ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

8 հունիսի 1992 թվականի N 340

քաղ. Երևան

ԼՈՒԾԱՐՎԱԾ ԳՅՈՒՂԱՏՆՏԵՍԱԿԱՆ ՁԵՌՆԱՐԿՈՒԹՅՈՒՆՆԵՐԻ ՉՍԵՓԱԿԱՆԱՇՆՈՐՀՎԱԾ ԱՐՏԱԴՐԱԿԱՆ ՆՇԱՆԱԿՈՒԹՅԱՆ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԻՐԱՑՄԱՆ ԿԱՐԳԻ ՄԱՍԻՆ

Հայաստանի Հանրապետության կառավարությունը որոշում է`

1. Սահմանել, որ լուծարված գյուղատնտեսական ձեռնարկությունների չսեփականաշնորհված արտադրական նշանակության շենքերն ու շինություններն իրացվում են ագրարային ռեֆորմի և սեփականաշնորհման տեղական հանձնաժողովների կողմից` աճուրդային վաճառքի կարգով, որն իրականացվում է ագրարային ռեֆորմի և սեփականաշնորհման շրջանային հանձնաժողովների հսկողությամբ, Հայաստանի Հանրապետության գյուղատնտեսության նախարարության, Հայաստանի Հանրապետության կառավարությանն առընթեր պետական ունեցվածքի հաշվառման ու ապապետականացման վարչության ներկայացուցիչների պարտադիր մասնակցությամբ:

Առաջին աճուրդն իրականացվում է տվյալ բնակավայրի բնակիչների կամ նրանց խմբերի միջև, իսկ կրկնաճուրդը` ցանկացող բոլոր քաղաքացիների և ոչ պետական իրավաբանական անձանց միջև:

2. Արտադրական նշանակության շենքերի և շինությունների աճուրդի մեկնարկային գինը սահմանվում է դրանց հաշվեկշռային մնացորդային ինդեքսավորված արժեքից ոչ պակաս:

3. Աճուրդային վաճառքի վերջնական գինը զեղչվում է, եթե գնորդը պարտավորվում է առաջին երեք տարվա ընթացքում արտադրական նշանակության շենքերն ու շինություններն օգտագործել գյուղատնտեսական հումքի կամ մթերքների արտադրության նպատակով:

Սահմանել, որ 100 հազ. ռուբլուց մինչև 1 մլն. ռուբլի մեկնարկային գին ունեցող արտադրական շենքերի ու շինությունների վաճառքի գնի համար 100 հազար ռուբլին գերազանցող գումարի նկատմամբ կիրառվում է 25 տոկոսի չափով զեղչ, իսկ 1 միլիոն ռուբլին գերազանցող մասի նկատմամբ` 35 տոկոսի չափով: Իրացված օբյեկտների արժեքների վճարումը կատարվում է միանվագ սանդղակով, համաձայն հավելվածի:

4. Առաջին երեք տարվա ընթացքում արտադրական շենքերն ու շինությունները գյուղատնտեսական նշանակությամբ կամ մթերքների արտադրության նպատակով չօգտագործելու դեպքում վաճառված գնից զեղչված գումարները հատուցում է գնորդը, և նրանից գանձվում է տուգանք` շենքերի ու շինությունների վաճառքի մեկնարկային գնի 10 տոկոսի չափով:

5. Սահմանել, որ լուծարված գյուղատնտեսական ձեռնարկությունների չսեփականաշնորհված արտադրական նշանակության շենքերի և շինությունների իրացումից գոյացած դրամական միջոցներն օգտագործվում են Հայաստանի Հանրապետության Նախարարների խորհրդի 1991 թվականի մարտի 14-ի «Կոլտնտեսությունների և խորհտնտեսությունների ունեցվածքի սեփականաշնորհումից դրամական միջոցների գոյացման և օգտագործման կարգի մասին» N 214 որոշմամբ սահմանված կարգով:

6. Պատգամավորների շրջանային խորհուրդների գործադիր կոմիտեներին` 10 օրվա ընթացքում Հայաստանի Հանրապետության գյուղատնտեսության նախարարություն ներկայացնել չսեփականաշնորհված արտադրական նշանակության շենքերի և շինությունների ցուցակը:

7. Հաստատել իրացվող արտադրական նշանակության շենքերի և շինությունների աճուրդի վարման կարգը և դրանց վաճառքի ակտի ձևը (կցվում են):

8. Սույն որոշման կատարման հսկողությունը դնել պատգամավորների համապատասխան շրջանային խորհուրդների գործադիր կոմիտեների և Հայաստանի Հանրապետության գյուղատնտեսության նախարարության վրա:

ՀԱՅԱՍՏԱՆի հանրապետության փոխնախագահ, վարչապետ

Գ. ՀԱՐՈՒԹՅՈՒՆՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ

Հավելված ՀՀ կառավարության 1992 թ. հունիսի 8-ի N 340 որոշման

ԻՐԱՑՎԱԾ ԱՐՏԱԴՐԱԿԱՆ ՆՇԱՆԱԿՈՒԹՅԱՆ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԱՐԺԵՔԻ ՎՃԱՐՄԱՆ ՄԻԱՆՎԱԳ ՍԱՆԴՂԱԿ

---------------------------------------------------------------------------------------------------------------------------------
Օբյեկտի արժեքը (հազ. ռուբ.)	Առաջին վճարումը (տոկոսներով)	Վճարման ընդհանուր ժամկետը (տարի)	Վճարումների թիվը
---------------------------------------------------------------------------------------------------------------------------------
Մինչև 100	100	-	1
101-300	50	1	2
301-700	40	2	3
701-1200	30	3	4
1201-2000	25	4	5
2000-ից ավելի	20	5	6

Իրացված օբյեկտի արժեքի առաջին վճարից հետո արժեքի մնացած մասը մուծվում է տարին մեկ անգամ` հավասար մասերով: Գնորդը ցանկացած վճարման ժամանակ կարող է մուծել մնացած ամբողջ գումարը: Վճարումները կատարվում են վճարվելիք գումարին ավելացնելով բանկային տոկոսի նվազագույն չափը, յուրաքանչյուր տարվա համար` աճող սանդղակով: Իրացված օբյեկտի արժեքի վճարման պայմաններն արտահայտվում են առք ու վաճառքի պայմանագրերում: Վճարումները կարող են կատարվել ինչպես կանխիկ, այնպես էլ փոխանցումով:

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՔՈԹԱՆՅԱՆ

ՀԱՍՏԱՏՎԱԾ Է ՀՀ կառավարության 1992 թ. հունիսի 8-ի N 340 որոշմամբ

ԻՐԱՑՎՈՂ ԱՐՏԱԴՐԱԿԱՆ ՆՇԱՆԱԿՈՒԹՅԱՆ ՇԵՆՔԵՐԻ ԵՎ ՇԻՆՈՒԹՅՈՒՆՆԵՐԻ ԱՃՈՒՐԴԻ ՎԱՐՄԱՆ ԿԱՐԳԸ

1. Լուծարված գյուղատնտեսական ձեռնարկությունների չսեփականաշնորհված արտադրական նշանակության օբյեկտը ձեռք բերելու ցանկություն հայտնած մեկից ավելի քաղաքացիների և ոչ պետական իրավաբանական անձանց առկայության դեպքում այն իրացվում է հրապարակային աճուրդով: Կայանալիք աճուրդի մասին ագրարային ռեֆորմի և սեփականաշնորհման տեղական հանձնաժողովը հայտարարություն է տալիս ոչ ուշ, քան աճուրդից 15 օր առաջ:

Հայտարարությունը փակցվում է բնակավայրի տեսանելի տեղերում, որում նշվում է աճուրդի անցկացման վայրը, ժամանակը, իրացվող օբյեկտների մեկնարկային գինը, ինչպես նաև վաճառվող շենքերի և շինությունների տեխնիկական ու նախագծային տվյալները:

2. Աճուրդին մասնակցելու համար գրավոր ցանկություն հայտնած քաղաքացիներն իրացվող օբյեկտի մեկնարկային գնի 5 տոկոսի չափով գումար են մուծում պատգամավորների ավանային կամ գյուղական խորհրդի գործկոմին: Աճուրդին մասնակցելու իրավունք չունեն պետական հիմնարկները և ձեռնարկությունները: Շենքը կամ կառույցն աճուրդով գնած անձի մուծած գումարը հաշվարկվում է գնման գնի մեջ:

Աճուրդն ավարտվելուց կամ չկայացած հայտարարվելուց անմիջապես հետո աճուրդի մնացած մասնակիցներին վերադարձվում են նրանց կողմից նախապես մուծված գումարները:

Օբյեկտը վաճառված է համարվում այն անձին, որն աճուրդի ժամանակ ամենաբարձր գինն է առաջարկել: Գնորդը պարտավոր է աճուրդի ավարտից հետո Հայաստանի Հանրապետության կառավարության սույն որոշման հավելվածով սահմանված ժամկետներում և չափերով մուծել այն գումարը, որով նա գնել է օբյեկտը:

Եթե շենքը կամ շինությունը գնողը մուծվելիք սկզբնական գումարը սահմանված ժամկետում չի մուծում, աճուրդին մասնակցելու նախնական վճարը նրան չի վերադարձվում և անցնում է հօգուտ պետության: Այդ սկզբնական գումարը հօգուտ պետությանն է անցնում նաև այն դեպքում, երբ պարզվում է, որ գնորդն իրավունք չի ունեցել մասնակցելու աճուրդին: Կայացած աճուրդի վերաբերյալ կազմված ակտի պատճենները հանձնվում են գնորդին, Հայաստանի Հանրապետության կառավարության ագրարային ռեֆորմի և սեփականաշնորհման կենտրոնական պետական հանձնաժողովին և Հայաստանի Հանրապետության կառավարությանն առընթեր պետական ունեցվածքի հաշվառման և ապապետականացման վարչություն:

3. Աճուրդը հայտարարվում է չկայացած`

ա) եթե աճուրդին միայն մեկ գնորդ է ներկայացել.

բ) եթե ներկայացուցիչներից ոչ ոք իրացվող արտադրական նշանակության շենքի կամ շինության սկզբնական գնահատության դիմաց հավելում չի կատարում.

գ) եթե գնորդը սահմանված ժամկետում չի մուծում սույն որոշման հավելվածով սահմանված առաջին վճարը:

4. Աճուրդը չկայացած հայտարարվելու դեպքում իրացվող արտադրական նշանակության շենքը կամ շինությունը թողնվում է պատգամավորների ավանային կամ գյուղական խորհրդի գործկոմի տրամադրության տակ` սկզբնական գնահատության գումարով: Եթե այդպիսի հայտարարություն չի ստացվել, ագրարային ռեֆորմի և սեփականաշնորհման տեղական հանձնաժողովն աճուրդը չկայացած հայտարարելուց հետո 15 օրվանից ոչ շուտ նշանակում է կրկնաճուրդ:

Կրկնաճուրդը հայտարարվում և տեղի է ունենում առաջին աճուրդի համար սահմանված կանոնների պահպանմամբ: Կրկնաճուրդ չկայանալու դեպքում, եթե կա շենքը կամ շինությունը ձեռք բերելու ցանկություն հայտնած մեկ գնորդ, ապա այն նրան է վաճառվում սկզբնական գնահատման արժեքով:

5. Աճուրդը կարող է անվավեր ճանաչվել դատարանի կողմից, եթե այն տեղի է ունեցել աճուրդի համար սահմանված կանոնների խախտումով, եթե շենքը կամ շինությունը վաճառվել է աճուրդին մասնակցելու իրավունք չունեցող անձի, ինչպես նաև` Հայաստանի Հանրապետության օրենսդրությամբ սահմանված այլ դեպքերում:

ՀԱՍՏԱՏՎԱԾ Է ՀՀ կառավարության 1992 թ. հունիսի 8-ի N 340 որոշմամբ

Ա Կ Տ

ԻՐԱՑՎՈՂ ԱՐՏԱԴՐԱԿԱՆ ՆՇԱՆԱԿՈՒԹՅԱՆ ՕԲՅԵԿՏՆԵՐԻ ՎԱՃԱՌՔԻ

Հասցեն __________________________________________________________________________________ _________________________________________________________________________________________ (շրջանը, բնակավայրը, տնտեսությունը) Սույն ակտը կազմված է մի կողմից աճուրդն անցկացնող հանձնաժողովի նախագահի _______________  ________________________________________________________________________________________, (ազգանունը, անունը, հայրանունը) Հայաստանի Հանրապետության գյուղատնտեսության նախարարության ներկայացուցչի ___________ _________________________________________________________________________________________, (ազգանունը, անունը, հայրանունը, պաշտոնը) Հայաստանի Հանրապետության կառավարությանն առընթեր պետական ունեցվածքի հաշվառման և ապապետականացման վարչության ներկայացուցչի ____________________________________________,                                                                   (ազգանունը, անունը, հայրանունը, պաշտոնը) ագրարային ռեֆորմի և սեփականաշնորհման շրջանային հանձնաժողովի անդամներից մեկի __________ __________________________________________________________________________________________, (ազգանունը, անունը, հայրանունը) ագրարային ռեֆորմի ու սեփականաշնորհման տեղական հանձնաժողովի անդամներից մեկի __________ __________________________________________________________________________________________ (ազգանունը, անունը, հայրանունը) մյուս կողմից օբյեկտը գնողի _________________________________________________________________ ___________________________________________________________________ կողմից հետևյալի մասին` (ազգանունը, անունը, հայրանունը, կազմակերպությունը, հասցեն) 1. Գնորդ կողմը ___________________________________________ աճուրդային վաճառքի կարգով գնում է հետևյալ շենքերն ու շինությունները՝

----------------------------------------------------------------------------------------------------------------------------------

Շենքի կամ շինության անվանումը Մեկնարկային գինը (հազ. ռուբ.) Վաճառքի գինը (հազ. ռուբ.) Կիրառվող զեղչը (տոկոսի դիմաց` հազ. ռուբ.)   Մուծման ենթակա գումարը (հազ. ռուբ.) Օբյեկտի օգտագործման նպատակը ----------------------------------------------------------------------------------------------------------------------------------

2. Սույն ակտը կազմված է չորս օրինակից, որոնցից մեկը մնում է պատգամավորների ավանային կամ գյուղական խորհրդի գործադիր կոմիտեի փաստաթղթերում, երկրորդը տրվում է գնորդին, երրորդը` պատգամավորների շրջանային խորհրդի գործադիր կոմիտե, չորրորդը` Հայաստանի Հանրապետության կառավարության ագրարային ռեֆորմի և սեփականաշնորհման կենտրոնական պետական հանձնաժողովին:

Կողմերի ստորագրությունները և կնիքները

Վաճառող`	Գնորդ`
---------------------------------------------------------	---------------------------------------------------------
---------------------------------------------------------
---------------------------------------------------------
---------------------------------------------------------
---------------------------------------------------------

199  թվականի ------------------------------