ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 մայիսի 1994 թվականի N 229

քաղ. Երևան

ՇԱՐՔԱՅԻՆ ԱՆՁՆԱԿԱԶՄԻ ՀԱՇՄԱՆԴԱՄ ԶԻՆԾԱՌԱՅՈՂՆԵՐԻ ԵՎ ԱՅԴ ԱՆՁՆԱԿԱԶՄԻ ԶՈՀՎԱԾ (ՄԱՀԱՑԱԾ) ԶԻՆԾԱՌԱՅՈՂՆԵՐԻ ԸՆՏԱՆԻՔՆԵՐԻ ԱՆԴԱՄՆԵՐԻ ԿԵՆՍԱԹՈՇԱԿՆԵՐԻ ՎԵՐԱՀԱՇՎԱՐԿՄԱՆ ԵՎ ՎՃԱՐՄԱՆ ՄԱՍԻՆ

Շարքային անձնակազմի հաշմանդամ զինծառայողների և այդ անձնակազմի զոհված (մահացած) զինծառայողների ընտանիքների անդամների կենսաթոշակների վերահաշվարկման և վճարման միասնական կարգ սահմանելու նպատակով Հայաստանի Հանրապետության կառավարությունը որոշում է`

1. Հայաստանի Հանրապետության աշխատանքի և սոցիալական ապահովության նախարարությանը և պաշտպանության նախարարությանը` մինչև 1994 թվականի հուլիսի 1-ը «Զինծառայողների և նրանց ընտանիքների անդամների սոցիալական ապահովման մասին» Հայաստանի Հանրապետության օրենքին համապատասխան համատեղ վերահաշվարկել շարքային անձնակազմի հաշմանդամ զինծառայողների և այդ անձնակազմի զոհված (մահացած) զինծառայողների ընտանիքների անդամների` նախկին օրենսդրությամբ սահմանված կենսաթոշակները:

2. Հայաստանի Հանրապետության պաշտպանության նախարարությանը, աշխատանքի և սոցիալական ապահովության նախարարությանը` մշակել սույն որոշման 1-ին կետում նշված կենսաթոշակառուների գործերը Հայաստանի Հանրապետության աշխատանքի և սոցիալական ապահովության նախարարության համակարգից Հայաստանի Հանրապետության պաշտպանության նախարարությանը հանձնելու կոնկրետ մեխանիզմ և մինչև 1994 թվականի սեպտեմբերի 1-ը ավարտել դրանց հանձնման-ընդունման աշխատանքները:

3. Հայաստանի Հանրապետության պաշտպանության նախարարությանը` 1994 թվականի սեպտեմբերի 1-ից մինչև տարեվերջ ապահովել շարքային անձնակազմի հաշմանդամ զինծառայողների և այդ անձնակազմի զոհված (մահացած) զինծառայողների ընտանիքների անդամների վերահաշվարկված կենսաթոշակների վճարումը Հայաստանի Հանրապետության պաշտպանության նախարարության համար բյուջեով հաստատված միջոցների հաշվին:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ