«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
11 ապրիլի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

11 ապրիլի 2000 թվականի N 165
քաղ. Երևան

ՎԱԶԳԵՆ ՍԱՐԳՍՅԱՆԻ ԱՆՎԱՆ ԵՐԵՎԱՆԻ ՀԱՆՐԱՊԵՏԱԿԱՆ ՄԱՐԶԱԴԱՇՏԸ ՀԱՅԱՍՏԱՆԻ ՖՈՒՏԲՈԼԻ ՖԵԴԵՐԱՑԻԱՅԻՆ ԱՆՀԱՏՈՒՅՑ ՕԳՏԱԳՈՐԾՄԱՆ ՀԱՆՁՆԵԼՈՒ ՄԱՍԻՆ

Հաշվի առնելով Վազգեն Սարգսյանի անվան Երևանի հանրապետական մարզադաշտը կապիտալ վերակառուցման ենթարկելու և այն միջազգային չափանիշներին համապատասխանեցնելու անհրաժեշտությունը և Հայաստանի Հանրապետության քաղաքացիական օրենսգրքի 685-699 հոդվածներին համապատասխան` Հայաստանի Հանրապետության կառավարությունը որոշում է.

1. Երևանի քաղաքապետարանի տնօրինության Վազգեն Սարգսյանի անվան Երևանի հանրապետական մարզադաշտը 25 տարի ժամկետով անհատույց օգտագործման հանձնել Հայաստանի ֆուտբոլի ֆեդերացիային:

2. Երևանի քաղաքապետին` Հայաստանի ֆուտբոլի ֆեդերացիայի հետ համատեղ`

ա) 15-օրյա ժամկետում օրենքով սահմանված կարգով կնքել անհատույց օգտագործման պայմանագիր` նախատեսելով մարզադաշտի օգտագործումը մարզական և այլ տոնական հանդիսությունների ու միջոցառումների կազմակերպման նպատակներով.

բ) մեկամսյա ժամկետում ապահովել մարզադաշտի սպասարկման համար անհրաժեշտ հողամասի սահմանների ճշտումը և սահմանված կարգով ձևակերպումը, ինչպես նաև գույքային իրավունքների պետական գրանցումը:

3. Մարզադաշտի վերակառուցումն ավարտելու և այն միջազգային չափանիշներին համապատասխանեցնելու նպատակով վարկեր և (կամ) փոխատվություններ ստանալու համար թույլատրել Հայաստանի ֆուտբոլի ֆեդերացիային գրավ դնել մարզադաշտի անհատույց օգտագործման իրավունքը:

4. Սույն որոշումն ուժի մեջ է մտնում 2000 թվականի ապրիլի 11-ից:

ՀայաՍՏԱՆԻ հԱՆՐԱՊԵՏՈՒԹՅԱՆ ՎԱՐՉԱՊԵՏ

Ա. Սարգսյան