ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

Հ Ր Ա Մ Ա Ն

«07» հունվարի 2025 թ.

N 02-Ն

ՊԵՏԱԿԱՆ ԵՎ ՀԱՄԱՅՆՔԱՅԻՆ ԹԱՆԳԱՐԱՆՆԵՐԻ ՀԱՎԱՔԱԾՈՒԻ ՀԱՍԱՆԵԼԻՈՒԹՅԱՆ ԱՊԱՀՈՎՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Թանգարանների մասին» օրենքի 24-րդ հոդվածի 1-ին մասի 21-րդ կետով՝

1. Սահմանել պետական և համայնքային թանգարանների հավաքածուի հասանելիության ապահովման կարգը՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

Նախարար՝   1/7/2025

Ժ. ԱնդրեասՅԱՆ

Հավելված Հայաստանի Հանրապետության Կրթության, գիտության, մշակույթի և սպորտի նախարարի 2025 թվականի հունվարի 07-ի N 02-Ն հրամանի

ԿԱՐԳ

ՊԵՏԱԿԱՆ ԵՎ ՀԱՄԱՅՆՔԱՅԻՆ ԹԱՆԳԱՐԱՆՆԵՐԻ ՀԱՎԱՔԱԾՈՒԻ ՀԱՍԱՆԵԼԻՈՒԹՅԱՆ ԱՊԱՀՈՎՄԱՆ

1. Սույն կարգով սահմանվում են պետական և համայնքային թանգարանների հավաքածուի հասանելիության ապահովման հետ կապված ընթացակարգերը:

2. Թանգարանների հավաքածուն հասանելի է հանրությանը, բացառությամբ սույն կարգով նախատեսված դեպքերում կիրառվող սահմանափակումների:

3. Թանգարանների հավաքածուն հասանելի է գիտական, մշակութային, կրթական, ճանաչողական, ստեղծագործական-արտադրական (հուշանվերային արտադրություն) նպատակներով:

4. Թանգարանների հավաքածուների և թանգարանային առարկաների գիտահետազոտական, կրթական և ճանաչողական նպատակներով հասանելիությունն իրականացվում է թանգարանի հետ կնքվող պայմանագրով:

5. Թանգարանների հավաքածուի հասանելիության ապահովման ձևերն են՝

1) թանգարաններում մշտական կամ ժամանակավոր ցուցադրություններ (ցուցահանդեսներ).

2) հրապարակային, հանրային ցուցադրություններ, ինչպես երկրի ներսում, այնպես էլ երկրի սահմաններից դուրս.

3) թանգարանների հավաքածուների և թանգարանային առարկաների տրամադրում կինոնկարահանման, տեսանկարահանման և լուսանկարահանման համար.

4) թանգարանների հավաքածուների և թանգարանային առարկաների պատկերների վերարտադրում տպագիր հրատարակություններում, էլեկտրոնային և այլ տեսակի հարթակներում ու զանգվածային լրատվամիջոցներում:

6. Թանգարանների հավաքածուների և թանգարանային առարկաների հասանելիության վերաբերյալ սահմանափակումներ կարող են կիրառվել միայն դրանց`

1) պահպանվածության ոչ բավարար վիճակի դեպքում.

2) վերականգնման ընթացքում գտնվելու դեպքում.

3) օրենքով սահմանված սահմանափակումների առկայության դեպքերում.

4) անվտանգային նկատառումներից ելնելով։

7. Բացառությամբ «Հեղինակային և հարակից իրավունքների մասին» օրենքով նախատեսված դեպքերի, պետական կամ համայնքային թանգարանի թանգարանային առարկաների և հավաքածուների, թանգարանի շենքերի կամ նրա համալիրի մասերի գծապատկերները, տեսապատկերները, կրկնօրինակները և դրանց վերաբերյալ տեղեկույթը գովազդային նպատակով որպես խորհրդանիշ հուշանվերների կամ այլ ապրանքների արտադրության համար տրամադրելը ֆիզիկական կամ իրավաբանական անձանց կատարվում է լիազոր պետական մարմնի համաձայնությամբ՝ պայմանագրային հիմունքներով:

8․ Հայաստանի Հանրապետության առանձնակի արժեքավոր և բացառիկ կարևորության թանգարանային հավաքածուում ընդգրկված թանգարանային առարկաների վերաբերյալ տեղեկությունները կարող են տրամադրվել միայն օրենքով սահմանված դեպքերում:

9. Թանգարանների հավաքածուներից օգտվողների իրավունքներն ու պարտականությունները սահմանվում է թանգարանի գործադիր մարմնի ղեկավարի հաստատած ներքին կանոնակարգով՝ լիազոր մարմնի հաստատած օրինակելի ձևին համապատասխան։

10․ Թանգարանի գույքամատյանը (գլխավոր մատյան) հասանելի է միայն թանգարանի գործադիր մարմնի ղեկավարին և գլխավոր ավանդապահին (ֆոնդապահին)։ Գույքամատյանին երրորդ անձանց հասանելիություն կարող է տրվել միայն օրենքով սահմանված դեպքերում:

Պաշտոնական հրապարակման օրը՝ 9 հունվարի 2025 թվական: