռամսյակ
4.	Բիզնես-կրթական ծրագրերի և մեթոդական ձեռնարկների մշակում	ՓՄՁ-ի զարգացման ազգային կենտրոն	2001 թ. IV եռամսյակ

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան