ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՈՏԱՅՔԻ ՄԱՐԶԻ

ԱԲՈՎՅԱՆ ՀԱՄԱՅՆՔԻ ԱՎԱԳԱՆԻ

Ո Ր Ո Շ ՈՒ Մ

28 դեկտեմբերի 2022 թվականի N 189-Ն

Համաձայն «Տեղական ինքնակառավարման մասին» օրենքի 18-րդ հոդվածի 1-ին մասի 42-րդ կետի, «Առևտրի և ծառայությունների մասին» օրենքի 9-րդ հոդվածի 9-րդ մասի, Աբովյան համայնքի ավագանին որոշում է.

1. Հաստատել Աբովյան համայնքում տոնավաճառներ (վերնիսաժներ) կազմակերպելու կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Կողմ -14 ԱՎԵՏԻՍՅԱՆ ՍԵԴԱ ԱՐԶՈՒՄԱՆՅԱՆ ՌԱԶՄԻԿ ԲԱԲԱՅԱՆ ԷԴՈՒԱՐԴ ԲԱԴԱԼՅԱՆ ԱՏՈՄ ԳԱՍՊԱՐՅԱՆ ԱՄԱԼՅԱ ԶԱՐԳԱՐՅԱՆ ՆՈՐԱՅՐ ԶԱՐՈՅԱՆ ԴԱՎԻԹ ԹԵՆԵՔԵՋՅԱՆ ԱՆԻ ԽԱՉԱՏՐՅԱՆ ՀԱՍՄԻԿ ԿԱՐԱՊԵՏՅԱՆ ԷԴՎԻՆ ՀԱՐՈՒԹՅՈՒՆՅԱՆ ՎԱՀԵ ՄԵՂՐՅԱՆ ԱՐՄԱՆ ՊԵՏՐՈՍՅԱՆ ԱՍՊՈՒՐԱԿ ՔՈՍԱԿՅԱՆ ԱՐՄԵՆ

Դեմ -0

Ձեռնպահ -0

 

ՀԱՄԱՅՆՔԻ ՂԵԿԱՎԱՐ	Է. ԲԱԲԱՅԱՆ
2022 թ. դեկտեմբերի 28 ք. Աբովյան

Հավելված Աբովյան համայնքի ավագանու 2022 թվականի դեկտեմբերի 28-ի N 189-Ն որոշման

1. Աբովյան համայնքում տոնավաճառները (վերնիսաժները) կազմակերպում է Աբովյանի համայնքապետարանը (այսուհետ՝ կազմակերպիչ)՝ համայնքի ղեկավարի որոշմամբ՝ շաբաթ, կիրակի և օրենքով սահմանված տոնական օրերին:

2. Աբովյան համայնքում կազմակերպվում են սեզոնային, տոնական, մասնագիտացված, գյուղատնտեսական, ունիվերսալ և այլ տեսակի տոնավաճառներ:

3. Տոնավաճառ կազմակերպելու մասին որոշմամբ սահմանվում են.

1) տոնավաճառի տեսակը, գտնվելու հասցեն,

2) սկսելու և ավարտելու օրերը, աշխատանքային ժամերը,

3) տոնավաճառին մասնակցելու համար դիմելու ժամկետները,

4) տոնավաճառին մասնակցելու թույլտվության ձևը, հայտերի ներկայացման և թույլտվության ստացման կարգը,

5) տոնավաճառի կազմակերպման համար անհրաժեշտ միջոցառումներն ու դրանց իրականացման պատասխանատուները:

4. Տոնավաճառներ կազմակերպելու մասին Աբովյան համայնքի ղեկավարի որոշման վերաբերյալ հայտարարությունը տեղադրվում է Աբովյանի համայնքապետարանի պաշտոնական կայքում տոնավաճառ կազմակերպելու օրվանից առնվազն 15 օր առաջ, ինչպես նաև անհրաժեշտության դեպքում փակցվում է համայնքի տարբեր վայրերում:

5. Տոնավաճառներ կազմակերպելու մասին Աբովյան համայնքի ղեկավարի որոշման վերաբերյալ, դրա անցկացումից առնվազն մեկ շաբաթ առաջ, գրավոր տեղեկացվում են ՀՀ ոստիկանությունը, Պետական եկամուտների կոմիտեն, Հայաստանի Հանրապետության առողջապահական և աշխատանքի տեսչական մարմինը, ՀՀ արտակարգ իրավիճակների նախարարությունը, իսկ կախված տոնավաճառի բնույթից, նաև այլ պետական կառավարման մարմինները:

6. Կազմակերպչի կողմից տոնավաճառի մուտքի (մուտքերի) մոտ (բացօթյա տոնավաճառի դեպքում՝ այն մասերում, որտեղից որպես կանոն սպասվում է այցելուների առավելագույն հոսք) փակցվում է ցուցանակ՝ տոնավաճառի անվանման և անցկացման օրերի, ժամերի, կազմակերպչի հեռախոսահամարների վերաբերյալ:

7. Կազմակերպիչը ապահովում է տարածքում աղբամանների առկայությունը, իսկ օրվա ավարտին՝ աղբահանության կազմակերպումը, ինչպես նաև ժամանակավոր զուգարանների տեղադրումն ու աշխատանքը, եթե հարակից տարածքում հանրային զուգարաններ չկան:

8. Կազմակերպիչն ապահովում է իր ներկայացուցչի մասնակցությունը տոնավաճառի գործունեության ամբողջ ընթացքում: Կազմակերպչի ներկայացուցիչը՝

1) ըստ կազմակերպչի կողմից տրված թույլտվությունների կամ ներկայացված հայտերի հիման վրա կազմված ցուցակների գրանցում է տոնավաճառի մասնակիցներին,

2) կատարում է մեքենաների, վաճառակետերի բաշխումը մասնակիցների միջև,

3) հետևում է տարածքի մաքրման աշխատանքներին,

4) կատարում է օրենքով, սույն կարգով և տոնավաճառներ կազմակերպելու մասին Աբովյան համայնքի ղեկավարի որոշմամբ նախատեսված այլ գործողություններ,

5) համագործակցում է տարածքի անվտանգությունը և հասարակական կարգը պահպանող մարմինների հետ:

9. Աբովյան համայնքում կազմակերպված տոնավաճառին մասնակցելու համար անհրաժեշտ է առնվազն 3 օր առաջ դիմում ներկայացնել Աբովյանի համայնքապետարան:

10. Դիմումին կից ներկայացվում են տվյալներ վաճառվող ապրանքի մասին, ինչպես նաև՝

1) ֆիզիկական անձանց համար՝ անձնագրի պատճենը,

2) անհատ ձեռնարկատերերի և կազմակերպություններ համար՝ պետական գրանցման վկայականի պատճենը:

11. Համայնքի ավագանու կողմից սահմանված չափով տեղական վճարը վճարելու դեպքում դիմումատուին տրամադրվում է տոնավաճառին մասնակցելու թույլտվություն:

12. Տեղական վճարը չվճարելու կամ անհրաժեշտ փաստաթղթերը չներկայացնելու կամ թերի ներկայացնելու դեպքում, ինչպես նաև, եթե դիմումին կից նշված ապրանքի մասին տվյալները չեն համապատասխանում նախատեսված տոնավաճառի տեսակի հետ, թույլտվություն չի տրամադրվում:

13. Թույլտվություն ստացած անձինք տոնավաճառին մասնակցելու համար ներկայանում են տոնավաճառը սկսելուց առնվազն 2 ժամ առաջ, գրանցվում և ստանում իրենց վաճառատեղերը:

14. Գրանցվելու ժամանակ մասնակիցը պետք է իր մոտ ունենա համայնքապետարանի տրված թույլտվությունը, անձնագրի (պետական գրանցման վկայականի) պատճենները, իսկ կազմակերպությունների ապրանքը վաճառողները նաև՝ լիազորագիր:

15. Հայաստանի Հանրապետության օրենսդրության և/կամ սույն կարգի խախտման դեպքում մասնակցին կարող է արգելվել մասնակցել տոնավաճառին:

16. Տոնավաճառի մասնակիցը մասնակցության իրավունքը չի կարող փոխանցել այլ անձի:

17. Տոնավաճառի մասնակիցը՝ վաճառքի վայրում՝ չի կարող փոփոխություն կատարել (փոխել սեղանների դասավորվածությունը և այլն) առանց կազմակերպչի թույլտվության:

18. Մասնակիցը պարտավոր է տոնավաճառը ավարտվելուց հետո մաքրել իրեն հատկացված վաճառատեղը, աղբը և մնացած ապրանքը հանել, տարածքը բերել նախկին տեսքի:

19. Վաճառողը առևտուրն իրականացնում է Հայաստանի Հանրապետության օրենսդրության և սույն կարգի հիման վրա:

Պաշտոնական հրապարակման օրը՝ 9 հունվարի 2023 թվական: