ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

22 հոկտեմբերի 1994 թվականի N 501

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄՇԱԿՈՒՅԹԻ ՆԱԽԱՐԱՐՈՒԹՅԱՆ ՀԱՄԱԿԱՐԳՈՒՄ ՄՇԱԿՈՒԹԱՅԻՆ ԱՐԺԵՔՆԵՐԻ ՊԱՀՊԱՆՈՒԹՅԱՆ ՎԱՐՉՈՒԹՅՈՒՆ ՍՏԵՂԾԵԼՈՒ ՄԱՍԻՆ

Ի կատարումն Հայաստանի Հանրապետության Գերագույն խորհրդի 1994 թվականի մայիսի 25-ի «Մշակութային արժեքների արտահանման և ներմուծման մասին» Հայաստանի Հանրապետության օրենքի կիրարկման մասին» որոշման, Հայաստանի Հանրապետության կառավարությունը որոշում է`

1. Հայաստանի Հանրապետության մշակույթի նախարարության համակարգում ստեղծել մշակութային արժեքների պահպանության վարչություն:

2. Հաստատել մշակութային արժեքների պահպանության վարչության կանոնադրությունը (կցվում է):

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ս. ՄԱՆԱՍԱՐՅԱՆ

ՀԱՍՏԱՏՎԱԾ Է ՀՀ կառավարության 1994 թ. հոկտեմբերի 22-ի N 501 որոշմամբ

Կ Ա Ն Ո Ն Ա Դ Ր Ո Ւ Թ Յ Ո Ւ Ն

ՄՇԱԿՈՒԹԱՅԻՆ ԱՐԺԵՔՆԵՐԻ ՊԱՀՊԱՆՈՒԹՅԱՆ ՎԱՐՉՈՒԹՅԱՆ

1. Ընդհանուր դրույթներ

1. Մշակութային արժեքների պահպանության վարչությունը (այսուհետև` վարչությունը) հատուկ լիազորված պետական մարմին է, որը ստեղծվել է Հայաստանի Հանրապետության մշակույթի նախարարության համակարգում «Մշակութային արժեքների արտահանման և ներմուծման մասին» Հայաստանի Հանրապետության օրենքին համապատասխան:

2. Իր գործունեության ընթացքում վարչությունը ղեկավարվում է «Մշակութային արժեքների արտահանման և ներմուծման մասին» Հայաստանի Հանրապետության օրենքով, Հայաստանի Հանրապետության օրենսդրության այլ ակտերով, ինչպես նաև սույն կանոնադրությամբ:

3. Իր գործունեությունն իրականացնելիս վարչությունը սերտորեն համագործակցում է մշակութային արժեքների արտահանման և ներմուծման հարցերի պետական խորհրդի, Հայաստանի Հանրապետության պետական և ոչ պետական խորհրդի, Հայաստանի Հանրապետության պետական և ոչ պետական մարմինների, ձեռնարկությունների, հիմնարկների, կազմակերպությունների ու քաղաքացիների հետ:

4. Վարչությունն ունի Հայաստանի Հանրապետության պետական զինանշանի պատկերով ու իր անվամբ կնիք և դրոշմակնիք:

2. Վարչության խնդիրները

5. Վարչության հիմնական խնդիրներն են`

ա) կարգավորել մշակութային արժեքների արտահանումը, ներմուծումը և հսկողություն իրականացնել դրանց նկատմամբ.

բ) նպաստել Հայաստանի Հանրապետության մշակութային ժառանգության պահպանմանը.

գ) կանխել մշակութային արժեքների ապօրինի արտահանումը, ներմուծումը և այդ արժեքների նկատմամբ սեփականության իրավունքի ապօրինի փոխանցումը.

դ) նպաստել միջազգային համագործակցությանը, Հայաստանի Հանրապետության և այլ պետությունների ժողովուրդների մշակութային հաղորդակցմանը:

3. Վարչության իրավասությունը

6. Մշակութային արժեքների պահպանության վարչությունն իր իրավասության սահմաններում`

ա) մասնակցում է մշակութային ժառանգության պահպանությունն ապահովող, ինչպես նաև մշակութային արժեքների ապօրինի արտահանումը և ներմուծումը, այդ արժեքների նկատմամբ սեփականության իրավունքի ապօրինի փոխանցումը կանխող ակտերի նախագծերի մշակմանը.

բ) կազմում է այն մշակութային արժեքների ցանկը, որոնց վրա տարածվում է «Մշակութային արժեքների արտահանման և ներմուծման մասին» Հայաստանի Հանրապետության օրենքի գործողությունը` Հայաստանի Հանրապետության օրենսդրությամբ սահմանված կարգով.

գ) ազգային պահպանական ցուցակների հիման վրա ստեղծում է Հայաստանի Հանրապետության տարածքում գտնվող պետական, կոլեկտիվ և անձնական սեփականություն հանդիսացող մշակութային արժեքների «տվյալների շտեմարանը».

դ) միջոցներ է ձեռնարկում այլ պետությունների տարածքներում գտնվող ազգային մշակութային արժեքների հայտնաբերման համար և կազմում է այդ արժեքների հաշվառման մատյան.

ե) որոշում է ընդունում մշակութային արժեքների արտահանման կամ ժամանակավոր արտահանման վերաբերյալ, ինչպես նաև գրանցում է այդ արժեքները.

զ) ապահովում է արտահանման կամ ժամանակավոր արտահանման ներկայացված, ինչպես նաև ժամանակավոր արտահանումից վերադարձված մշակութային արժեքների փորձաքննությունը.

 է) տալիս է մշակութային արժեքների արտահանման կամ ժամանակավոր արտահանման իրավունքի վկայագիր, որի համար գանձում է տուրք.

ը) հսկողություն է իրականացնում մշակութային արժեքների արտահանման և ներմուծման հետ կապված արտաքին տնտեսական գործունեության նկատմամբ.

թ) Հայաստանի Հանրապետությունում և նրա սահմաններից դուրս կազմակերպում է հասարակական լայն տեղեկատվություն մշակութային արժեքների անհետացման, կորստի, հափշտակման փաստերի մասին.

ժ) կատարում է պետական մարմինների կողմից առգրավված մշակութային արժեքների պահպանությունը, փորձաքննությունը և հրապարակումը` դրանց նկատմամբ սեփականության իրավունքի ճշտման նպատակով:

4. Վարչության աշխատանքների կազմակերպումը

7. Վարչությունը գլխավորում է պետը, որը պաշտոնի է նշանակվում և պաշտոնից ազատվում Հայաստանի Հանրապետության կառավարության կողմից` Հայաստանի Հանրապետության մշակույթի նախարարի ներկայացմամբ:

Վարչության պետն ունի տեղակալ, որը պաշտոնի է նշանակվում և պաշտոնից ազատվում Հայաստանի Հանրապետության մշակույթի նախարարության կողմից` վարչության պետի ներկայացմամբ:

8. Վարչության պետը`

ա) ղեկավարում է վարչության գործունեությունը.

բ) պատասխանատվություն է կրում վարչության վրա դրված խնդիրների իրագործման համար.

գ) ներկայացնում է վարչությունը Հայաստանի Հանրապետությունում և օտարերկրյա պետություններում.

դ) ստորագրում և կնքում է մշակութային արժեքների արտահանման կամ ժամանակավոր արտահանման իրավունքի վկայագրերը.

ե) սահմանում է վարչության աշխատողների իրավունքները և պարտականությունները.

զ) իրականացնում է օրենսդրությամբ նախատեսված այլ լիազորություններ:

5. Վարչության գործունեության դադարեցումը

9. Վարչությունը կարող է վերակազմավորվել կամ լուծարվել Հայաստանի Հանրապետության օրենսդրությամբ սահմանված կարգով: