ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

15 օգոստոսի 2025 թվականի

N 548-Ն

ՉՀԻՄՆԱՎՈՐՎԱԾ ԲԱՐՁՐ ԳՆԻ ԵՎ ՉՀԻՄՆԱՎՈՐՎԱԾ ՑԱԾՐ ԳՆԻ ՈՐՈՇՄԱՆ ԿԱՐԳԸ ՍԱՀՄԱՆԵԼՈՒ ԵՎ ՄՐՑԱԿՑՈՒԹՅԱՆ ՊԱՇՏՊԱՆՈՒԹՅԱՆ ՀԱՆՁՆԱԺՈՂՈՎԻ 2021 ԹՎԱԿԱՆԻ ԴԵԿՏԵՄԲԵՐԻ 23-Ի ԹԻՎ 381-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հիմք ընդունելով «Տնտեսական մրցակցության և սպառողների շահերի պաշտպանության մասին» օրենքի 37-րդ հոդվածի 1-ին մասի 29-րդ կետը և 2-րդ մասը, ինչպես նաև «Նորմատիվ իրավական ակտերի մասին» օրենքի 1-ին հոդվածի 2-րդ մասը, 36-րդ և 37-րդ հոդվածների 1-ին մասերը` Մրցակցության և սպառողների շահերի պաշտպանության հանձնաժողովը

ՈՐՈՇՈՒՄ Է

1. Սահմանել չհիմնավորված բարձր գնի և չհիմնավորված ցածր գնի որոշման կարգը` համաձայն հավելվածի:

2. Ուժը կորցրած ճանաչել Մրցակցության պաշտպանության հանձնաժողովի 2021 թվականի դեկտեմբերի 23-ի «Չհիմնավորված բարձր գնի և չհիմնավորված ցածր գնի որոշման կարգը սահմանելու մասին» թիվ 381‑Ն որոշումը։

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

4. Մինչև 2025 թվականի օգոստոսի 1-ը հարուցված և իրականացվող վարույթների շրջանակում չհիմնավորված բարձր գինը և չհիմնավորված ցածր գինը որոշվում է մինչև սույն որոշման ուժի մեջ մտնելը գործող կարգով, իսկ 2025 թվականի օգոստոսի 1-ից հետո հարուցված և իրականացվող վարույթների շրջանակում չհիմնավորված բարձր գինը և չհիմնավորված ցածր գինը որոշվում է սույն որոշմամբ սահմանված կարգով։

Նախագահին ԺԱՄԱՆԱԿԱՎՈՐ ՓՈԽԱՐԻՆՈՂ	Տ. Մարկոսյան
2025 թ. օգոստոսի 15 Երևան

Հավելված Մրցակցության և սպառողների շահերի պաշտպանության հանձնաժողովի 2025 թվականի օգոստոսի 15-ի N 548-Ն որոշման

Կ Ա Ր Գ

ՉՀԻՄՆԱՎՈՐՎԱԾ ԲԱՐՁՐ ԳՆԻ ԵՎ ՉՀԻՄՆԱՎՈՐՎԱԾ ՑԱԾՐ ԳՆԻ ՈՐՈՇՄԱՆ

ԳԼՈՒԽ 1

ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով (այսուհետ նաև՝ Կարգ) սահմանվում են Մրցակցության և սպառողների շահերի պաշտպանության հանձնաժողովի (այսուհետ նաև՝ Հանձնաժողով) կողմից ապրանքային շուկայում մենաշնորհ կամ գերիշխող դիրք ունեցող տնտեսավարող սուբյեկտի (այսուհետ նաև՝ Տնտեսավարող սուբյեկտ) սահմանած չհիմնավորված բարձր գնի և չհիմնավորված ցածր գնի որոշման հետ կապված հարաբերությունները:

2. Կարգում օգտագործվող հասկացությունները և տերմինները կիրառվում են ,Տնտեսական մրցակցության և սպառողների շահերի պաշտպանության մասինե օրենքով (այսուհետ նաև՝ Օրենք) սահմանված իմաստով:

ԳԼՈՒԽ 2

ՉՀԻՄՆԱՎՈՐՎԱԾ ԲԱՐՁՐ ԵՎ ՉՀԻՄՆԱՎՈՐՎԱԾ ՑԱԾՐ ԳՆԵՐԻ ՈՐՈՇՈՒՄԸ

3. Տնտեսավարող սուբյեկտի սահմանած ապրանքի իրացման կամ ձեռքբերման չհիմնավորված բարձր կամ ցածր գնի որոշման նպատակով Հանձնաժողովը միաժամանակ գնահատում է հետևյալ հանգամանքները․

1) ապրանքի արտադրության, իրացման, այդ թվում՝ ներմուծման համար անհրաժեշտ ծախսերի (այսուհետ նաև՝ Անհրաժեշտ ծախսեր) և շահույթի գումարը.

2) մրցակցության պայմաններում ձևավորված համադրելի ապրանքային շուկայում առկա գինը՝ համադրելի ապրանքային շուկայի առկայության դեպքում։

ԳԼՈՒԽ 3

Անհրաժեշտ ԾԱԽՍԵՐԻ ԵՎ ՇԱՀՈՒՅԹԻ ԳՈՒՄԱՐԻ ԳՆԱՀԱՏՄԱՆ ՄԵԹՈԴԱԲԱՆՈՒԹՅՈՒՆԸ

4. Տնտեսավարող սուբյեկտի կողմից ապրանքի իրացման կամ ձեռքբերման համար սահմանված գնի չհիմնավորված ցածր լինելը պարզելիս Անհրաժեշտ ծախսերի գնահատման նպատակով Հանձնաժողովը կիրառում է հետևյալ մեթոդները․

1) Միջին փոփոխուն ծախսերի մեթոդը, որը հաշվարկվում է հետևյալ բանաձևով․

AVC=	VCtotal	,
	Qtotal

որտեղ․

AVC – միջին փոփոխուն ծախսն է,

VCtotal – հնարավոր իրավախախտման առարկա հանդիսացող ապրանքների արտադրությանը (իրացմանը, ներմուծմանը) վերաբերող փոփոխուն ծախսերի գումարն է,

Qtotal – հնարավոր իրավախախտման առարկա հանդիսացող ապրանքների արտադրության (իրացման, ներմուծման) ընդհանուր քանակն է։

2) Միջին խուսափելի ծախսերի մեթոդ, որը հաշվարկվում է հետևյալ բանաձևով․

AAC=	ACtotal	,
	Qtotal

որտեղ․

AAC – միջին խուսափելի ծախսն է,

ACtotal – հնարավոր իրավախախտման առարկա հանդիսացող ապրանքների արտադրության (իրացման, ներմուծման) համար կատարված ընդհանուր խուսափելի ծախսերի գումարն է,

Qtotal – հնարավոր իրավախախտման առարկա հանդիսացող ապրանքների արտադրության (իրացման, ներմուծման) ընդհանուր քանակն է։

3) Երկարաժամկետ միջին հավելյալ ծախսերի մեթոդը, որը հաշվարկվում է հետևյալ բանաձևով․

LRAIC=	Ctotal-C'total	,
	Qtotal

որտեղ․

LRAIC – երկարաժամկետ միջին հավելյալ ծախսն է,

Ctotal – տնտեսավարող սուբյեկտի ընդհանուր ծախսերի գումարն է,

C'total –ընդհանուր ծախսն է, որը կունենար տնտեսավարող սուբյեկտը, եթե չարտադրեր (չիրացներ, չներմուծեր) դիտարկվող կոնկրետ ապրանքը,

Qtotal – հնարավոր իրավախախտման առարկա հանդիսացող ապրանքների արտադրության (իրացման, ներմուծման) ընդհանուր քանակն է։

4) միջին ընդհանուր ծախսի մեթոդը, որը հաշվարկվում է հետևյալ բանաձևով․

AТC=	Ctotal
	Qtotal

որտեղ․

AТC – միջին ընդհանուր ծախսն է,

Ctotal – հնարավոր իրավախախտման առարկա հանդիսացող ապրանքների ամբողջ ծախսերի գումարն է,

Qtotal – հնարավոր իրավախախտման առարկա հանդիսացող ապրանքների արտադրության (իրացման, ներմուծման) ընդհանուր քանակն է։

5. Հանձնաժողովը չհիմնավորված ցածր գինը որոշելիս, ելնելով ապրանքային շուկայի առանձնահատկություններից և ձեռք բերված տեղեկատվությունից, ընտրում է Անհրաժեշտ ծախսերի գնահատման մեթոդներից մեկը կամ մի քանիսը։

6. Անհրաժեշտ ծախսերի գնահատման մեթոդներից որևէ մեկով տնտեսական մրցակցության բնագավառում իրավախախտման դեպքի բացահայտման պարագայում Անհրաժեշտ ծախսերի գնահատման մյուս մեթոդները կիրառելու անհրաժեշտությունը բացակայում է։

7. Չհիմնավորված բարձր գնի դրսևորմամբ հնարավոր իրավախախտման դեպքը քննարկելիս Անհրաժեշտ ծախսերի գնահատման համար կիրառվում է միայն միջին ընդհանուր ծախսի մեթոդը։

8. Չհիմնավորված բարձր և չհիմնավորված ցածր գների որոշման համար ուղենիշային է միջին ընդհանուր ծախսը։

9. Հանձնաժողովն անհրաժեշտության դեպքում կարող է ստուգել Անհրաժեշտ ծախսերի վերաբերյալ ներկայացված տեղեկատվության արժանահավատությունը, որի նպատակն է բացահայտել տվյալ ապրանքի ինքնարժեքի տարրերի և ծախսերի փոխկապակցվածությունը տվյալ ապրանքի արտադրությանը և իրացմանը, ինչպես նաև ծախսերի փոխկապակցվածության աղբյուրները։

10. Անհրաժեշտ ծախսերը գնահատելիս Հանձնաժողովը կարող է հաշվի առնել նաև տվյալ ապրանքի համաշխարհային շուկաներում սահմանված բորսայական և ոչ բորսայական գնի ցուցանիշները՝ ելնելով յուրաքանչյուր գործի առանձնահատկություններից։

ԳԼՈՒԽ 4

ՀԱՄԱԴՐԵԼԻ ԱՊՐԱՆՔԱՅԻՆ ՇՈՒԿԱՆԵՐԻ ՈՐՈՇՄԱՆ ՄԵԹՈԴԱԲԱՆՈՒԹՅՈՒՆԸ

11. Համադրելի ապրանքային շուկաներ են միևնույն կամ նմանատիպ բնութագրիչներով շուկաները։

12. Համադրելի ապրանքային շուկաների գների համեմատության նպատակով Հանձնաժողովը տվյալների առկայության դեպքում կարող է կիրառել գնի կամ գնային բաղադրիչների համեմատության մեթոդները։

13. Եթե համադրելի ապրանքային շուկա չի հայտնաբերվում, ապա Հանձնաժողովն այդ փաստն ամրագրում է որոշման մեջ և Տնտեսավարող սուբյեկտի սահմանած ապրանքի իրացման կամ ձեռքբերման չհիմնավորված բարձր կամ չհիմնավորված ցածր գինը որոշելու նպատակով առաջնորդվում է միայն Անհրաժեշտ ծախսերի գնահատման մեթոդներով:

Պաշտոնական հրապարակման օրը՝ 20 օգոստոսի 2025 թվական: