ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

Ո Ր Ո Շ ՈՒ Մ

6 օգոստոսի 2019 թվականի

թիվ 131

քաղ. Մոսկվա

«Եվրասիական տնտեսական միության շրջանակներում տեղեկատվական հաղորդակցական տեխնոլոգիաների և տեղեկատվական փոխգործակցության մասին» արձանագրության («Եվրասիական տնտեսական միության մասին» 2014 թվականի մայիսի 29-ի պայմանագրի թիվ 3 հավելված) 30-րդ կետին համապատասխան և ղեկավարվելով Եվրասիական տնտեսական հանձնաժողովի կոլեգիայի 2016 թվականի դեկտեմբերի 19-ի թիվ 169 որոշմամբ՝ Եվրասիական տնտեսական հանձնաժողովի կոլեգիան որոշեց.

1. Հաստատել կից ներկայացվող՝ Անասնաբուժասանիտարական միջոցների կիրառման տեղեկատվական ապահովման ոլորտում ընդհանուր գործընթացների իրագործման կանոնները:

2. Սույն որոշումն ուժի մեջ է մտնում դրա պաշտոնական հրապարակման օրվանից 30 օրացուցային օրը լրանալուց հետո։

Եվրասիական տնտեսական հանձնաժողովի կոլեգիայի նախագահ`

Տ. Սարգսյան

1. Սույն կանոններով սահմանվում են անասնաբուժասանիտարական միջոցների կիրառման տեղեկատվական ապահովման ոլորտում Եվրասիական տնտեսական միության շրջանակներում ընդհանուր գործընթացների (այսուհետ համապատասխանաբար՝ Միություն, ընդհանուր գործընթացներ) իրագործմանը ներկայացվող պահանջները՝ անասնաբուժական հսկողության (վերահսկողության) ենթակա՝ նշանակման վայրի պետություն տեղափոխվող ապրանքները (այսուհետ՝ հսկողության վերցված ապրանքներ) ուղեկցող անասնաբուժական սերտիֆիկատների և հսկողության վերցված ապրանքների ներմուծման (արտահանման, տարանցման) թույլտվությունների (այսուհետ՝ թույլտվություններ) մասին տեղեկությունների փոխանակմանը վերաբերող մասով, ընդհանուր գործընթացների նպատակներն ու խնդիրները, Միության անդամ պետությունների՝ անասնաբուժության բնագավառում պետական մարմինների միջև (այսուհետ համապատասխանաբար՝ անդամ պետություններ, լիազորված մարմիններ), ինչպես նաև լիազորված մարմինների և Եվրասիական տնտեսական հանձնաժողովի միջև (այսուհետ՝ Հանձնաժողով) փոխգործակցության շրջանակներում իրականացվող գործառույթները, դրանց միջև տեղեկությունների փոխանակման կարգը և ընդհանուր գործընթացների իրագործման ժամանակ փոխանցվող տեղեկությունների կազմը։

2. Սույն կանոնների նպատակներով օգտագործվում են հասկացություններ, որոնք ունեն հետևյալ իմաստը՝

տվյալների բազա՝ անդամ պետությունների օրենսդրությանը համապատասխան՝ անասնաբուժության բնագավառում լիազորված պաշտոնատար անձանց կողմից տրված թույլտվությունների մասին տեղեկություններ պարունակող տեղեկատվական ռեսուրս.

նշանակման վայրի պետություն՝ անդամ պետություն, որի տարածքում գտնվում է հսկողության վերցված ապրանքների նշանակման վայրը.

ուղարկման վայրի պետություն՝ անդամ պետություն, որի տարածքում գտնվում է հսկողության վերցված ապրանքների ուղարկման վայրը.

միջանկյալ տրանսպորտային փոխադրման պետություն՝ այն անդամ պետությունը, որի տարածքով հսկողության ենթակա ապրանքները փոխադրվում են առանց դատարկելու։

Սույն կանոններում օգտագործվող մյուս հասկացությունները կիրառվում են «Եվրասիական տնտեսական միության մասին» 2014 թվականի մայիսի 29-ի պայմանագրով և Մաքսային միության հանձնաժողովի 2010 թվականի հունիսի 18-ի «Մաքսային միությունում անասնաբուժասանիտարական միջոցներ կիրառելու մասին» թիվ 317 որոշմամբ սահմանված իմաստներով։

(2-րդ կեը լրաց. ԵՏՀԿ 20.10.20 թիվ 126)

3. Ընդհանուր գործընթացների իրագործման նպատակներն են՝

ա) կենդանիների վարակիչ հիվանդությունների, այդ թվում՝ մարդու և կենդանիների համար ընդհանուր հիվանդությունների հարուցիչների և միասնական անասնաբուժական (անասնաբուժասանիտարական) պահանջներին չհամապատասխանող՝ կենդանական ծագում ունեցող ապրանքների (արտադրանքի)՝ Միության մաքսային տարածք ներմուծումն ու տարածումը թույլ չտալուն ուղղված միջոցներ կիրառելու միջոցով անասնաբուժական հսկողության (վերահսկողության) իրականացման արդյունավետության բարձրացում.

բ) անասնաբուժասանիտարական միջոցների կիրառման թափանցիկության և հսկողության վերցված ապրանքների հետագծելիության ապահովում՝ անդամ պետությունների տարածքներում դրանց արտադրման, փոխադրման և իրացման ժամանակ:

4. Ընդհանուր գործընթացների իրագործման նպատակների իրականացումն ապահովվում է հետևյալի հաշվին՝

ա) էլեկտրոնային տեսքով անասնաբուժական սերտիֆիկատների տրման ապահովումը (անդամ պետություններում էլեկտրոնային անասնաբուժական սերտիֆիկացման համակարգերի պատրաստ լինելուն զուգընթաց).

բ) նշանակման վայրի պետություն տեղափոխվող հսկողության վերցված ապրանքներն ուղեկցող՝ տրված (այդ թվում՝ փոխարինման համար) անասնաբուժական սերտիֆիկատների մասին տեղեկություննների (այսուհետ՝ անասնաբուժական սերտիֆիկատների մասին տեղեկություններ)՝ լիազորված մարմինների միջև փոխանակման իրականացումը.

գ) հսկողության վերցված ապրանքների փոխադրումը կասեցվելու դեպքերի, այդպիսի դեպքերի առաջացման պատճառների և ձեռնարկված միջոցների մասին լիազորված մարմիններին ծանուցելը.

դ) լիազորված մարմինների միջև թույլտվությունների մասին տեղեկությունների փոխանակում իրականացնելու միջոցով տվյալների բազայի ստեղծումը, ձևավորումը և վարումը։

5. Ընդհանուր գործընթացների մասնակիցներն են լիազորված մարմինները և Հանձնաժողովը։

6. Ընդհանուր գործընթացների իրագործման շրջանակներում լիազորված մարմիններն իրականացնում են հետևյալ գործառույթները ՝

ա) նշանակման վայրի պետության և միջանկյալ տրանսպորտային փոխադրման պետությունների լիազորված մարմիններին տրամադրված անասնաբուժական սերտիֆիկատների մասին տեղեկություններ ներկայացնելը.

բ) նշանակման վայրի պետության լիազորված մարմնի, միջանկյալ տրանսպորտային փոխադրման պետության լիազորված մարմնի հարցման հիման վրա անասնաբուժական սերտիֆիկատների մասին տեղեկություններ ներկայացնելը.

գ) ուղարկման վայրի պետության, նշանակման վայրի պետության և միջանկյալ տրանսպորտային փոխադրման պետությունների լիազորված մարմիններ անասնաբուժական զննության և անասնաբուժական սերտիֆիկատների առգրավման մասին տեղեկություններ ներկայացնելը.

դ) ուղարկման վայրի պետության լիազորված մարմիններ և միջանկյալ տրանսպորտային փոխադրման պետությունների լիազորված մարմիններ անասնաբուժական սերտիֆիկատների մարման դեպքում դրանց կարգավիճակի մասին տեղեկություններ տրամադրելը.

ե) ուղարկման վայրի պետության, նշանակման վայրի պետության և միջանկյալ տրանսպորտային փոխադրման պետությունների լիազորված մարմիններին հսկողության վերցված ապրանքների փոխադրումը կասեցվելու դեպքերի մասին ծանուցելը.

զ) Հանձնաժողովի հարցման հիման վրա անասնաբուժական սերտիֆիկատների և թույլտվությունների մասին ընդհանրացված տեղեկություններ ներկայացնելը.

է) անդամ պետության տվյալների բազայի ազգային մասը ձևավորելը և վարելը.

ը) տրված թույլտվությունների մասին այլ անդամ պետությունների լիազորված մարմիններին ծանուցելը.

թ) այլ անդամ պետության լիազորված մարմնի հարցման հիման վրա տվյալների բազայի ազգային մասից թույլտվությունների մասին տեղեկություններ ներկայացնելը։

(6-րդ կեը խմբ. ԵՏՀԿ 20.10.20 թիվ 126)

7. Հանձնաժողովն իրականացնում է ընդհանուր գործընթացների իրագործման մշտադիտարկում և արդյունավետության գնահատում՝ անասնաբուժական սերտիֆիկատների մասին, այդ թվում՝ անասնաբուժական հսկողության (վերահսկողության) իրականացման ժամանակ հայտնաբերված խախտումների մասին ընդհանրացված տեղեկությունների, ինչպես նաև հարցման հիման վրա լիազորված մարմիններից ստացված՝ թույլտվությունների մասին ընդհանրացված տեղեկությունների հիման վրա։

8. Ընդհանուր գործընթացների իրագործման ժամանակ տեղեկատվական փոխգործակցությունն իրականացվում է ըստ գործառական սխեմաների՝ թիվ 1 հավելվածի համաձայն։

9. Ընդհանուր գործընթացների իրագործման շրջանակներում ապահովվում է տվյալների այն բազայի ձևավորումը և վարումը, որը կազմված է ազգային մասերից, որոնց ձևավորումը և վարումն ապահովում են լիազորված մարմինները։

10. Անասնաբուժական սերտիֆիկատների մասին և հսկողության վերցված ապրանքների փոխադրումը կասեցվելու դեպքերի մասին տեղեկությունները պահպանվում են անդամ պետությունների ազգային տեղեկատվական ռեսուրսներում։

11. Թույլտվությունների և անասնաբուժական սերտիֆիկատների մասին տեղեկությունները Միության տեղեկատվական պորտալում ենթակա չեն հրապարակման։

12. Ընդհանուր գործընթացների մասնակիցների տեղեկատվական փոխգործակցությունն իրականացվում է ավտոմատացված ռեժիմով՝ Միության ինտեգրված տեղեկատվական համակարգի միջոցների օգտագործմամբ։

13. Միության ինտեգրված տեղեկատվական համակարգի միջոցների օգտագործմամբ՝ լիազորված մարմինների, ինչպես նաև լիազորված մարմինների և Հանձնաժողովի տեղեկատվական փոխգործակցությունն իրականացվում է այդ փոխգործակցությունը կանոնակարգող, այդ թվում՝ էլեկտրոնային փաստաթղթերի (տեղեկությունների) ձևաչափն ու կառուցվածքը սահմանող տեխնոլոգիական փաստաթղթերի պահանջներին համապատասխան։

14. Ընդհանուր գործընթացների իրագործման ժամանակ լիազորված մարմինների միջև, ինչպես նաև լիազորված մարմինների և Հանձնաժողովի միջև փոխանցվող տեղեկությունների կազմը ներկայացված է թիվ 2 հավելվածի համաձայն:

15. Հանձնաժողովը մշակում և հաստատում է տեխնոլոգիական փաստաթղթերը, որոնցով կանոնակարգվում է տեղեկատվական փոխգործակցությունը՝ Միության ինտեգրված տեղեկատվական համակարգի միջոցներով ընդհանուր գործընթացներն իրագործելիս։

16. Լիազորված մարմիններն ապահովում են համապատասխան տեղեկատվական համակարգերի մշակումը (լրամշակումը)՝ ընդհանուր գործընթացները Միության ինտեգրված տեղեկատվական համակարգի միջոցներով իրագործելիս տեղեկատվական փոխգործակցությունը կանոնակարգող տեխնոլոգիական փաստաթղթերի պահանջների կատարումն ապահովելու համար, և դրանց միացումն անդամ պետությունների՝ Միության ինտեգրված տեղեկատվական համակարգի ազգային հատվածներին:

17. Ընդհանուր գործընթացները գործողության մեջ դնելու ընթացակարգի կատարման համակարգումը, ընդհանուր գործընթացների իրագործման մշտադիտարկումն ու արդյունքների վերլուծությունն իրականացվում է Հանձնաժողովի կողմից:

(հավելվածը խմբ. ԵՏՀԿ 20.10.20 թիվ 126)

Պաշտոնական հրապարակման օրը՝ 22 հունիսի 2022 թվական: