ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

10 մայիսի 2010 թ.

թիվ 2

Պ Ա Շ Տ Ո Ն Ա Կ Ա Ն  Պ Ա Ր Զ Ա Բ Ա Ն ՈՒ Մ

«ՎՃԱՐԱՀԱՇՎԱՐԿԱՅԻՆ ՀԱՄԱԿԱՐԳԵՐԻ ԵՎ ՎՃԱՐԱՀԱՇՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ 3-ՐԴ ՀՈԴՎԱԾԻ «Զ» ԵՎ «Ժ» ԿԵՏԵՐԻ ՄԱՍԻՆ

Հիմք ընդունելով «Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի «բ» կետը և հաշվի առնելով «Վճարահաշվարկային համակարգերի և վճարահաշվարկային կազմակերպությունների մասին» Հայաստանի Հանրապետության օրենքի (այսուհետ՝ Օրենք) 3-րդ հոդվածի «զ» և «ժ» կետերի պարզաբանման անհրաժեշտությունը՝ Հայաստանի Հանրապետության կենտրոնական բանկի խորհուրդը պարզաբանում է.

Օրենքի 3-րդ հոդվածի «զ» և «ժ» կետերով նախատեսված վճարահաշվարկային գործիքների՝ վճարային քարտերի քլիրինգը և պրոցեսինգն իրենց մեջ ի թիվս այլ ծառայությունների ներառում են սույն պարզաբանման 1-ից 10-րդ կետերով սահմանված ծառայությունները, որոնք մատուցվում են հանրային նշանակություն ունեցող համակարգի օպերատորին կամ նրա կողմից։ Համակարգը հանրային նշանակություն ունեցող է ճանաչվում, եթե համապատասխանում է Հայաստանի Հանրապետության կենտրոնական բանկի խորհրդի 2006 թվականի հուլիսի 4-ի «Արտասահմանյան վճարահաշվարկային համակարգում մասնակցության հետևանքով Հայաստանի Հանրապետությունում ֆինանսական համակարգի կայունությունը և (կամ) իրացվելիությունը և (կամ) վճարունակությունը վտանգելու մասին» թիվ 342-Ն որոշմամբ հաստատված «Արտասահմանյան վճարահաշվարկային համակարգում մասնակցության հետևանքով Հայաստանի Հանրապետությունում ֆինանսական համակարգի կայունությունը և (կամ) իրացվելիությունը և (կամ) վճարունակությունը վտանգելու մասին» ուղեցույցի 6-րդ կետին։

1. Վճարային փաստաթղթերի և վճարային քարտերով կատարված գործառնությունների վերաբերյալ տեղեկատվության հավաքագրում, մշակում և ուղարկում հաշվարկի մասնակիցներին, այդ թվում՝ վերջնահաշվարկի գծով դիրքերի ձևավորում,

2. վճարային քարտերի թողարկման նպատակով էմբոսինգի և կոդավորման իրականացման, ՊԻՆ ծրարների և կլիշեների ձևավորում,

3. քարտապանների կողմից գործառնություններ իրականացնելու արդյունքում ձևավորված էլեկտրոնային վճարային փաստաթղթերի ընդունում, կատարում և փոխանցում,

4. ապրանքներ վաճառողների, ծառայություններ մատուցողների, աշխատանքներ կատարողների (այսուհետ՝ ապրանքներ վաճառողներ) և քարտապանների նույնականացում,

5. էլեկտրոնային վճարային փաստաթղթերի ամբողջականության ստուգում և հավաստագրում,

6. հաշվարկային բանկին ուղղված էլեկտրոնային վճարային փաստաթղթերի փոխանցում և ներկայացում (մարշրուտիզացիա),

7. քարտապանների կողմից կատարված գործառնությունների արդյունքում ապրանքներ վաճառողներին վճարելու կամ վճարումը մերժելու վերաբերյալ հավաստագրման հարցումների և պատասխանների ընդունում և տրամադրում, այդ թվում՝ լիմիտների վարում,

8. ապրանքներ վաճառողներին ուղղված վճարումների կատարման կամ մերժման վերաբերյալ տեղեկատվության տրամադրում սպասարկող բանկին,

9. վճարահաշվարկային ծառայություններ մատուցելու նպատակով մասնագիտացված ծրագրային ապահովման արտոնագրերի և/կամ հավաստագրերի տրամադրում,

10. վճարային քարտերը սպասարկող սարքավորումների ծրագրային ապահովման և պրոցեսինգային կենտրոնների աշխատանքն ապահովող ծրագրերի և համակարգերի ուղեկցում։

ՀՀ կենտրոնական բանկի նախագահ	Ա. Ջավադյան
2010 թ. մայիսի 11 ք. Երևան