040.0740.26.11.98
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
26 նոյեմբերի 1998 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
26 նոյեմբերի 1998 թվականի N 740
քաղ. Երևան
ՀԱՇՎԱՊԱՀԱԿԱՆ ՀԱՇՎԱՌՄԱՆ ՀԱՄԱԿԱՐԳԻ ԲԱՐԵՓՈԽՈՒՄՆԵՐԻ ՄԱՍԻՆ
Համաձայն «Հաշվապահական հաշվառման մասին» Հայաստանի Հանրապետության օրենքի 4 հոդվածի և հաշվապահական հաշվառման համակարգում իրականացվող բարեփոխումներն արդյունավետ անցկացնելու նպատակով Հայաստանի Հանրապետության կառավարությունը որոշում է.
1. Սահմանել, որ Հայաստանի Հանրապետության հաշվապահական հաշվառման ստանդարտները մշակվում են Հաշվապահական հաշվառման միջազգային ստանդարտների կոմիտեի կողմից հրապարակված հաշվապահական հաշվառման միջազգային ստանդարտների հիման վրա:
Համապատասխան հաշվապահական հաշվառման միջազգային ստանդարտների բացակայության դեպքում Հայաստանի Հանրապետության հաշվապահական հաշվառման ստանդարտները մշակել` ելնելով միջազգային պրակտիկայում ընդունված չափանիշներից:
2. Հայաստանի Հանրապետության ֆինանսների և էկոնոմիկայի նախարարությանը`
ա) համաձայն սույն որոշման N 1 հավելվածում նշված փուլերի, մշակել Հայաստանի Հանրապետության հաշվապահական հաշվառման ստանդարտները.
բ) մինչև 1998 թվականի ավարտը Հայաստանի Հանրապետության հաշվապահական հաշվառման ստանդարտները կիրառելու նպատակով մշակել հաշվապահական հաշվառման հաշվային պլան.
գ) 1999 թվականի առաջին եռամսյակի ընթացքում Հայաստանի Հանրապետության հաշվապահական հաշվառման ստանդարտների հիման վրա լրամշակել ֆինանսական հաշվետվությունների ձևերը և դրանց լրացման հրահանգը:
3. Հայաստանի Հանրապետության ֆինանսների և էկոնոմիկայի նախարարությանը` սույն որոշման N 2 հավելվածում նշված կազմակերպություններում Հայաստանի Հանրապետության հաշվապահական հաշվառման ստանդարտները 1999 թվականին փորձարկելու նպատակով կիրառելու համար`
ա) մինչև 1998 թվականի ավարտը հաստատել սույն որոշման N 1 հավելվածում նշված առաջին փուլի Հայաստանի Հանրապետության հաշվապահական հաշվառման ստանդարտները.
բ) հաստատել սույն որոշման N 1 հավելվածում նշված երկրորդ փուլի Հայաստանի Հանրապետության հաշվապահական հաշվառման ստանդարտները` դրանց պատրաստ լինելուն զուգընթաց.
գ) մինչև 1998 թվականի ավարտը հաստատել հաշվապահական հաշվառման նոր հաշվային պլանը.
դ) մինչև 1999 թվականի չորրորդ եռամսյակը հաստատել ֆինանսական հաշվետվությունների լրամշակված ձևերը:
4. Սահմանել, որ սույն որոշման N 2 հավելվածում նշված կազմակերպությունները գործող օրենսդրությամբ հաշվապահական հաշվառումը վարելուն և ֆինանսական հաշվետվությունները կազմելուն զուգընթաց 1999 թվականի ընթացքում հաշվապահական հաշվառումը պետք է վարեն և ֆինանսական հաշվետվությունները կազմեն ու ներկայացնեն` փորձարկման նպատակով հաստատված Հայաստանի Հանրապետության հաշվապահական հաշվառման ստանդարտներին, հաշվային պլանին և ֆինանսական հաշվետվությունների ձևերին համապատասխան:
5. Հայաստանի Հանրապետության ֆինանսների և էկոնոմիկայի նախարարությանը` սույն որոշման N 2 հավելվածում նշված կազմակերպություններին և այն կազմակերպություններին, որոնք գործող օրենսդրությամբ հաշվապահական հաշվառումը վարելուն և ֆինանսական հաշվետվությունները կազմելուն զուգընթաց 1999 թվականի ընթացքում կցանկանան նաև իրականացնել փորձարկման նպատակով հաստատված Հայաստանի Հանրապետության հաշվապահական հաշվառման ստանդարտներին, հաշվային պլանին և ֆինանսական հաշվետվությունների ձևերին համապատասխան հաշվառում, ցույց տալ անհրաժեշտ օգնություն (հաշվի առնելով նաև ԱՄՆ-ի Միջազգային զարգացման գործակալության համապատասխան օգնությունը), մասնավորապես`
ա) տրամադրել փորձարկման նպատակով հաստատված Հայաստանի Հանրապետության հաշվապահական հաշվառման ստանդարտները, հաշվային պլանը, ֆինանսական հաշվետվությունների ձևերը.
բ) կազմակերպության հաշվային աշխատողների համար կազմակերպել վերապատրաստման դասընթացներ.
գ) ցույց տալ գործնական օգնություն` տեղերում հաշվապահական նոր համակարգին անցումն ապահովելու գործում:
6. Հայաստանի Հանրապետության ֆինանսների և էկոնոմիկայի նախարարությանը`
ա) փորձարկման արդյունքների հիման վրա մինչև 1999 թվականի նոյեմբերի 1-ը լրամշակել և հաստատել սույն որոշման N 1 հավելվածի առաջին և երկրորդ փուլերի Հայաստանի Հանրապետության հաշվապահական հաշվառման ստանդարտները, նոր հաշվային պլանը և ֆինանսական հաշվետվությունների լրամշակված ձևերը.
բ) 2000 թվականի ընթացքում հաստատել սույն որոշման N 1 հավելվածում նշված երրորդ փուլի Հայաստանի Հանրապետության հաշվապահական հաշվառման ստանդարտները.
գ) Հայաստանի Հանրապետության հաշվապահական հաշվառման ստանդարտների փոփոխմանը և նորերի ընդունմանը, ինչպես նաև հանրապետությունում շուկայական ենթակառուցվածքների զարգացմանը զուգընթաց համալրել և լրամշակել Հայաստանի Հանրապետության հաշվապահական հաշվառման ստանդարտները:
7. Սահմանել, որ Հայաստանի Հանրապետությունում պետական գրանցում ստացած ձեռնարկատիրական գործունեություն իրականացնող կազմակերպությունները (այդ թվում` ձեռնարկատիրական գործունեություն իրականացնող օտարերկրյա կազմակերպությունների մասնաճյուղերը և ներկայացուցչությունները) պարտավոր են 2000 թվականի հունվարի 1-ից հաշվապահական հաշվառումը վարել և ֆինանսական հաշվետվությունները կազմել ու ներկայացնել Հայաստանի Հանրապետության հաշվապահական հաշվառման ստանդարտներով, նոր հաշվային պլանով և ֆինանսական հաշվետվությունների լրամշակված ձևերով, ինչպես նաև գործող այն իրավական ակտերով, որոնք չեն հակասի վերջիններիս:
8. Հայաստանի Հանրապետության կրթության և գիտության նախարարությանը` հաշվապահական հաշվառման նոր համակարգին անցնելու կապակցությամբ մշակել և ներդնել`
ա) համապատասխան ուսումնամեթոդական գրականություն.
բ) հաշվապահական հաշվառման բնագավառի մասնագետների պատրաստման ծրագրեր.
գ) հաշվապահական ծառայությունների աշխատողների վերապատրաստման ծրագրեր:
9. Սույն որոշումն ուժի մեջ է մտնում 1998 թվականի նոյեմբերի 26-ից:
|
Հայաստանի Հանրապետության |
Ա. Դարբինյան |
|
Հավելված N 1 |
Հայաստանի Հանրապետության հաշվապահական հաշվառման ստանդարտների (ՀՀՀՀՍ) մշակման փուլերը
Առաջին փուլ` 1998 թվական
ՀՀՀՀՍ 1 «Ֆինանսական հաշվետվությունների ներկայացում»
ՀՀՀՀՍ 2 «Պաշարներ»
ՀՀՀՀՍ 3 «Կազմակերպության ծախսումների և ծախսերի կազմը»
ՀՀՀՀՍ 4 «Մաշվածության հաշվառում»
ՀՀՀՀՍ 7 «Հաշվետվություն դրամական միջոցների հոսքերի մասին»
ՀՀՀՀՍ 8 «Հաշվետու ժամանակաշրջանի զուտ շահույթ կամ վնաս, էական սխալներ և
փոփոխություններ հաշվապահական հաշվառման քաղաքականության մեջ»
ՀՀՀՀՍ 9 «Գիտահետազոտական և փորձակոնստրուկտորական աշխատանքների ծախսումներ»
ՀՀՀՀՍ 11 «Կառուցման պայմանագրեր»
ՀՀՀՀՍ 16 «Հիմնական միջոցներ»
ՀՀՀՀՍ 17 «Վարձակալություն»
ՀՀՀՀՍ 18 «Հասույթ»
ՀՀՀՀՍ 20 «Պետական շնորհների հաշվառում և պետական օգնության բացահայտում»
ՀՀՀՀՍ 21 «Արտարժույթի փոխանակման փոխարժեքի փոփոխությունների հետևանքները»
ՀՀՀՀՍ 23 «Փոխառության ծախսումներ»
ՀՀՀՀՍ 25 «Ներդրումների հաշվառում»
ՀՀՀՀՍ 27 «Համախմբված ֆինանսական հաշվետվություններ և դուստր
ընկերություններում ներդրումների հաշվառում»
Երկրորդ փուլ` 1999 թվական
ՀՀՀՀՍ 10 «Հաշվապահական հաշվեկշռի կազմման ամսաթվից հետո տեղի ունեցած
չնախատեսված դեպքեր և իրադարձություններ»
ՀՀՀՀՍ 12 «Շահութահարկ»
ՀՀՀՀՍ 22 «Ընկերությունների միավորումներ»
ՀՀՀՀՍ 24 «Կապակցված կողմերի բացահայտում»
ՀՀՀՀՍ 28 «Ասոցիացված կազմակերպություններում ներդրումների հաշվառում»
ՀՀՀՀՍ 30 «Բանկերի և նմանատիպ ֆինանսական հաստատությունների ֆինանսական
հաշվետվությունների բացահայտում» (կմշակվի Հայաստանի Հանրապետության
կենտրոնական բանկի հետ համատեղ)
ՀՀՀՀՍ 31 «Համատեղ գործունեությունում մասնակցությանը վերաբերող
ֆինանսական հաշվետվություններ»
ՀՀՀՀՍ 32 «Ֆինանսական գործիքներ, բացահայտումը և ներկայացումը»
ՀՀՀՀՍ 33 «Մեկ բաժնետոմսին բաժին ընկնող շահույթ»
ՀՀՀՀՍ 34 «Միջանկյալ ֆինանսական հաշվետվություններ»
ՀՀՀՀՍ 36 «Ակտիվների արժեզրկում»
Երրորդ փուլ` 2000 թվական
ՀՀՀՀՍ 14 «Ֆինանսական տեղեկատվություն` ըստ սեգմենտների»
ՀՀՀՀՍ 15 «Գների փոփոխության հետևանքների ազդեցությունն արտացոլող տեղեկատվություն»
ՀՀՀՀՍ 19 «Կենսաթոշակային ապահովության ծախսումներ»
ՀՀՀՀՍ 26 «Կենսաթոշակային ապահովության ծրագրերի հաշվառում և հաշվետվություն»
ՀՀՀՀՍ 29 «Ֆինանսական հաշվետվությունները գերսղաճի պայմաններում»
ՀՀՀՀՍ 35 «Ընդհատված գործառնություններ»
ՀՀՀՀՍ 37 «Պահուստներ, պայմանական ակտիվներ և պայմանական պարտավորություններ»
ՀՀՀՀՍ 38 «Ոչ նյութական ակտիվներ»
|
Հայաստանի Հանրապետության |
Է. Թադևոսյան |
|
Հավելված N 2 |
Ց Ա Ն Կ
հաշվապահական հաշվառման նոր համակարգի փորձարկմանը մասնակցող կազմակերպությունների
«Հրազդանի ՋԷԿ» ՊՓԲԸ
«Երևանի ՋԷԿ» ՊՓԲԸ
«Վանաձորի ՋԷԿ» ՊՓԲԸ
«Սևան-Հրազդանյան ՀԷԿ-երի կասկադ» ՊՓԲԸ
«Որոտանի ՀԷԿ-երի կասկադ» ՊՓԲԸ
«ՀԱԷԿ» ՊՓԲԸ
«Բարձրավոլտ ցանցեր» ՊՓԲԸ
«Հայէներգո» ՊՓԲԸ
«Երևանի էլեկտրացանց» ՊՓԲԸ
«Կենտրոնական էլեկտրացանց» ՊՓԲԸ
«Հյուսիսային էլեկտրացանց» ՊՓԲԸ
«Հարավային էլեկտրացանց» ՊՓԲԸ
«Հայգազարդ» ՊՓԲԸ
«ՀայՌուսգազարդ» ՓԲԸ
«Ջրմուղ-կոյուղի» ՊՓԲԸ
«Հայջրմուղկոյուղի» ՊՓԲԸ
«Ոռոգում» ՊՓԲԸ
«Հայկական ավիաուղիներ» ՊՓԲԸ
|
Հայաստանի Հանրապետության |
Է. Թադևոսյան |