«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
22 սեպտեմբերի 1999 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

22 սեպտեմբերի 1999 թվականի N 588
քաղ. Երևան

«ԷՆԵՐԳԱՉԱՓ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆ ՍՏԵՂԾԵԼՈՒ ՄԱՍԻՆ

Հայաստանի Հանրապետության էներգահամակարգում հաշվառքային համակարգի նկատմամբ միասնական տեխնիկական քաղաքականության վարման, հաշվառքային սարքերի ստուգման, վերանորոգման, կարգաբերման, փոխարինման, փոխանակման, տեղադրման և կապարակնքման աշխատանքները կանոնակարգելու, ինչպես նաև սպառողների շահերը պաշտպանելու նպատակով Հայաստանի Հանրապետության կառավարությունը որոշում է.

1. Ստեղծել «Էներգաչափ» փակ բաժնետիրական ընկերություն:

2. «Բաժնետիրական ընկերությունների մասին» Հայաստանի Հանրապետության օրենքի 8 հոդվածի 5-րդ կետով սահմանված լիազորությունները վերապահել Հայաստանի Հանրապետության էներգետիկայի նախարարությանը:

3. Հայաստանի Հանրապետության էներգետիկայի նախարարությանը` «Բարձրավոլտ էլեկտրացանցեր» պետական փակ բաժնետիրական ընկերության, «Երևանի էլեկտրացանց» պետական փակ բաժնետիրական ընկերության, «Հյուսիսային էլեկտրացանց» պետական փակ բաժնետիրական ընկերության, «Կենտրոնական էլեկտրացանց» պետական փակ բաժնետիրական ընկերության, «Հարավային էլեկտրացանց» պետական փակ բաժնետիրական ընկերության գույքի կազմից սահմանված կարգով առանձնացնել էլեկտրական էներգիայի հաշվառքային սարքերի ստուգման ու տեխնիկական սպասարկման համար անհրաժեշտ գույքը և այն ներդնել «Էներգաչափ» փակ բաժնետիրական ընկերության կանոնադրական կապիտալում:

4. Սույն որոշումն ուժի մեջ է մտնում 1999 թվականի սեպտեմբերի 22-ից:

Հայաստանի Հանրապետության վարչապետ

Վ. Սարգսյան