16 օգոստոսի 1994 թվականի N 376

քաղ. Երևան

 ՀԱՅԱՍՏԱՆԻ ԱԶԳԱՅԻՆ ԱՐԽԻՎԱՅԻՆ ՖՈՆԴԻ ԿԱԶՄՈՒՄ ՓԱՍՏԱԹՂԹԵՐԻ ԸՆԴԳՐԿՄԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

Ի կատարումն «Հայաստանի ազգային արխիվային ֆոնդի մասին» Հայաստանի Հանրապետության օրենքի, Հայաստանի Հանրապետության կառավարությունը որոշում է`

1. Հաստատել Հայաստանի ազգային արխիվային ֆոնդի կազմում փաստաթղթերի ընդգրկման կարգը (կցվում է):

2. Հայաստանի Հանրապետության նախարարություններին, պետական վարչություններին և գերատեսչություններին` մինչև 1994 թվականի հոկտեմբերի 1-ը ապահովել համապատասխան փորձագիտական հանձնաժողովների կազմավորումը և կանոնակարգված գործունեությունը:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ

ՀԱՍՏԱՏՎԱԾ Է ՀՀ կառավարության 1994 թ. օգոստոսի 16-ի N 376 որոշմամբ

Կ Ա Ր Գ

ՀԱՅԱՍՏԱՆԻ ԱԶԳԱՅԻՆ ԱՐԽԻՎԱՅԻՆ ՖՈՆԴԻ ԿԱԶՄՈՒՄ ՓԱՍՏԱԹՂԹԵՐԻ ԸՆԴԳՐԿՄԱՆ

I. Ընդհանուր դրույթներ

1. Հայաստանի ազգային արխիվային ֆոնդի (ՀԱԱՖ) կազմում փաստաթղթերի ընդգրկման համար անցկացվում է դրանց փորձագիտական արժեքավորում:

2. Փաստաթղթերի փորձագիտական արժեքավորումը փաստաթղթերի արժեքավորման սկզբունքների ու չափանիշների հիման վրա դրանց ուսումնասիրությունն է` փաստաթղթերի պահպանության ժամկետները սահմանելու և դրանք պետական պահպանության համար առանձնացնելու նպատակով:

II. Փաստաթղթերի փորձագիտական արժեքավորման սկզբունքներն ու չափանիշները

3. Փաստաթղթերի փորձագիտական արժեքավորման սկզբունքներն են` պատմականությունը, ամբողջականությունը և համակողմանիությունը:

4. Փաստաթղթերի փորձագիտական արժեքավորման սկզբունքները կիրառվում են` «Փաստաթղթի ծագում», «Փաստաթղթի բովանդակություն», «Փաստաթղթի արտաքին առանձնահատկություն» չափանիշների համադրմամբ:

5. «Փաստաթղթի ծագում» չափանիշին են վերաբերում`

ա) հասարակության կյանքում նախարարության, պետական վարչության, գերատեսչության, ձեռնարկության, հիմնարկի և կազմակերպության (այսուհետև` հիմնարկի) կամ անձի զբաղեցրած տեղը.

բ) փաստաթղթում արտացոլված իրադարձության (երևույթի, փաստի, առարկայի) նշանակությունը.

գ) փաստաթղթի առաջացման (ծագման) տեղն ու ժամանակը:

6. «Փաստաթղթի բովանդակություն» չափանիշին են վերաբերում`

ա) փաստաթղթում արտացոլված տեղեկատվության նշանակությունը.

բ) տեղեկատվության կրկնվածությունն ուրիշ փաստաթղթերում.

գ) կազմման նպատակը.

դ) փաստաթղթի տեսակն ու տարատեսակը:

7. «Փաստաթղթի արտաքին առանձնահատկություն» չափանիշին են վերաբերում`

ա) փաստաթղթի իսկությունը.

բ) փաստաթղթի վրա մակագրության, նշագրման և նշումների առկայությունը.

գ) փաստաթղթի արտաքին տեսքը.

դ) փաստաթղթի բովանդակության հաղորդման ձևը.

ե) փաստաթղթի ձևակերպման ու վավերացման եղանակը (այդ թվում` փաստաթղթի գեղարվեստական, հնագրագիտական, լեզվական, ֆիզիկական առանձնահատկությունը և այլն):

3. Փաստաթղթերի փորձագիտական արժեքավորման կազմակերպումը

8. Փաստաթղթերի փորձագիտական արժեքավորումն անցկացվում է`

ա) հիմնարկի գործավարությունում`

գործերի անվանակարգ կազմելիս.

գործերը ձևակերպելիս և փաստաթղթերը գործերում տեղադրելու ճշտությունն ստուգելիս.

գործերը գերատեսչական արխիվում պահպանության համար նախապատրաստելիս.

բ) գերատեսչական արխիվում` գործերը պետական պահպանության համար նախապատրաստելիս.

գ) պետական արխիվում`

չկարգավորված ֆոնդերը (հիմնականում անձնական ծագման) մշակելիս.

փաստաթղթերի նպատակային փորձագիտական արժեքավորում անցկացնելիս.

գործերը նկարագրելիս.

արխիվային գործերի ցուցակները վերամշակելիս:

9. Հայաստանի ազգային արխիվային ֆոնդի կազմի և փաստաթղթերի փորձագիտական արժեքավորման ու պետական պահպանության համար դրանց ընտրության հարցերը քննարկում են Հայաստանի Հանրապետության կառավարությանն առընթեր արխիվային գործի վարչության կենտրոնական փորձագիտական-ստուգող հանձնաժողովը (ԿՓՍՀ), կենտրոնական, միջշրջանային և Երևան քաղաքի արխիվների մեթոդական փորձագիտական-ստուգող հանձնաժողովները (ՄՓՍՀ):

10. Փաստաթղթերի փորձագիտական արժեքավորումը և պետական պահպանման համար դրանց ընտրությունը կազմակերպելու և անցկացնելու, ինչպես նաև հիմնարկներում փաստաթղթերի փորձագիտական արժեքավորման անցկացման մեթոդական օգնությունն ու հսկողությունն իրականացնելու նպատակով նախարարություններում, պետական վարչություններում և գերատեսչություններում ստեղծվում են մշտական գործող կենտրոնական փորձագիտական հանձնաժողովներ (ԿՓՀ):

11. Փաստաթղթերի փորձագիտական արժեքավորումը և պահպանության համար դրանց առանձնացումը իրականացնում են նախարարություններում, պետական վարչություններում, գերատեսչություններում, ձեռնարկություններում, հիմնարկներում և կազմակերպություններում ստեղծված և մշտական գործող փորձագիտական հանձնաժողովները (ՓՀ):

12. Փորձագիտական հանձնաժողովների խնդիրները, գործառույթները, իրավունքներն ու պարտականությունները սահմանվում են Հայաստանի Հանրապետության կառավարությանն առընթեր արխիվային գործի վարչության կողմից հաստատված կանոնադրություններով: