«Գրանցված է»
ՀՀ արդարադատության
նախարարության կողմից
23 փետրվարի 2005 թ.
Պետական գրանցման թիվ 10005112

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԱՌՈՂՋԱՊԱՀՈՒԹՅԱՆ ՆԱԽԱՐԱՐ

27 հունվարի 2005 թ. ք. Երևան

N 74-Ն

                                   

Հ Ր Ա Մ Ա Ն

«ԱՆՎՃԱՐ ԿԱՄ ԱՐՏՈՆՅԱԼ ՊԱՅՄԱՆՆԵՐՈՎ ԴԵՂԵՐԻ ՀԱՏԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ»

Ի կատարումն Հայաստանի Հանրապետության կառավարության 2006 թվականի նոյեմբերի 23-ի N 1717-Ն որոշման 2-րդ կետի, բժշկական կազմակերպությունների կողմից անվճար կամ արտոնյալ պայմաններով դեղերի հատկացման գործընթացն առավել լիարժեք ու արդյունավետ կազմակերպելու նպատակով,

(նախաբանը խմբ. 08.06.07 N 1014-Ն)

Հրամայում եմ`

1. Հաստատել անվճար կամ արտոնյալ պայմաններով դեղերի հատկացման կարգը` համաձայն N 1 հավելվածի:

2. Հաստատել անվճար կամ արտոնյալ պայմաններով տրվող դեղերի դեղատոմսերի ամփոփային ռեեստրի ձևը` համաձայն N 2 հավելվածի:

3. Ուժը կորցրած ճանաչել Հայաստանի Հանրապետության առողջապահության նախարարի 2004 թվականի հուլիսի 20-ի «Անվճար կամ արտոնյալ պայմաններով դեղերի հատկացման կարգը հաստատելու մասին» N 759-Ն հրամանը:

4. Հայաստանի Հանրապետության առողջապահության նախարարի իրավական խորհրդական Ս. Քրմոյանին` սույն հրամանը սահմանված կարգով ներկայացնել Հայաստանի Հանրապետության արդարադատության նախարարություն` պետական գրանցման: 

5. Սույն հրամանի կատարման հսկողությունը հանձնարարել ՀՀ առողջապահության նախարարի առաջին տեղակալ Հ. Դարբինյանին և ՀՀ առողջապահության նախարարի տեղակալ Թ. Հակոբյանին:

Նախարար`

Ն. Դավիդյան

Հավելված N 1 ՀՀ առողջապահության նախարարի 2005 թ. հունվարի 27-ի  N 74-Ն հրամանի

Կ Ա Ր Գ

ԱՆՎՃԱՐ ԿԱՄ ԱՐՏՈՆՅԱԼ ՊԱՅՄԱՆՆԵՐՈՎ ԴԵՂԵՐԻ ՀԱՏԿԱՑՄԱՆ

1. Սույն կարգով սահմանվում և կանոնակարգվում է Հայաստանի Հանրապետության կառավարության 2006 թվականի նոյեմբերի 23-ի N 1717-Ն որոշմամբ հաստատված անվճար կամ արտոնյալ պայմաններով դեղեր ձեռք բերելու իրավունք ունեցող բնակչության սոցիալական խմբերի և հիվանդությունների ցանկում ընդգրկված հիվանդներին դեղերի հատկացման կարգը:

(1-ին կետը խմբ. 08.06.07 N 1014-Ն)

2. Անվճար կամ արտոնյալ պայմաններով դեղեր ձեռք բերելու իրավունք ունեցող բնակչության սոցիալական խմբերին և հիվանդությունների ցանկում ընդգրկված հիվանդներին դեղերով ապահովումն իրականացվում է դեղերի ձեռքբերման բոլոր աղբյուրների հաշվին ամբուլատոր-պոլիկլինիկական բժշկական կազմակերպությունների, մասնագիտացված հիվանդանոցների ու դիսպանսերների միջոցով:

3. Համաձայն «Գնումների մասին» Հայաստանի Հանրապետության օրենքի պետության կողմից կենտրոնացված գնումներով ձեռք բերվող դեղերը հատկացվում են ամբուլատոր-պոլիկլինիկական բժշկական կազմակերպությունների, մասնագիտացված հիվանդանոցներին և դիսպանսերներին` համաձայն բաշխացուցակների, որոնք հաստատվում են ՀՀ առողջապահության նախարարության հրամաններով:

Դեղերի անվճար հատկացումը հիվանդներին իրականացվում է ամբուլատոր-պոլիկլինիկական և դիսպանսերային բժշկական կազմակերպությունների կողմից դեղատոմսերով, համապատասխան գրառում կատարելով հիվանդի ամբուլատոր քարտում, իսկ մասնագիտացված հիվանդանոցների կողմից` հիվանդության պատմությունում:

4. Հայաստանի Հանրապետության պետական բյուջեի «Առողջապահություն» խմբի «Առաջնային (ամբուլատոր-պոլիկլինիկական) բուժօգնություն» ենթախմբով բնակչության առողջության առաջնային պահպանման համար նախատեսված միջոցների հաշվին անվճար կամ արտոնյալ պայմաններով դեղեր ձեռք բերելու իրավունք ունեցող սոցիալական խմբերում և հիվանդություններ ցանկում ընդգրկված անձանց դեղերով ապահովումն իրականացնում են ամբուլատոր-պոլիկլինիկական բժշկական կազմակերպությունները.

4.1. Անվճար կամ արտոնյալ պայմաններով դեղեր ստանալու համար ամբուլատոր-պոլիկլինիկական բժշկական կազմակերպություն են ներկայացնում անձը հաստատող փաստաթուղթ (երեխաների համար` ծննդյան վկայական) և Հայաստանի Հանրապետության օրենսդրությամբ սահմանված կարգով տվյալ սոցիալական խմբի պատկանելությունը հաստատող փաստաթուղթ, իսկ դեղատուն կամ դեղատնային կրպակ` դեղատոմսը և անձը հաստատող փաստաթուղթ:

4.2. Հիվանդներին անվճար կամ արտոնյալ պայմաններով դեղեր նշանակելիս  հիմք է ընդունվում ամբուլատոր քարտում առկա ախտորոշումը կամ հիվանդանոցային կազմակերպության կողմից տրված հիվանդության պատմությունից գրված քաղվածքը (էպիկրիզը):

4.3. Անվճար կամ արտոնյալ պայմաններով տրվող դեղերի դեղատոմսերը դուրս են գրվում Հայաստանի Հանրապետության կառավարության 2001 թվականի օգոստոսի 14-ի «Հայաստանի Հանրապետությունում կիրառվող դեղատոմսային ձևաթղթերը հաստատելու մասին» N 759 որոշման և Հայաստանի Հանրապետության առողջապահության նախարարի 2002 թվականի փետրվարի 2-ի «Հայաստանի Հանրապետությունում դեղատոմսի դուրսգրման և դեղերի բաց թողնման կարգի» N 100 հրամանի պահանջներին համապատասխան:

4.4. Մեկ դեղատոմսի ձևաթերթիկով թույլատրվում է դուրս գրել անվճար կամ արտոնյալ պայմաններով տրամադրվող միայն մեկ դեղ:

4.5 Դեղերի դուրս գրումն իրականացվում է Հայաստանի Հանրապետության առողջապահության նախարարի 2013 թվականի մայիսի 14-ի N 17-Ն հրամանով հաստատված «Հայաստանի Հանրապետության հիմնական դեղերի ցանկին» համապատասխան:

Ելնելով հիվանդությունից, եթե հիվանդին բժշկի ցուցումով նշանակվել է Հիմնական դեղերի ցանկում չընդգրկված դեղ, ապա ամբուլատոր-պոլիկլինիկական բժշկական կազմակերպության տնoրենի հրամանով ստեղծվում է հանձնաժողով, որի եզրակացության հիման վրա հիվանդին դուրս է գրվում դեղ Հայաստանի Հանրապետության առողջապահության նախարարի 2016 թվականի հուլիսի 12-ի N 25-Ն հրամանով հաստատված «Հայաստանի Հանրապետությունում գրանցված դեղերի պետական գրանցամատյանի (ռեեստրի)» ցանկից:

(4.5-րդ կետը խմբ. 07.05.09 N 10-Ն, փոփ. 10.10.16 N 35-Ն)

4.6. Ամբուլատոր-պոլիկլինիկական բժշկական կազմակերպությունները կարող են դեղեր ձեռք բերել և հիվանդներին անվճար հատկացնել հատուկ այդ նպատակով ստեղծված ներպոլիկլինիկական դեղատնից (դեղատնային կրպակ), իսկ վերջիններիս բացակայության դեպքում` գլխավոր (ավագ) բուժքրոջ միջոցով:

4.7. Ամբուլատոր-պոլիկլինիկական բժշկական կազմակերպությունները կարող են անվճար և արտոնյալ պայմաններով դեղերի ապահովումը կազմակերպել նաև պայմանագրային հիմունքներով` իրենց սպասարկման տարածքում գործող ու լիցենզավորված դեղատների կամ դեղատնային կրպակների միջոցով: Պայմանագիրը կնքելիս ապահովվում է սպասարկման տարածքում գործող դեղատների կամ դեղատնային կրպակների ազատ մասնակցությունը, տեղակայման ընդլայնվածությունը, հաշվի առնելով դրանց դեղերի տեսականին (հիմնական դեղերի ցանկին համապատասխան), գնային շահավետությունը:

4.8 Անվճար կամ արտոնյալ պայմաններով տրվող դեղատոմսերը դուրս գրելիս բնօրինակը տրվում է հիվանդին դեղը դեղատնից կամ դեղատնային կրպակից ստանալու համար, իսկ դրա պատճենը պահվում է ամբուլատոր-պոլիկլինիկական բժշկական կազմակերպությունում:

Դեղատանը կամ դեղատնային կրպակում գնահատվում է դեղատոմսը (նշվում է դեղի գինը, զեղչը և վճարման ենթակա գումարը), դեղատոմսի ետևի մասում ստացողը կատարում է նշում ստացած դեղի և վճարած գումարի մասին:

Դեղատոմսերը պահվում են դեղատանը կամ դեղատնային կրպակում հինգ տարի ժամկետով  և ոչնչացվում սահմանված կարգով:

(4.8-րդ կետը խմբ. 07.05.09 N 10-Ն)

4.9. Յուրաքանչյուր ամսվա վերջում դեղատան կողմից ամփոփվում է անվճար և զեղչով տրված դեղերի փաստացի ծախսը, և ամփոփ տվյալները ներկայացվում են ամբուլատոր-պոլիկլինիկական բժշկական կազմակերպությանը, որի հիման վրա համատեղ կազմվում է ռեեստր` համաձայն սույն կարգը հաստատող հրամանի 2-րդ կետով հաստատված «Անվճար կամ արտոնյալ պայմաններով տրված դեղերի դեղատոմսերի ամփոփային ռեեստրի» ձևի (հավելված 2-ը):

4.10. Ռեեստրը կազմվում է երեք օրինակից, որոնցից մեկը պահվում է դեղատանը կամ դեղատնային կրպակում, երկրորդ օրինակը` ամբուլատոր-պոլիկլինիկական բժշկական կազմակերպությունում, իսկ երրորդը` բժշկական կազմակերպության կողմից ներկայացվում է ՀՀ առողջապահության նախարարության պետական առողջապահական գործակալություն:

4.11. Դեղատան  կամ դեղատնային կրպակի կողմից անվճար կամ արտոնյալ պայմաններով տրված դեղերի արժեքի փոխհատուցումն ամբուլատոր-պոլիկլինիկական բժշկական կազմակերպություններն իրականացնում են դեղատան կամ դեղատնային կրպակի հետ կնքված պայմանագրերի համաձայն:

5. Հայաստանի Հանրապետության առողջապահության նախարարության անունով մարդասիրական օգնությամբ ստացված և բաշխված, ինչպես նաև անմիջապես առողջապահական կազմակերպությունների անունով այլ մարդասիրական խողովակներով ստացված դեղերն անվճար տրվում են բոլոր հիվանդներին, ըստ բժշկական ցուցումների:

Անվճար պայմաններով դեղերի հատկացման ժամանակ առաջնահերթությունը տալ մարդասիրական օգնությամբ ստացված դեղերին:

6. Պետության կողմից կենտրոնացված գնումներով ձեռք բերվող դեղերի սպառման, գնման կամ մատակարարման ընդհատման դեպքում, հիվանդների բուժման շարունակականության և անընդհատության ապահովման նպատակով ամբուլատոր-պոլիկլինիկական բժշկական կազմակերպությունները, ՀՀ առողջապահության նախարարության հրահանգով, պետք է իրենց ֆինանսավորման ծավալում դեղերի համար սահմանված գումարների հաշվին գնեն և անվճար ապահովեն հիվանդներին:

(հավելվածը խմբ. 08.06.07 N 1014-Ն, 07.05.09 N 10-Ն, փոփ. 10.10.16 N 35-Ն)

Հավելված N 2 ՀՀ առողջապահության նախարարի 2005 թ. հունվարի 27-ի  N 74-Ն հրամանի

ԱՆՎՃԱՐ ԿԱՄ ԱՐՏՈՆՅԱԼ ՊԱՅՄԱՆՆԵՐՈՎ ՏՐՎՈՂ ԴԵՂԵՐԻ ԴԵՂԱՏՈՄՍԵՐԻ ԱՄՓՈՓԱՅԻՆ ՌԵԵՍՏՐ N _______

200  թ. ____________ համար

____________________	____________________
____________________	____________________
Դեղատան (դեղատնային կրպակ) անվանումը	(ամբուլատոր-պոլիկլինիկական կազմակերպություն)

1. Դեղատոմսերի քանակը _______________

2. Վճարման ենթակա

գումարը/մանրածախ գներով ________________

(թվերով)

________________________________

(բառերով)

Տնօրեն` ________________________	Տնօրեն` ________________________
Հաշվապահ` _______________________	Հաշվապահ` _______________________
Կ. Տ.	Կ. Տ.