ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

23 փետրվարի 2023 թվականի N 252-Ն

Ղեկավարվելով Հայաստանի Հանրապետության քաղաքացիական օրենսգրքի 65-րդ հոդվածի 2-րդ մասով, 685-րդ հոդվածով, «Հիմնադրամների մասին» օրենքի 31-րդ հոդվածի 2-րդ կետով և ի կատարումն Հայաստանի Հանրապետության կառավարության 2022 թվականի սեպտեմբերի 8-ի N 1406-Ն որոշման 10-րդ կետի 2-րդ ենթակետի հանձնարարականի՝ Հայաստանի Հանրապետության կառավարությունը որոշում է.

1. Հաստատել՝

1) «Վանաձորի պետական գյուղատնտեսական քոլեջ» հիմնադրամի և «Հայաստանի ազգային ագրարային համալսարան» հիմնադրամի միջև կնքված միացման պայմանագիրը՝ համաձայն N 1 հավելվածի.

2) «Վանաձորի պետական գյուղատնտեսական քոլեջ» հիմնադրամի գույքի, այլ գույքային իրավունքների, ինչպես նաև պարտատերերին և պարտապաններին վերաբերող բոլոր (ներառյալ վիճարկվող) պարտավորությունների «Հայաստանի ազգային ագրարային համալսարան» հիմնադրամին փոխանցման ակտը՝ համաձայն N 2 հավելվածի:

2. Սահմանել «Վանաձորի պետական գյուղատնտեսական քոլեջ» հիմնադրամի և «Հայաստանի ազգային ագրարային համալսարան» հիմնադրամի վերակազմավորման հետևյալ կարգն ու պայմանները՝

1) «Վանաձորի պետական գյուղատնտեսական քոլեջ» հիմնադրամի կողմից կազմված և սույն որոշման համաձայն և միացման հետևանքով ընդլայնված հիմնադրամի՝ «Հայաստանի ազգային ագրարային համալսարան» հիմնադրամի հոգաբարձուների խորհրդի որոշմամբ հաստատված փոխանցման ակտի համաձայն «Հայաստանի ազգային ագրարային համալսարան» հիմնադրամն ընդունում է, իսկ «Վանաձորի պետական գյուղատնտեսական քոլեջ» հիմնադրամը հանձնում է առկա հիմնական (ինչպես օգտագործման, այնպես էլ սեփականության իրավունքով պատկանող) և շրջանառու միջոցները, դրամական մնացորդները, ինչպես նաև դեբիտորական և կրեդիտորական պարտքերը, հաշվարկները: Հանձնման-ընդունման աշխատանքները կատարվում են միացման ձևով վերակազմակերպվող «Վանաձորի պետական գյուղատնտեսական քոլեջ» հիմնադրամի գործունեության դադարման փաստաթղթերը Հայաստանի Հանրապետության արդարադատության նախարարության իրավաբանական անձանց պետական ռեգիստր ներկայացնելու օրվանից և ավարտվում վերջինիս գործունեության դադարման պետական գրանցման աշխատանքների ավարտի օրը, իսկ դրա անհնարինության դեպքում՝ հաջորդ աշխատանքային օրը.

2) հանձնման-ընդունման աշխատանքներն իրականացվում են Հայաստանի Հանրապետության կրթության, գիտության, մշակույթի և սպորտի նախարարի 2022 թվականի սեպտեմբերի 13-ի N 957-Ա հրամանով ստեղծված հանձնաժողովի կողմից.

3) «Վանաձորի պետական գյուղատնտեսական քոլեջ» հիմնադրամը և «Հայաստանի ազգային ագրարային համալսարան» հիմնադրամը վերակազմավորված են համարվում՝ միացող հիմնադրամի գործունեության դադարման պետական գրանցման պահից:

3. Առաջարկել «Հայաստանի ազգային ագրարային համալսարան» հիմնադրամի տնօրենին (ռեկտորին) (Վ. Ուռուտյան)`

1) սույն որոշումը, այլ անհրաժեշտ փաստաթղթերի հետ միասին, ներկայացնել Հայաստանի Հանրապետության արդարադատության նախարարության իրավաբանական անձանց պետական ռեգիստրի գործակալություն` «Վանաձորի պետական գյուղատնտեսական քոլեջ» հիմնադրամի գործունեության դադարման պետական գրանցման համար.

2) սույն որոշման 2-րդ կետի 1-ին ենթակետի համաձայն կազմակերպել ընդունման-հանձնման աշխատանքները.

3) սույն որոշման 3-րդ կետի 1-ին ենթակետի աշխատանքների ավարտից հետո ապահովել աշխատակիցների ու սովորողների վերաձևակերպման, ինչպես նաև սույն որոշումից բխող այլ աշխատանքներ:

Հայաստանի Հանրապետության վարչապետ	Ն. Փաշինյան
Երևան

28.02.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված N 1 ՀՀ կառավարության 2023 թվականի փետրվարի 23-ի N 252-Ն որոշման

Հավելված N 2 ՀՀ կառավարության 2023 թվականի փետրվարի 23-ի N 252-Ն որոշման

Պաշտոնական հրապարակման օրը՝ 28 փետրվարի 2023 թվական: