«Վավերացնում եմ»
Հայաստանի Հանրապետության
Նախագահ Ռ. Քոչարյան
28 դեկտեմբերի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 դեկտեմբերի 2000 թվականի N 888
քաղ. Երևան

«ՏՐԱՆԶԻՍՏՈՐ» ՊԵՏԱԿԱՆ ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՄԱՍՆԱՎՈՐԵՑՄԱՆ ՄԱՍԻՆ

«Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 14 հոդվածի 2-րդ կետին, 18 և 24 հոդվածներին համապատասխան, ինչպես նաև հաշվի առնելով Հայաստանի Հանրապետության կառավարության 2000 թվականի մայիսի 12-ի «Տրանզիստոր» պետական փակ բաժնետիրական ընկերության բաժնետոմսերի մասնավորեցման նախապատրաստական աշխատանքների մասին» N 236 որոշմամբ ստեղծված «Տրանզիստոր» պետական փակ բաժնետիրական ընկերության բաժնետոմսերի մասնավորեցման նախապատրաստական աշխատանքներն իրականացնող հանձնաժողովի առաջարկությունը` Հայաստանի Հանրապետության կառավարությունը որոշում է.

1. Հայաստանի Հանրապետության արդյունաբերության և առևտրի նախարարությանն ու Հայաստանի Հանրապետության պաշտպանության նախարարությանը` մեկշաբաթյա ժամկետում` Հայաստանի Հանրապետության օրենսդրությամբ սահմանված կարգով նախաձեռնել «Տրանզիստոր» պետական փակ բաժնետիրական ընկերության «Տրանզիստոր-Կերմետ» դուստր ձեռնարկության` Հայաստանի Հանրապետության օրենսդրությամբ սահմանված կարգով վերակազմակերպումը «Տրանզիստոր-Կերմետ» փակ բաժնետիրական ընկերության և դրա բաժնետոմսերի անհատույց հանձնումը «Երևանի մաթեմատիկական մեքենաների գիտահետազոտական ինստիտուտ» փակ բաժնետիրական ընկերությանը` որպես սեփականություն:

2. Հայաստանի Հանրապետության պետական գույքի կառավարման նախարարությանը`

ա) երկշաբաթյա ժամկետում ապահովել «Տրանզիստոր» պետական փակ բաժնետիրական ընկերության հիմնադիր փաստաթղթերի համապատասխանեցումը Հայաստանի Հանրապետության քաղաքացիական օրենսգրքի 5-րդ գլխի պահանջներին և նշված ընկերության վերագրանցումը «Տրանզիստոր» փակ բաժնետիրական ընկերության` 351843 հազ. դրամ կանոնադրական կապիտալով.

բ) հաշվի առնելով Հայաստանի Հանրապետության կառավարության 2000 թվականի հոկտեմբերի 16-ի «Աշտարակի տրանզիստոր» փակ բաժնետիրական ընկերության մասնավորեցման մասին» N 655 որոշման 6-րդ կետը` թույլատրել «Տրանզիստոր» պետական փակ բաժնետիրական ընկերությանը (գլխամաս) 2000 թվականի հոկտեմբերի 1-ի դրությամբ հաշվապահական հաշվեկշռի ակտիվներից և պասսիվներից դուրս գրել ժամանակին «Աշտարակի տրանզիստոր» դուստր ձեռնարկության զարգացման ծրագրի մշակման համար Հայաստանի Հանրապետության կառավարության երաշխիքով ձեռք բերված վարկի գումարը, հաշվարկված տոկոսները և տույժերը, իսկ զարգացման ծրագրի մշակման ամբողջ փաթեթը հանձնել Հայաստանի Հանրապետության ֆինանսների և էկոնոմիկայի նախարարություն.

գ) ապահովել «Տրանզիստոր» փակ բաժնետիրական ընկերության բաժնետոմսերի սեփականատերերի ռեեստրի վարումը:

3. «Տրանզիստոր» փակ բաժնետիրական ընկերության պետական սեփականություն հանդիսացող բաժնետոմսերի տնօրինման լիազորությունները վերապահել Հայաստանի Հանրապետության պետական գույքի կառավարման նախարարությանը:

4. Երևանի քաղաքապետին` Հայաստանի Հանրապետության օրենսդրությամբ սահմանված կարգով «Տրանզիստոր» փակ բաժնետիրական ընկերության հետ կնքել վերջինիս կողմից զբաղեցված հողատարածքի մշտական օգտագործման պայմանագիր:

5. Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեին` Հայաստանի Հանրապետության օրենսդրությամբ սահմանված կարգով գրանցել «Տրանզիստոր» փակ բաժնետիրական ընկերության կողմից հողի օգտագործման, ինչպես նաև վերջինիս` սեփականության իրավունքով պատկանող անշարժ գույքի նկատմամբ իրավունքները:

6. Հայաստանի Հանրապետության բնապահպանության նախարարությանը` մեկամսյա ժամկետում` Հայաստանի Հանրապետության օրենսդրությամբ սահմանված կարգով հաստատել «Տրանզիստոր» փակ բաժնետիրական ընկերության ջրօգտագործման, ջրահեռացման ու արտանետումների սահմանաքանակները և վերջինիս հետ կնքել համապատասխան պայմանագիր:

7. «Տրանզիստոր» փակ բաժնետիրական ընկերության պետական սեփականություն հանդիսացող բաժնետոմսերն ուղղակի վաճառքի ձևով մասնավորեցնել «ViaSphere» ընկերությանը (այսուհետև` գնորդ):

Սահմանել «Տրանզիստոր» փակ բաժնետիրական ընկերության պետական սեփականություն հանդիսացող բաժնետոմսերի վաճառքի գինը` 160 հազ. ԱՄՆ-ի դոլար կամ դրան համարժեք Հայաստանի Հանրապետության դրամ` վճարման օրվա դրությամբ Հայաստանի Հանրապետության կենտրոնական բանկի կողմից սահմանված հաշվարկային փոխարժեքով:

Գնորդը բաժնետոմսերի վաճառքի գումարն ամբողջությամբ վճարում է մասնավորեցման պայմանագրի կնքման պահից մեկամսյա ժամկետում:

8. Գնորդը մասնավորեցման պայմանագիրն ստորագրելուց հետո 30 աշխատանքային օրվա ընթացքում ապահովում է «Տրանզիստոր» պետական փակ բաժնետիրական ընկերության (գլխամաս) 2000 թվականի հոկտեմբերի 1-ի դրությամբ ունեցած պարտավորությունների մարումը` 100 հազ. ԱՄՆ-ի դոլարի չափով:

9. «Տրանզիստոր» պետական փակ բաժնետիրական ընկերության (գլխամաս) պարտավորությունները 1999 թվականի հուլիսի 1-ի դրությամբ կազմել են 293224 հազ. դրամ, այդ թվում`

բանկերի կարճաժամկետ վարկեր` 27826 հազ. դրամ,

բանկերի երկարաժամկետ վարկեր` 166114 հազ. դրամ,

ֆինանսական պարտավորությունների դիմաց հաշվեգրված տոկոսներ` 62530 հազ. դրամ,

Հայաստանի Հանրապետության պետական բյուջեի նկատմամբ` 604 հազ. դրամ,

անձնակազմին աշխատավարձի վճարման գծով` 11694 հազ. դրամ,

հաշվետու անձանց նկատմամբ` 2071 հազ. դրամ,

ստացված կանխավճարների գծով` 1285 հազ. դրամ,

դուստր (կախյալ) ձեռնարկությունների նկատմամբ` 371 հազ. դրամ,

Հայաստանի Հանրապետության պետական բյուջեի հետաձգված հարկերի գծով` 12217 հազ. դրամ,

նպատակային ֆինանսավորում և մուտքեր` 7370 հազ. դրամ,

տարբեր կրեդիտորների նկատմամբ` 1142 հազ. դրամ:

10. Հայաստանի Հանրապետության պետական գույքի կառավարման նախարարությանը`

ա) Հայաստանի Հանրապետության օրենսդրությամբ սահմանված կարգով գնորդի հետ կնքել «Տրանզիստոր» փակ բաժնետիրական ընկերության բաժնետոմսերի մասնավորեցման պայմանագիր` ընկերության ակտիվների և պարտավորությունների հաշվարկում հաշվի առնելով մինչև 2000 թվականի հոկտեմբերի 1-ը ընկերության ֆինանսատնտեսական գործունեության արդյունքում հաշվապահական հաշվեկշռում կատարված փոփոխությունները.

բ) մասնավորեցման պայմանագրում նախատեսել, որ գնորդը պարտավոր է առաջիկա 3 տարվա ընթացքում կատարել առնվազն 2 մլն ԱՄՆ-ի դոլարի չափով ներդրում` մասնավորեցման պայմանագրով սահմանված ուղղություններով և ձևով, ինչպես նաև ապահովել 270 աշխատատեղ:

11. Սույն որոշումն ուժի մեջ է մտնում 2000 թվականի դեկտեմբերի 28-ից:

Հայաստանի Հանրապետության վարչապետ

Ա. Մարգարյան