ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

(որոշումը խմբ. 14.03.24 N 353-Ն)

16 հունվարի 2014 թվականի N 86-Ն

ԼԻԱԶՈՐ ՊԵՏԱԿԱՆ ՄԱՐՄՆԻՆ ՏԱՐԱԾԱԿԱՆ ՏՎՅԱԼՆԵՐԻ ՏՐԱՄԱԴՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

(վերնագիրը խմբ. 14.03.24 N 353-Ն)

Ղեկավարվելով «Տարածական տվյալների մասին» Հայաստանի Հանրապետության օրենքի 5-րդ հոդվածի 1-ին մասի 3-րդ կետի պահանջներով՝ Հայաստանի Հանրապետության կառավարությունը որոշում է.

1. Սահմանել, որ՝

1) պետական կառավարման մարմինները պետական տարածական տվյալների (քարտեզագրագեոդեզիական) ֆոնդի արդիականությունն ապահովելու նպատակով լիազոր պետական կառավարման մարմնին՝ Կադաստրի կոմիտեին (այսուհետ՝ կոմիտե) տրամադրում են նոր առաջացած բազային տարածական տվյալները՝ ստեղծման կամ ընդունման ավարտից հետո 30 օրվա ընթացքում, վեկտորային (dwg/dxf, dgn, shapefile), ռաստերային (tif, img, Geotif, GRID) և տվյալների բազա (Excel, Access և այլ ձևաչափերով)՝ համապատասխան հատկանիշային տվյալներով.

2) պետական կառավարման մարմիններն ազգային տարածական տվյալների ենթակառուցվածքի ազգային գեոպորտալի արդիականությունն ապահովելու նպատակով էլեկտրոնային եղանակով ապահովում են առկա և նոր առաջացած՝ ստեղծման կամ ընդունման ավարտից հետո 30 օրվա ընթացքում, թեմատիկ տարածական տվյալների քարտեզագրական շերտերի հասանելիություն՝ JSON (տարածական տվյալների համար-GeoJSON) և XML (տարածական տվյալների համար–GML) ձևաչափերով։ Եթե տեղեկատվական փոխգործելիության ընթացքում տեղեկատվության փոխանակումը նախատեսում է ռաստերային ձևաչափով, ապա տեղեկատվության հասանելիությունն ապահովվում է GeoTIFF ձևաչափով.

3) մինչև ավտոմատացված JSON և XML-սխեմաների ներդրումն ազգային գեոպորտալ, ազգային տարածական տվյալների ենթակառուցվածքի տեղեկատվական փոխգործելիության ընթացքում տեղեկատվության հասանելիությունն ապահովվում է OGC WMS, WFS, WCS քարտեզագրական ծառայությունների միջոցով։

2․ Պետական կառավարման մարմինները սույն որոշման 1-ին կետի 1-ին ենթակետով նախատեսված տվյալները, կախված տվյալների առանձնահատկությունից, կոմիտեին տրամադրում են հասանելի ձևաչափերից որևէ մեկով, իսկ 2-րդ և 3-րդ ենթակետերով սահմանված տվյալների հասանելիությունն ապահովվում է համապատասխան սարքածրագրային համակարգերի առկայության պարագայում:

3. Տարածքային կառավարման, տեղական ինքնակառավարման մարմիններում և հանրային ծառայություններ մատուցող կազմակերպություններում առկա և նոր ստեղծված, սույն որոշման 1-ին կետի 1-3-րդ ենթակետերում նշված ձևաչափերով համապատասխան ոլորտային լիազոր մարմիններին տրամադրված (հասանելիություն ապահովված) տարածական տվյալները վերջիններիս նախաձեռնությամբ ինտեգրվում են ազգային գեոպորտալին:

Հայաստանի Հանրապետության վարչապետ	Տ. Սարգսյան
2014 թ. փետրվարի 10 Երևան