«Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն կատարելու մասին» օրենքի նախագծով (այսուհետ՝ նախագիծ) առաջարկվում է նոր խմբագրությամբ շարադրել Վարչական իրավախախտումների վերաբերյալ Հայաստանի Հանրապետության օրենսգրքի 1292-րդ հոդվածի խրախուսող նորմը՝ ազատելով իրավախախտումը վերացրած քաղաքացիներին խրախուսող նորմի կիրառման համար 24 ժամվա ընթացքում լիազորված մարմին (պաշտոնատար անձին) իրավախախտման հատկանիշները վերացրած լինելու ապացույցը ներկայացնելու պարտավորությունից։

Վերոնշյալ նախագծի վերաբերյալ Հայաստանի Հանրապետության կառավարությունը ներկայացնում է հետևյալ դիտարկումները.

1․ Նախագծով առաջարկվող կարգավորումը, ըստ էության, իրագործելի է, եթե ծրագրատեխնիկական համակարգը հնարավորություն տա, որպեսզի քաղաքացիների կողմից Վարչական իրավախախտումների վերաբերյալ ՀՀ օրենսգրքի 1292-րդ հոդվածի 2-րդ մասով վարչական պատասխանատվության ենթարկված անձի կողմից 24 ժամվա ընթացքում իրավախախտման հատկանիշները վերացվելու մասին տեղեկատվությունը, այսինքն՝ կնքված պայմանագիրը, սահմանված ժամկետում արտացոլվի էլեկտրոնային հարթակում։

Նախագծի ընդունման պարագայում անհրաժեշտություն է առաջանալու Պարեկային ծառայության կողմից օգտագործվող էլեկտրոնային ծրագիրը փոխկապակցելու aswa.am կայքին, որպեսզի ինքնաբերաբար գործի խրախուսող նորմը (կամ գործող պայմանագիր ունենալու հանգամանքն ինքնաբերաբար արտացոլվի)։ Այս համատեքստում ՀՀ ներքին գործերի նախարարության կողմից առաջիկայում նախատեսվում է ձեռնարկել միջոցներ՝ համապատասխան ծրագրատեխնիկական լուծումներ գտնելու համար։

2. Նախագծի հիմնավորումն ունի լրամշակման կարիք։ Հիմնավորման համաձայն՝ նախագծի ընդունման անհրաժեշտությունը պայմանավորված է այն հանգամանքով, որ անձը խախտումը վերացնելու և տուգանքի 25 տոկոսը վճարելու, բայց 24 ժամվա ընթացքում դրա ապացույցը չներկայացնելու դեպքում «ենթարկվում է հավելյալ վարչական պատասխանատվության»։ Վարչական իրավախախտումների վերաբերյալ ՀՀ օրենսգրքի 1292-րդ հոդվածի 2-րդ մասով վարչական տույժ է նախատեսված քաղաքացու՝ ՀՀ օրենքով նախատեսված պարտավորությունը չկատարելու համար։ Հետևաբար, խրախուսող նորմով պարտականություն է դրվել իրավասու մարմին ներկայացնելու գործող պայմանագիր։ Քաղաքացու կողմից հիմնական պարտականությունը չկատարելն է առաջացնում գործող պայմանագիր ներկայացնելու պարտականություն, որպեսզի կիրառվի խրախուսող նորմը։