ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

10 օգոստոսի 1993 թվականի N 418

քաղ. Երևան

ԵՐԿՐԱԲԱՆԱՀԵՏԱԽՈՒԶԱԿԱՆ, ՏԵՂԱԳՐԱԳԵՈԴԵԶԻԱԿԱՆ, ՆԱԽԱԳԾԱՀԵՏԱԶՈՏԱԿԱՆ ԵՎ ԴՐԱՆՑ ՀԵՏ ԿԱՊՎԱԾ ԱՇԽԱՏԱՆՔՆԵՐՈՒՄ ԶԲԱՂՎԱԾ ԱՇԽԱՏՈՂՆԵՐԻՆ ԴԱՇՏԱՅԻՆ ԲԱՎԱՐԱՐՄԱՆ ՎՃԱՐՄԱՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է`

Հաստատել երկրաբանահետախուզական, տեղագրագեոդեզիական, նախագծահետազոտական և դրանց հետ կապված աշխատանքներում զբաղված աշխատողներին դաշտային բավարարման վճարման մասին կանոնադրությունը (կցվում է):

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ

ՀԱՍՏԱՏՎԱԾ Է ՀՀ կառավարության 1993 թվականի օգոստոսի 10-ի N 418 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

ԵՐԿՐԱԲԱՆԱՀԵՏԱԽՈՒԶԱԿԱՆ, ՏԵՂԱԳՐԱԳԵՈԴԵԶԻԱԿԱՆ, ՆԱԽԱԳԾԱՀԵՏԱԶՈՏԱԿԱՆ ԵՎ ԴՐԱՆՑ ՀԵՏ ԿԱՊՎԱԾ ԱՇԽԱՏԱՆՔՆԵՐՈՒՄ ԶԲԱՂՎԱԾ ԱՇԽԱՏՈՂՆԵՐԻՆ ԴԱՇՏԱՅԻՆ ԲԱՎԱՐԱՐՄԱՆ ՎՃԱՐՄԱՆ ՄԱՍԻՆ

1. Երկրաբանահետախուզական, տեղագրագեոդեզիական, նախագծահետազոտական և դրանց հետ կապված աշխատանքներում զբաղված աշխատողներին դաշտային պայմաններում հավելյալ ծախսերը փոխհատուցելու նպատակով դաշտային բավարարումը վճարվում է`

ա) ջոկատների, տեղամասերի, պարտիաների, արշավախմբերի և դրանց հավասարեցված ձեռնարկությունների ու կազմակերպությունների (այսուհետև` դաշտային կազմակերպություններ) աշխատողներին, անկախ գերատեսչական ենթակայությունից, դաշտում գտնվելու ժամանակ աշխատանքային ծրագրով և նախագծով նախատեսված առաջադրանքների կատարումն ապահովելու համար.

բ) դաշտային կազմակերպություններին անմիջապես սպասարկելու համար ժամանակավորապես ստեղծված և դրանց տեղաբաշխման վայրում գտնվող դպրոցների, բանվորական մատակարարման բաժինների, բժշկական, մշակութային ու մանկական նախադպրոցական հիմնարկությունների, ինչպես նաև կապի և այլ կազմակերպությունների աշխատողներին:

2. Դաշտային կազմակերպությունների ցանկն ամեն տարի հաստատվում է համապատասխան նախարարության, պետական վարչության և գերատեսչության կողմից` այն համաձայնեցնելով Հայաստանի Հանրապետության էկոնոմիկայի նախարարության և ֆինանսների նախարարության հետ:

3. Աշխատողներին դաշտային բավարարման վճարումը կատարվում է դաշտային աշխատանքներում գտնվելու բոլոր օրացուցային օրերի համար և ձևակերպվում է այն կազմակերպության հրամանով, որի հաստիքներում նրանք գտնվում են:

4. Յուրաքանչյուր օրվա համար դաշտային բավարարումը վճարվում է աշխատողներին գործուղման ծախսերի սահմանված օրապահիկի 50 տոկոսի չափով:

5. Դաշտային բավարարման վճարումն աշխատողների համար պահպանվում է`

ա) ժամանակավոր անաշխատունակության ընթացքում.

բ) հղիության և ծննդաբերության արձակուրդի ընթացքում:

Նշված դեպքերում դաշտային բավարարումն աշխատողներին վճարվում է միայն դաշտային կազմակերպությունների տեղաբաշխման վայրում գտնվելու դեպքում:

6. Դաշտային բավարարումը չի վճարվում`

ա) աշխատողներին, որոնք հնարավորություն ունեն ամեն օր վերադառնալու իրենց մշտական բնակության վայրերը:

Ընդ որում, ամեն օր մշտական բնակության վայր վերադառնալու հնարավորության հարցը յուրաքանչյուր կոնկրետ դեպքում որոշվում է կազմակերպության ղեկավարի կողմից` հաշվի առնելով բնակության վայրի հեռավորությունը, տրանսպորտային հաղորդակցության պայմանները, կատարվող առաջադրանքի բնույթը, ինչպես նաև աշխատողի համար հանգստի պայմաններ ստեղծելու անհրաժեշտությունը.

բ) աշխատողներին, որոնք գտնվում են ամենամյա հերթական արձակուրդում և առողջարանա-կուրորտային բուժման մեջ.

գ) քաղաքատիպ ավաններում տեղաբաշխված ձեռնարկությունների և կազմակերպությունների ու դրանց մասնաճյուղերի, տեղամասերի, արտադրամասերի, խմբերի, ջոկատների և դրանց հավասարեցված այլ ստորաբաժանումների բազաներում գտնվելիս, եթե նրանք ապահովված են պատգամավորների տեղական խորհուրդների գործկոմների կողմից տվյալ բնակավայրի համար հաստատված նորմաներին համապատասխանող կացարանով:

7. Դաշտային կազմակերպությունից գործուղում մեկնելիս աշխատողի դաշտային բավարարման վճարումը դադարեցվում է:

8. Այլ մասնագիտացված կազմակերպությունների աշխատողներին (բացառությամբ այդ կազմակերպությունների կառավարման ապարատի) դաշտային բավարարումը վճարվում է սույն կանոնադրությամբ սահմանված կազմակերպությունների համար դաշտային պայմաններում օժանդակ և զուգընթաց աշխատանքներ կատարելիս:

9. Դաշտային աշխատանքներ կատարող ոչ պետական ձեռնարկությունների և կազմակերպությունների աշխատողներին դաշտային բավարարումը վճարվում է Հայաստանի Հանրապետության ֆինանսների նախարարության կողմից սահմանված կարգով: