«Գրանցված է»
ՀՀ արդարադատության
նախարարության կողմից
20 նոյեմբերի 2006 թ.
Պետական գրանցման թիվ 11206384

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՈՍՏԻԿԱՆՈՒԹՅԱՆ ՊԵՏ

1 նոյեմբերի 2006 թ. ք. Երևան

N 8-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԿՐԹԱՀԱՄԱԼԻՐԻ ԴԻՄՈՐԴՆԵՐԻ ԸՆՏՐՈՒԹՅԱՆ ՄԱՆԴԱՏԱՅԻՆ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
(վերնագիրը փոփ. 12.10.13 թիվ 17-Ն)

ՀՀ կառավարության 2003 թ. օգոստոսի 28-ի «Ոստիկանության ուսումնական հաստատությունում ուսման մասին կանոնագիրքը հաստատելու մասին» թիվ 1184-Ն որոշմամբ հաստատված ոստիկանության ուսումնական հաստատությունում ուսման մասին կանոնագրքի 10-րդ կետի պահանջի համաձայն.

Հրամայում եմ՝

1. Սահմանել ՀՀ ոստիկանության կրթահամալիրի դիմորդների ընտրության մանդատային հանձնաժողովի գործունեության կարգը՝ համաձայն հավելվածի:

(1-ին կետը փոփ. 12.10.13 թիվ 17-Ն)

2. Հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

Ոստիկանության գեներալ-գնդապետ`

Հ. Հարությունյան

Հավելված ՀՀ ոստիկանության պետի 2006 թ. նոյեմբերի 1-ի թիվ 8-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԿՐԹԱՀԱՄԱԼԻՐԻ ԴԻՄՈՐԴՆԵՐԻ ԸՆՏՐՈՒԹՅԱՆ ՄԱՆԴԱՏԱՅԻՆ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ

1. Սույն կարգով կարգավորվում է Հայաստանի Հանրապետության կառավարությանն առընթեր Հայաստանի Հանրապետության ոստիկանության (այսուհետ` ոստիկանություն) ուսումնական հաստատություն` ոստիկանության կրթահամալիր (այսուհետ` կրթահամալիր) ընդունվելու համար պետական պատվերի շրջանակներում դիմած քաղաքացիների (այսուհետ` դիմորդ) ընտրության մանդատային հանձնաժողովի (այսուհետ՝ մանդատային հանձնաժողով) գործունեության կարգը:

2. Կրթահամալիրի դիմորդների ընտրության նպատակով ոստիկանության պետի հրամանով ստեղծվում է ոստիկանության հինգ ծառայողներից բաղկացած մանդատային հանձնաժողով:

3. Մանդատային հանձնաժողովի նախագահ նշանակվում է կրթահամալիրի գլխավոր խմբի պաշտոն զբաղեցնող ծառայողներից, անդամները՝ ոստիկանության շտաբի, կադրերի և իրավաբանական վարչությունների գլխավոր խմբի պաշտոն զբաղեցնող ծառայողներից, իսկ մանդատային հանձնաժողովի քարտուղարը՝ կրթահամալիրի գլխավոր կամ ավագ խմբի պաշտոն զբաղեցնող ծառայողներից:

4. Մանդատային հանձնաժողովի քարտուղարը ղեկավարում է դիմորդների փաստաթղթերի ընդունման, ձևակերպման և ուսումնասիրության նյութերի նախապատրաստման համար կրթահամալիրի պետի հրամանով կազմավորված աշխատանքային խմբի գործունեությունը և նախապատրաստված ուսումնասիրության նյութերը մանդատային հանձնաժողովի նիստերի ժամանակ ներկայացնում է մանդատային հանձնաժողովի քննարկմանը:

5. Կրթահամալիրի դիմորդների վերաբերյալ նախապատրաստված ուսումնասիրության նյութերի հիման վրա մանդատային հանձնաժողովի քարտուղարի կողմից ստուգվում է դիմորդների համապատասխանությունը «Ոստիկանությունում ծառայության մասին» Հայաստանի Հանրապետության օրենքի 11-րդ, 55-րդ հոդվածների և Հայաստանի Հանրապետության ոստիկանության պետի 2012 թվականի մայիսի 18-ի թիվ 8-Ն հրամանի պահանջներին, մասնավորապես`

1) դիմորդների տարիքը, նրանց քաղաքացիության և բնակության վայրերի վերաբերյալ տվյալները,

2) արական սեռի դիմորդների` պարտադիր զինվորական ծառայություն անցած լինելու (բացառությամբ «Զինապարտության մասին» Հայաստանի Հանրապետության օրենքի 12-րդ հոդվածի 1-ին մասի «բ»-«ե» կետերով, 13-րդ հոդվածի 4-րդ մասով նախատեսված դեպքերի) հանգամանքը և զինվորական շարային ծառայության պիտանելիությունը:

6. Ստուգվում են նաև դիմորդների ուսումնասիրության նյութերում առկա փաստաթղթերի հիման վրա կազմված հետևյալ ցուցակները և դրանց հիմքերը`

1) ըստ սեռի՝ դիմորդների,

2) ընդունելության ստուգումներից (քննություններից) դրական գնահատականներ ստանալու դեպքում մրցույթից դուրս ընդունվելու իրավունք ունեցող՝

ա. Հայաստանի Հանրապետության պաշտպանության ժամանակ զոհված (մահացած) ազատամարտիկների և զինծառայողների երեխաների,

բ. իրենց ծառայողական պարտականությունների կատարման ժամանակ զոհված (մահացած) ոստիկանության ծառայողների (զինծառայողների) երեխաների,

3) հավասար միավորների դեպքում մրցույթում առավելության իրավունք ունեցող`

ա. Հայաստանի Հանրապետության պետական պարգևներով (շքանշաններով և մեդալներով) պարգևատրված դիմորդների,

բ. Հայաստանի Հանրապետության պաշտպանության ժամանակ հաշմանդամ դարձած Հայաստանի Հանրապետության պաշտպանության նախարարության, Հայաստանի Հանրապետության կառավարությանն առընթեր ոստիկանության և Հայաստանի Հանրապետության կառավարությանն առընթեր ազգային անվտանգության ծառայության ծառայողների երեխաների,

գ. երկկողմանի ծնողազուրկ երեխաների,

դ. իրենց ծառայողական պարտականությունների կատարման ժամանակ հաշմանդամ դարձած ոստիկանության ծառայողների երեխաների,

4) ոստիկանության բժշկական հանձնաժողովի որոշմամբ ոստիկանությունում ծառայելու համար ոչ պիտանի ճանաչված դիմորդների:

7. Նախապատրաստված ուսումնասիրության նյութերը և ցուցակները ստուգվում են մանդատային հանձնաժողովի քարտուղարի կողմից, որից հետո այդ մասին զեկուցվում է մանդատային հանձնաժողովի նախագահին՝ մանդատային հանձնաժողովի նիստ հրավիրելու համար:

8. Մանդատային հանձնաժողովի նիստի ընթացքում մանդատային հանձնաժողովի քարտուղարի կողմից դիմորդների վերաբերյալ նախապատրաստված նյութերն ու ցուցակները ներկայացվում են մանդատային հանձնաժողովի քննարկմանը:

9. Քննարկման հարցի առանձնահատկություններից ելնելով մանդատային հանձնաժողովի նիստերին կարող են հրավիրվել նաև մասնագետներ, ինչպես նաև դիմորդները: Մանդատային հանձնաժողովի նիստերում որոշումներն ընդունվում են բաց քվեարկությամբ՝ հանձնաժողովի ձայների պարզ մեծամասնությամբ: Հավասար ձայների դեպքում մանդատային հանձնաժողովի նախագահի ձայնը որոշիչ է:

10. Մանդատային հանձնաժողովի քարտուղարը և հրավիրված մասնագետները օգտվում են խորհրդակցական ձայնի իրավունքից:

11. Քննարկման արդյունքում մանդատային հանձնաժողովը յուրաքանչյուր դիմորդի վերաբերյալ ընդունում է հետևյալ որոշումներից մեկը.

1) համապատասխանում է դիմորդին ներկայացվող պահանջներին և կարող է մասնակցել կրթահամալիրի ընդունելության ստուգումներին (քննություններին),

2) չի համապատասխանում դիմորդին ներկայացվող պահանջներին և չի կարող մասնակցել կրթահամալիրի ընդունելության ստուգումներին (քննություններին):

12. «Ոստիկանությունում ծառայության մասին» Հայաստանի Հանրապետության օրենքի 11-րդ հոդվածի համաձայն՝ մանդատային հանձնաժողովի որոշման հիման վրա կրթահամալիրի դիմորդը չի կարող մասնակցել ընդունելության ստուգումներին (քննություններին), եթե`

1) դատական կարգով ճանաչվել է անգործունակ կամ սահմանափակ գործունակ,

2) դատական կարգով զրկվել է քաղաքացիական կամ այլ ծառայությունում պաշտոն զբաղեցնելու իրավունքից,

3) դատապարտվել է դիտավորյալ հանցագործություն կատարելու համար,

4) դատապարտվել է անզգույշ հանցագործություն կատարելու համար, և դատվածությունը սահմանված կարգով հանված կամ մարված չէ,

5) դիմորդի նկատմամբ իրականացվում է քրեական հետապնդում,

6) դիմորդի տարիքը ընդունելության ստուգումների (քննությունների) համար սահմանված ժամկետի վերջին օրվա դրությամբ լրացել է,

7) ոստիկանության բժշկական հանձնաժողովի կողմից ճանաչվել է ոստիկանության ուսումնական հաստատություն ընդունվելու համար ոչ պիտանի:

13. Մանդատային հանձնաժողովի կողմից սույն կարգի 11-րդ կետի 1-ին ենթակետով նախատեսված որոշումն ընդունելուց հետո՝ մինչև կրթահամալիրի ընդունելության ստուգումները (քննությունները) սկսվելը կամ ստուգումների (քննությունների) ժամանակահատվածում ուսման համար խոչընդոտ հանդիսացող հանգամանքներ ի հայտ գալու դեպքերում, դիմորդի` կրթահամալիրի ընդունելության ստուգումներին (քննություններին) մասնակցության հարցը լուծվում է ոստիկանության պետի որոշմամբ:

14. Մանդատային հանձնաժողովի՝ սույն կարգի 11-րդ կետով նախատեսված որոշումների հիման վրա, մանդատային հանձնաժողովի քարտուղարի կողմից կազմվում է մանդատային հանձնաժողովի նիստի արձանագրություն` երկու օրինակից, որը ստորագրվում է մանդատային հանձնաժողովի նախագահի, անդամների ու քարտուղարի կողմից: Արձանագրության մեկ օրինակը տրամադրվում է ընդունող հանձնաժողովին` ընդունելության ստուգումները (քննությունները) կազմակերպելու համար, իսկ մյուս օրինակը հանձնվում է կրթահամալիրի քարտուղարություն:

(հավելվածը խմբ. 12.10.13 թիվ 17-Ն)