ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 մայիսի 1993 թ. N 286

Քաղ. Երևան

ՊԵՏԱԿԱՆ ՎԻՃԱԿԱԳՐԱԿԱՆ ՀԱՇՎԵՏՎԱԿԱՆ ԿԱՐԳԱՊԱՀՈՒԹՅՈՒՆԸ ԲԱՐՁՐԱՑՆԵԼՈՒ ՄԱՍԻՆ

Ի կատարումն Հայաստանի Հանրապետության նախագահի 1993 թվականի փետրվարի 3-ի «Պետական վիճակագրական հաշվետվական կարգապահությունը բարձրացնելու մասին» հրամանագրի, Հայաստանի Հանրապետության կառավարությունը որոշում է.

1. Հայաստանի Հանրապետության նախարարությունների, պետական վարչությունների, գերատեսչությունների ու պատգամավորների տեղական խորհուրդների գործադիր կոմիտեների ուշադրությունը հրավիրել իրենց համակարգերի կամ տարածքների ձեռնարկությունների, կազմակերպությունների և պատգամավորների գյուղական ու ավանային խորհուրդների գործկոմների անբավարար հաշվետվական կարգապահության փաստի վրա:

2. Հայաստանի Հանրապետության նախարարություններին, պետական վարչություններին, հարկային պետական տեսչությանը և գերատեսչություններին`

ա) ապահովել իրենց, ինչպես նաև իրենց ենթակայության ձեռնարկությունների և կազմակերպությունների կողմից սահմանված ժամկետներում և որակյալ պետական վիճակագրական հաշվետվությունների ներկայացումը Հայաստանի Հանրապետության վիճակագրության, պետական ռեգիստրի և վերլուծության պետական վարչություն.

բ) քննարկել համակարգի ձեռնարկությունների և կազմակերպությունների հաշվետվական կարգապահության հարցը, ըստ Հայաստանի Հանրապետության վիճակագրության, պետական ռեգիստրի և վերլուծության պետական վարչության տեղեկագրի միջոցառումներ մշակել այն բարձրացնելու ուղղությամբ և արդյունքների մասին յուրաքանչյուր եռամսյակը հաջորդող ամսվա մինչև 15-ը տեղեկատվություն ներկայացնել Հայաստանի Հանրապետության վիճակագրության, պետական ռեգիստրի և վերլուծության պետական վարչություն.

գ) ձեռնարկությունների և կազմակերպությունների ղեկավարների հետ կնքված աշխատանքային պայմանագրերում (կոնտրակտներում) նախատեսել նրանց պատասխանատվությունը պետական վիճակագրական հաշվետվական կարգապահության խախտման համար:

3. Պատգամավորների տեղական խորհուրդների գործադիր կոմիտեներին`

ա) վիճակագրական մարմինների ներկայացրած տեղեկատվության հիման վրա, նիստերում պարբերաբար քննարկել իրենց տարածքներում գործող հաշվառման օբյեկտների (անկախ սեփականության ձևից) հաշվետվական կարգապահության հարցը և միջոցներ ձեռնարկել այն ամրապնդելու համար.

բ) իրենց տարածքներում գրանցվող և լուծարվող ոչ պետական ձեռնարկությունների մասին տեղեկատվություն ներկայացնել վիճակագրական մարմիններին, ըստ Հայաստանի Հանրապետության վիճակագրության, պետական ռեգիստրի և վերլուծության պետական վարչության կողմից հաստատված ձևերի.

գ) վիճակագրական մարմինների մասնակցությամբ, անհրաժեշտության դեպքում, պատգամավորների գյուղական և ավանային խորհուրդների գործադիր կոմիտեների նախագահների հետ անցկացնել հրահանգչական աշխատանք վիճակագրական հաշվետվությունների լրացման կարգի և դրանց ներկայացման սահմանված ժամկետների պահպանման հարցերի վերաբերյալ.

դ) ձեռնարկված միջոցների մասին յուրաքանչյուր եռամսյակը հաջորդող ամսվա մինչև 15-ը տեղեկատվություն ներկայացնել Հայաստանի Հանրապետության վիճակագրության, պետական ռեգիստրի և վերլուծության պետական վարչություն:

4. Հանձնարարել Հայաստանի Հանրապետության վիճակագրության, պետական ռեգիստրի և վերլուծության պետական վարչությանը և Հայաստանի Հանրապետության ներքին գործերի նախարարությանը` անձնագրային նոր համակարգի ներդրման հետ կապված, մեկամսյա ժամկետում մշակել և հաստատել բնակչության միգրացիայի ընթացիկ հաշվառման համապատասխան ձևեր և հրահանգ դրանց լրացման կարգի մասին, բնակչության ընթացիկ հաշվառման ճշտությունն ապահովելու նպատակով:

5. Հանձնարարել Հայաստանի Հանրապետության փախստականների հարցերի պետական վարչությանը և պատգամավորների տեղական խորհուրդների գործադիր կոմիտեներին` կարգավորել հանրապետության տարածքում բնակվող, սակայն գրանցում չունեցող փախստականների հաշվառման և նրանց գրանցման հարցերը, գործող կարգի համաձայն:

6. Հայաստանի Հանրապետության էկոնոմիկայի նախարարությանը` ապրանքների արտահանման արտոնագրերի տրման կարգում նշել, որ պետական վիճակագրական հաշվետվությունների ներկայացման սահմանված ժամկետը խախտող կամ չներկայացնող ձեռնարկությունները և կազմակերպությունները կզրկվեն արտոնագրեր ստանալու իրավունքից:

7. Հայաստանի Հանրապետության մաքսային վարչությանը` ապահովել Հանրապետություն ներմուծվող և հանրապետությունից արտահանվող ապրանքների տեսականու և արժեքի մասին ամբողջական ու որակյալ տեղեկատվության ներկայացումը Հայաստանի Հանրապետության վիճակագրության, պետական ռեգիստրի և վերլուծության պետական վարչություն, վերջինիս կողմից հաստատված ձևերով և ժամկետներին:

8. Հայաստանի Հանրապետության պետական հարկային տեսչությանը` օժանդակել Հայաստանի Հանրապետության վիճակագրության, պետական ռեգիստրի և վերլուծության պետական վարչությանը ոչ պետական ձեռնարկություններից և կազմակերպություններից վիճակագրական տեղեկատվության հավաքման աշխատանքներում:

9. Հայաստանի Հանրապետության կապի նախարարությանը` Հայաստանի Հանրապետության վիճակագրության, պետական ռեգիստրի և վերլուծության պետական վարչության հետ համատեղ մեկամսյա ժամկետում մշակել և իրականացնել միջոցառումներ վիճակագրության համակարգի հեռախոսահեռագրական և փոստային կապի անխափան աշխատանքն ապահովելու ուղղությամբ` նպաստելով տեղերից վիճակագրական տեղեկատվության ժամանակին ստացմանը:

Կառավարության լուծումը պահանջող հարցերի վերաբերյալ ներկայացնել առաջարկություններ:

10. Հայաստանի Հանրապետության վիճակագրության, պետական ռեգիստրի և վերլուծության պետական վարչությանը`

ա) մինչև 1993 թվականի հունիսի 7-ը  Հայաստանի Հանրապետության էկոնոմիկայի նախարարության, ֆինանսների նախարարության, Հայաստանի Հանրապետության հարկային պետական տեսչության հետ համատեղ քննարկել և հաստատել արտադրաարդյունաբերական գործունեությամբ զբաղվող ձեռնարկությունների և կազմակերպությունների կողմից արտադրանքի մասին հաշվետվության կազմման տիպային հրահանգը` արտացոլելով նաև ակցիզային հարկի, ավելացված արժեքի հարկի, արտադրված, բայց չիրացված արտադրանքի արժեքի հարցերը.

բ) երկամսյա ժամկետում մշակել «Վիճակագրության մասին» Հայաստանի Հանրապետության օրենքի նախագիծը և ներկայացնել Հայաստանի Հանրապետության կառավարություն.

գ) եռամսյա ժամկետում մշակել և շահագրգիռ կազմակերպությունների հետ քննարկել վիճակագրության համակարգը շուկայական հարաբերությունների պայմաններին համապատասխանեցնելու ծրագիր ու ներկայացնել Հայաստանի Հանրապետության կառավարություն.

դ) ապահովել վիճակագրական հաշվետվությունների ձևերի ժամանակին տպագրումը և առաքումը հաշվետու օբյեկտներին.

ե) ուսումնասիրել հանրապետության ոչ պետական ձեռնարկություններում և կազմակերպություններում հաշվետվությունների կազմման և ներկայացման վիճակը հաշվետվություններ ներկայացնող ձեռնարկությունների շրջանակն ընդլայնելու նպատակով.

զ) սույն որոշման կատարման մասին յուրաքանչյուր եռամսյակ տեղեկատվություն ներկայացնել Հայաստանի Հանրապետության կառավարություն:

Հայաստանի Հանրապետության ՓՈԽվարչապետ

Վ. ՉԻՏԵՉյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐՉԻ ԱՌԱՋԻՆ ՏԵՂԱԿԱԼ

Ա. ՀՅՈՒՍԻՍՅԱՆ