ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌՈՂՋԱՊԱՀՈՒԹՅԱՆ ՆԱԽԱՐԱՐ

29 մայիսի 2009 թ.

N 759-Ա

Հ Ր Ա Մ Ա Ն 

ԴԵՂԵՐԻ ԱՐՏԱԴՐՈՒԹՅՈՒՆ ԻՐԱԿԱՆԱՑՆՈՂ «ՀՀ ԳԱԱ ՕՐԳԱՆԱԿԱՆ ԵՎ ԴԵՂԱԳՈՐԾԱԿԱՆ ՔԻՄԻԱՅԻ ԳԻՏԱՏԵԽՆԻԿԱԿԱՆ ԿԵՆՏՐՈՆ» ՊՈԱԿ-ԻՆ ՆԱԽԱԶԳՈՒՇԱՑՆԵԼՈՒ ՄԱՍԻՆ

Նկատի ունենալով «ՀՀ ԳԱԱ օրգանական և դեղագործական քիմիայի գիտատեխնոլոգիական կենտրոն» ՊՈԱԿ-ի տնօրենի 27.11.2008թ. N 24431.25/189 գրությունը, համաձայն որի ՀՀ առողջապահության նախարարի 19.11.2008 թվականի N 1670-Ա հրամանով հայտարարված նախազգուշացման հիմքերով թերությունները շտկվել են, որի ստուգման նպատակով 2009 թվականի ապրիլի 8-ից 18-ը «ՀՀ ԳԱԱ օրգանական և դեղագործական քիմիայի գիտատեխնոլոգիական կենտրոն» ՊՈԱԿ-ում իրականացվել է ուսումնասիրություն:

Համաձայն ուսումնասիրության արդյունքում ներկայացված գրության (գրություն N 419, 05.05.2009 թ.) ուսումնասիրման արդյունքում պարզվել է օրենքի, այլ իրավական ակտերի, լիցենզավորման կարգով ամրագրված պարտադիր պայմանների և պահանջների մի շարք խախտումներ, այն է`

1. պահանջվող 1000 մետր սանիտարական պաշտպանական գոտին, ինչն անհրաժեշտ է քիմիական սինթետիկ դեղամիջոցների արտադրության համար ապահովված չի եղել, ինչը չի բխում ՀՀ քաղաքաշինության նախարարի 01.10.2001 թվականի N 82 հրամանով հաստատված ՍՆԻՊ 245-71 սանիտարական կանոնների պահանջներից,

2. արտադրության կասեցման պատճառով հնարավոր չի եղել պարզել արտադրամասի աշխատելու պայմաններում օղափոխման համակարգը գործարկելուց հետո օդի ջերմաստիճանի և օդի շարժման արագության ցուցանիշների համապատասխանությունը ՀՀ առողջապահության նախարարի 2005 թվականի սեպտեմբերի 16-ի «Արտադրական սենքերի միկրոկլիմայի» ՍՆ 2.4-001-05 սանիտարական նորմերը հաստատելու մասին» N 842-Ն հրամանով հաստատված սանիտարական նորմերի 5.3 և 5.6.3-րդ կետերի պահանջներին,

3. ուսումնասիրության ընթացքում պարզվել է, որ չնայած նրան, որ կազմվել է աշխատողների բժշկական քննության անցկացման ցուցակը, այնուամենայնիվ աշխատողները չեն ենթարկվել պարտադիր բժշկական զննության, ինչը չի բխում ՀՀ կառավարության 27.03.03թ.N 347-Ն և ՀՀ կառավարության 15.07. 2004թ. N1089-Ն որոշումների պահանջներից,

4. ձեռք բերված պաշտպանիչ միջոցները չեն համապատասխանում ՀՀ կառավարության 2004 թվականի նոյեմբերի 11-ի «Անհատական պաշտպանության միջոցների տեխնիկական կանոնակարգը հաստատելու մասին» N 1631-Ն որոշման պահանջներին,

5. արտադրական մասնաշենքի թորման սարքը դեղատներում շահագործվող թորման սարքին համապատասխան չէ և առաջինը, չի կարող ապամոնտաժվել և մաքրվել, ախտահանվել համաձայն ՀՀ առողջապահության նախարարի 2002 թվականի սեպտեմբերի 4-ի «Դեղատների և դեղատնային կրպակներին ներկայացվող» N 2-111-2.2.7 սանիտարական կանոնները հաստատելու մասին» N 574 որոշմամբ հաստատված նորմերի պահանջների, երկրորդը` նախկինում արձանագրված թերությունը վերաբերում էր լաբորատոր մասնաշենքերում շահագործվող թորման սարքերին: Իսկ արտադրական մասնաշենքի թորման սարքը չունի տեխնիկական անձնագիր, ինքնաշեն սարք է (ոչ գործարանային):

Հաշվի առնելով վերը նշված փաստերը, հիմք ընդունելով «ՀՀ-ում ստուգումների կազմակերպման և անցակացման մասին» ՀՀ օրենքի 2-րդ հոդվածը, «Լիցենզավորման մասին» ՀՀ օրենքի 11-րդ հոդվածի 1-ին մասը` լիցենզավորման ենթակա գործունեության տեսակների իրականացման ժամանակ լիցենզավորված անձինք պարտավոր են պահպանել բնապահպանական, հիգիենիկ և սանիտարահամաճարակային անվտանգության, հակահրդեհային նորմերն ու կանոնները`

ՀՐԱՄԱՅՈՒՄ ԵՄ՝

1. Նախազգուշացնել` դեղերի արտադրություն իրականացնող «ՀՀ ԳԱԱ օրգանական և դեղագործական քիմիայի գիտատեխնիկական կենտրոն» ՊՈԱԿ-ին լիցենզավորման պարտադիր պահանջների ու պայմանների խախտման համար և առաջարկել 15-օրյա ժամկետում վերացնել վերը նշված խախտումները և գրավոր տեղեկացնել լիցենզավորող մարմին:

2. ՀՀ ԱՆ աշխատակազմի լիցենզավորման բաժնին՝

1) Եռօրյա ժամկետում ապահովել սույն հրամանի առաքումը լիցենզավորված անձին:

3. Սույն հրամանի կատարման հսկողությունը հանձնարարել ՀՀ առողջապահության նախարարի տեղակալ Ա. Ղուկասյանին:

Հ. Քուշկյան