ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ

ՆԱԽԱԳԱՀ

31 հունվարի 2022 թ.

N 96-Ն

Հ Ր Ա Մ Ա Ն

ՀԱՐԿԱՅԻՆ ԿԱՄ ՄԱՔՍԱՅԻՆ ԾԱՌԱՅՈՂՆԵՐԻ ՊԱՏՐԱՍՏՄԱՆ ԴԱՍԸՆԹԱՑՆԵՐԻ ՄԱՍՆԱԿՑՈՒԹՅԱՆ ՀԱՄԱՐ ԸՆԴՈՒՆԵԼՈՒԹՅԱՆ ԿԱՐԳԸ, ԹԵՍՏԱՎՈՐՄԱՆ ՊԱՀԱՆՋՆԵՐԸ ԵՎ ՊԱՏՐԱՍՏՄԱՆ ԴԱՍԸՆԹԱՑԻ ԸՆԴՈՒՆԵԼՈՒԹՅԱՆԸ ՄԱՍՆԱԿՑԵԼՈՒ ՆՊԱՏԱԿՈՎ ՆԵՐԿԱՅԱՑՎՈՂ ԲԱՐԵՎԱՐՔՈՒԹՅԱՆ ՎԵՐԱԲԵՐՅԱԼ ՀԱՐՑԱԹԵՐԹԻԿԻ ՁԵՎԱՆՄՈՒՇԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Մաքսային ծառայության մասին» օրենքի 8.1-րդ հոդվածի 2-րդ մասով, 4-րդ մասի 2-րդ կետով և 7-րդ մասով, «Հարկային ծառայության մասին» օրենքի 17.1-րդ հոդվածի 2-րդ, 4-րդ մասի 2-րդ կետով և 7-րդ մասով`

ՀՐԱՄԱՅՈՒՄ ԵՄ`

1. Հաստատել հարկային կամ մաքսային ծառայողների պատրաստման դասընթացների մասնակցության համար ընդունելության կարգը և թեստավորման պահանջները` համաձայն հավելված 1-ի:

2. Հաստատել պատրաստման դասընթացի ընդունելությանը մասնակցելու նպատակով ներկայացվող բարեվարքության վերաբերյալ հարցաթերթիկի ձևանմուշը՝ համաձայն հավելված 2-ի։

3. Սույն հրամանն ուժի մեջ է մտնում պաշտոնական հրապարակմանը հաջորդող օրվանից։

Ռ. Բադասյան

Հավելված 1 Պետական եկամուտների կոմիտեի  նախագահի 2022 թվականի հունվարի 31-ի N 96-Ն հրամանի

ՀԱՐԿԱՅԻՆ ԿԱՄ ՄԱՔՍԱՅԻՆ ԾԱՌԱՅՈՂՆԵՐԻ ՊԱՏՐԱՍՏՄԱՆ ԴԱՍԸՆԹԱՑՆԵՐԻ ՄԱՍՆԱԿՑՈՒԹՅԱՆ ՀԱՄԱՐ ԸՆԴՈՒՆԵԼՈՒԹՅԱՆ ԿԱՐԳԸ ԵՎ ԹԵՍՏԱՎՈՐՄԱՆ ՊԱՀԱՆՋՆԵՐԸ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են հարկային կամ մաքսային ծառայողների պատրաստման դասընթացների մասնակցության համար ընդունելության (այսուհետ՝ Ընդունելություն) հայտարարության հրապարակման, Ընդունելության անցկացման պարբերականության, Ընդունելության տեղերի սահմանման, Ընդունելության դիմումների և կից փաստաթղթերի ներկայացման, թեստավորման (այսուհետ՝ թեստավորում) և հարցազրույցի անցկացման, բարեվարքության վերաբերյալ հարցաթերթիկի ներկայացման, Ընդունելության արդյունքների ամփոփման, թեստավորման փուլի անցկացման համար թեստերը կազմելու, թեստային առաջադրանքները ձևավորելու պահանջներին, թեստային առաջադրանքների բովանդակային առանձնահատկություններին, թեստային առաջադրանքների քանակին, թեստավորման հաղթահարման համար անհրաժեշտ նվազագույն միավորի հետ կապված հարաբերությունները։

2. Ընդունելությանը կարող են մասնակցել հայերենին տիրապետող, 18 տարին լրացած բարձրագույն կրթություն ունեցող Հայաստանի Հանրապետության քաղաքացիները։

3. Ընդունելությանը չի կարող մասնակցել այն քաղաքացին, որը չի բավարարում հարկային ծառայողի ընդունելության դեպքում՝ «Հարկային ծառայության մասին» օրենքի 16-րդ հոդվածի 3-րդ մասով, մաքսային ծառայողի ընդունելության դեպքում՝ «Մաքսային ծառայության մասին» օրենքի 49-րդ հոդվածներով սահմանված պահանջները, և (կամ) առկա է «Հանրային ծառայության մասին» օրենքի 14-րդ հոդվածով նախատեսված հիմքերից որևէ մեկը:

4. Հարկային կամ մաքսային ծառայության պաշտոն կամ հարկային կամ մաքսային մարմիններում քաղաքացիական ծառայության պաշտոն զբաղեցնող անձը (այսուհետ` Ծառայող) սույն կարգին համապատասխան իրավունք ունի մասնակցելու Ընդունելությանը` իր ցանկությամբ, անկախ տվյալ պահին իր զբաղեցրած պաշտոնից:

5. Ծառայողի` Ընդունելությանը մասնակցելու ժամանակահատվածը համարվում է աշխատանքից հարգելի բացակայություն:

6. Ընդունելությունն անցկացվում է յուրաքանչյուր տարի առնվազն մեկ անգամ։ Հարկային և մաքսային մարմնի (այսուհետ՝ Կոմիտե) ղեկավարի որոշմամբ, պայմանավորված հարկային և մաքսային ծառայության պաշտոնների համալրման անհրաժեշտությամբ, Ընդունելությունը կարող է անցկացվել նաև սույն կետում նշված պարբերականությունից տարբերվող պարբերականությամբ։

7. Ընդունելությունը բաղկացած է երկու փուլից՝ թեստավորման և հարցազրույցի։

8. Ընդունելության կազմակերպչական աշխատանքներն իրականացվում են Կոմիտեի ուսումնական կենտրոնի (այսուհետ՝ Ուսումնական կենտրոն) կողմից։

2. ԸՆԴՈՒՆԵԼՈՒԹՅԱՆ ՀԱՅՏԱՐԱՐՈՒԹՅԱՆ ՀՐԱՊԱՐԱԿՈՒՄԸ, ԸՆԴՈՒՆԵԼՈՒԹՅԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐԸ

9. Ընդունելության հայտարարությունը հրապարակվում է Կոմիտեի, ինչպես նաև Ուսումնական կենտրոնի պաշտոնական ինտերնետային կայքերում։

10. Ընդունելության փաստաթղթերի ընդունումն իրականացվում է Ընդունելության հայտարարության մեջ նշված եղանակով։

11. Ընդունելության հայտարարությունը հրապարակվում է Ընդունելության դիմումների ընդունման վերջնաժամկետից առնվազն 15 օր առաջ։

12. Ընդունելության դիմումների ներկայացման վերջնաժամկետը կարող է երկարաձգվել Կոմիտեի ղեկավարի հրամանով։

13. Ընդունելության հայտարարությամբ հրապարակվում են՝

1) Ընդունելությանը ներկայացվող պահանջները (այդ թվում՝ տեղեկատվություն այն մասին, որ «Հարկային ծառայության մասին» կամ «Մաքսային ծառայության մասին» օրենքներով սահմանված համապատասխան ստաժ ունեցող անձինք, հարկային կամ մաքսային ծառայողների պատրաստման դասընթացը հաջողությամբ ավարտելուց հետո կարող են նշանակվել նաև հարկային կամ մաքսային ծառայության ավելի բարձր պաշտոնի).

2) Ընդունելության դիմումի ձևանմուշը՝ համաձայն N 1 Ձևի,

3) դիմումի ներկայացման վերջնաժամկետը,

4) դիմումին կից ներկայացվող անհրաժեշտ փաստաթղթերի ցանկը,

5) թեստավորման փուլը հաղթահարելուց հետո ներկայացման ենթակա Կոմիտեի ղեկավարի կողմից հաստատված բարեվարքության վերաբերյալ հարցաթերթիկի ձևանմուշը համաձայն N 2 Հավելվածի,

6) Ընդունելության տեղերի քանակը,

7) դասընթացի տևողությունը, այդ թվում՝ տեսական և գործնական մասերի տևողությունը,

8) փաստաթղթերի ներկայացման եղանակը,

9) Ընդունելության փուլերի (թեստավորման և հարցազրույցի) անցկացման վերաբերյալ տեղեկատվություն, այդ թվում՝ թեստավորման փուլը հաղթահարելու համար անհրաժեշտ նվազագույն միավորը,

10) մաքսային կամ հարկային ծառայության թափուր պաշտոնների խմբերի անվանումները.

11) օրենքով տվյալ պաշտոնների խմբերի համար նախատեսված պաշտոնային դրույքաչափերը,

12) թեստավորման հարցերի շրջանակը, թեստային առաջադրանքները (առանց ճիշտ պատասխանի)՝ համապատասխան իրավական ակտերի հոդվածներին հղումներով,

13) այլ անհրաժեշտ տեղեկատվություն։

14. Ընդունելության դիմումին կից ներկայացվում են հետևյալ փաստաթղթերի պատճենները․

1) անձնագիր կամ նույնականացման քարտ,

2) անձնագիր ներկայացնելու պարագայում հանրային ծառայությունների համարանիշ (կամ սոցիալական քարտ կամ անձին հանրային ծառայությունների համարանիշ տրամադրելու մասին տեղեկանք կամ հանրային ծառայությունների համարանիշ չստանալու վերաբերյալ տեղեկանք),

3) հարկային և մաքսային ծառայողի համար սահմանված մասնագիտական գիտելիքների մասով պահանջների բավարարումը և մասնագիտական ստաժ դիտարկվող աշխատանքում աշխատանքային պարտականությունները հավաստող փաստաթղթեր (եթե պատրաստման դասընթացը հաջողությամբ ավարտելուց հետո մասնակիցը ցանկանում է զբաղեցնել «Հարկային ծառայության մասին» կամ «Մաքսային ծառայության մասին» օրենքներով սահմանված համապատասխան ստաժ պահանջող ավելի բարձր պաշտոն),

4) արական սեռի անձինք ներկայացնում են նաև զինգրքույկի կամ դրան փոխարինող ժամանակավոր և զորակոչային տեղամասին կցագրման վկայական կամ համապատասխան տեղեկանք,

5) բարձրագույն կրթության առկայությունը հավաստող փաստաթուղթ (օտարերկրյա պետությունում բարձրագույն կրթություն ստացածների համար՝ փաստաթուղթ նրանց կրթության որակավորման աստիճանների համարժեքության և դիպլոմների ճանաչելիության մասին),

6) ռուսերենի կամ անգլերենի իմացության բավարար մակարդակը հավաստող փաստաթուղթ,

7) համակարգչային գիտելիքները հավաստող փաստաթուղթ։

15. Սույն կարգի 14-րդ կետի 6-րդ ենթակետում նշված լեզուների իմացության բավարար մակարդակը հավաստող փաստաթուղթ է հանդիսանում Լեզուների իմացության համաեվրոպական համակարգի (CEFR) B1 մակարդակը հավաստող փաստաթուղթը։ Լեզուների իմացության բավարար մակարդակը կարող է ստուգվել նաև ուսումնական կենտրոնի կողմից կազմակերպվող թեստի միջոցով, որի դեպքում սույն կարգի 14-րդ կետի 6-րդ ենթակետում նշված լեզուների իմացության բավարար մակարդակը հավաստող փաստաթուղթ է հանդիսանում թեստը դրական հանձնելու վերաբերյալ ուսումնական կենտրոնի տրամադրած հավաստումը։ Լեզուների իմացության բավարար մակարդակը հավաստող փաստաթուղթը կիրառելի է երկու տարի ժամկետով։

16. Սույն կարգի 14-րդ կետի 7-րդ ենթակետում նշված համակարգչային գրագիտությունը հավաստող փաստաթուղթ է համարվում համակարգչային գործի ուսուցման կենտրոնի կողմից տրամադրված տեղեկանքը (հավաստագիր, սերտիֆիկատ) համակարգչային բազային գիտելիքներ ունենալը հավաստելու վերաբերյալ։ Համակարգչային գրագիտության մակարդակը կարող է ստուգվել նաև ուսումնական կենտրոնի կողմից կազմակերպվող թեստի միջոցով, որի դեպքում սույն կարգի 14-րդ կետի 7-րդ ենթակետում նշված համակարգչային բազային գիտելիքներ ունենալը հավաստող փաստաթուղթ է հանդիսանում թեստը դրական հանձնելու վերաբերյալ ուսումնական կենտրոնի տրամադրած հավաստումը։ Համակարգչային գիտելիքների բավարար մակարդակը հավաստող փաստաթուղթը կիրառելի է երկու տարի ժամկետով։

17. Սույն կարգի 14-րդ կետի 6-րդ ենթակետում նշված օտար լեզվի իմացությունը հավաստող փաստաթղթերը չեն պահանջվում, եթե բարձրագույն կրթության առկայությունը հավաստող փաստաթղթով հավաստվում է, որ տվյալ կրթությունը անձը ստացել է համապատասխան լեզվով։

18. Ուսումնական կենտրոնը փաստաթղթերը ստանալուց հետո 5 աշխատանքային օրվա ընթացքում ուսումնասիրում է ներկայացված փաստաթղթերի ամբողջականությունը և էլեկտրոնային եղանակով տեղեկացնում է դիմումատուին փաստաթղթերի ընդունման, ինչպես նաև դրանց ամբողջականության վերաբերյալ։ Եթե դիմումատուի կողմից ներկայացրած փաստաթղթերն ամբողջական չեն, և (կամ) դրանցում առկա են տեխնիկական սխալներ, ապա դիմումատուին տրվում է հնարավորություն 2 աշխատանքային օրվա ընթացքում համալրելու անհրաժեշտ փաստաթղթերի ցանկը և (կամ) շտկելու առկա տեխնիկական սխալները։ Ուսումնական կենտրոնը ամբողջականացված և (կամ) տեխնիկական սխալները շտկված փաստաթղթերը ստանալուց հետո 1 աշխատանքային օրվա ընթացքում էլեկտրոնային եղանակով տեղեկացնում է դիմումատուին դրանց ընդունման վերաբերյալ:

19. Հայտարարությամբ ներկայացված պահանջներին չհամապատասխանող (իսկ Ուսումնական կենտրոնի կողմից թեստավորում կազմակերպելու դեպքում նաև նշված թեստավորման արդյունքներով համապատասխանությունը չհաստատվելու դեպքում) անձի դիմումը համարվում է մերժված և վերջինիս չի թույլատրվում մասնակցել Ընդունելության թեստավորման փուլին։ Այդ մասին էլեկտրոնային եղանակով տեղեկացվում է դիմումատուին սույն հավելվածի 18-րդ կետով նախատեսված ժամկետում:

20. Ուսումնական կենտրոնի կողմից վարվում է էլեկտրոնային մատյան դիմում ներկայացնող բոլոր անձանց հաշվառման նպատակով։

3. ԹԵՍՏԱՎՈՐՄԱՆ ԿԱԶՄԱԿԵՐՊՈՒՄԸ, ԹԵՍՏԱՎՈՐՄԱՆԸ ՆԵՐԿԱՅԱՑՎՈՂ ՊԱՀԱՆՋՆԵՐԸ

21. Դիմորդի մասնակցությունը Ուսումնական կենտրոնի կողմից կազմակերպվող թեստավորմանը թույլատրվում է, եթե ներկայացված դիմումը և կից փաստաթղթերը բավարարում են հայտարարությամբ ներկայացված պահանջներին, բացառությամբ սույն կարգի 14-րդ կետի 6-7-րդ ենթակետերում նշված փաստաթղթերի բացակայության դեպքերի, եթե համապատասխան ստուգումը կազմակերպվում է Ուսումնական կենտրոնի կողմից։

22. Թեստավորման փուլն անցկացվում է Ընդունելության մասին հայտարարության հրապարակումից հետո ոչ շուտ քան 25-րդ և ոչ ուշ քան 30-րդ աշխատանքային օրը:

23. Ընդունելության թեստավորման փուլի ընթացքը տեսաձայնագրվում է, իսկ հարցազրույցի փուլի ընթացքը՝ ձայնագրվում։

24. Ուսումնական կենտրոնը թեստավորման օրվա մասին թեստավորումից առնվազն 2 աշխատանքային օր առաջ տեղեկացնում է մասնակցին՝ դիմումում նշված էլեկտրոնային փոստի հասցեին հրավեր ուղարկելու միջոցով։ Թեստավորման օրվա, վայրի և ժամի մասին հայտարարությունը հրապարակվում է նաև Կոմիտեի և Ուսումնական կենտրոնի պաշտոնական ինտերնետային կայքերում։

25. Թեստավորման մասնակցության հրավեր ստացած մասնակիցը թեստավորմանը չմասնակցելու դեպքում զրկվում է տվյալ Ընդունելության հետագա փուլին մասնակցելու հնարավորությունից՝ անկախ թեստավորմանը չմասնակցելու պատճառներից։

26. Թեստավորումը կարող է անցկացվել մեկ կամ մի քանի խմբերով՝ տարբեր օրերի կամ ժամերի՝ ելնելով թեստավորմանը մասնակցող անձանց թվից։

27. Ուսումնական կենտրոնի՝ թեստավորման կազմակերպման պատասխանատուն անձը հաստատող փաստաթղթի միջոցով ստուգում է մասնակցի ինքնությունը և թույլատրում նրա մուտքը թեստավորման սենյակ:

28. Թեստավորման մասնակիցների մուտքը թեստավորման սենյակ դադարեցվում է թեստավորումը սկսելուց 5 րոպե առաջ:

29. Թեստավորումն անցկացվում է էլեկտրոնային եղանակով, թեստավորման համար նախատեսված հատուկ սրահում, որն ունի թեստավորմանը մասնակցող քաղաքացիների թվից ոչ պակաս քանակությամբ համակարգիչներ, որոնք միացված են միայն թեստավորման անցկացման համար պահանջվող կապուղիներին:

30. Թեստավորումը սկսելուց առաջ թեստավորման կազմակերպման պատասխանատուն ամփոփ ներկայացնում է թեստավորման անցկացման ընթացակարգը, բացատրում է թեստավորման անցկացմանը վերաբերող տեխնիկական հարցերը` պատասխանելով մասնակիցների թեստավորման անցկացման ընթացակարգին վերաբերող տեխնիկական բոլոր հարցերին:

31. Թեստավորման մասնակիցները չեն կարող`

1) իրենց հետ թեստավորման սենյակ բերել տպագիր, ձեռագիր նյութեր, կապի միջոցներ կամ այլ տեխնիկական սարքեր, թեստավորման առաջադրանքների կատարման համար աղբյուր հանդիսացող այլ միջոցներ,

2) օգտվել որևէ գրավոր (տպագիր, ձեռագիր և այլն) նյութից, կապի միջոցներից կամ այլ տեխնիկական սարքերից, թեստավորման առաջադրանքների կատարման համար աղբյուր հանդիսացող այլ միջոցներից՝ բացառությամբ թեստավորման սենյակում տեղադրված համակարգիչների և հասանելի ծրագրերի,

3) թեստավորման առաջադրանքների կատարման վերաբերյալ հարցեր տալ ներկա գտնվող անձանց, այդ թվում` թեստավորման կազմակերպման պատասխանատուին՝ բացառությամբ տեխնիկական հարցերի,

4) մինչև թեստային առաջադրանքների կատարումն ավարտելը՝ դուրս գալ համակարգից կամ ապաակտիվացնել գործող ծրագրերը,

5) անջատել կամ վերագործարկել համակարգիչը, կապուղիները կամ դրանց սնուցումը, կամ իրականացնել համակարգի կամ համակարգչի սովորական աշխատանքը խափանող այլ գործողություններ,

6) դուրս գալ սենյակից՝ մինչև թեստային առաջադրանքների կատարումն իր կողմից ավարտելը:

32. Մասնակցի կողմից սույն կարգի 31-րդ կետում նշված պահանջները խախտելու դեպքում թեստավորման կազմակերպման պատասխանատուն դադարեցնում է մասնակցի աշխատանքը` էլեկտրոնային եղանակով կազմելով արձանագրություն, որի արդյունքում համակարգն ինքնաշխատ եղանակով մասնակցին գնահատում է զրո միավոր:

33. Սույն կարգի 30-րդ կետի պահանջների կատարումից հետո թեստավորման մասնակիցները համակարգում մուտքագրում են իրենց անունը, հայրանունը, ազգանունը:

34. Թեստերի կազմման և թեստային առաջադրանքների ձևավորման ընթացակարգերը կազմակերպում, այդ թվում՝ թեստային առաջադրանքները էլեկտրոնային համակարգ է մուտքագրում Ուսումնական կենտրոնը` Կոմիտեի անձնակազմի կառավարման ստորաբաժանման օժանդակությամբ։ Թեստերի կազմման աշխատանքներին ներգրավվում են նաև Կոմիտեի համապատասխան մասնագիտացված ստորաբաժանումների աշխատակիցները:

35. Ուսումնական կենտրոնը թեստերի կազմման գործընթացը կարող է արտապատվիրակել նաև երրորդ անձանց՝ գնումների օրենսդրության հիման վրա՝ գնման ընթացակարգերի կիրառման միջոցով։

36. Թեստավորման յուրաքանչյուր մասնակցի համար համակարգչային ծրագիրը համապատասխան մասնագիտության թեստերի բազայից, պատահականության սկզբունքով, ձևավորում է թեստի անհատական տարբերակ։

37. Թեստերը բաղկացած են մասնագիտական ընդհանուր գիտելիքները և հմտություններն ստուգող 40 առաջադրանքից:

38. Թեստի ձևավորումից հետո յուրաքանչյուր մասնակից իր համակարգչի էկրանին ստանում է թեստը և անցնում թեստային առաջադրանքների կատարմանը:

39. Թեստի առաջադրանքներին պատասխանելու համար տրվում է 80 րոպե ժամանակ, որը լրանալուց հետո թեստի լրացումը դադարեցվում է:

40. Թեստավորման մասնակիցը յուրաքանչյուր թեստային առաջադրանքի համար ընտրում է պատասխանի իր տարբերակը՝ կատարելով համապատասխան նշում:

41. Թեստավորման մասնակիցը, մինչև առաջադրանքի վերջնական պահպանումը, ընտրված պատասխանները կարող է փոփոխել և ավարտել աշխատանքը մինչև թեստի կատարման համար սահմանված ժամանակի ավարտը:

42. Թեստային առաջադրանքների կատարման համար սահմանված ժամանակի ավարտին թեստավորման անցկացման էլեկտրոնային համակարգն ապաակտիվացնում է թեստը:

43. Եթե մասնակիցը որևէ պատճառով չի պահպանել իր կատարած առաջադրանքը մինչև հատկացված ժամանակի ավարտը, ապա առաջադրանքի կատարման վերջնական տարբերակ է համարվում թեստն ապաակտիվացնելու պահին համակարգում ինքնաշխատ եղանակով պահպանված տարբերակը:

44. Համակարգը, մուտքագրված տվյալների հիման վրա, ինքնաշխատ եղանակով գեներացնում է ճիշտ և սխալ պատասխանները՝ ձևավորելով թեստավորման գնահատականը։

45. Թեստային առաջադրանքների պատասխանների գնահատված տարբերակի միջոցով մասնակիցն անմիջապես տեղեկանում է թեստավորման իր արդյունքի մասին:

46. Թեստը համարվում է հանձնված, եթե մասնակիցը հաղթահարել է անցողիկ նվազագույն միավորը։

47. Անցողիկ նվազագույն միավոր է համարվում թեստային առաջադրանքների առնվազն 32-ին տրված ճիշտ պատասխանը:

48. Թեստավորման հարցաշարում ընդգրկված առաջադրանքներին չպատասխանված և (կամ) սխալ պատասխանված տարբերակները գնահատվում են 0 միավոր։

49. Թեստավորման արդյունքներն ամփոփվում են Ուսումնական կենտրոնի կողմից թեստավորման օրվա, իսկ եթե թեստավորումն իրականացվել է տարբեր օրերի, ապա թեստավորման վերջին օրվան հաջորդող 1 աշխատանքային օրվա ընթացքում։

50. Ուսումնական կենտրոնը ընդունելության դիմումում նշված էլեկտրոնային փոստի հասցեին հաղորդագրություն ուղարկելու միջոցով յուրաքանչյուր մասնակցի ուղարկում է թեստավորման՝ տվյալ մասնակցի արդյունքը՝ յուրաքանչյուր սխալ պատասխանված առաջադրանքի դեպքում՝ դրա ճիշտ պատասխանների նշումով։ Միաժամանակ նույն հաղորդագրությամբ թեստավորման անցողիկ նվազագույն և դրանից բարձր միավորներ ստացած մասնակիցներին առաջարկվում է 3 աշխատանքային օրվա ընթացքում լրացնել և Ուսումնական կենտրոնի էլեկտրոնային փոստի հասցեին ուղարկել լրացված բարեվարքության վերաբերյալ հարցաթերթիկը։

51. Սույն կարգի 50-րդ կետում նշված ժամկետում բարեվարքության վերաբերյալ լրացված հարցաթերթիկը Ուսումնական կենտրոն չներկայացնելու դեպքում դիմորդի մասնակցությունը հետագա փուլին չի թույլատրվում։

4. ՀԱՐՑԱԶՐՈՒՅՑԻ ԿԱԶՄԱԿԵՐՊՈՒՄՆ ՈՒ ԱՆՑԿԱՑՈՒՄԸ

52. Լրացված բարեվարքության հարցաթերթիկը ներկայացնելու համար սահմանված ժամկետի ավարտից հետո 15 աշխատանքային օրվա ընթացքում կազմակերպվում է Ընդունելության հարցազրույցի փուլը։ Հարցազրույցի անցկացման օրվա, վայրի և ժամի մասին տեղեկատվությունը հրապարակվում է Կոմիտեի և Ուսումնական կենտրոնի պաշտոնական ինտերնետային կայքերում։

53. Ընդունելության հարցազրույցի փուլն անցկացնելու նպատակով Կոմիտեի ղեկավարի կողմից ձևավորվում է առնվազն հինգ անդամից կազմված հարցազրույցի հանձնաժողով։ Անհրաժեշտության դեպքում կարող են ձևավորվել մեկից ավել հանձնաժողովներ՝ պայմանավորված հարցազրույցին մասնակցող անձանց թվով։

54. Հանձնաժողովի նախագահը Կոմիտեի ղեկավարի տեղակալն է։

55. Հարցազրույցի հանձնաժողովի կազմում Կոմիտեի ղեկավարի հրավերով կարող են ընդգրկվել ֆինանսների, էկոնոմիկայի նախարարությունների կամ այլ պետական մարմինների ներկայացուցիչներ։

56. Հանձնաժողովի մյուս անդամները հանդիսանում են Կոմիտեի ստորաբաժանումների, ինչպես նաև Ուսումնական կենտրոնի աշխատակիցներ։

57. Հանձնաժողովի քարտուղարության աշխատանքներն իրականացնում է Ուսումնական կենտրոնը։

58. Հանձնաժողովը յուրաքանչյուր մասնակցի հետ հարցազրույցն անցկացնում է առանձին: Հարցազրույցի արդյունքների համար հաշվի է առնվում նաև մասնակցի բարեվարքության հարցաթերթիկը։

59. Հարցազրույցի ընթացքում հանձնաժողովն իր կողմից նախօրոք հաստատված հարցաշարի միջոցով ստուգում է մասնակիցների անձնական որակները և արժանիքները, ընդհանուր հոգեբանական նկարագիրը, ներառյալ ինքնատիրապետման, վարվեցողության, ունկնդրելու կարողության և հաղորդակցության հմտությունները։ Հարցազրույցի ընթացքում մասնակցին կարող են տրվել մասնագիտությանը, հարկային կամ մաքսային օրենսդրության ընդհանուր կանոնակարգումներին, հարկային կամ մաքսային ծառայողի վարքագծի կանոններին առնչվող բանավոր հարցեր։

60. Յուրաքանչյուր հարցին պատասխանելուց հետո հանձնաժողովի յուրաքանչյուր անդամ մասնակցի պատասխանը գնահատում է առավելագույնը 2 միավորով` հետևյալ կերպ՝ ամբողջական պատասխանի դեպքում՝ 2 միավորով, թերի պատասխանի դեպքում՝ 1 միավորով, իսկ սխալ պատասխանի կամ պատասխան չհնչեցնելու դեպքերում՝ 0 միավորով:

61. Հարցազրույցի ընթացքում մասնակիցներին չի թույլատրվում օգտվել որևէ գրավոր (տպագիր, ձեռագիր և այլն) նյութից, կապի միջոցներից կամ այլ տեխնիկական սարքերից, ինչպես նաև այլ միջոցներից, հարցերին պատասխանելու հետ կապված հարցեր տալ ներկա գտնվող անձանց, այդ թվում՝ հանձնաժողովի անդամներին, ինչպես նաև դուրս գալ սենյակից:

62. Սույն կարգի 61-րդ կետում նշված պահանջների խախտման դեպքում հանձնաժողովը կազմում է արձանագրություն և դադարեցնում է տվյալ մասնակցի մասնակցությունը հարցազրույցին:

63. Հարցազրույցի արդյունքներով, հանձնաժողովի անդամների բաց քվեարկությամբ, ձայների պարզ մեծամասնությամբ յուրաքանչյուր մասնակցի համար կայացվում է դրական կամ բացասական որոշում: Որոշմանը կցվում է նաև հանձնաժողովի անդամների կողմից յուրաքանչյուր հարցի գնահատված միավորները։ Ձայների հավասարության դեպքում որոշիչ է հանձնաժողովի նախագահի ձայնը: Բացասական որոշում կայացնելու դեպքում մասնակիցը համարվում է Ընդունելությունը չանցած:

64. Հարցազրույցի արդյունքներն ամփոփվում են հարցազրույցի անցկացման նույն օրը։

5. ԱՐԴՅՈՒՆՔՆԵՐԻ ԱՄՓՈՓՈՒՄԸ

65. Եթե հարցազրույցի արդյունքներով հարցազրույցի փուլը հաղթահարել են Ընդունելության համար սահմանված տեղերի քանակը գերազանցող թվով մասնակիցներ, ապա Ընդունելության համար սահմանված տեղերը զբաղեցվում են ըստ թեստավորման արդյունքների՝ բարձրից ցածր միավորներ հավաքելու սկզբունքից ելնելով։ Թեստավորման արդյունքներով հավասար միավորներ հավաքած մասնակիցների դեպքում հաշվի է առնվում հարցազրույցի արդյունքում մասնակցի կողմից ստացած միավորները։

66. Հավասար միավորների դեպքում Ընդունելության տեղերի քանակը կարող է ավելացվել համապատասխան հավասար միավորներ ստացած մասնակիցների թվով։

67. Հարցազրույցի փուլին մասնակցած, սակայն չհաղթահարած մասնակիցներին իրենց ցանկությամբ տրվում է Ընդունելության արդյունքների մասին համապատասխան տեղեկանք՝ էլեկտրոնային եղանակով:

68. Հարցազրույցի փուլը հաղթահարած մասնակիցները իրավունք են ստանում մասնակցելու Ուսումնական կենտրոնի կողմից կազմակերպվող հարկային կամ մաքսային ծառայողի պատրաստման դասընթացին։

69. Դասընթացի մեկնարկի մասին մասնակիցները ծանուցվում են Ընդունելության դիմումում նշված էլեկտրոնային փոստի միջոցով:

70. Թեստավորման և հարցազրույցի արդյունքները կարող են բողոքարկվել Կոմիտեի ղեկավարին գրավոր՝ թեստավորման և հարցազրույցի ավարտից հետո մեկ ժամվա ընթացքում։ Ընդ որում, եթե թեստավորումը կազմակերպվում է մի քանի օրերի կամ մեկ օրվա ընթացքում թեստավորում կազմակերպվում է տարբեր ժամերի, ապա թեստավորման արդյունքների բողոքարկման ժամկետը հաշվարկվում է թեստավորման յուրաքանչյուր խմբի համար առանձին՝ յուրաքանչյուր խմբի թեստավորման ավարտից հետո։

71. Բողոքարկումը թեստավորման առաջադրանքի կամ հարցազրույցի հարցաշարի որևէ հարցադրման կամ դրա ենթադրյալ պատասխանի ճշտության, ինչպես նաև թեստավորման արդյունքում մասնակցի հավաքած միավորները հաշվելիս թույլ տրված հնարավոր սխալի վիճարկումն է։

72. Կոմիտեի ղեկավարի հանձնարարությամբ Ուսումնական կենտրոնը մեկ աշխատանքային օրվա ընթացքում ուսումնասիրում է բողոքը և բողոքի հիմնավոր լինելու կամ չլինելու մասին համապատասխան եզրակացությունը ներկայացնում է Կոմիտեի ղեկավարին։

73. Կոմիտեի ղեկավարը սույն հավելվածի 72-րդ կետում նշված եզրակացությունը ստանալուց հետո մինչև երկու աշխատանքային օրվա ընթացքում կայացնում է մասնակցի բողոքը բավարարելու կամ մերժելու որոշում։

74. Եթե պարզվում է, որ թեստավորման արդյունքների հաշվարկման ժամանակ թույլ տրված հավանական սխալի վերաբերյալ մասնակցի բողոքը հիմնավորված է, ապա Կոմիտեի ղեկավարը բավարարում է մասնակցի պահանջը՝ կատարելով թեստավորման արդյունքների ճիշտ հաշվարկ։ Եթե Կոմիտեի ղեկավարը որոշում է բավարարել մասնակցի բողոքը և սխալ է համարում որևէ հարցադրում, ապա այդ որոշման հիման վրա տվյալ հարցը (խնդիրը) պարունակող թեստավորման առաջադրանքներ լրացրած բոլոր մասնակիցների համար կատարվում է թեստավորման և հարցազրույցի արդյունքների ճիշտ հաշվարկ։

75. Թեստավորման և հարցազրույցի արդյունքները կարող են բողոքարկվել դատական կարգով։

Ձև N 1

Պետական եկամուտների  կոմիտեի նախագահի 2022 թ. հունվարի 31-ի թիվ 96-Ն հրամանի հավելվածի

ԴԻՄՈՒՄ

Դասընթացի անվանումը՝   ———————————————————————————

Անձնական տվյալներ

Հավելված 2 ՀՀ պետական եկամուտների կոմիտեի  նախագահի 2022 թ. հունվարի 31-ի N 96-Ն հրամանի

ԲԱՐԵՎԱՐՔՈՒԹՅԱՆ ՎԵՐԱԲԵՐՅԱԼ ՀԱՐՑԱԹԵՐԹԻԿ

1.1 ԼՐԱՑՈՒՑԻՉ ՏԵՂԵԿՈՒԹՅՈՒՆՆԵՐ

2. ՄԱՍՆԱԿՑԻ ԿՐԹՈՒԹՅԱՆ, ԱՇԽԱՏԱՆՔԱՅԻՆ ՓՈՐՁԻ, ՆԵՐԱՌՅԱԼ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ԵՎ ԳՈՐԾԱՏՈՒՆԵՐԻ ԱՆՎԱՆՈՒՄՆԵՐԻ, ԶԲԱՂԵՑՐԱԾ ՊԱՇՏՈՆԻ (ՊԱՇՏՈՆՆԵՐԻ) ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐ

4. ՄԱՍՆԱԿՑԻ ՔՐԵԱԿԱՆ, ՎԱՐՉԱԿԱՆ ԿԱՄ ԿԱՐԳԱՊԱՀԱԿԱՆ ՊԱՏԱՍԽԱՆԱՏՎՈՒԹՅԱՆ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐ

4.1 ԼՐԱՑՈՒՑԻՉ ՏԵՂԵԿՈՒԹՅՈՒՆՆԵՐ

5. ՄԱՍՆԱԿՑԻ ՔՐԵԱԿԱՆ ԵՆԹԱՄՇԱԿՈՒՅԹԻՆ ՀԱՐԵԼՈՒ ՀՆԱՐԱՎՈՐՈՒԹՅԱՆ ՎԵՐԱԲԵՐՅԱԼ ՏԵՂԵԿՈՒԹՅՈՒՆՆԵՐ

5.1 ԼՐԱՑՈՒՑԻՉ ՏԵՂԵԿՈՒԹՅՈՒՆՆԵՐ

6. Մասնակցի գույքային դրության վերաբերյալ ամփոփ տեղեկություններ

6.2. ՄԱՍՆԱԿՑԻ ՍԵՓԱԿԱՆՈՒԹՅՈՒՆԸ

6.2.1. ԱՆՇԱՐԺ ԳՈՒՅՔԸ

6.2.2. ՏՐԱՆՍՊՈՐՏԻ ՄԻՋՈՑՆԵՐԸ

6.2.3. ԱՐԺԵԹՂԹԵՐ ԵՎ ԱՅԼ ՆԵՐԴՐՈՒՄՆԵՐ

6.2.4. ՀԱՆՁՆՎԱԾ ՓՈԽԱՌՈՒԹՅՈՒՆՆԵՐ, ԲԱՆԿԱՅԻՆ ԱՎԱՆԴՆԵՐ

6.2.5. ՈՒԹ ՄԻԼԻՈՆ ԴՐԱՄԻՑ ԿԱՄ ԴՐԱՆ ՀԱՄԱՐԺԵՔ ԱՐՏԱՐԺՈՒՅԹԻՑ ԱՎԵԼԻ ԱՐԺԵՔ ՈՒՆԵՑՈՂ ԳՈՒՅՔԸ (ԹԱՆԿԱՐԺԵՔ ԳՈՒՅՔ)

6.2.6. ԴՐԱՄԱԿԱՆ ՄԻՋՈՑՆԵՐԸ

6.2.7. ԼՐԱՑՈՒՑԻՉ ՏԵՂԵԿՈՒԹՅՈՒՆՆԵՐ

6.3. ՄԱՍՆԱԿՑԻ, ՎԵՐՋԻՆ ԵՐԵՔ ՏԱՐԻՆԵՐԻ ԵԿԱՄՈՒՏՆԵՐԸ

7․0 ԿԱՊԸ ՄՐՑՈՒՅԹՆ ԻՐԱԿԱՆԱՑՆՈՂ ՄԱՐՄՆԻ ՀԵՏ

(1) Կենսագրական այլ տեղեկատվության կամավոր բացահայտում

Տրամադրեք Ձեր, ինչպես նաև Ձեր անձնական, ընտանեական, սոցիալական, մասնագիտական կյանքին առնչվող ցանկացած այլ փաստեր, որոնք կցանկանայիք, որ հաշվի առնվի՝ բարեվարքության վերաբերյալ եզրակացություն կազմելիս։

Պաշտոնական հրապարակման օրը՝ 31 հունվարի 2022 թվական: