ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՎԱԳԱՆԻ
|
24 հունիսի 2020 թ. |
N 253-Ն |
Ո Ր Ո Շ ՈՒ Մ
ԵՐԵՎԱՆԻ ՔԱՂԱՔԱՊԵՏԻՆ ԿԻՑ ՀԱՍԱՐԱԿԱԿԱՆ ԿԱՐԳՈՎ ԳՈՐԾՈՂ ՍՈՑԻԱԼԱԿԱՆ ԱՋԱԿՑՈՒԹՅԱՆ ՏՐԱՄԱԴՐՄԱՆ ԽՈՐՀՐԴԻ ԿԱԶՄԱՎՈՐՄԱՆ ԵՎ ԳՈՐԾՈՒՆԵՈՒԹՅԱՆ ԿԱՐԳՆ ՈՒ ԼԻԱԶՈՐՈՒԹՅՈՒՆՆԵՐԸ ՍԱՀՄԱՆԵԼՈՒ ՄԱՍԻՆ
Հիմք ընդունելով «Երևան քաղաքում տեղական ինքնակառավարման մասին» օրենքի 12-րդ հոդվածի 1-ին մասի 36-րդ կետը և Երևան քաղաքի ավագանու 2013 թվականի սեպտեմբերի 10-ի N 46-Ն որոշումը.
Երևան քաղաքի ավագանին որոշում է.
1. Սահմանել Երևանի քաղաքապետին կից հասարակական կարգով գործող սոցիալական աջակցության տրամադրման խորհրդի կազմավորման և գործունեության կարգն ու լիազորությունները՝ համաձայն հավելվածի:
2. Uույն որոշումն ուժի մեջ է մտնում պաշտոնական հրապարակմանը հաջորդող oրը:
|
Երևանի քաղաքապետ |
Հ. Մարության |
|
Հավելված Երևան քաղաքի ավագանու 2020 թվականի հունիսի 24-ի N 253-Ն որոշման |
ԵՐԵՎԱՆԻ ՔԱՂԱՔԱՊԵՏԻՆ ԿԻՑ ՀԱՍԱՐԱԿԱԿԱՆ ԿԱՐԳՈՎ ԳՈՐԾՈՂ ՍՈՑԻԱԼԱԿԱՆ ԱՋԱԿՑՈՒԹՅԱՆ ՏՐԱՄԱԴՐՄԱՆ ԽՈՐՀՐԴԻ ԿԱԶՄԱՎՈՐՄԱՆ ԵՎ ԳՈՐԾՈՒՆԵՈՒԹՅԱՆ ԿԱՐԳ ՈՒ ԼԻԱԶՈՐՈՒԹՅՈՒՆՆԵՐ
1. Սույն կարգով սահմանվում են Հայաստանի Հանրապետության Երևան քաղաքի (այսուհետև` քաղաք) սոցիալական աջակցության վերաբերյալ կամավոր խնդիրների լուծմանն ուղղված սեփական լիազորությունների իրականացման գործընթացում խորհրդակցական նպատակով և հասարակական կարգով գործող սոցիալական աջակցության տրամադրման խորհրդի (այսուհետև` Խորհուրդ) կազմավորման և գործունեության կարգի և լիազորությունների հետ կապված հարաբերությունները: Խորհուրդը ստեղծվում է Երևան քաղաքի ավագանու որոշմամբ սահմանված սոցիալական աջակցության տրամադրումն արդյունավետ իրականացնելու նպատակով:
2. Սույն կարգով չկարգավորված հարաբերությունները կարգավորվում են Երևան քաղաքի ավագանու 2013 թվականի սեպտեմբերի 10-ի N 46-Ն որոշմամբ:
3. Խորհրդի անդամ կարող է լինել չափահաս յուրաքանչյուր անձ՝ անկախ ազգությունից, ռասայից, սեռից, դավանանքից, քաղաքական կամ այլ հայացքներից:
4. Խորհրդի անդամներին իր որոշմամբ, 1 տարի ժամկետով, նշանակում է Երևանի քաղաքապետը՝ Երևանի քաղաքապետարանի աշխատակազմի, Երևանի ավագանու անդամների, ինչպես նաև հասարակական հիմունքներով սոցիալական պաշտպանության ոլորտում գործող միջազգային ու հասարակական կազմակերպությունների ներկայացուցիչների ու անհատ փորձագետների ներգրավմամբ: Փորձագետները պետք է ունենան սոցիալական պաշտպանության ոլորտում գործունեության առնվազն 3 տարվա աշխատանքային փորձ: Խորհրդի կազմում մեկ սոցիալական աշխատողի և իրավաբանի ներգրավումը պարտադիր է:
5. Հասարակական հիմունքներով միջազգային ու հասարակական կազմակերպությունների ներկայացուցիչների, փորձագետների ներգրավումն իրականացվում է իրենց դիմումի համաձայն՝ հրապարակային հայտարարության հիման վրա, որի արդյունքում Երևանի քաղաքապետը կամ նրա հանձնարարությամբ համապատասխան տեղակալն իր հայեցողությամբ ընտրում է Խորհրդի անդամներին՝ մինչև սույն կարգով սահմանված անդամների առավելագույն քանակը լրանալը:
6. Հրապարակային հայտարարությունը տեղադրվում է Երևանի քաղաքապետարանի պաշտոնական համացանցային կայքում Խորհրդի անդամների նշանակումից առնվազն 15 աշխատանքային օր առաջ:
7. Խորհուրդը կազմված է 17 անդամից, որից 4-ը Երևանի քաղաքապետարանի աշխատակազմի աշխատակիցներ, 5-ը՝ ավագանու անդամներ, 2-ը` միջազգային կազմակերպությունների ներկայացուցիչներ, 3-ը` հասարակական կազմակերպության ներկայացուցիչներ և 3-ը` անհատ փորձագետներ:
(7-րդ կետը փոփ. 26.12.23 N 38-Ն)
8. Խորհրդի նիստերի գումարումը պայմանավորված է սոցիալական ծրագրերի քանակով և դրանք գումարվում են ըստ անհրաժեշտության, բայց առնվազն ամիսը երկու անգամ: Խորհրդի նիստերը կարող են գումարվել նաև արտահերթ կամ հեռավար կարգով:
9. Խորհրդի նիստն իրավազոր է, եթե նիստին ներկա են նշանակված անդամների առնվազն կեսը:
10. Խորհուրդն ընդունում է եզրակացություններ, որոնք կրում են խորհրդատվական բնույթ, ինչպես նաև արձանագրություններ:
11. Խորհուրդը քննարկվող հարցերի շուրջ եզրակացությունն ընդունում է բաց քվեարկությամբ՝ ներկա մասնակիցների ձայների մեծամասնությամբ:
12. Խորհրդի նիստերը գումարվում են Արգիշտի փողոց 1 հասցեում գտնվող Երևանի քաղաքապետարանի վարչական շենքում: Նիստեր կարող են գումարվել քաղաքի որևէ վարչական շրջանի վարչական շենքում կամ Խորհրդի նախագահի որոշմամբ` այլ վայրում:
13. Խորհուրդը Երևանի քաղաքապետի որոշմամբ նախագահում է Երևանի քաղաքապետի համապատասխան տեղակալը, որը նշանակում է Խորհրդի նախագահի տեղակալին և քարտուղարին: Խորհրդի նախագահի տեղակալ նշանակվում է Երևանի քաղաքապետարանի աշխատակազմի սոցիալական ոլորտը համակարգող վարչության (այսուհետ` վարչություն) պետը, իսկ քարտուղար՝ Խորհրդի կազմում ներառված վարչության աշխատակիցներից մեկը:
14. Խորհրդի նախագահի տեղակալը փոխարինում է Խորհրդի նախագահին նրա բացակայության դեպքում: Խորհրդի նախագահի տեղակալի բացակայության դեպքում նրան փոխարինում է խորհրդի քարտուղարը:
15. Խորհրդի նախագահը՝
1) իրականացնում է Խորհրդի գործունեության ընդհանուր ղեկավարումը,
2) հաստատում է Խորհրդի նիստի օրակարգը,
3) հրավիրում է Խորհրդի նիստերը,
4) կազմակերպում է Խորհրդի գործունեությունը և ղեկավարում նիստի աշխատանքը,
5) ստորագրում է Խորհրդի նիստի արձանագրությունը և եզրակացությունը,
6) մասնագիտական աջակցության նպատակով մասնագետների ներգրավման համար դիմում է պետական, տեղական ինքնակառավարման կամ միջազգային մարմիններին:
16. Խորհրդի քարտուղարը`
1) կազմում է նիստի օրակարգը և ներկայացնում Խորհրդի նախագահի հաստատմանը,
2) իրականացնում է նիստերի օրակարգում ընդգրկված հարցերի նախապատրաստումը,
3) ապահովում է մասնակիցների ներկայությունը՝ Խորհրդի նիստի օրակարգը Խորհրդի անդամներին ներկայացնելով նիստից առնվազն երեք աշխատանքային օր առաջ տրամադրված էլեկտրոնային փոստերին համապատասխան նամակներն ուղարկելով,
4) պատասխանատվություն է կրում ներկայացվող նյութերի ամբողջականության համար,
5) վարում է Խորհրդի գործավարությունը, այդ թվում` նիստի արձանագրության կազմումը,
6) կիսամյակը մեկ անգամ Խորհրդի անդամներին է ներկայացնում Խորհրդի գործունեության վերաբերյալ վերլուծություններ, մշտադիտարկման արդյունքներ և այլ տեղեկատվություն:
17. Խորհրդի նիստի օրակարգում լրացուցիչ հարցեր կարող են ընդգրկվել նիստից առնվազն մեկ աշխատանքային օր առաջ Խորհրդի նախագահի, տեղակալի կամ քարտուղարի կողմից:
18. Խորհրդի անդամն իրավունք չունի օրակարգում լրացուցիչ հարցեր ընդգրկել:
19. Խորհրդի աշխատանքների վերաբերյալ տեղեկատվությունը յուրաքանչյուր կիսամյակ հրապարակվում է Երևանի պաշտոնական համացանցային կայքում՝ բացառելով սոցիալական աջակցություն ստացող անձանց անձնական տվյալների հրապարակումը: Խորհրդի ընդունած եզրակացություններն ու առաջարկությունները չեն հրապարակվում:
20. Խորհուրդը վարչությունից ստանում է սոցիալական ծրագիր (այսուհետ՝ ծրագիր)՝ անհրաժեշտ մասնագիտական, կազմակերպչական և ֆինանսական հիմնավորումներով ու փաստաթղթերով:
21. Խորհրդի նիստը, ներառյալ՝ հեռավար, գումարելու համար Խորհրդի առաջին նիստի ընթացքում Խորհրդի անդամների կողմից ընդունվում է արձանագրություն, որտեղ նշվում են Խորհրդի անդամների էլեկտրոնային փոստերի հասցեները, որոնք համարվում են պաշտոնական: Խորհրդի անդամների փոփոխության դեպքում՝ Խորհրդի յուրաքանչյուր նոր անդամ իր մասնակցությամբ առաջին նիստի ընթացքում տրամադրում է իր էլեկտրոնային փոստի հասցեն՝ նիստերի մասին ծանուցումների ապահովելու համար:
22. Հեռավար նիստի դեպքում Խորհուրդը քննարկվող հարցերի վերաբերյալ որոշումներ է կայացնում առցանց քվեարկությամբ` մասնակիցների ձայների մեծամասնությամբ: Խորհրդի անդամները հարցի վերաբերյալ իրենց որոշման մասին առցանց տեղեկացնում են Խորհրդի քարտուղարին` բանավոր կամ գրավոր:
23. Երևանի քաղաքապետարանի աշխատակազմն ըստ անհրաժեշտության աջակցում է Խորհրդի աշխատանքների կազմակերպման հարցում:
24. Խորհուրդը ծրագիրը քննարկելուց և համապատասխան որոշում կայացնելուց հետո երկօրյա ժամկետում վարչություն է ներկայացնում հիմնավորված բացասական կամ դրական եզրակացություն։
25. Բացասական եզրակացությունը կարող է լինել՝
1) ծրագրի մերժում, եթե այդ ծրագրի իրականացումը չի բխում կամավոր խնդիրների լուծմանն ուղղված սեփական լիազորություններից, հիմնված է կեղծ, չհիմնավորված փաստերի վրա կամ հակասում է սոցիալական աջակցության նպատակներին կամ հիմնական սկզբունքներին,
2) ծրագրի վերադարձ՝ եզրակացությունում նշված թերությունները վերացնելու նպատակով:
26. Ծրագրի դրական եզրակացությունը, այդ ծրագիրը և կից փաստաթղթերը տրամադրվում են վարչությանը՝ հետագա ընթացքն ապահովելու նպատակով:
27. Սույն կարգի 25-րդ կետի 2-րդ ենթակետում նշված եզրակացության մեջ առկա թերությունները վերացնելուց հետո լրամշակված ծրագիրը կարող է հաստատվել սույն կարգի 21-րդ կետով նախատեսված ընթացակարգով:
(հավելվածը փոփ. 26.12.23 N 38-Ն)
Պաշտոնական հրապարակման օրը՝ 2 հուլիսի 2020 թվական: