ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌՈՂՋԱՊԱՀՈՒԹՅԱՆ ՆԱԽԱՐԱՐ

21 հունիսի 2021 թ.

N 50-Ն

Հ Ր Ա Մ Ա Ն

Հիմք ընդունելով «Մարդուն օրգաններ և (կամ) հյուսվածքներ փոխպատվաստելու մասին» Հայաստանի Հանրապետության օրենքի 5-րդ հոդվածը`

Հրամայում եմ`

1. Սահմանել փոխպատվաստման անհրաժեշտության մասին բժշկական եզրակացություն տալու կարգը` համաձայն Հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՊԱՇՏՈՆԱԿԱՏԱՐ՝

Ա. ԱՎԱՆԵՍՅԱՆ

Հավելված ՀՀ առողջապահության նախարարի 2021 թվականի հունիսի 21-ի N 50-Ն հրամանի

ԿԱՐԳ

ՓՈԽՊԱՏՎԱՍՏՄԱՆ ԱՆՀՐԱԺԵՇՏՈՒԹՅԱՆ ՄԱՍԻՆ ԲԺՇԿԱԿԱՆ ԵԶՐԱԿԱՑՈՒԹՅՈՒՆ ՏԱԼՈՒ

1. Սույն կարգով կարգավորվում են փոխպատվաստման անհրաժեշտության մասին բժշկական եզրակացություն (այսուհետ` եզրակացություն) տալու հետ կապված հարաբերությունները:

2. Եզրակացությունը` համաձայն սույն հավելվածի Ձևի, տրվում է փոխպատվաստումն իրականացնող բժշկական կազմակերպության տնօրենի հրամանով ստեղծված բժշկական հանձնաժողովի (այսուհետ` հանձնաժողով) կողմից:

3. Հանձնաժողովի կազմում ընդգրկվում են ռեցիպիենտի բուժող բժիշկը (համաձայնությամբ, եթե բուժող բժիշկն այլ բժշկական կազմակերպության աշխատող է), վիրաբույժ, անեսթեզիոլոգ-ռեանիմատոլոգ, փոխպատվաստում իրականացնող համապատասխան մասնագետ:

4. Անհրաժեշտության դեպքում, բժշկական կազմակերպության տնօրենի հրամանով, հանձնաժողովի աշխատանքներում կարող են ներգրավվել այլ մասնագիտացում ունեցող բժիշկներ։

5. Եզրակացություն տալու համար հիմք են հանդիսանում՝

1) ռեցիպիենտի կողմից անձամբ, իսկ դրա անհնարինության դեպքում, նրա օրինական ներկայացուցչի կողմից բժշկական կազմակերպություն ներկայացված բժշկական փաստաթղթերը,

2) հանձնաժողովի անդամների ու ռեցիպիենտի, իսկ դրա անհնարինության դեպքում, նրա օրինական ներկայացուցչի միջև անցկացվող զրույցի արդյունքը,

3) լրացուցիչ իրականացված լաբորատոր-գործիքային ախտորոշիչ հետազոտությունները, որոնք նշանակվել են հանձնաժողովի կողմից:

6. Եզրակացություն տալու համար ռեցիպիենտի հիվանդության պատմագրին կամ ամբուլատոր բժշկական քարտին կցվում են հետևյալ փաստաթղթերը`

1) ռեցիպիենտի անձը հաստատող փաստաթուղթը,

2) լաբորատոր-գործիքային ախտորոշիչ հետազոտությունների արդյունքները։

7. Եթե հանձնաժողովը զրույցի արդյունքի և (կամ) փաստաթղթերի ուսումնասիրության հիման վրա, ինչպես նաև հաշվի առնելով լրացուցիչ լաբորատոր-գործիքային ախտորոշիչ հետազոտությունների արդյունքները` համոզվում է, որ տվյալ ռեցիպիենտին անհրաժեշտ է օրգանի և (կամ) հյուսվածքի փոխպատվաստում, ապա տալիս է եզրակացություն, որը հաստատվում է հանձնաժողովի բոլոր անդամների և բժշկական կազմակերպության տնօրենի ստորագրություններով:

8. Եզրակացությունը ձևակերպվում է երկու օրինակից, որոնցից մեկը տրվում է ռեցիպիենտին, մյուսը պահվում է բժշկական կազմակերպությունում, որտեղից տրվել է եզրակացությունը և կցվում է հիվանդության պատմագրին կամ ամբուլատոր բժշկական քարտին:

9. Եզրակացությունը տրվում է անձամբ ռեցիպիենտին, իսկ եթե դա հնարավոր չէ, ապա` նրա ընտանիքի անդամներին (ամուսնուն, ծնողներին և զավակներին (որդեգրողներին ու որդեգրվածներին): Եթե ռեցիպիենտն անչափահաս է կամ Հայաստանի Հանրապետության օրենսդրությամբ սահմանված կարգով ճանաչվել է անգործունակ, ապա եզրակացությունը տրվում է նրա օրինական ներկայացուցչին:

10. Եզրակացությունը ստանալիս` ռեցիպիենտը, իսկ դրա անհնարինության դեպքում, նրա ընտանիքի անդամները (ամուսինը, ծնողները և զավակները (որդեգրողներն ու որդեգրվածները) կամ նրա օրինական ներկայացուցիչը եզրակացության երկու օրինակի վրա կատարում է նշում այն մասին, որ ծանոթացել է եզրակացության բովանդակությանը, ստորագրելով եզրակացության` այդ նպատակով հատկացված մասերում:

11. Եթե եզրակացությունը տալուց հետո մեկ տարվա ընթացքում ռեցիպիենտին անհրաժեշտ օրգանի և (կամ) հյուսվածքի փոխպատվաստումը չի իրականացվել, ապա փոխպատվաստման անհրաժեշտությունը պետք է կրկին վերահաստատվի սույն կարգով սահմանված կարգով տրված նոր եզրակացությամբ:

Ձև

ԲԺՇԿԱԿԱՆ ԵԶՐԱԿԱՑՈՒԹՅՈՒՆ ՓՈԽՊԱՏՎԱՍՏՄԱՆ ԱՆՀՐԱԺԵՇՏՈՒԹՅԱՆ ՄԱՍԻՆ

Ռեցիպիենտի անունը, ազգանունը, հայրանունը ______________________________ Ռեցիպիենտի սեռը __________________ Ռեցիպիենտի ծննդյան տարեթիվը, ամիսը, ամսաթիվը (բառերով) ___________________ ______________________________________________________________   Ռեցիպիենտի հաշվառման վայրը և բնակության վայրը (եթե դրանք նույնն են, ապա նշել մեկ անգամ) ______________________________________________________________   Ռեցիպիենտի արյան խումբը _________________, ռեզուս-գործոնը____________ Ռեցիպիենտի գենոտիպը ______________________________________________ ______________________________________________________________   Ռեցիպիենտի օրգանիզմի իմունային համակարգի առանձնահատկությունները __________ ______________________________________________________________   Ռեցիպիենտի վերջնական ախտորոշումը ___________________________________ ______________________________________________________________   Փոխպատվաստման անհրաժեշտության մասին բժշկական ցուցումները _______________ ______________________________________________________________________________________   Բժշկական հանձնաժողովի եզրակացությունը _____________________________________________ ____________________________________________________________________________________   Բժշկական կազմակերպության անվանումը ____________________________________________________   Բժշկական հանձնաժողովի անդամներ և հանձնաժողովի աշխատանքներում ներգրավված բժիշկներ   ___________________ (պաշտոնը)  _________________ ___________________ ___________________ ___________________  (ստորագրությունը) ___________________ ___________________ ___________________ _________________ (անունը,ազգանունը,հայրանունը) _________________ _________________ _________________               Տնօրեն ___________________ (ստորագրությունը)                         _______________________________________ (անունը, ազգանունը, հայրանունը)                        ____ _________ ________ թ.                ___________________________ ((ռեցիպիենտի կամ նրա օրինական ներկայացուցչի  կամ նրա ընտանիքի անդամի (ընդգծել)               __________________ (ստորագրությունը)               ____________________ (անունը, ազգանունը, հայրանունը)

Պաշտոնական հրապարակման օրը՝ 28 հունիսի 2021 թվական: