ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԽՈՐՀՈՒՐԴ

Ո Ր Ո Շ ՈՒ Մ

29 մարտի 2019 թվականի

թիվ 23

քաղ. Մոսկվա

Եվրասիական տնտեսական միության մաքսային օրենսգրքի 253-րդ հոդվածի 3-րդ կետին, 254-րդ հոդվածին և Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 98 որոշմամբ հաստատված` Եվրասիական տնտեսական հանձնաժողովի աշխատանքի կանոնակարգի թիվ 1 հավելվածի 6-րդ և 62-րդ կետերին համապատասխան՝ Եվրասիական տնտեսական հանձնաժողովի խորհուրդը որոշեց.

1. Սահմանել, որ հատուկ մաքսային ընթացակարգը կիրառվում է Եվրասիական տնտեսական միության մաքսային տարածք ներմուծվող (ներմուծված) և բացառապես WorldSkills («Ուորլդսքիլլս») մասնագիտական վարպետության պաշտոնական միջազգային մրցումային միջոցառումներ կազմակերպելու համար նախատեսված օտարերկրյա ապրանքների նկատմամբ:

2. Հաստատել Եվրասիական տնտեսական միության մաքսային տարածք ներմուծվող (ներմուծված) և բացառապես WorldSkills («Ուորլդսքիլլս») մասնագիտական վարպետության պաշտոնական միջազգային մրցումային միջոցառումներ կազմակերպելու համար նախատեսված օտարերկրյա ապրանքները հատուկ մաքսային ընթացակարգով ձևակերպելու կցվող պայմանները և այդպիսի ապրանքների նկատմամբ այդ ընթացակարգը կիրառելու կարգը:

3. Սույն որոշումն ուժի մեջ է մտնում դրա պաշտոնական հրապարակման օրվանից 10 օրացուցային օրը լրանալուց հետո:

ՀԱՍՏԱՏՎԱԾ ԵՆ Եվրասիական տնտեսական հանձնաժողովի խորհրդի 2019 թվականի մարտի 29-ի թիվ 23 որոշմամբ

1. Սույն փաստաթղթով սահմանվում են Եվրասիական տնտեսական միության (այսուհետ՝ Միություն) մաքսային տարածք ներմուծվող (ներմուծված) և բացառապես WorldSkills («Ուորլդսքիլլս») մասնագիտական վարպետության պաշտոնական միջազգային մրցումային միջոցառումներ կազմակերպելու համար (ներառյալ հենց մրցումային միջոցառումները և զուգընթաց միջոցառումները՝ կապված կազմակերպիչների կողմից կազմակերպված կամ հավանության արժանացված մրցումային միջոցառումների կազմակերպման, անցկացման, զանգվածային լրատվամիջոցներում լուսաբանման, բացման, փակման և արդյունքների ամփոփման հետ) նախատեսված օտարերկրյա ապրանքները հատուկ մաքսային ընթացակարգով ձևակերպելու պայմանները և այդպիսի ապրանքների նկատմամբ հատուկ մաքսային ընթացակարգ կիրառելու կարգը (այսուհետ համապատասխանաբար՝ ապրանքներ, միջոցառումներ):

2. Հատուկ մաքսային ընթացակարգ չի կիրառվում՝

ա) ակցիզներով (ակցիզային հարկով կամ ակցիզային տուրքով) հարկվող ապրանքների նկատմամբ՝ Միության այն անդամ պետության (այսուհետ՝ անդամ պետություն) օրենսդրությանը համապատասխան, որի տարածքում անցկացվում են միջոցառումները.

բ) Միության մաքսային տարածք ներմուծման համար արգելված ապրանքների նկատմամբ.

գ) այն ապրանքների նկատմամբ, որոնց մասով սահմանված է Միության մաքսային տարածք ներմուծելու և (կամ) Միության մաքսային տարածքից արտահանելու թույլատրման կարգ՝ Եվրասիական տնտեսական հանձնաժողովի կոլեգիայի 2015 թվականի ապրիլի 21-ի թիվ 30 որոշման 2-րդ հավելվածով նախատեսված ցանկին համապատասխան՝ բացառությամբ ապրանքների նշված ցանկի հետևյալ բաժիններում ընդգրկված ապրանքների՝

2.16 (ռադիոէլեկտրոնային միջոցներ և (կամ) քաղաքացիական նշանակության բարձր հաճախականության սարքավորումներ, այդ թվում՝ ներկառուցված կամ այլ ապրանքների կազմի մեջ մտնող).

2.19 (ծածկագրման (գաղտնագրման) միջոցներ)։

3. Հատուկ մաքսային ընթացակարգով ձևակերպված ապրանքները պահպանում են օտարերկրյա ապրանքների կարգավիճակը:

4. Ապրանքները հատուկ մաքսային ընթացակարգով ձևակերպելու պայմաններն են՝

ա) այն անդամ պետության, որի տարածքում անցկացվում են միջոցառումները, օրենսդրությանը համապատասխան լիազորված մարմնի (կազմակերպության)՝ ապրանքների նպատակային նշանակության գրավոր հաստատումն այդ անդամ պետության այն մաքսային մարմին ներկայացնելը, որի իրավասությանն են վերապահված միջոցառումների կազմակերպման և անցկացման հարցերը՝ նշելով այն միջոցառումների անվանումները և անցկացման վայրը, որոնց կազմակերպման և անցկացման համար դրանք նախատեսվել են, ապրանքների անվանումները և քանակը, տեղեկություններ ապրանքները տեղափոխող անձի մասին, տեղեկություններ ապրանքների հայտարարատուի մասին, ինչպես նաև ապրանքների մաքսային հայտարարագրման ժամանակ դրանք նույնականացնելու համար անհրաժեշտ տեղեկություններ.

բ) արգելքների և սահմանափակումների պահպանումը՝ Եվրասիական տնտեսական միության մաքսային օրենսգրքի (այսուհետ՝ Օրենսգիրք) 7-րդ հոդվածին համապատասխան՝ բացառությամբ ոչ սակագնային կարգավորման միջոցների և տեխնիկական կարգավորման միջոցների:

5. Չի թույլատրվում ապրանքների հայտագրումը բացթողման համար՝ մինչև հատուկ մաքսային ընթացակարգին համապատասխան ապրանքները հայտարարագրման ներկայացնելը:

6. Հատուկ մաքսային ընթացակարգին համապատասխան ապրանքներն օգտագործելու պայմաններն են՝

ա) հատուկ մաքսային ընթացակարգի՝ սույն փաստաթղթի 7-րդ կետին համապատասխան սահմանված գործողության ժամկետի պահպանումը.

բ) հատուկ մաքսային ընթացակարգով ձևակերպված ապրանքների տիրապետման և օգտագործման հետ կապված՝ սույն փաստաթղթի 8-րդ կետով սահմանված սահմանափակումների պահպանումը:

7. Ապրանքները հատուկ մաքսային ընթացակարգով ձևակերպելիս այն անդամ պետության մաքսային մարմինը, որի տարածքում անցկացվում են միջոցառումները, հիմք ընդունելով Միության մաքսային տարածք ապրանքները ներմուծելու նպատակներից և հանգամանքներից բխող հայտարարատուի կողմից հայտագրված ժամկետը, սահմանում է այդ մաքսային ընթացակարգի գործողության ժամկետը, որը չի կարող գերազանցել միջոցառումներն ավարտվելու օրվանից 6 ամիսը՝ հաշվի առնելով սույն կետի երկրորդ պարբերությունը:

Այն անդամ պետության օրենսդրությամբ, որի տարածքում անցկացվում են միջոցառումները, դրանում սահմանված դեպքերի համար կարող է սահմանվել հատուկ մաքսային ընթացակարգի գործողության ժամկետ, որը չի կարող գերազանցել այն միջոցառումներն ավարտվելու օրվանից 12 ամիսը, որոնց կազմակերպման և անցկացման համար նախատեսված են ապրանքները:

Մաքսային մարմնի կողմից սահմանված հատուկ մաքսային ընթացակարգի գործողության ժամկետը հայտարարատուի հիմնավորված դիմումի հիման վրա կարող է երկարաձգվել՝ սույն կետի առաջին պարբերությունում նշված ժամկետի սահմաններում կամ սույն կետի երկրորդ պարբերությանը համապատասխան՝ այն անդամ պետության օրենսդրությամբ սահմանված ժամկետի սահմաններում, որի տարածքում անցկացվում են միջոցառումները:

8. Հատուկ մաքսային ընթացակարգով ձևակերպված ապրանքները պետք է գտնվեն հայտարարատուի փաստացի տիրապետման և օգտագործման ներքո, բացառությամբ այն դեպքերի, երբ թույլատրվում է դրանց օգտագործումը (հանձնումը)՝ սույն կետի երկրորդ պարբերությանը համապատասխան, կամ դրանց փոխանցումն այլ անձանց տիրապետմանը և օգտագործմանը՝ սույն կետի երրորդ պարբերությանը համապատասխան:

Ապրանքների նկատմամբ լիազորություններ ունեցող անձինք կամ նրանց ներկայացուցիչներն իրավունք ունեն այն անդամ պետությունում, որի տարածքում անցկացվում են միջոցառումները, հատուկ մաքսային ընթացակարգով ձևակերպված ապրանքների հետ կատարելու ընթացիկ գործառնություններ՝ կապված այդպիսի ապրանքների պահպանության, դրանց պահպանվածությունն ապահովելու, միջոցառումների կազմակերպման և անցկացման համար դրանք նախապատրաստելու հետ, ինչպես նաև օգտագործելու այդպիսի ապրանքները միջոցառումների կազմակերպման և անցկացման համար, այդ թվում՝ այդպիսի օգտագործման ընթացքում ամբողջությամբ կամ մասնակիորեն գործածելու (սպառել) կամ հանձնելու միջոցառման մասնակիցներին՝ որպես պարգևատրման ատրիբուտներ:

Թույլատրվում է ապրանքների հայտարարատուի կողմից՝ հատուկ մաքսային ընթացակարգով ձևակերպված ապրանքների փոխանցումն այլ անձանց տիրապետմանը և օգտագործմանը՝ այդ ապրանքների տեխնիկական սպասարկման, պահպանման, փոխադրման (տրանսպորտային փոխադրման) նպատակներով, ինչպես նաև թաղման, վնասազերծման, օգտահանման կամ այլ եղանակով ոչնչացման համար՝ այն անդամ պետության օրենսդրությանը համապատասխան, որի տարածքում անցկացվում են միջոցառումները, եթե այդ ապրանքները կորցրել են իրենց սպառողական հատկությունները և ճանաչվել են ոչ պիտանի այն նպատակներով հետագա օգտագործման համար, որոնց համար դրանք նախատեսված էին:

Չի թույլատրվում հատուկ մաքսային ընթացակարգով ձևակերպված ապրանքների օգտագործումը որևէ առևտրային գործունեության համար՝ ներառյալ այդ ապրանքների իրացումը կամ այլ եղանակով օտարումը, դրանց վարձակալության տրամադրումը և այդ ապրանքների օգտագործմամբ վճարովի ծառայությունների մատուցումը, ինչպես նաև այդ ապրանքների արտահանումն այլ անդամ պետությունների տարածք։

Հատուկ մաքսային ընթացակարգով ձևակերպված ապրանքների փոխանցումն այլ անձանց տիրապետմանը և օգտագործմանը, ինչպես նաև այդ ապրանքների կորուստն այդ ապրանքների հայտարարատուին չի ազատում հատուկ մաքսային ընթացակարգին համապատասխան ապրանքների օգտագործման՝ սույն կետով սահմանված մյուս պայմանները պահպանելուց, սույն փաստաթղթի 9-րդ կետին համապատասխան հատուկ մաքսային ընթացակարգի գործողությունն ավարտելուց, ինչպես նաև չի կասեցնում և չի երկարաձգում այդ մաքսային ընթացակարգի գործողության ժամկետը:

9. Մինչև մաքսային մարմնի կողմից սույն փաստաթղթի 7-րդ կետին համապատասխան սահմանված՝ հատուկ մաքսային ընթացակարգի գործողության ժամկետը լրանալն այդ մաքսային ընթացակարգի գործողությունն ավարտվում է՝

ա) հատուկ մաքսային ընթացակարգով ձևակերպված ապրանքները Օրենսգրքով նախատեսված կարգով և պայմաններով, օտարերկրյա ապրանքների նկատմամբ կիրառվող մաքսային ընթացակարգով ձևակերպելու դեպքում՝ հաշվի առնելով սույն փաստաթղթի 11-րդ կետը: Ընդ որում, այդ ապրանքները մաքսային ընթացակարգով կարող են ձևակերպվել մեկ կամ մի քանի խմբաքանակով.

բ) հատուկ մաքսային ընթացակարգով ձևակերպված ապրանքները Միության մաքսային տարածքից արտահանելու դեպքում, եթե Միության մաքսային տարածքից այդ ապրանքների մեկնման վայրը գտնվում է այն անդամ պետությունում, որի տարածքում անցկացվում են միջոցառումները.

գ) վթարի կամ անհաղթահարելի ուժի ազդեցության հետևանքով հատուկ մաքսային ընթացակարգով ձևակերպված ապրանքների ոչնչացման և (կամ) անվերադարձ կորստի փաստը կամ փոխադրման (տրանսպորտային փոխադրման) և (կամ) պահպանման բնականոն պայմաններում բնական կորստի արդյունքում այդ ապրանքների անվերադարձ կորստի փաստը մաքսային մարմինների կողմից այն անդամ պետության օրենսդրությանը համապատասխան ճանաչվելու դեպքում, որի տարածքում անցկացվում են միջոցառումները.

դ) միջոցառումների կազմակերպման և անցկացման ժամանակ հատուկ մաքսային ընթացակարգով ձևակերպված ապրանքների օգտագործման ընթացքում դրանք գործածելու (սպառելու) փաստը կամ սույն փաստաթղթի 8-րդ կետի երկրորդ պարբերությանը համապատասխան՝ միջոցառման մասնակիցներին որպես պարգևատրման ատրիբուտներ դրանք հանձնելու փաստը մաքսային մարմինների կողմից այն անդամ պետության օրենսդրությանը համապատասխան ճանաչվելու դեպքում, որի տարածքում անցկացվում են միջոցառումները .

ե) հատուկ մաքսային ընթացակարգով ձևակերպված՝ իրենց սպառողական հատկությունները կորցրած և այն նպատակներով հետագա օգտագործման համար ոչ պիտանի ճանաչված ապրանքները, որոնց համար դրանք նախատեսված էին, թաղելու, վնասազերծելու, օգտահանելու կամ այն անդամ պետության օրենսդրությանը համապատասխան այլ եղանակով ոչնչացնելու փաստը, որի տարածքում անցկացվում են միջոցառումները, մաքսային մարմինների կողմից այդ անդամ պետության օրենսդրությանը համապատասխան ճանաչվելու դեպքում:

10. Հատուկ մաքսային ընթացակարգի գործողության՝ մաքսային մարմնի կողմից սույն փաստաթղթի 7-րդ կետին համապատասխան սահմանված ժամկետը լրանալուն պես այդ մաքսային ընթացակարգի գործողությունը դադարեցվում է:

11. Հատուկ մաքսային ընթացակարգի գործողությունը՝ «ներքին սպառման համար բացթողում» մաքսային ընթացակարգով ձևակերպելով ավարտվելու դեպքում՝

ա) այդ ապրանքների ներմուծման մաքսատուրքերի, հարկերի, հատուկ, հակագնագցման, փոխհատուցման տուրքերի դրույքաչափերը, մաքսային արժեքը և (կամ) բնաիրային արտահայտությամբ դրանց ֆիզիկական բնութագիրը (քանակ, զանգված, ծավալ կամ այլ բնութագրեր) սահմանվում են մաքսային մարմնի կողմից՝ «ներքին սպառման համար բացթողում» մաքսային ընթացակարգով ձևակերպելու համար ներկայացված մաքսային հայտարարագրի գրանցման օրվա դրությամբ.

բ) այդ ապրանքների նկատմամբ կիրառվում են «ներքին սպառման համար բացթողում» մաքսային ընթացակարգով ձևակերպելու համար ներկայացված ապրանքների հայտարարագրի գրանցման օրվա դրությամբ գործող արգելքները և սահմանափակումները՝ հաշվի առնելով այդ ապրանքների փաստացի վիճակն ապրանքների հայտարարագրի գրանցման օրվա դրությամբ:

12. Սույն փաստաթղթի 9-րդ կետի «բ»-«ե» ենթակետերին համապատասխան՝ հատուկ մաքսային ընթացակարգի գործողությունն ավարտվելու հետ կապված մաքսային գործառնությունների կատարման կարգը, ինչպես նաև սույն փաստաթղթի 9-րդ կետի «բ»-«ե» ենթակետերին համապատասխան՝ հատուկ մաքսային ընթացակարգն ավարտելու համար հիմքերի առկայությունը հաստատող փաստաթղթերի ցանկը սահմանվում են այն անդամ պետության օրենսդրությանը համապատասխան, որի տարածքում անցկացվում են միջոցառումները:

13. Միջոցառումների մասնակիցներին որպես պարգևատրման ատրիբուտներ հանձնված՝ հատուկ մաքսային ընթացակարգով ձևակերպված ապրանքները ձեռք են բերում Միության ապրանքների կարգավիճակ և համարվում են մաքսային հսկողության ներքո չգտնվող ապրանքներ՝ հանձնման փաստն այն անդամ պետության մաքսային մարմնի կողմից ճանաչվելու օրվանից, որի տարածքում անցկացվում են միջոցառումները:

14. Հատուկ մաքսային ընթացակարգով ձևակերպված ապրանքները, որոնք կորցրել են իրենց սպառողական հատկությունները և ճանաչվել են ոչ պիտանի այն նպատակներով հետագա օգտագործման համար, որոնց համար դրանք նախատեսված էին, համարվում են մաքսային հսկողության ներքո չգտնվող ապրանքներ՝ թաղման, վնասազերծման, օգտահանման կամ այն անդամ պետության օրենսդրությանը համապատասխան այլ եղանակով ոչնչացման փաստը, որի տարածքում անցկացվում են միջոցառումները, մաքսային մարմնի կողմից այդ անդամ պետության օրենսդրությանը համապատասխան ճանաչվելու օրվանից:

15. Հատուկ մաքսային ընթացակարգով ձևակերպվող (ձևակերպված) ապրանքների համար ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու հայտարարատուի պարտավորությունն առաջանում է մաքսային մարմնի կողմից այն ապրանքների հայտարարագիրը գրանցելու պահից, որին համապատասխան ապրանքները ձևակերպվում են հատուկ մաքսային ընթացակարգով:

16. Հատուկ մաքսային ընթացակարգով ձևակերպվող (ձևակերպված) ապրանքների համար ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու հայտարարատուի պարտավորությունը դադարում է հետևյալ հանգամանքներից մեկի ի հայտ գալու դեպքում՝

ա) ապրանքների բացթողումը մերժելը՝ հատուկ մաքսային ընթացակարգին համապատասխան՝ ապրանքների հայտարարագրի գրանցման ժամանակ առաջացած՝ ներմուծման մաքսատուրքեր, հարկեր, հատուկ, հակագնագցման, փոխհատուցման տուրքեր վճարելու պարտավորության առնչությամբ.

բ) Օրենսգրքի 113-րդ հոդվածի 1-ին կետին համապատասխան՝ ապրանքների հայտարարագիրը հետ կանչելը և (կամ) Օրենսգրքի 118-րդ հոդվածի 4-րդ կետին համապատասխան՝ ապրանքների բացթողումը չեղարկելը՝ ապրանքների հայտարարագրի գրանցման ժամանակ առաջացած՝ ներմուծման մաքսատուրքեր, հարկեր, հատուկ, հակագնագցման, փոխհատուցման տուրքեր վճարելու պարտավորության առնչությամբ.

գ) սույն փաստաթղթի 9-րդ կետին համապատասխան՝ հատուկ մաքսային ընթացակարգի գործողությունն ավարտվելը՝ մինչև մաքսային մարմնի կողմից սույն փաստաթղթի 7-րդ կետին համապատասխան սահմանված հատուկ մաքսային ընթացակարգի գործողության ժամկետը լրանալը, այդ թվում՝ սույն փաստաթղթի 17-րդ կետի «ա»-«գ» ենթակետերում նշված հանգամանքներն ի հայտ գալուց հետո.

դ) այն ապրանքները ժամանակավոր պահպանության հանձնելը, որոնց նկատմամբ հատուկ մաքսային ընթացակարգի գործողությունը դադարել է՝ Օրենսգրքի 129-րդ հոդվածի 6-րդ կետին համապատասխան.

ե) այն ապրանքները մաքսային ընթացակարգերով ձևակերպելը, որոնց նկատմամբ հատուկ մաքսային ընթացակարգի գործողությունը դադարել է՝ Օրենսգրքի 129-րդ հոդվածի 7-րդ կետին համապատասխան.

զ) ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու պարտավորությունը կատարելը և (կամ) դրանք գանձելը՝ սույն փաստաթղթի 18-րդ կետին համապատասխան հաշվարկված և վճարման ենթակա չափերով.

է) վթարի կամ անհաղթահարելի ուժի ազդեցության հետևանքով հատուկ մաքսային ընթացակարգով ձևակերպված ապրանքների ոչնչացման և (կամ) անվերադարձ կորստի փաստը կամ փոխադրման (տրանսպորտային փոխադրման) և (կամ) պահպանման բնականոն պայմաններում բնական կորստի հետևանքով այդ ապրանքների անվերադարձ կորստի փաստը մաքսային մարմնի կողմից ճանաչելը՝ այն անդամ պետության օրենսդրությանը համապատասխան, որի տարածքում անցկացվում են միջոցառումները, բացառությամբ այն դեպքերի, երբ նախքան այդպիսի ոչնչացումը կամ անվերադարձ կորուստը վրա է հասել այդ ապրանքների համար ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու ժամկետը.

թ) հատուկ մաքսային ընթացակարգով ձևակերպված ապրանքները բռնագրավելը կամ այն անդամ պետության սեփականություն (եկամուտ) դարձնելը, որի տարածքում անցկացվում են միջոցառումները՝ այդ անդամ պետության օրենսդրությանը համապատասխան.

ժ) սույն Օրենսգրքի 51-րդ գլխին համապատասխան հատուկ մաքսային ընթացակարգով ձևակերպված ապրանքները մաքսային մարմնի կողմից արգելանքի վերցնելը:

17. Հետևյալ հանգամանքներն ի հայտ գալու դեպքում ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու ժամկետ է համարվում՝

ա) հատուկ մաքսային ընթացակարգով ձևակերպված ապրանքների՝ մինչև հատուկ մաքսային ընթացակարգի գործողության ավարտը ոչ սույն փաստաթղթի 1-ին կետում նշված նպատակներով օգտագործման դեպքում՝ այդպիսի օգտագործման առաջին օրը, իսկ եթե այդ օրը որոշված չէ՝ այդ ապրանքները հատուկ մաքսային ընթացակարգով ձևակերպելու օրը.

բ) հատուկ մաքսային ընթացակարգով ձևակերպված ապրանքների՝ մինչև այդ մաքսային ընթացակարգի գործողության ավարտը սույն փաստաթղթի 8-րդ կետի պահանջների խախտմամբ այլ անձի (անձանց) փոխանցման և (կամ) դրանց օգտագործման դեպքում այդ ապրանքները փոխանցելու և (կամ) օգտագործելու օրը, իսկ եթե այդ օրը որոշված չէ՝ այդ ապրանքները հատուկ մաքսային ընթացակարգով ձևակերպելու օրը.

գ) հատուկ մաքսային ընթացակարգով ձևակերպված ապրանքների՝ մինչև այդ մաքսային ընթացակարգի գործողության ավարտը կորստի դեպքում՝ բացառությամբ վթարի կամ անհաղթահարելի ուժի ազդեցության հետևանքով դրանց ոչնչացման և (կամ) անվերադարձ կորստի կամ փոխադրման (տրանսպորտային փոխադրման) և (կամ) պահպանման բնականոն պայմաններում բնական կորստի հետևանքով անվերադարձ կորստի՝ հատուկ մաքսային ընթացակարգով ձևակերպված ապրանքների կորստի օրը, իսկ եթե այդ օրը որոշված չէ՝ ապրանքները հատուկ մաքսային ընթացակարգով ձևակերպելու օրը.

դ) սույն փաստաթղթի 9-րդ կետին համապատասխան հատուկ մաքսային ընթացակարգի գործողությունը չավարտվելու դեպքում՝ մաքսային մարմնի կողմից սույն փաստաթղթի 7-րդ կետին համապատասխան սահմանված՝ հատուկ մաքսային ընթացակարգի գործողության ժամկետը լրանալու օրը:

18. Սույն փաստաթղթի 17-րդ կետում նշված հանգամանքներն ի հայտ գալու դեպքում ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը ենթակա են վճարման այնպես, ինչպես դա կարվեր, եթե հատուկ մաքսային ընթացակարգով ձևակերպված ապրանքները ձևակերպվեին «ներքին սպառման համար բացթողում» մաքսային ընթացակարգով՝ առանց ներմուծման մաքսատուրքերի, հարկերի վճարման մասով սակագնային առանձնաշնորհումների և արտոնությունների կիրառման:

Ներմուծման մաքսատուրքերը, հարկերը, հատուկ, հակագնագցման, փոխհատուցման տուրքերը հաշվարկելու համար կիրառվում են ապրանքները հատուկ մաքսային ընթացակարգով ձևակերպելու համար ներկայացված ապրանքների հայտարարագիրը մաքսային մարմնի կողմից գրանցման օրվա դրությամբ գործող ներմուծման մաքսատուրքերի, հարկերի, հատուկ, հակագնագցման, փոխհատուցման տուրքերի դրույքաչափերը:

Այն դեպքում, երբ մաքսային մարմինն իր տրամադրության տակ չունի ապրանքների մաքսային արժեքը որոշելու համար անհրաժեշտ ճշգրիտ տեղեկություններ, ապրանքների մաքսային արժեքը որոշվում է մաքսային մարմնի մոտ առկա տեղեկությունների հիման վրա:

Հետագայում ապրանքների մաքսային արժեքը որոշելու համար անհրաժեշտ ճշգրիտ տեղեկություններ սահմանելիս ապրանքների մաքսային արժեքը որոշվում է՝ ելնելով այդ ճշգրիտ տեղեկություններից, և կատարվում է ներմուծման մաքսատուրքերի, հարկերի, հատուկ, հակագնագցման, փոխհատուցման տուրքերի՝ ավելի վճարված և (կամ) ավելի բռնագանձված գումարների վերադարձ (հաշվանցում) կամ Օրենսգրքի 10-րդ և 11-րդ գլուխներին և 76-րդ և 77-րդ հոդվածներին համապատասխան չվճարված գումարների բռնագանձում:

19. Հատուկ մաքսային ընթացակարգի՝ սույն փաստաթղթի 10-րդ հոդվածին համապատասխան գործողությունն ավարտելու կամ Օրենսգրքի 129-րդ հոդվածի 6-րդ կետին համապատասխան՝ հատուկ մաքսային ընթացակարգով ձևակերպված ապրանքները ժամանակավոր պահպանման հանձնելու, կամ Օրենսգրքի 129-րդ հոդվածի 7-րդ կետին համապատասխան՝ այդ ապրանքներն օտարերկրյա ապրանքների նկատմամբ կիրառելի մաքսային ընթացակարգերով ձևակերպելու, կամ Օրենսգրքի 51-րդ գլխին համապատասխան մաքսային մարմինների կողմից այդ ապրանքներն արգելանքի վերցվելու (արգելապահվելու) դեպքում մաքսատուրքերը, հարկերը, հատուկ, հակագնագցման, փոխհատուցման տուրքերը վճարելու պարտավորությունը կատարելուց և (կամ) դրանք բռնագանձելուց հետո (ամբողջությամբ կամ մասնակի) սույն փատաթղթին համապատասխան վճարված և (կամ) բռնագանձված մաքսատուրքերի, հարկերի, հատուկ, հակագնագցման, փոխհատուցման տուրքերի գումարները ենթակա են վերադարձման (հաշվանցման)՝ Օրենսգրքի 10-րդ գլխին և 76-րդ հոդվածին համապատասխան:

20. Հատուկ մաքսային ընթացակարգը կիրառելու հետ կապված մյուս հարցերը՝ ներառյալ հատուկ մաքսային ընթացակարգի գործողությունը կասեցնելու կամ վերսկսելու հետ կապված հարցերը, կարգավորվում են Օրենսգրքի 19-րդ գլխին համապատասխան:

21. Ապրանքների նկատմամբ պետական սանիտարահամաճարակային վերահսկողությունը (հսկողությունը), անասնաբուժական և կարանտինային ֆիտոսանիտարական հսկողությունը (վերահսկողությունը) իրականացվում է Միության մաքսային տարածքում և Միության մաքսային սահմանին՝ Միության իրավունքի մաս կազմող ակտերին, ինչպես նաև այն անդամ պետության օրենսդրությանը համապատասխան, որի տարածքում անցկացվում են միջոցառումները:

Պաշտոնական հրապարակման օրը՝ 22 հունիսի 2022 թվական: