ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 մարտի 1993 թվականի N 135

քաղ. Երևան 

ՔԱՂԱՔԱՑԻՆԵՐԻ ԹԱՂՄԱՆ ԾԱԽՍԵՐԻ ՄԱՍՆԱԿԻ ՀԱՏՈՒՑՄԱՆ ՄԱՍԻՆ

Հայաստանի Հանրապետության կառավարությունը որոշում է`

1. Հանրապետության շրջանների և հանրապետական ենթակայության քաղաքների բյուջեների միջոցների հաշվին հատուցել քաղաքացիների թաղման հետևյալ ծախսերը`

ա) դագաղի ձեռքբերում.

բ) գերեզմանի փորում.

գ) տրանսպորտով դիակի փոխադրում.

դ) հանգուցյալի մահվան փաստաթղթերի ձևակերպում:

2. Սույն որոշման 1-ին կետում նշված ծառայությունները կատարել պատգամավորների համապատասխան շրջանային և հանրապետական ենթակայության քաղաքային խորհուրդների գործադիր կոմիտեների մասնագիտացված ստորաբաժանումների միջոցով, համաձայն գործող սակագների:

3. Հայաստանի Հանրապետության ֆինանսների նախարարությանը` մեկշաբաթյա ժամկետում մշակել և պատգամավորների Երևանի քաղաքային խորհրդի գործադիր կոմիտեի ու Հայաստանի Հանրապետության կառավարությանն առընթեր «Հայբնակկոմունտնտ» ՀՄ-ի հետ համաձայնեցված հաստատել քաղաքացիների թաղման ծախսերի հատուցման պայմանները և կարգը:

4. «Հայանտառարդ» ՏԱՄ-ին և պատգամավորների շրջանային ու քաղաքային խորհուրդների գործադիր կոմիտեներին` իրենց ենթակա ձեռնարկություններում կազմակերպել դագաղների արտադրություն:

5. Հայաստանի Հանրապետության նյութական ռեսուրսների նախարարությանը` ապահովել «Հայանտառարդ» ՏԱՄ-ին և պատգամավորների շրջանային ու քաղաքային խորհուրդների գործադիր կոմիտեներին անհրաժեշտ նյութատեխնիկական ռեսուրսներով` դագաղների արտադրության կազմակերպման համար:

6. Հայաստանի Հանրապետության նյութական ռեսուրսների նախարարությանը` «Հայանտառարդ» ՏԱՄ-ի, «Հայբնակկոմունտնտ» ՀՄ-ի և պատգամավորների Երևանի քաղաքային խորհրդի գործադիր կոմիտեի հետ համատեղ մշակել դագաղների պատվիրման և այդ նպատակի համար ռեսուրսների տրամադրման կարգը:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ