ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱՐԱՐՆԵՐԻ ԽՈՐՀՈՒՐԴ

Ո Ր Ո Շ ՈՒ Մ

10 հոկտեմբերի 1991 թվականի N 599

քաղ. Երևան

Հասարակական սննդի բնագավառում գործունեություն իրականացնող ոչ պետական ձեռնարկություններից բյուջե գանձումների մասին

Հայաստանի Հանրապետության Նախարարների խորհուրդը որոշում է`

1. Հասարակական սննդի բնագավառում գործունեություն իրականացնող ոչ պետական (բացի սպառողական կոոպերացիայից) ձեռնարկությունների շահութահարկի գծով բյուջեի հետ փոխհարաբերությունների կարգավորման նպատակով սահմանել գործունեության այդ տեսակով զբաղվելու վճար` հաստատագրված գումարով, համաձայն հավելվածի, հաշվի առնելով հասարակական սննդի օբյեկտներում նստատեղերի քանակը և հաճախելիությունը:

Մեկ նստելատեղի կահավորման համար անհրաժեշտ մակերեսի նորմատիվը չպետք է գերազանցի 1,5 քառ. մետրը, իսկ վճարի հաշվարկի ժամանակ ընդունվող հաճախելիության և նստելատեղերի օգտագործման գործակիցը պետք է լինի 0,5: Առաջարկվող կարգով կատարված հաշվարկին համապատասխան մեկ հաճախորդից բյուջե է գանձվում 0,4 դրամ:

(1-ին կետը խմբ., փոփ. 11.02.94 N 74)

2. (կետն ուժը կորցրել է 11.02.94 N 74)

3. կետն ուժը կորցրել է 11.02.94 N 74)

4. կետն ուժը կորցրել է 11.02.94 N 74)

2. Հայաստանի Հանրապետության ֆինանսների նախարարությանը` մեկշաբաթյա ժամկետում մշակել և հաստատել սույն որոշման կիրարկման կարգը:

(2-րդ կետը փոփ. 11.02.94 N 74)

3. Սկսած 1994 թվականի հունվարի 1-ից սույն որոշման 1-ին կետում նշված գումարն ինդեքսավորվում է Հայաստանի Հանրապետության օրենսդրությամբ սահմանվող աշխատավարձի նվազագույն չափի ինդեքսավորման գործակիցներով:

(3-րդ կետը լրաց 11.02.94 N 74)

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի նախագահԻ ՊԱՇՏՈՆԱԿԱՏԱՐ

Հ. ԲԱԳՐԱՏՅԱՆ

ՀԱՅԱՍՏԱՆի հանրապետության ՆԱԽԱՐԱՐՆԵՐԻ ԽՈՐՀՐԴի ԳՈՐԾԵՐԻ ԿԱՌԱՎԱՐՉԻ ՊԱՇՏՈՆԱԿԱՏԱՐ

Հ. ՀԱԿՈԲՅԱՆ

ՀԱՎԵԼՎԱԾ ՀՀ Նախարարների խորհրդի 1991 թ. հոկտեմբերի 10-ի N 599 որոշման

ՀԱՍԱՐԱԿԱԿԱՆ ՍՆՆԴԻ ԲՆԱԳԱՎԱՌՈՒՄ ԳՈՐԾՈՒՆԵՈՒԹՅԱՆ ԱՆՑԿԱՑՄԱՆ ՀԱՄԱՐ ՎՃԱՐԻ ՀԱՇՎԱՐԿՄԱՆ ԿԱՐԳԸ

Հաշվարկի հիմքում ընդունվում է կոոպերատիվ ռեստորաններում և սրճարաններում (որտեղ առկա են խորտիկների, տաք կերակրատեսակների տեսականի, ալկոհոլային խմիչքներ և այլն) մեկ հաճախորդի հաշվով հանրապետությունում ձևավորված ծախսերի միջին մակարդակը` 13,35 դրամի չափով: Ընդ որում, նյութական ծախսերի (սննդամթերքի) տեսակարար կշիռը կազմում է 65 տոկոս, մյուս ծախսերը` 25 տոկոս, շահութաբերությունը` 10 տոկոսի սահմաններում, շահույթը` համապատասխանաբար 1,335 դրամ: Բյուջե պետք է մուծվի 30 տոկոս դրույքաչափով կամ 0,4 դրամ (1,335 x 30 տոկոս):

Հաշվի առնելով այն հանգամանքը, որ հասարակական սննդի ձեռնարկությունները տարվա ընթացքում աշխատում են ոչ հավասարաչափ բեռնվածությամբ` կապված սեզոնայնության, սննդամթերքով, էլեկտրաէներգիայով, վառելիքով ապահովվածության հետ և այլն, հաշվարկում հաճախելիությունն ընդունվում է տարեկան օրերի թվի 50 տոկոսի մակարդակով և առկա նստատեղերի բեռնվածությունը նույնպես 50 տոկոսի մակարդակով, այսինքն` 0,5 գործակցով:

Մեկ նստատեղի կահավորման համար առանձնացված մակերեսը չպետք է գերազանցի 1,5 քառ. մետրը:

Հասարակական սննդի բնագավառում գործունեություն իրականացնելու իրավունքի վճարի հաշվարկը կատարվում է հետևյալ ձևով`

ա) օգտակար մակերեսը 150 քառ. մետր, որը համապատասխանում է 100 նստատեղի (150 քառ. մ : 1,5 քառ. մ = 100 նստատեղի):

Հաշվարկը` 0,4 դրամ x 180 (360 x 0,5) x 50 (100 x 0,5) = 3600 դրամ.

բ) օգտակար մակերեսը 100 քառ. մետր, որը համապատասխանում է 66 նստատեղի:

Հաշվարկը` 0,4 դրամ x 180 (360 x 0,5) x 33 (66 x 0,5) = 2376 դրամ.

գ) օգտակար մակերեսը 30 քառ. մետր կամ 20 նստատեղ:

Հաշվարկը` 0,4 դրամ x 180 (360 x 0,5) x 10 (20 x 0,5) = 720 դրամ:

Հասարակական սննդի այն օբյեկտները, որտեղ բացակայում են խորտիկները, տաք ճաշատեսակները, ալկոհոլային խմիչքները և այլն, կախված առկա նստատեղերի քանակից, բյուջե են մուծում լրիվ վճարի 25 տոկոսը:

Օրինակ, նման տիպի օբյեկտը 30 քառ. մետր է կամ 20 նստատեղ:

Հաշվարկը` 0,4 դրամ x 180 (360 x 0,5) x 10 (20 x 0,5) x 25% = 180 դրամ:

Հասարակական սննդի նստատեղեր չունեցող ձեռնարկությունների համար հաստատագրված վճարների գումարի հաշվարկի հիմքում ընդունվում է 20 պայմանական նստատեղի առկայությունը կամ 720 դրամ:

(հավելվածը խմբ. 11.02.94 N 74)