ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱՐԱՐՆԵՐԻ ԽՈՐՀՈՒՐԴ

Ո Ր Ո Շ ՈՒ Մ

20 հունիսի 1991 թվականի N 415

քաղ. Երևան

Հայաստանի Հանրապետության Նախարարների խորհրդի 1991 թվականի մարտի 5-ի «Հայաստանի Հանրապետության տարածքում տնտեսական գործունեության տեսակներով զբաղվելու կարգի մասին» N 161 որոշման մեջ փոփոխություններ մտցնելու մասին

Հայաստանի Հանրապետության Նախարարների խորհուրդը որոշում է`

1. Հայաստանի Հանրապետության Նախարարների խորհրդի 1991 թվականի մարտի 5-ի «Հայաստանի Հանրապետության տարածքում տնտեսական գործունեության տեսակներով զբաղվելու կարգի մասին» N 161 որոշման մեջ մտցնել հետևյալ փոփոխությունները`

ա) որոշման 1-ին, 3-րդ և 6-րդ կետերը շարադրել հետևյալ խմբագրությամբ.

«1. Սահմանել, որ Հայաստանի Հանրապետության տարածքում ձեռնարկությունները և տնտեսավարող մյուս սուբյեկտները ազատ են զբաղվելու Հայաստանի Հանրապետության օրենսդրությամբ չարգելված տնտեսական գործունեության տեսակներով, բացառությամբ այն տեսակների, որոնք պետության մենաշնորհ են հանդիսանում, համաձայն N 1 ցանկի, կամ որոնցով զբաղվելու համար անհրաժեշտ է ստանալ համապատասխան պետական կառավարման մարմինների լիցենզիան (թույլտվությունը), համաձայն N 2 ցանկի»:

«3. Բոլոր տեսակի ձեռնարկությունները կարող են իրականացնել լիցենզավորման ենթակա տնտեսական գործունեության միայն պետական կառավարման համապատասխան մարմինների կողմից թույլտվություն ստանալուց հետո:

Մինչ սույն որոշման ընդունվելը լիցենզավորման ենթակա գործունեության տեսակներով արդեն զբաղվող ձեռնարկությունները (բացառությամբ գործող պետական ձեռնարկությունների) պարտավոր են այդպիսի գործունեությունը շարունակելու համար մինչև 1991 թվականի սեպտեմբերի 1-ը ստանալ համապատասխան լիցենզիա»:

Գործող պետական ձեռնարկությունները լիցենզավորման ենթակա գործունեության նոր` ոչ պրոֆիլային տեսակներով զբաղվելու համար պարտավոր են ստանալ սեփականատիրոջ կամ նրա կողմից լիազորված մարմնի (վերադասի` նախարարության, գերատեսչության, եթե օրենքով այլ բան նախատեսված չէ) թույլտվությունը` համաձայնեցնելով լիցենզավորված մարմնի հետ: Այս կարգը գործում է նաև պետական փոքր ձեռնարկություն ստեղծելու ժամանակ:

«6. Ուժը կորցրած ճանաչել Հայկական ԽՍՀ Մինիստրների խորհրդի 1989 թվականի մարտի 5-ի «ԽՍՀՄ Մինիստրների խորհրդի 1988 թվականի դեկտեմբերի 29-ի «Կոոպերացիայի մասին ԽՍՀ օրենքի համաձայն կոոպերատիվների առանձին տեսակի գործունեության կարգավորման մասին» N 1468 որոշումը» N 103 որոշումը և Հայկական ԽՍՀ Մինիստրների խորհրդի 1990 թվականի հուլիսի 22-ի «ԽՍՀՄ Մինիստրների խորհրդի 1990 թվականի մայիսի 31-ի «Գործունեության տեսակների լրացուցիչ ցանկի մասին, որոնցով կոոպերատիվները իրավասու չեն զբաղվելու» N 540 որոշումը» N 305 որոշումը.

բ) նշված որոշմամբ հաստատված Հայաստանի Հանրապետության տարածքում տնտեսական գործունեության տեսակներով զբաղվելու կարգի 8-րդ կետը շարադրել հետևյալ խմբագրությամբ`

«8. Որևէ գործունեության լիցենզիա ստանալու նպատակով սեփականության բոլոր ձևերի վրա հիմնված ձեռնարկությունները և անհատները ներկայացնում են հայտ պետական կառավարման համապատասխան մարմիններին, որին կցում են տվյալ գործունեության լիցենզավորման համար անհրաժեշտ փաստաթղթերը».

գ) նույն որոշմամբ հաստատված Հայաստանի Հանրապետության պետական մենաշնորհ հանդիսացող գործունեության տեսակների N 1 ցանկի 7-րդ կետը լրացնել հետևյալ բառերով` «կնիքների և դրոշմակնիքների պատրաստում».

դ) որոշմանը կցված Հայաստանի Հանրապետության տարածքում պետական լիցենզավորման ենթակա գործունեության տեսակների N 2 ցանկը շարադրել նոր խմբագրությամբ (կցվում է):

2. Հանձնարարել Հայաստանի Հանրապետության էկոնոմպետկոմին` Հայաստանի Հանրապետության ֆինանսների նախարարության հետ համատեղ մեկշաբաթյա ժամկետում հաստատել լիցենզավորման համար անհրաժեշտ վճարի չափը, ինչպես նաև դրա օգտագործման կարգը:

3. Լիցենզավորող բոլոր նախարարություններին, կազմակերպություններին` մեկշաբաթյա ժամկետում Հայաստանի Հանրապետության էկոնոմպետկոմին ներկայացնել համապատասխան գործունեության տեսակի լիցենզավորման համար անհրաժեշտ փաստաթղթերի ցանկը և գործունեությունն արգելող հիմնավորումները:

4. Հայաստանի Հանրապետության էկոնոմպետկոմին` երեքշաբաթյա ժամկետում մշակել և բոլոր շրջանային ու քաղաքային խորհուրդների գործադիր կոմիտեներին ուղարկել լիցենզավորման հայտերի միասնական ձևերի, ինչպես նաև լիցենզավորման ենթակա գործունեության բոլոր տեսակների համար անհրաժեշտ փաստաթղթերը:

5. Հանձնարարել շրջանային և քաղաքային խորհուրդների գործադիր կոմիտեներին` լիցենզավորման ենթակա տնտեսական գործունեության տեսակներով զբաղվող բոլոր սուբյեկտներին գրանցել միայն համապատասխան պետական մարմիններից գործունեության լիցենզիա ստանալուց հետո:

6. Հանձնարարել Հայաստանի Հանրապետության արդարադատության նախարարությանը` քննարկել և մեկամսյա ժամկետում Հայաստանի Հանրապետության Նախարարների խորհուրդ ներկայացնել առաջարկություններ թանկարժեք մետաղների և կիսաթանկարժեք քարերի արտադրության և վաճառքի հետ կապված գործունեության լիցենզավորման համար անհրաժեշտ օրենսդրական և այլ նորմատիվ ակտերի փոփոխությունների վերաբերյալ:

7. Սույն որոշման կատարման վերահսկողությունը դնել Հայաստանի Հանրապետության էկոնոմիկայի պետական կոմիտեի վրա:

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի նախագահ

Վ. ՄԱՆՈՒԿՅԱՆ

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՀԱԿՈԲՅԱՆ

Ցանկ 2

Հայաստանի Հանրապետության տարածքում պետական լիցենզավորման ենթակա գործունեության տեսակները

Լիցենզավորող մարմնի անվանումը	Գործունեության տեսակը
1	2
Քաղաքացիական ավիացիայի հայկական վարչություն	օդային տրանսպորտի աշխատանքների  կազմակերպում
Անդրերկաթուղու Երևանի բաժանմունք	երկաթուղային տրանսպորտի (բացի ներտնտեսայինից) աշխատանքի կազմակերպում
Հայաստանի Հանրապետության կապի նախարարություն	կապի տեխնիկական համակարգերի  արտադրություն և սպասարկում
Հայաստանի Հանրապետության  հեռուստատեսության և ռադիոհաղորդումների պետական կոմիտե	հեռուստահաղորդումների տեխնիկական  համակարգերի արտադրություն և  սպասարկում, այդ թվում կաբելային հեռուստատեսություն
Հայաստանի Հանրապետության գյուղատնտեսության նախարարություն	ջրամբարների կառուցում և շահագործում
«Հայարդշինանյութեր» ԱՄ (էկոնոմպետկոմի քվոտաների սահմաններում ՀՀ էկոնոմպետկոմ *)	բնական շինանյութերի արդյունահանում և շահագործում
Հայաստանի Հանրապետության էկոնոմիկայի պետական կոմիտե	ընդերքի ռեսուրսային ներուժի (պոտենցիալի) շահագործում, այդ թվում` մետաղային և ոչ մետաղային օգտակար հանածոների, ստորգետնյա, հանքային և քաղցրահամ ջրերի
	ընդերքը որպես պահեստարանների օգտագործում և շահագործում
	թանկարժեք մետաղների և կիսաթանկարժեք քարերի արտադրություն, այդ նյութերի օգտագործմամբ առարկաների պատրաստում և վաճառք
	հիդրոկայանների և էներգիայի այլընտրանքային աղբյուրի հիման վրա էներգիա արտադրող օբյեկտների կառուցում և շահագործում
	կենցաղային քիմիայի ապրանքների արտադրություն
	բորսաների կազմակերպում և բորսային միջնորդային ծառայություններ (ֆոնդային բորսաների լիցենզիան տրվում է ֆինանսների նախարարության հետ համատեղ)
Հայաստանի Հանրապետության ֆինանսների նախարարություն	բոլոր կարգի վիճակախաղերի  կազմակերպում և անցկացում
	շահումներով խաղերի անցկացում և խաղատների (կազինոյի) կազմակերպում
	ապահովագրական գործունեություն աուդիտորական ծառայություն
ԽՍՀՄ պետբանկի հայկական հանրապետական բանկ	բանկային գործի կազմակերպում, արժեթղթերի պատրաստում և արժութային աճուրդների կազմակերպում
Հայաստանի Հանրապետության արդյունաբերության մեջ աշխատանքների անվտանգ կատարման հսկողության և լեռնային հսկողության կոմիտե	պայթեցման աշխատանքների իրականացում
Հայաստանի Հանրապետության ներքին գործերի նախարարություն	անվտանգության, պահնորդային և խուզարկուական ծառայություն
Հայաստանի Հանրապետության առողջապահության նախարարություն	ցանկացած տեսակի բժշկական օգնություն, բացի ոչ տեխնիկական միջոցներով կատարվող ախտորոշումից
	դեղամիջոցների պատրաստում, վաճառք
	օծանելիքների և գեղարարության նյութերի արտադրություն
Հայաստանի Հանրապետության սննդի արդյունաբերության նախարարություն	սննդամթերքի, ծխախոտի, խմիչքի արտադրություն
Հայաստանի Հանրապետության առևտրի նախարարություն	գրավատների կազմակերպում
	հասարակական սննդի կազմակերպում և իրացում ալկոհոլային խմիչքների վաճառք
Հայաստանի Հանրապետության բարձրագույն կրթության և գիտության պետական կոմիտե, Հայաստանի Հանրապետության լուսավորության նախարարություն	հանրակրթական և բարձրագույն ուսումնական հաստատությունների կազմակերպում
ԽՍՀՄ պետստանդարտի հայկական հանրապետության վարչություն	չափիչ սարքերի արտադրություն, ստուգում, նորոգում և կարգավորում
Հայաստանի Հանրապետության ճարտարապետության և քաղաքաշինության պետական կոմիտե	նախագծահետազոտական աշխատանքների կազմակերպում
Հայաստանի Հանրապետության արդարադատության նախարարություն	օրենսդրական ակտերի, նորմատիվ այլ փաստաթղթերի հրատարակում և բազմացում
	իրավաբանական ծառայություն

*) Գործող ձեռնարկությունների և կազմակերպությունների համար գործունեության թույլտվությունը (լիցենզիան) տրվում է «Հայարդշինանյութեր» ԱՄ-ի կողմից, նոր ստեղծվող ձեռնարկություններին և կազմակերպություններին` ՀՀ էկոնոմպետկոմի կողմից: