«Գրանցված է»

ՀՀ արդարադատության

նախարարության կողմից

22 նոյեմբերի 2012 թ.

Պետական գրանցման թիվ 11812414

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՖԻՆԱՆՍՆԵՐԻ ՆԱԽԱՐԱՐ

29 հոկտեմբերի 2012 թ.

թիվ 923-Ն

Հ Ր Ա Մ Ա Ն

ՎԻՃԱԿԱԽԱՂԻ ԳՈՎԱԶԴԻ ԲՈՎԱՆԴԱԿՈՒԹՅԱՆ ՀԱՄԱՁԱՅՆԵՑՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՖԻՆԱՆՍՆԵՐԻ ԵՎ ԷԿՈՆՈՄԻԿԱՅԻ ՆԱԽԱՐԱՐՈՒԹՅԱՆ 2000 ԹՎԱԿԱՆԻ ՍԵՊՏԵՄԲԵՐԻ 11-Ի N 229 ՀՐԱՄԱՆՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հիմք ընդունելով Հայաստանի Հանրապետության վարչապետի 2012 թվականի մայիսի 23-ի N 450-Ա որոշմամբ հաստատված Հայաստանի Հանրապետության ֆինանսների նախարարության բիզնես գործընթացների կանոնակարգման միջոցառումների ծրագրի 7-րդ կետը և ղեկավարվելով «Իրավական ակտերի մասին» Հայաստանի Հանրապետության օրենքի 72-րդ հոդվածով.

Հրամայում եմ`

1. Ուժը կորցրած ճանաչել «Հայաստանի Հանրապետության ֆինանսների և էկոնոմիկայի նախարարության 2000 թվականի սեպտեմբերի 11-ի «Վիճակախաղի գովազդի բովանդակության համաձայնեցման մասին» N 229 հրամանը:

2. Հաստատել վիճակախաղի գովազդի բովանդակության համաձայնեցման կարգը և ձևը` համաձայն NN 1 և 2 հավելվածների:

3. Վիճակախաղի գովազդի բովանդակությանը համաձայնություն տալու կամ դրանք մերժելու իրավասությունը վերապահել Հայաստանի Հանրապետության ֆինանսների նախարարության աշխատակազմի լիցենզավորման գործակալությանը:

4. Սույն հրամանի կատարման պատասխանատու սահմանել Հայաստանի Հանրապետության ֆինանսների նախարարության աշխատակազմի լիցենզավորման գործակալության պետին:

5. Սույն հրամանն ուժի մեջ է մտնում պաշտոնական հրապարակմանը հաջորդող 10-րդ օրը:

Վ. Գաբրիելյան

Հավելված N 1 ՀՀ ֆինանսների նախարարի 2012 թվականի հոկտեմբերի 29-ի N 923-Ն հրամանի

Կ Ա Ր Գ

ՎԻՃԱԿԱԽԱՂԻ ԳՈՎԱԶԴԻ ԲՈՎԱՆԴԱԿՈՒԹՅԱՆ ՀԱՄԱՁԱՅՆԵՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են վիճակախաղեր կազմակերպող տնտեսվարող սուբյեկտների (այսուհետ` Կազմակերպիչ) կողմից նախքան վիճակախաղի գովազդի հրապարակումը լիազոր մարմնի հետ համաձայնեցման համար վիճակախաղի գովազդի բովանդակությունը ներկայացնելու հետ կապված հարաբերությունները:

2. «Վիճակախաղերի մասին» Հայաստանի Հանրապետության օրենքի 5-րդ հոդվածի 1-ին մասի «բ» կետին համապատասխան՝ Կազմակերպիչը նախքան վիճակախաղի գովազդի հրապարակումը, դրա բովանդակությունը ներկայացնում է Հայաստանի Հանրապետության ֆինանսների նախարարության համաձայնեցմանը:

3. Կազմակերպիչը վիճակախաղի գովազդի բովանդակությունը ՀՀ ֆինանսների նախարարություն է ներկայացնում երկու օրինակից` ՀՀ ֆինանսների նախարարի կողմից հաստատված ձևով (N 2 Հավելված)։

4. Սույն կարգի 2-րդ և 3-րդ կետերով նախատեսված տեղեկատվությունը Հայաստանի Հանրապետության ֆինանսների նախարարությունում հասցեագրվում է Հայաստանի Հանրապետության ֆինանսների նախարարության աշխատակազմի լիցենզավորման գործակալությանը (Այսուհետ` Գործակալություն):

5. Կազմակերպիչը վիճակախաղի գովազդի բովանդակությունը ներկայացնում է Հայաստանի Հանրապետության ֆինանսների նախարարության քարտուղարություն թղթային, կամ փոստային, կամ էլեկտրոնային եղանակով` ուղարկելով secretariat@minfin.am էլեկտրոնային հասցեին, ընդ որում` էլեկտրոնային եղանակով ներկայացնելու դեպքում վիճակախաղի գովազդի բովանդակությունը պետք է ստորագրված լինի կազմակերպչի կողմից էլեկտրոնային ստորագրությամբ։

6. Քարտուղարություն գրանցման (մուտքագրման) ամսաթիվը համարվում է վիճակախաղի գովազդի բովանդակության ներկայացման ամսաթիվ:

7. Կազմակերպչի կողմից ներկայացված վիճակախաղի գովազդի բովանդակությանը համաձայնեցում տալու կամ մերժելու նպատակով իրականացվում է ուսումնասիրություն` ներկայացված ձևի համապատասխանությունը սույն կարգով հաստատված ձևին և դրանում ներկայացված տեղեկությունների համապատասխանությունը Հայաստանի Հանրապետության օրենսդրության և «Վիճակախաղերի մասին» ու «Գովազդի մասին» Հայաստանի Հանրապետության օրենքների պահանջներին։

8. Գործակալությունը` վիճակախաղի գովազդի բովանդակությունը իրեն ներկայացնելու օրվան հաջորդող տասն օրվա ընթացքում ընդունում է որոշում վիճակախաղի գովազդի բովանդակությանը համաձայնություն տալու կամ մերժելու մասին և այդ մասին գրավոր տեղեկացնում Կազմակերպչին: Եթե նշված ժամկետում համաձայնություն տալը չի մերժվում, ապա այն համարվում է տրված:

9. Վիճակախաղի գովազդի բովանդակության համաձայնեցում տալու կամ մերժելու գործընթացի իրականացման պատասխանատու է հանդիսանում Գործակալության խաղային գործի լիցենզավորման բաժինը:

10. Եթե Գործակալությունը ընդունել է վիճակախաղի գովազդի բովանդակության համաձայնություն տալու մասին որոշում, ապա կազմակերպչին է առձեռն տրամադրվում լիազոր մարմնի հետ համաձայնեցված` վիճակախաղի գովազդի մեկ օրինակը Գործակալության պետի ստորագրությամբ և Հայաստանի Հանրապետության ֆինանսների նախարարության աշխատակազմի լիցենզավորման գործակալության Հայաստանի Հանրապետության զինանշանի պատկերի կնիքով: Երկրորդ օրինակը՝ Կազմակերպչի կողմից առաջին օրինակի ստացման վերաբերյալ գրառումով և ստորագրությամբ պահվում է Գործակալությունում՝ Կազմակերպչի անհատական գործում կամ վիճակախաղի գովազդի բովանդակությունների պահման համար նախատեսված թղթապանակում: Վիճակախաղի գովազդի բովանդակությանը համաձայնություն տալու մասին գրությամբ Կազմակերպչին տեղեկացվում է նաև, որ լիազոր մարմնի հետ համաձայնեցված` վիճակախաղի գովազդի մեկ օրինակը կարող է առձեռն ստանալ Գործակալության խաղային գործի լիցենզավորման բաժնից ցանկացած աշխատանքային օր աշխատանքային ժամերի ընթացքում:

(10-րդ կետը փոփ. 01.12.14 թիվ 851-Ն)

11. «Վիճակախաղերի մասին» Հայաստանի Հանրապետության օրենքի 5-րդ հոդվածի 1-ին մասի «բ» կետին համապատասխան՝ վիճակախաղի գովազդին լիազոր մարմինը չի տալիս իր համաձայնությունը, եթե այն`

1) հակասում է «Գովազդի մասին» Հայաստանի Հանրապետության օրենքին.

2) լիազոր մարմնի հետ համաձայնեցված համապատասխան վիճակախաղի կազմակերպման և անցկացման կանոնակարգի դրույթներին.

3) պարունակում է թյուր կամ ապակողմնորոշող տեղեկություններ։

12. Վիճակաղաղի գովազդի բովանդակությանը համաձայնություն տալը մերժելու մասին որոշում կայացնելու դեպքում Լիազոր մարմինը գրավոր տեղեկացման մեջ նշում է մերժման հիմք հանդիսացած պատճառը(ները)` վկայակոչելով այն իրավական ակտը, որի ուժով մերժվում է: Վիճակախաղի գովազդի բովանդակությանը համաձայնություն տալը մերժելու դեպքում Կազմակերպչի կողմից ներկայացված Վիճակախաղի գովազդի բովանդակության օրինակները պահվում են Գործակալությունում՝ Կազմակերպչի անհատական գործում կամ վիճակախաղի գովազդի բովանդակությունների պահման համար նախատեսված թղթապանակում:

13. Վիճակախաղի կանոնակարգի` ՀՀ ֆինանսների նախարարության հետ համաձայնեցված գովազդի բովանդակության վրա ազդող փոփոխությունների դեպքում կազմակերպիչը ՀՀ ֆինանսների նախարարության հաստատմանը նշված փոփոխությունները ներկայացնելու հետ միաժամանակ ներկայացնում է գովազդի համապատասխանաբար փոփոխված տեքստը, որը քննարկվում է սույն կարգի դրույթներին համապատասխան՝ ընդհանուր հիմունքներով:

(հավելվածը փոփ. 01.12.14 թիվ 851-Ն)

Հավելված N 2 ՀՀ ֆինանսների նախարարի 2012 թվականի հոկտեմբերի 29-ի N 923-Ն հրամանի

Հաստատված է ՀՀ ֆինանսների նախարարի 20— թ. —————— -ի N ——— հրամանով

Համաձայնեցված է ՀՀ ֆինանսների նախարարության հետ «——» «——————» թ. ՀՀ ֆինանսների նախարարության աշխատակազմի լիցենզավորման գործակալության պետ` _______________

Վիճակախաղի գովազդի բովանդակությունը ներկայացնողի`

անվանումը __________________________________________________________

կազմակերպական-իրավական ձևը _______________________________________

վիճակախաղի անվանումը ______________________________________________

վիճակախաղի տեսակը ________________________________________________

իրավաբանական անձի գտնվելու վայրը __________________________________

հեռախոս ____________________________________________________________

Ստորև Ձեր համաձայնեցմանն ենք ներկայացնում

վիճակախաղի գովազդի բովանդակությունը`

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

______________________________________________________________________________

Վիճակախաղի գովազդի հրապարակման համար նախատեսվող ժամկետները (գործողության ժամկետը)

_____ ____________ 20 թ.

_______________________ ստորագրությունը