ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌՈՂՋԱՊԱՀՈՒԹՅԱՆ ՆԱԽԱՐԱՐ

10 հուլիս 2024 թ.

N 215-Ն

ԲԺՇԿԱԿԱՆ ՄԻՋԱՄՏՈՒԹՅԱՆ ՀԱՄԱՐ ԳՐԱՎՈՐ ՀԱՄԱՁԱՅՆՈՒԹՅՈՒՆ ՏԱԼՈՒ ԴԵՊՔԵՐԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Բնակչության բժշկական օգնության և սպասարկման մասին» օրենքի 16-րդ հոդվածի 2-րդ մասը`

ՀՐԱՄԱՅՈՒՄ ԵՄ`

1. Սահմանել, բժշկական միջամտության համար գրավոր համաձայնություն տալու դեպքերը՝ համաձայն հավելվածի:

2. Սահմանել, որ՝

1) առողջության առաջնային պահպանման ծառայություններ մատուցող կազմակերպությունում սույն հրամանի հավելվածով սահմանված բժշկական միջամտությունների իրականացման համար անձը գրավոր համաձայնություն է տալիս մեկ անգամ` օրենսդրությամբ սահմանված կարգով առողջության առաջնային պահպանման ծառայություններ մատուցող բժշկի մոտ գրանցվելիս, իսկ առողջության առաջնային պահպանման ծառայություններ մատուցող բժշկի մոտ գրանցված և սույն ենթակետում նշված մեկանգամյա համաձայնությունը չտված անձինք այդ համաձայնությունը տալիս են սույն հրամանն ուժի մեջ մտնելուց հետո հերթական առաջին այցի ժամանակ,

2) հիվանդանոցային պայմաններում բժշկական օգնություն և սպասարկում իրականացնող կազմակերպությունում սույն հրամանի հավելվածով սահմանված բժշկական միջամտությունների իրականացման համար անձը գրավոր համաձայնություն է տալիս մեկ անգամ` տվյալ դեպքի շրջանակներում, բացառությամբ մարդու կյանքին վտանգ սպառնացող դեպքերի,

3) արտահիվանդանոցային պայմաններում բժշկական օգնություն և սպասարկում իրականացնող կազմակերպությունում, սույն հրամանի հավելվածով սահմանված բժշկական միջամտությունների իրականացման համար անձը գրավոր համաձայնություն է տալիս մեկ անգամ՝ տվյալ դեպքի շրջանակներում, բացառությամբ սույն հրամանի 2-րդ կետի 1-ին ենթակետով սահմանված դեպքերի,

4) բժշկական կազմակերպությունից դուրս պայմաններում բժշկական օգնություն և սպասարկումն իրականացնելիս սույն հրամանի հավելվածով սահմանված բժշկական միջամտությունների իրականացման համար անձը գրավոր համաձայնություն է տալիս մեկ անգամ՝ տվյալ դեպքի շրջանակներում, բացառությամբ մարդու կյանքին վտանգ սպառնացող դեպքերի:

3. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

10.07.2024

Ա. ԱՎԱՆԵՍՅԱՆ

Հավելված Առողջապահության նախարարի «10» հուլիս 2024 թվականի N 215-Ն հրամանի

ԲԺՇԿԱԿԱՆ ՄԻՋԱՄՏՈՒԹՅԱՆ ՀԱՄԱՐ ԳՐԱՎՈՐ ՀԱՄԱՁԱՅՆՈՒԹՅՈՒՆ ՏԱԼՈՒ ԴԵՊՔԵՐԸ

1. Բոլոր տեսակի լաբորատոր-գործիքային ախտորոշիչ հետազոտություններ:

2. Բոլոր տեսակի ներարկումներ:

3. Մանկաբարձագինեկոլոգիական, վերարտադրողականության օժանդակ տեխնոլոգիաների կիրառմամբ բժշկական օգնության և սպասարկման ընթացքում իրականացվող միջամտություններ:

4. Ուռուցքաբանական բժշկական օգնության և սպասարկման ընթացքում իրականացվող միջամտություններ:

5. Վիրաբուժական բժշկական օգնության և սպասարկման ընթացքում իրականացվող միջամտություններ:

6. Մարդու օրգանների և (կամ) հյուսվածքների, ինչպես նաև ոսկրածուծի/արյունաստեղծ ցողունային բջիջների դոնորության և փոխպատվաստման նպատակով բժշկական օգնության և սպասարկման ընթացքում իրականացվող միջամտություններ:

7. Մարդու արյան և դրա բաղադրամասերի դոնորության և փոխներարկումային բժշկական օգնության և սպասարկման ընթացքում իրականացվող միջամտություններ։

8. Հեմոդիալիզային բժշկական օգնության և սպասարկման ընթացքում իրականացվող միջամտություններ:

9. Աֆերեզի նպատակով բժշկական օգնության և սպասարկման ընթացքում իրականացվող միջամտություններ։

10. Բոլոր տեսակի անզգայացման ծառայություններ:

11. Ստոմատոլոգիական բժշկական օգնության և սպասարկման ընթացքում իրականացվող միջամտություններ:

12. Թմրաբանական բժշկական օգնության և սպասարկման ընթացքում իրականացվող միջամտություններ:

13. Վերականգնողական և պալիատիվ բժշկական օգնության և սպասարկման ընթացքում իրականացվող միջամտություններ:

Պաշտոնական հրապարակման օրը՝ 18 հուլիսի 2024 թվական: