«Գրանցված է»

ՀՀ ԱՌՈՂՋԱՊԱՀՈՒԹՅԱՆ 

նախարարության կողմից

3 նոյեմբերի 2015 թ.

Պետական գրանցման թիվ 10015442

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԱՌՈՂՋԱՊԱՀՈՒԹՅԱՆ ՆԱԽԱՐԱՐ

23 հոկտեմբերի 2015 թ.

N 52-Ն

Հ Ր Ա Մ Ա Ն

ԱՐՅԱՆ ԴՈՆՈՐԻ ԻՄՈՒՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Մարդու արյան և դրա բաղադրամասերի դոնորության և փոխներարկումային բժշկական օգնության մասին» Հայաստանի Հանրապետության օրենքի 7-րդ հոդվածի 1-ին մասի 7-րդ կետը, 15-րդ հոդվածը`

Հրամայում եմ`

1. Հաստատել արյան դոնորի իմունացման կարգը` համաձայն հավելվածի:

Ա. Մուրադյան

Կ Ա Ր Գ

ԱՐՅԱՆ ԴՈՆՈՐԻ ԻՄՈՒՆԱՑՄԱՆ

1. Սույն կարգով կարգավորում են արյան դոնորի իմունացման հետ կապված հարաբերությունները:

2. Դոնորի իմունացումը կատարվում է բուժական հատկություններով օժտված հակառեզուս իմունոգլոբուլինի արտադրության համար անհրաժեշտ ռեզուս հակամարմիններով հարուստ պլազմայի ստացման նպատակով:

3. Ռեզուս հակածնով իմունացումը և կրկնակի իմունացումը (այսուհետ` ռեիմունացում) կատարվում է ռեզուս բացասական ccddee կամ Ccddee ֆենոտիպերով արյան պատկանելիություն ունեցող դոնորին:

4. Ռեզուս հակածնով իմունացումը կամ ռեիմունացումը կատարվում է իմունացման ենթարկվող դոնորի գրավոր համաձայնությամբ՝ համաձայն Ձև 1-ի:

5. Յուրաքանչյուր անգամ այն արյունը, որով կատարվում է իմունացումը կամ ռեիմունացումը, հետազոտվում է Հայաստանի Հանրապետության առողջապահության նախարարի 2012 թվականի օգոստոսի 7-ի թիվ 12-Ն հրամանի համաձայն:

6. Իմունացումից կամ ռեիմունացումից առաջ իմունացման կամ ռեիմունացման ենթարկվող դոնորը անցնում է բժշկական հետազոտում՝

1) արյան ընդհանուր քննություն,

2) կենսաքիմիական քննություն (ԱԼՏ (ալանինամինոտրանսֆերազա ֆերմենտ), ԱՍՏ (ասպարտատամինոտրանսֆերազա ֆերմենտ), կրեատինին, միզանյութ),

3) որովայնի օրգանների գերձայնային հետազոտություն,

4) էլեկտրասրտագրություն,

5) հեպատիտ Բ-ի հակածնի (HBsAg), հակա-HBc հակամարմինների, հեպատիտ Ց-ի հակամարմինների, ինչպես նաև սիֆիլիսի և բրուցելոզի հակամարմինների որոշում:

7. Մինչ իմունացումը իմունացման ենթարկվող դոնորի արյունը հետազոտվում է Կումբսի ուղղակի ռեակցիայով:

8. Կումբսի ուղղակի ռեակցիայի դրական արդյունքը հանդիսանում է իմունացման և ռեիմունացման հակացուցում:

9. Կումբսի ուղղակի ռեակցիայի բացասական արդյունքի դեպքում դոնորի արյան շիճուկում որոշվում են ռեզուս հակամարմինները Կումբսի անուղղակի ռեակցիայով:

10. Ռեզուս հակամարմինների առկայության դեպքում որոշվում է դրանց սպեցիֆիկությունը (յուրահատկությունը) և տիտրը (հակամարմինների քանակը):

11. Եթե սույն կարգի 10-րդ կետի ցուցանիշները բավարար չեն հակառեզուս իմունոգլոբուլինի արտադրության համար, ապա հակամարմինների ակտիվության բարձրացման նպատակով այդ անձանց կատարում են ռեիմունացում:

12. Իմունացման համար հակածին է հանդիսանում ռեզուս դրական ccDee կամ CcDee ֆենոտիպերով Օ (I) կամ իմունացվող դոնորի հետ միևնույն արյան խմբային պատկանելիություն ունեցող արյունը:

13. Իմունացման և ռեիմունացման համար նախատեսված արյունը չպետք է պարունակի Kell հակածին:

14. Իմունացումը կատարվում է մի քանի փուլով՝

1) առաջին փուլում կատարում են երեք միջմկանային կամ ներերակային ներարկումներ 3-4 օր ընդմիջումներով.

ա. առաջին ներարկում՝ 10 մլ դոնորական արյուն-հակածին,

բ. երկրորդ ներարկում 5 մլ դոնորական արյուն-հակածին,

գ. երրորդ ներարկում 5 մլ դոնորական արյուն-հակածին,

2) երկրորդ փուլը կատարվում է իմունացման առաջին փուլից երեք- չորս ամիս հետո.

ա. կատարում են երեք միջմկանային կամ ներերակային ներարկումներ 3 օր ընդմիջումներով,

բ. յուրաքանչյուր ներարկում՝ 5 մլ դոնորական արյուն-հակածին,

15. Յուրաքանչյուր փուլի ավարտից հետո (8-30-րդ օրը) որոշում են հակա-ռեզուս հակամարմինների քանակը (տիտրը) Կումբսի անուղղակի ռեակցիայով:

16.Եթե երկու փուլերից հետո հակա-ռեզուս հակամարմիններ չեն առաջացել, ապա երկրորդ փուլի ավարտից 4-6 ամիս անց կատարվում է իմունացման երրորդ և չորրորդ փուլերը` սույն կարգի 15-րդ կետի համաձայն:

17. Եթե չորրորդ փուլի ավարտից հետո հակա-ռեզուս հակամարմիններ չեն առաջացել, ապա 4 ամիս անց կատարվում են հինգերորդ և վեցերորդ փուլերը, որոնց ժամանակ անհրաժեշտության դեպքում միջմկանային ներարկումների թիվը կարելի է ավելացնել 1-3 ներարկումներով:

18. Եթե այդ փուլերից հետո հակամարմիններ չեն առաջանում, ապա այդ դոնորի իմունացումը դադարեցվում է:

19. Ռեիմունացումը, որը կատարվում է հակա-ռեզուս հակամարմինների քանակի պահպանման կամ բարձրացման նպատակով, իրականացվում է այն դոնորներին, որոնց մոտ հակա-ռեզուս հակամարմինների քանակը իջել է 1:32-ից:

20. Ռեիմունացումը կատարվում 2-9 ամիսների ընթացքում:

21. Ռեիմունացումը կատարվում է երկու կամ երեք միջմկանային կամ ներերակային 5 մլ դոնորական արյան ներարկումներով՝ 2-3 օր ընդմիջումով:

22. Իմունացումից հետո լրացվում է հակա-ռեզուս հակածնով իմունացման վերաբերյալ տեղեկանքը` համաձայն Ձև 2-ի:

Ձև 1

ՀԱՄԱՁԱՅՆԱԳԻՐ

Դոնորի իմունացման վերաբերյալ

Ես`_______________________________________________________________________________

դոնորի անուն, ազգանուն

տեղեկացված լինելով, որ իմունացման հետևանքով ինձ մոտ կարող է զարգանալ հետփոխներարկումային բարդություն, եթե ինձ փոխներարկվի ռեզուս դրական էրիթրոցիտ պարունակող արյան բաղադրամաս, տալիս եմ իմ համաձայնությունը ինձ դոնորական արյուն-հակածնով իմունացման վերաբերյալ:

Դոնոր	___________________________________
	ստորագրություն

Ամսաթիվ «____» _____________20   թ.

 Ձև 2

ՏԵՂԵԿԱՆՔ

հակա-ռեզուս հակածնով իմունացման վերաբերյալ

Կազմակերպության անվանումը _____________________________________________

Դոնորի անուն, ազգանուն, հայրանուն ________________________________________

Արյան խումբը ըստ ABO համակարգի________________________________________

Ռեզուս պատկանելիության ֆենոտիպը______________________________________

Իմունացվել է ___________________________ հակածնով (ռեզուս-հակածին)

Արյան բաղադրամասերի փոխներարկման դեպքում պարտադիր փոխներարկել

______ խմբի և ______ռեզուս պատկանելիության արյան բաղադրամաս

Լաբորատորիայի ղեկավար`	_________________________
	Ստորագրություն

Կազմակերպության գործադիր մարմնի ղեկավար ՝	_________________________
	Ստորագրություն

Կ.Տ. (առկայության դեպքում)

Տրամադրման ամսաթիվ «____» _____________ 20   թ.